E nafea te mau parau a Iesu e faatupu ai i te oaoa
E nafea te mau parau a Iesu e faatupu ai i te oaoa
“Haere atura [Iesu] i nia i te mouˈa . . . e ua haere maira ta ˈna mau pǐpǐ i pihai iho ia ˈna. Ua . . . haapii atura ia ratou.”—MAT. 5:1, 2.
1, 2. (a) I roto i teihea mau tupuraa i horoa ˈi Iesu i ta ˈna Aˈoraa i nia i te mouˈa? (b) Mea nafea to Iesu haamataraa i ta ˈna oreroraa parau?
TEI te matahiti 31 T.T. tatou. E vaiiho Iesu maa taime poto i ta ˈna pororaa na Galilea no te faatupu i te oroa Pasa i Ierusalema. (Ioa. 5:1) Ia hoˈi oia i Galilea, e pure oia i te Atua e ao noa ˈtu no te aratai ia ˈna i roto i te maitiraa 12 aposetolo. I te mahana i muri iho, e putuputu te hoê nahoa taata a faaora ˈi Iesu i te feia maˈi. E parahi oia i raro i nia i te hoê mouˈa e e haamata oia i te haapii i ta ˈna mau pǐpǐ e te tahi atu i reira.—Mat. 4:23–5:2; Luka 6:12-19.
2 E haamata Iesu i ta ˈna oreroraa parau—te Aˈoraa i nia i te mouˈa—ma te faaite e no ǒ mai te oaoa i te mau taairaa maitatai e te Atua. (A taio i te Mataio 5:1-12. a) Te oaoa, o ‘te hoê ïa huru o te au-maitai-raa mai te mauruuru e tae atu i te oaoa iti rahi.’ Te haamahitihiti ra na oaoa e iva ta Iesu i faahiti i te mau tumu e oaoa ˈi te mau Kerisetiano, e e mea faufaa â teie mau parau i teie mahana mai i e 2 000 matahiti aˈenei. E hiˈopoa hoê hoê anaˈe ïa i teie nei i te reira.
“Tei ite i to ratou veve i te pae varua”
3. Eaha te auraa e ite i to tatou veve i te pae varua?
3 “E ao to tei [ite i to ratou veve i te pae varua], no ratou hoi te basileia ra o te [raˈi].” (Mat. 5:3; MN) Te taa ra i “tei ite i to ratou veve i te pae varua” e e hinaaro mau ratou i te aratairaa a te Atua e to ˈna aroha.
4, 5. (a) No te aha tei ite i to ratou veve i te pae varua e oaoa ˈi? (b) E nafea ia haamâha i to tatou mau hinaaro pae varua?
4 Te oaoa ra te feia i ite i to ratou veve i te pae varua, “no ratou hoi te basileia ra o te raˈi.” Ma te farii ia Iesu ei Mesia, ua matara te ravea no ta ˈna mau pǐpǐ matamua ia faatere e o ˈna i roto i te Basileia i te raˈi a te Atua. (Luka 22:28-30) Te tiaturi ra anei tatou iho e riro ei taata tufaa e te Mesia i nia i te raˈi aore ra te tiai ru ra i te ora mure ore i roto i te hoê paradaiso fenua i raro aˈe i te faatereraa a te Basileia, e nehenehe tatou e oaoa mai te peu e te ite ra iho â tatou i to tatou veve i te pae varua e te hinaaro mau ra tatou i te Atua.
5 E ere o te taatoaraa tei ite i to ratou veve i te pae varua, mea rahi hoi o te ere ra i te faaroo e o te haafaufaa ore ra i te mau ohipa moˈa. (Tes. 2, 3:1, 2; Heb. 12:16) E nehenehe tatou e haamâha i to tatou mau hinaaro pae varua na roto i te haapii-maite-raa i te Bibilia, te faariroraa i te taata ei pǐpǐ ma te itoito rahi, e te haere-tamau-raa i te mau putuputuraa Kerisetiano.—Mat. 28:19, 20; Heb. 10:23-25.
E oaoa tei oto
6. O vai ma “tei oto,” e no te aha ratou e oaoa ˈi?
6 “E ao to tei oto; e [tamahanahanahia] hoi ratou.” (Mat. 5:4; MN) “Tei oto” ra, o “tei ite [atoa ïa] i to ratou veve i te pae varua.” Aita ratou e oto ra i roto i te auraa e te autâ ra ratou no te mauruuru ore. Te peapea ra râ ratou no to ratou tiaraa taata hara e te mau huru tupuraa e vai nei no te huru tia ore o te taata. No te aha taua mau taata oto ra e oaoa ˈi? No te mea te faatupu ra ratou i te faaroo i te Atua e i te Mesia e te tamahanahanahia ra ratou e to ratou mau taairaa maitatai e o Iehova.—Ioa. 3:36.
7. Eaha to tatou manaˈo i te ao a Satani e tia ˈi?
7 Te oto ra anei tatou taitahi no te parau-tia ore tei parare i roto i te ao a Satani? Eaha mau â to tatou manaˈo i ta teie nei ao e pûpû ra? Ua papai te aposetolo Ioane: “O te mau mea atoa o teie nei ao, o te hinaaro tia ore o te tino nei, e te hinaaro tia ore o te mata nei, e te ahaaha o te oraraa nei, e ere ïa i to ǒ mai i te Metua ra.” (Ioa. 1, 2:16) E nafea râ tatou ia ite tatou e te ino riirii ra to tatou ea pae varua i ‘te varua o teie nei ao,’ te puai turai e faatere ra i te totaiete taata tei atea ê i te Atua? E pure anaˈe ïa ma te uˈana, e haapii anaˈe i te Parau a te Atua, e e ani anaˈe i te tauturu a te mau matahiapo. A haafatata ˈtu â ˈi tatou ia Iehova, e ite tatou i te “haamahanahana” noa ˈtu eaha te tumu o to tatou ahoaho.—Kor. 1, 2:12; Sal. 119:52; Iak. 5:14, 15.
Te oaoa ra iho â “tei mǎrû”!
8, 9. Eaha te auraa o te mǎrû, e no te aha tei mǎrû e oaoa ˈi?
8 “E ao to tei mǎrû; e riro hoi ia ratou te fenua.” (Mat. 5:5) E ere te “mǎrû” i te hoê paruparu aore ra i te hoê huru haavarevare. (Tim. 1, 6:11) Mai te peu e mea mǎrû tatou, e faaite tatou i te reira ma te rave i te hinaaro o Iehova e ma te farii i ta ˈna aratairaa. E ite-atoa-hia te mǎrû i roto i ta tatou mau haaraa i nia i to tatou mau hoa Kerisetiano e ia vetahi ê. Te tuati ra taua mǎrû ra e te aˈoraa a te aposetolo Paulo.—A taio i te Roma 12:17-19.
9 No te aha tei mǎrû e oaoa ˈi? “E riro hoi ia ratou te fenua,” ta Iesu ïa te hoê taata mǎrû i parau. O ˈna te fatu na mua roa i te fenua. (Sal. 2:8; Mat. 11:29; Heb. 2:8, 9) E riro atoa râ te fenua i ‘te feia tufaa mǎrû e te Mesia.’ (Roma 8:16, 17) I nia i te fenua o te faaterehia e te Basileia o Iesu, mea rahi atu â te taata mǎrû o te fanaˈo i te ora mure ore.—Sal. 37:10, 11.
10. Eaha te faahopearaa o te ereraa i te mǎrû i nia i ta tatou mau fanaˈoraa taa ê o te taviniraa e to tatou taairaa e vetahi ê?
10 Mai ia Iesu, e mea maitai ia mǎrû tatou. E nafea râ mai te peu e ua matauhia tatou ei taata mârôrô? No taua huru iria e te au ore ra, e ape te taata ia tatou. Mai te peu e e taeae tatou o te hinaaro ra e amo i te mau hopoia i roto i te amuiraa, eita ïa ta tatou e nehenehe no taua huru ra. (Tim. 1, 3:1, 3) Ua parau Paulo ia Tito e e haamanaˈo noa i te mau Kerisetiano i Kereta “eiaha ei mârôrô, ia mǎrû râ, e te mamahu i te taata atoa ra.” (Tito 3:1, 2) E haamaitairaa mau â taua mamahu, aore ra mǎrû, ra no vetahi ê!
Te hiaai ra ratou i “te parau-tia”
11-13. (a) Eaha te auraa e hiaai i te parau-tia? (b) E nafea te feia o te hiaai ra i te parau-tia e ‘faaîhia ˈi’?
11 “E ao to tei hiaai i te [parau-tia]; e faaîhia hoi ratou.” (Mat. 5:6; MN) Te “parau-tia” ta Iesu e manaˈo ra, o te huru maitai ïa e rave i te mea tia ia au i te hinaaro o te Atua e ta ˈna mau faaueraa. Ua parau te papai salamo e ua ‘unuhi oia i te hinaaroraa’ i te mau faaauraa parau-tia a te Atua. (Sal. 119:20) Te haafaufaa roa ra anei tatou i te parau-tia a hiaai ai tatou i te reira?
12 Ua parau Iesu e e oaoa taua feia e hiaai ra i te parau-tia no te mea e “faaîhia,” aore ra haamâha-roa-hia, ratou. Ua tupu te reira i muri aˈe i te Penetekose 33 T.T., i reira hoi to te varua moˈa o Iehova haamataraa i te ‘faaite i to te ao i te parau-tia.’ (Ioa. 16:8) Maoti te varua moˈa, ua faaurua te Atua i te tahi mau tane ia papai i te mau Papai Heleni Kerisetiano, mea faufaa hoi no te ‘aˈo i roto i te parau-tia.’ (Tim. 2, 3:16) E tauturu atoa te varua o te Atua ia tatou ia “ahu i te huru taata apî o tei poietehia ia au i te hinaaro o te Atua i roto i te parau-tia.” (Eph. 4:24, MN) E ere anei i te mea tamahanahana ia ite e e nehenehe te feia o te ani ra ma te tatarahapa ia faaorehia ta ratou mau hara maoti te tusia taraehara o Iesu, e fanaˈo i te tiaraa parau-tia i te aro o te Atua?—A taio i te Roma 3:23, 24.
13 Mai te peu e e tiaturiraa no te fenua to tatou, e mâha roa to tatou hiaai i te parau-tia ia fanaˈo tatou i te ora mure ore i roto i te mau tupuraa parau-tia i te fenua nei. A tiai noa ˈi râ, e faaoti papu anaˈe e pee maite i te mau ture aveia a Iehova. Ua parau Iesu e: “E mata na . . . outou i te imi i te basileia o te Atua, e te parau-tia na ˈna.” (Mat. 6:33) Ia na reira tatou, e î ïa to tatou rima i te mau ohipa paieti e to tatou aau i te oaoa mau.—Kor. 1, 15:58.
Te tumu e oaoa ˈi “tei aroha ia vetahi ê”
14, 15. E nafea tatou e faaite ai i te aroha, e no te aha “tei aroha ia vetahi ê” e oaoa ˈi?
14 “E ao to tei aroha ia vetahi ê ra; e aroha-atoa-hia mai ratou.” (Mat. 5:7) Te turaihia ra “tei aroha ia vetahi ê” e te aumihi e te aumauiui no ratou. Ua tamǎrû semeio oia i te mauiui o te taata e rave rahi no to ˈna aroha ia ratou. (Mat. 14:14) E faaitehia te aroha ia faaore te taata i tei hara ia ratou, mai ia Iehova e faaore ra ma te aroha i te hara a te feia tatarahapa mau. (Exo. 34:6, 7; Sal. 103:10) E nehenehe tatou e faaite i te aroha mai tera e na roto i ta tatou mau parau e ohipa hamani maitai o te tamǎrû i te feia riirii. Te hoê ravea maitai roa no te faaite i te aroha, o te faaiteraa ïa i te pue parau mau bibilia ia vetahi ê. No to ˈna aroha i te mau taata, ua “haapii atura [Iesu] ia ratou i te parau e rave rahi.”—Mar. 6:34.
15 Ua tano tatou i te farii i ta Iesu i parau: “E ao to tei aroha ia vetahi ê ra; e aroha-atoa-hia mai ratou.” Mai te peu e e haa tatou ma te aroha i nia ia vetahi ê, e na reira atoa mai ratou. Ia haava te Atua ia tatou, e maiti paha ïa oia eiaha e faautua ia tatou no te mea ua faaite tatou i te aroha i nia ia vetahi ê. (Iak. 2:13) Te faaoreraa hara e te ora mure ore, no tei aroha ia vetahi ê noa ïa.—Mat. 6:15.
Te tumu e oaoa ˈi “tei mâ te aau”
16. Eaha te auraa ia “mâ te aau,” e e nafea te feia ma taua huru maitai ra e ‘ite ai i te Atua’?
16 “E ao to tei mâ te aau; e ite hoi ratou i te Atua.” (Mat. 5:8) Mai te peu e e ‘aau mâ’ to tatou, e itehia ïa te viivii ore i roto i to tatou mau taairaa, hinaaro, e manaˈo turai. E faaite tatou i ‘te here no roto i te aau viivii ore.’ (Tim. 1, 1:5) I te mea e mea mâ tatou i roto mai, e “ite” ïa tatou “i te Atua.” Aita e parauhia ra e ite mata roa ia Iehova, ‘e ore roa hoi te hoê taata e ora ia hiˈo oia i te Atua.’ (Exo. 33:20) O Iesu râ, o tei pee ma te tia roa i te huru o te Atua, ua tia ïa ia parau e: “O tei hiˈo mai ia ˈu ra, ua hiˈo ïa i te Metua.” (Ioa. 14:7-9) Ei taata haamori ia Iehova i nia i te fenua, e nehenehe tatou e ‘ite i te Atua’ ma te hiˈo i ta ˈna e rave ra no tatou. (Ioba 42:5) No te mau Kerisetiano faatavaihia, e ite mata roa ˈtu ratou i to ratou Metua i te raˈi, ia faatiahia mai ratou no te ora i nia i te raˈi.—Ioa. 1, 3:2.
17. Eaha te faahopearaa o te hoê aau mâ i nia ia tatou?
17 No te mea e mea viivii ore te hoê taata aau mâ i te pae morare e i te pae varua, eita ïa oia e manaˈonaˈo i te mau mea viivii i te aro o Iehova. (Par. 1, 28:9; Isa. 52:11) Mai te peu e e aau mâ to tatou, e parau e e ohipa viivii ore ïa ta tatou, e aita e mea haavarevare i roto i ta tatou taviniraa ia Iehova.
E riro ‘tei faatupu i te hau’ ei tamarii na te Atua
18, 19. Eaha te haerea o ‘tei faatupu i te hau’?
18 “E ao to tei faatupu i te parau hau ra; e parauhia ratou i te tamarii na te Atua.” (Mat. 5:9) E itehia o vai ‘tei faatupu i te hau’ na roto i ta ratou e rave e ta ratou e ore e rave. Mai te peu e o tatou atoa tera mau huru taata ta Iesu e manaˈo ra, e taata faatupu i te hau ïa tatou e o te ‘ore e tahoo i te ino i te ino.’ E ‘titau râ tatou i te maitai eiaha e faaea no te taata.’—Tes. 1, 5:15.
19 Ia taiohia tatou i rotopu i tei faatupu i te hau, e titauhia ia paturu roa tatou i te hau. Eita te feia faatupu i te hau e rave i te tahi mea o te “faataa ê i te taua.” (Mas. 16:28) Mai tei faatupu i te hau, e rave tatou i te mau taahiraa avae maitatai no te “tapi i te hau i te taata atoa.”—Heb. 12:14.
20. O vai ma te ‘tamarii a te Atua’ i teie nei, e o vai atu â te riro i te pae hopea ei tamarii na ˈna?
20 Te oaoa ra tei faatupu i te hau no te mea “e parauhia ratou i te tamarii na te Atua.” Ua fariihia te mau Kerisetiano faatavaihia haapao maitai e Iehova ei ‘tamarii na ˈna.’ E taairaa piri roa ê na to ratou e o Iehova ei tamarii na ˈna no te mea te faatupu ra ratou i te faaroo i te Mesia e te haamori ra ma te aau atoa i “te Atua no ˈna te aroha e te hau.” (Kor. 2, 13:11; Ioa. 1:12) E ta Iesu mau “mamoe ê atu” faatupu i te hau ïa? O Iesu to ratou “Metua no te ui a muri atu” i te roaraa o ta ˈna Faatereraa tausani matahiti, ia hope râ te reira e tuu oia ia ˈna iho i raro aˈe ia Iehova a riro atu ai ratou ei tamarii na te Atua i roto i te hoê auraa taatoa.—Ioa. 10:16; Isa. 9:6; Roma 8:21; Kor. 1, 15:27, 28.
21. Eaha ta tatou e rave mai te peu e ‘te ora nei tatou i te varua’?
21 Mai te peu e ‘te ora nei tatou i te varua,’ o te faatupu i te hau ïa hoê o to tatou mau huru maitatai ta vetahi ê e ite ohie. Eita tatou e ‘faaooo te tahi i te tahi’ aore ra “e faatihaehae te tahi i te tahi.” (Gal. 5:22-26; Nouvelle Bible Segond) Eita, e faaitoito tatou i te ‘parahi hau noa i roto i te taata atoa.’—Roma 12:18.
Mea oaoa noa ˈtu e mea hamani-ino-hia!
22-24. (a) Eaha te mau tumu e oaoa ˈi te feia e hamani-ino-hia ra no te parau-tia? (b) Eaha ta tatou e hiˈopoa i roto i to muri iho na tumu parau haapiiraa e piti?
22 “E ao to tei hamani-ino-hia [no] te parau-tia ra; no ratou hoi te basileia ra o te [raˈi].” (Mat. 5:10; MN) E ua na ô â Iesu e: “E ao to outou ia faaino mai, e ia hamani ino mai, e ia pari haavare noa mai te taata ia outou i te mau ino atoa nei, no ˈu. A oaoa, e ia ouˈauˈa noa i te oaoa; e utua [maitai] rahi hoi ta outou i te [raˈi] ra: i na reira hoi ratou i te hamani ino i te mau peropheta ra, o mua ïa ia outou.”—Mat. 5:11, 12; MN.
23 Mai te mau peropheta a te Atua i tahito ra, ua ite te mau Kerisetiano e e faainohia, e hamani-ino-hia, e e pari-haavare-hia ratou “no te parau-tia.” Ia faaoromai râ tatou ma te haapao maitai i taua mau tamataraa ra, e ite tatou i te mauruuru no te faaoaoaraa e te faahanahanaraa ia Iehova. (Pet. 1, 2:19-21) Eita e tia i to tatou mauiui ia faaiti mai i to tatou mauruuru no te taviniraa ia Iehova i teie nei aore ra a muri aˈe. Eita atoa te reira e tia ia faaiti mai i te oaoa e faatere e te Mesia i roto i te Basileia i te raˈi aore ra te oaoa e ora e a muri noa ˈtu i nia i te fenua ei hoê o te mau melo huiraatira o te fenua nei o tera faatereraa. Te haapapu ra tera mau haamaitairaa i te farii maitai o te Atua, to ˈna hamani maitai, e to ˈna aau horoa.
24 Mea rahi atu â te haapiiraa i roto i te Aˈoraa i nia i te mouˈa. E rave rau haapiiraa te hiˈopoahia i roto i to muri iho na tumu parau haapiiraa e piti. E hiˈo mai tatou e nafea ia faaohipa i taua mau parau a Iesu Mesia ra.
[Nota i raro i te api]
a Te faaohipa ra te Traduction du monde nouveau e te tahi atu mau huriraa, mai te Bible de Jérusalem e te Nouvelle Bible Segond i te taˈo tano aˈe “oaoa,” eiaha râ te taˈo “ao.” No reira, i roto i teie tumu parau e to muri iho, e hiˈopoa tatou i te taˈo “oaoa,” hoê â hoi auraa e to te taˈo “ao.”
Eaha ta oe e pahono?
• No te aha “tei ite i to ratou veve i te pae varua” e oaoa ˈi?
• Eaha te mau tumu e oaoa ˈi “tei mǎrû”?
• No te aha te mau Kerisetiano e oaoa ˈi noa ˈtu e te hamani-ino-hia ra ratou?
• Teihea oaoa faahitihia e Iesu ta oe i au roa?
[Uiraa haapiiraa]
[Hohoˈa i te api 13]
Mea faufaa na oaoa e iva ta Iesu i haamahitihiti i teie mahana mai i tera ra tau
[Hohoˈa i te api 15]
Te hoê ravea maitai roa no te faaite i te aroha, o te faaiteraa ïa i te pue parau mau bibilia ia vetahi ê