E haafaufaa anaˈe ia Iesu—te Davida Rahi e te Solomona Rahi
E haafaufaa anaˈe ia Iesu—te Davida Rahi e te Solomona Rahi
“Inaha, e rahi teie ia Solomona.”—MAT. 12:42.
1, 2. Eaha hoi te taata e maere ai i to Samuela faaueraahia e faatavai ia Davida ei arii?
AITA oia e hohoˈa ra i te hoê arii. No te peropheta Samuela, e au ra e e hohoˈa aˈe oia i te hoê taurearea tiai mamoe. Hau atu â, e ere to ˈna oire tumu o Betelehema i te hoê oire faahiahia. Te parauhia ra e “e iti â” taua oire ra “ia amui atoa i roto i te mau tausani atoa i Iuda ra.” (Mika 5:2) Teie râ, e faatavaihia teie taurearea haihai ia hiˈohia no te hoê oire iti e te peropheta Samuela ei arii o Iseraela a muri aˈe.
2 E ere o Davida taurearea te tamaiti matamua ta to ˈna metua tane o Iese i faaite ia Samuela no te faatavai atu; e ere atoa te piti aore ra te toru. Aita atoa Davida, te hopea o na tamaroa e vau a Iese, i reira i to Samuela haereraa ˈtu i te utuafare o Iese no te faatavai hoê o na tamaiti a taua tane haapao maitai ra no te riro ei arii o te fenua. O Davida râ ta Iehova i maiti, e tera te mea faufaa aˈe.—Sam. 1, 16:1-10.
3. (a) Eaha te mea faufaa aˈe no Iehova ia hiˈopoa oia i te hoê taata? (b) I to Davida faatavairaahia, eaha tei tae mai i nia ia ˈna?
3 Ua ite Iehova i te mea ta Samuela e ore e nehenehe e ite. Ua tia i te Atua ia haroaroa i te huru aau o Davida, e ua mauruuru oia i te reira. No te Atua, e ere o te rapaeauraa te mea faufaa; o te huru taata mau râ i roto. (A taio i te Samuela 1, 16:7.) No reira, i to Samuela taaraa e aita Iehova i maiti hoê o na tamaiti paari aˈe e hitu a Iese, ua ani aˈera oia e tii i te hopea i te mau aua. Te na ô ra te faatiaraa e: ‘Ua tono atura Iese i te taata, e ua aratai mai ia Davida i roto. E taata uteute, e te mata maitai, e te huru maitai: e ua parau maira Iehova ia Samuela, A tia, a faatavai ia ˈna, oia hoi tena. Ua rave ihora Samuela i taua farii monoˈi ra, e ua faatavai atura ia ˈna i ropu atoa i tana mau tuaana ra: e mai taua mahana maira te varua o Iehova i te taeraa mai i nia ia Davida.’—Sam. 1, 16:12, 13.
Ua faahohoˈa Davida i te Mesia
4, 5. (a) A faataa i te tahi mau tuearaa i rotopu ia Davida e ia Iesu. (b) No te aha e nehenehe ai e parau ia Iesu te Davida Rahi?
4 Ua fanauhia Iesu, mai ia Davida, i Betelehema, fatata 1 100 matahiti i muri aˈe i to Davida fanauraahia. No te taata e rave rahi, aita Iesu atoa i hohoˈa i te hoê arii. Oia hoi, e ere oia i te huru arii ta e rave rahi i Iseraela i tiai na. Mai ia Davida râ, o ˈna ta Iehova i maiti. Mea herehia oia, mai ia Davida, e Iehova. a (Luka 3:22) ‘Ua tae mai te varua o Iehova i nia ia Iesu’ atoa.
5 Te vai ra ˈtu â te tuearaa i rotopu ia raua. Ei hiˈoraa, ua taivahia Davida e Ahitophela to ˈna taata aˈo, area o Iesu ra, e Iuda Isakariota ta ˈna aposetolo. (Sal. 41:9; Ioa. 13:18) E itoito rahi puai to raua e piti no te vahi haamoriraa a Iehova. (Sal. 27:4; 69:9; Ioa. 2:17) E tamaiti aiˈa atoa Iesu na Davida. Hou to Iesu fanauraa, ua parau te hoê melahi i to ˈna metua vahine e: “Na te Fatu ra na te Atua e horoa mai i te terono o to ˈna ra metua o Davida no ˈna.” (Luka 1:32; Mat. 1:1) No te mea râ e e tupu te mau parau fafau Mesia atoa i nia ia Iesu, e rahi aˈe ïa oia ia Davida. O ˈna te Davida Rahi, te Arii Mesia tiai-maoro-hia.—Ioa. 7:42.
A pee i te Arii e Tiai mamoe
6. Mea nafea e tiai mamoe maitai ai o Davida?
6 E tiai mamoe atoa Iesu. Eaha te mau huru taa ê o te hoê tiai mamoe maitai? E aupuru, e faatamaa, e e tiai oia i ta ˈna nǎnǎ ma te haapao maitai e te itoito. (Sal. 23:2-4) I to ˈna apîraa, i tiai na Davida i te mamoe, e ua aupuru maitai roa oia i te mau mamoe a to ˈna metua tane. Mea itoito oia i te fifiraa te nǎnǎ e ua faaû oia i te pohe no te paruru i te mamoe i te hoê liona e te hoê daba.—Sam. 1, 17:34, 35.
7. (a) Na te aha i faaineine ia Davida no ta ˈna mau hopoia ei arii? (b) Mea nafea e Tiai mamoe maitai ai o Iesu?
7 Tera mau matahiti a vai ai Davida i rapaeau e i nia i te mau aivi no te aupuru i te mau mamoe, ua faaineine ïa ia ˈna no te amo i te mau hopoia fifi e aratai i te nunaa Iseraela. b (Sal. 78:70, 71) Ua riro o Iesu atoa ei tiai mamoe hiˈoraa maitai. Te fanaˈo ra oia i te puai e te aratairaa no ǒ mai ia Iehova ra a aratai ai oia i te “nǎnǎ iti” e te mau “mamoe ê atu.” (Luka 12:32; Ioa. 10:16) Mea na reira ïa e e Tiai mamoe maitai ai Iesu. Ua matau maitai o ˈna i ta ˈna nǎnǎ a pii ai oia ia ratou ma to ratou iˈoa. No to ˈna here rahi i ta ˈna mau mamoe, ua horoa noa oia ia ˈna iho no ratou a vai ai oia i te fenua nei. (Ioa. 10:3, 11, 14, 15) Ei Tiai mamoe maitai, te faatupu nei Iesu i te hoê mea e ore roa ˈtu e tia ia Davida ia rave. Ua iriti to ˈna tusia taraehara i te ravea e faaorahia ˈi te huitaata i te pohe. Aita e mea e tapea ia ˈna eiaha e aratai i ta ˈna “nǎnǎ iti” i te ora pohe ore i nia i te raˈi e i ta ˈna mau “mamoe ê atu” i te ora mure ore i roto i te hoê ao apî parau-tia aita faahou e aaiora e au i te luko.—A taio i te Ioane 10:27-29.
A pee i te Arii upootia
8. Mea nafea e arii upootia ˈi Davida?
8 Ei arii, e taata tamaˈi faaoti papu o Davida, tei paruru i te fenua o te nunaa o te Atua, e ‘ua tiai noa Iehova ia Davida i te mau haerea atoa no ˈna ra.’ I raro aˈe i te faatereraa a Davida, mai te anavai o Aiphiti e tae atu i te anavai Eupharate te mau otia fenua o te nunaa. (Sam. 2, 8:1-14) Maoti to Iehova puai, ua riro oia ei arii puai roa ˈˈe. Te parau ra te Bibilia e: “Tui atura te roo o Davida e ati noa ˈˈe te mau fenua atoa; ua tuu ihora Iehova i te mǎtaˈu i roto i te aau o to te mau fenua atoa ia ˈna.”—Par. 1, 14:17.
9. A faataa mea nafea e Arii maitihia upootia ˈi Iesu.
9 Mai te arii Davida, e taata mǎtaˈu ore Iesu. Ei Arii maitihia, ua faaite oia i to ˈna mana faatere i nia i te mau demoni, ma te faaora i te mau taata tei uruhia e ratou. (Mar. 5:2, 6-13; Luka 4:36) Aita atoa to te enemi rahi o Satani te Diabolo e mana i nia ia ˈna. Maoti ta Iehova turu, ua vî teie nei ao, e vai nei i roto aˈe i te mana o Satani, ia Iesu.—Ioa. 14:30; 16:33; Ioa. 1, 5:19.
10, 11. Eaha te tiaraa Arii Aito o Iesu i nia i te raˈi?
10 Fatata e 60 matahiti i muri aˈe i to Iesu poheraa e tia-faahou-raa no te ora i nia i te raˈi, ua fanaˈo te aposetolo Ioane i te hoê orama o te tohu ra ia Iesu i roto i to ˈNa tiaraa Arii Aito i nia i te raˈi. Ua papai Ioane e: “Inaha e puaahorofenua teatea e e fana ta tei parahi i nia ihora, e e korona tei horoahia mai no ˈna: haere atura oia ma te haapau atu, e ia pau atu â.” (Apo. 6:2) O Iesu to nia iho i te puaahorofenua teatea. “E korona tei horoahia mai no ˈna” i 1914 i to ˈna faateronoraahia ei Arii i roto i te Basileia i te raˈi. I muri iho, “haere atura oia ma te haapau atu.” Oia, mai ia Davida, e arii upootia o Iesu. I muri iti aˈe i to ˈna faatoroaraahia ei Arii o te Basileia o te Atua, ua upootia oia i nia ia Satani i roto i te hoê aroraa e ua huri mai ia ˈna e ta ˈna mau demoni i nia i te fenua. (Apo. 12:7-9) E tamau â ta ˈna hororaa upootia e “ia pau atu â,” ia haamou roa oia i te ao ino a Satani.—A taio i te Apokalupo 19:11, 19-21.
11 Mai ia Davida râ, e arii aumihi Iesu, e e paruru oia i te “feia rahi roa” i Aramagedo. (Apo. 7:9, 14) Hau atu â, i raro aˈe i te faatereraa a Iesu e a to ˈna feia aiˈa apiti, na 144 000 tei faatiahia mai, “e tia-faahou-raa [ïa] to tei pohe, te feia parau-tia e te feia parau-tia ore.” (Ohi. 24:15) E nehenehe te feia i faatiahia mai i nia i te fenua e tiaturi e ora e a muri noa ˈtu. Auê ïa oraraa faahiahia no a muri aˈe te tiai maira ia ratou! Ia faaoti papu ïa tatou paatoa e tamau i te ‘rave i te maitai,’ ia nehenehe tatou e ora i te tau e î ai te fenua i te mau taata oaoa e te parau-tia i raro aˈe i te faatereraa a te Davida Rahi.—Sal. 37:27-29.
Ua pahonohia ta Solomona pure no te ani i te paari
12. Ua pure Solomona no te aha?
12 Ua faahohoˈa atoa o Solomona, te tamaiti a Davida, ia Iesu. c I to Solomona riroraa ei arii, ua fa ˈtu Iehova ia ˈna i roto i te hoê moemoeâ e ua parau e e horoa Oia na ˈna i te mea atoa ta ˈna e ani. E nehenehe hoi ta Solomona e ani ia rahi ta ˈna taoˈa, to ˈna puai, aore ra ia roa ˈtu â to ˈna oraraa. Aita râ, ua ani oia ma te miimii ore ia Iehova: “Ho mai na i te ite e te haapao maitai ia ˈu nei, ia haere vau i rapae, e ia hoˈi mai i roto i mua i teie nei feia: e tia hoi ia vai ia haapao i teie nei feia rahi no oe?” (Par. 2, 1:7-10) Ua pahono Iehova i te pure a Solomona.—A taio i te Paraleipomeno 2, 1:11, 12.
13. Mea nafea i faito ore ai to Solomona paari, e o vai te Tumu o to ˈna paari?
13 A vai taiva ore noa ˈi Solomona ia Iehova, aita e faito ta ˈna mau parau paari i rotopu i te feia o to ˈna ra tau. ‘E toru tausani parabole’ ta ˈna. (Arii 1, 4:30, 32, 34) Mea rahi o te reira tei papaihia e o te poihere-noa-hia ra e te feia e imi ra i te paari. Ua ratere te arii vahine o Seba fatata e 2 400 kilometera i te atea no te tamata i te paari o Solomona i “te parau imi-atâ.” Ua maere oia i te mau parau atoa a Solomona e i te ruperupe o to ˈna basileia. (Arii 1, 10:1-9) Te faaite ra te Bibilia i te Tumu o te paari o Solomona ma te parau e: “Ua imi maira to te mau fenua atoa ia Solomona, ia ite ratou i te paari i tuuhia mai e te Atua i roto i tana aau ra.”—Arii 1, 10:24.
A pee i te Arii paari
14. Mea nafea Iesu i ‘rahi ai ia Solomona’?
14 Hoê anaˈe taata tei hau aˈe i te paari ia Solomona. O Iesu Mesia ïa, tei faataa ia ˈna iho mai tei ‘rahi ia Solomona.’ (Mat. 12:42) E “parau o te ora mure ore” ta Iesu. (Ioa. 6:68) Ei hiˈoraa, ua tatara ˈtu â te Aˈoraa i nia i te mouˈa i te mau manaˈo tumu o te tahi mau parabole a Solomona. Ua faataa Solomona i te tahi mau mea o te faaoaoa i te hoê taata e haamori ra ia Iehova. (Mas. 3:13; 8:32, 33; 14:21; 16:20) Ua haapapu Iesu e no ǒ mai te oaoa mau i te mau mea tei taaihia i te haamoriraa ia Iehova e te tupuraa o te mau parau fafau a te Atua. Ua parau oia e: “E ao to tei [ite i to ratou veve i te pae varua], no ratou hoi te basileia ra o te [raˈi].” (Mat. 5:3; MN) Te feia o te faaohipa i te mau faaueraa tumu i roto i te mau haapiiraa a Iesu, e haafatata ˈtu â ïa ia Iehova, “te tumu o te ora.” (Sal. 36:9; Mas. 22:11; Mat. 5:8) O te Mesia “te paari o te Atua.” (Kor. 1, 1:24, 30) Ei Arii Mesia, e “varua o te paari” to Iesu.—Isa. 11:2.
15. E nafea tatou e faufaahia ˈi i te paari no ǒ mai i te Atua ra?
15 E nafea tatou, ei pǐpǐ na te Solomona Rahi, e faufaahia ˈi i te paari no ǒ mai i te Atua ra? I te mea e te faaitehia ra te paari o Iehova i roto i ta ˈna Parau, e titauhia ia tutava tatou i te ite i te reira ma te haapii maite i te Bibilia, ta Iesu iho â râ mau parau tei papaihia, e ma te feruriruri i ta tatou e taio ra. (Mas. 2:1-5) Hau atu â, e mea tia ia tamau tatou i te ani i te paari i te Atua. Te haapapu maira te Parau a te Atua e e pahono te Atua i ta tatou mau pure haavare ore no te ani i te tauturu. (Iak. 1:5) Maoti te varua moˈa e ite ai tatou i te paari taoˈa rahi i roto i te Parau a te Atua, o te nehenehe e tauturu ia tatou ia faaruru i te mau fifi e ia rave i te mau faaotiraa paari. (Luka 11:13) Te parau-atoa-hia ra Solomona ‘te orometua,’ aore ra taata haaputu, o tei ‘haapii noa i te taata i te ite.’ (Koh. 12:9, 10) E taata haaputu atoa o Iesu, ei Upoo o te amuiraa Kerisetiano, i to ˈna mau taata. (Ioa. 10:16; Kol. 1:18) No reira, e mea maitai ia haere tatou i te mau putuputuraa a te amuiraa, i reira tatou e ‘haapii-noa-hia ˈi.’
16. Eaha te tuearaa i rotopu ia Solomona e ia Iesu?
16 E arii rave ohipa roa o Solomona. Ua faanaho oia i te hoê porotarama paturaa na te tuhaa fenua taatoa, ua tiaau i te paturaa o te mau aorai, purumu, opereraa pape, oire vairaa taoˈa, oire no te pereoo, e te mau oire no te feia faahoro puaahorofenua. (Arii 1, 9:17-19) O te basileia taatoa tei faufaahia i ta ˈna mau ohipa paturaa. E taata patu atoa o Iesu. Ua patu oia i ta ˈna amuiraa i nia i te “pǎpǎ.” (Mat. 16:18) E tiaau atoa oia i te ohipa paturaa e ravehia i roto i te ao apî.—Isa. 65:21, 22.
A pee i te Arii o te hau
17. (a) Eaha te hoê huru faahiahia o te faatereraa a Solomona? (b) Eaha tei ore i tia ia Solomona ia rave?
17 No ǒ mai te iˈoa Solomona i te hoê taˈo tumu e “hau” te auraa. Ua faatere te arii Solomona i Ierusalema, e “Aiˈa no te hau toopiti huru” te auraa o taua iˈoa ra. I raro aˈe i ta ˈna faatereraa e 40 matahiti, ua itehia te hau hope i te faahiahia i roto i te nunaa Iseraela. Te na ô ra te Bibilia no nia i tera tau e: “Parahi noa ihora Iuda raua o Iseraela ma te hau, o te taata atoa i raro aˈe i ta ˈna vine e ta ˈna suke, mai Dana mai e tae noa ˈtura i Bere-seba, e hope roa aˈera to Solomona anotau.” (Arii 1, 4:25) Teie râ, aita i tia ia Solomona, i roto i to ˈna paari atoa, ia faatiamâ i to ˈna mau taata i te maˈi, te hara, e te pohe. Area te Solomona Rahi ra, e faatiamâ ïa i to ˈna mau taata i teie mau mea atoa.—A taio i te Roma 8:19-21.
18. I roto i te amuiraa Kerisetiano, eaha ta tatou mau haamaitairaa?
18 I teie nei atoa i roto i te amuiraa Kerisetiano, te fanaˈo nei tatou i te hau. Oia mau, to roto tatou i te hoê paradaiso mau i te pae varua. To roto tatou i te hau e te Atua e e to tatou taata-tupu. A tapao na i ta Isaia i tohu no nia i te mau haamaitairaa ta tatou e fanaˈo nei i teie tau: “E tiapai ratou i ta ratou ˈoˈe ei auri arote, e ta ratou mau mahae ei tipi tope raau; e ore te hoê fenua e aa mai i te tahi fenua i te ˈoˈe, e ore hoi ratou e haapii faahou i te tamaˈi.” (Isa. 2:3, 4) Ma te haa ia au i te varua o te Atua, te turu ra tatou i te nehenehe o te paradaiso pae varua.
19, 20. Eaha te mau tumu e oaoa ˈi tatou?
19 Teie râ, e mea maitai aˈe to a muri aˈe. A fanaˈo ai te feia faaroo i te hau i nia i te hoê faito aita i itehia aˈenei i raro aˈe i ta Iesu faatereraa, e ‘faaora-riirii-hia ratou i te tapea o te pohe,’ a riro atu ai ei taata tia roa. (Roma 8:21) I muri aˈe i te upootiaraa i roto i te tamataraa hopea ia hope te Faatereraa tausani matahiti, ‘e parahi te feia mǎrû i te fenua, e oaoa ratou i te rahi o te hau.’ (Sal. 37:11; Apo. 20:7-10) Oia mau, e rahi aˈe te faatereraa a te Mesia ra o Iesu i ta Solomona ma te mau ravea tei hau ê i to tatou feruriraa!
20 Mai ia Iseraela tei oaoa i raro aˈe i te tiaauraa a Mose, a Davida e a Solomona, e oaoa roa ˈtu â tatou i raro aˈe i te faatereraa a te Mesia. (Arii 1, 8:66) E haamauruuru anaˈe ïa tatou paatoa ia Iehova no te horoaraa mai i ta ˈna Tamaiti fanau tahi—te Mose Rahi, te Davida Rahi, e te Solomona Rahi!
[Nota i raro i te api]
a “Herehia” paha te auraa o te iˈoa Davida. I to Iesu bapetizoraahia e i to ˈna atoa faahuru-ê-raahia, ua parau Iehova mai te raˈi mai ia ˈna “tau Tamaiti here.”—Mat. 3:17; 17:5.
b I te hoê â taime, ua riro Davida mai te hoê arenio tiaturi. Ua ani oia i te parururaa e te aratairaa i te Tiai mamoe Rahi ra o Iehova. “O Iehova to ˈu tiai,” ta ˈna ïa i parau ma te tiaturi taatoa. “E ore roa vau e ere.” (Sal. 23:1) Ua faataa Ioane Bapetizo ia Iesu mai “te Arenio a te Atua.”—Ioa. 1:29.
c E tano ia tapao e o Iedidia, “Herehia e Ia,” te auraa o te piti o te iˈoa o Solomona.—Sam. 2, 12:24, 25.
E nehenehe anei oe e faataa?
• E nafea Iesu e rahi aˈe ai ia Davida?
• E nafea Iesu e rahi aˈe ai ia Solomona?
• No te aha oe e haafaufaa ˈi ia Iesu, te Davida Rahi e te Solomona Rahi?
[Uiraa haapiiraa]
[Hohoˈa i te api 29]
Te faahohoˈa ra to Solomona paari no ǒ mai i te Atua ra i te paari o te Solomona Rahi
[Hohoˈa i te api 31]
E rahi aˈe ta Iesu faatereraa i ta Davida e ta Solomona ma te mau ravea tei hau ê i to tatou feruriraa!