Uiraa a te feia taio

Ua faataa-ê-na-hia anei to tatou oraraa?

Te parau ra vetahi e ua faataa-ê-na-hia te mahana o to tatou poheraa. Te onoono ra te tahi atu e na te Atua iho e faaoti eaha te taime e pohe ai tatou. Hau atu â, te hiˈo ra tera mau taata i te mau tupuraa faufaa roa o te oraraa ei mea ape ore. Tera atoa anei to oe manaˈo?

E ui paha oe ia oe iho i teie mau uiraa: ‘Ahani aita ta tatou e ravea no te taui i to tatou oraraa faataahia, ahani ua faataa ê na te Atua aore ra te oraraa faataahia i te faahopearaa o te hoê tupuraa, eaha ïa te faufaa ia pure? E ahani ua faataa-ê-na-hia to tatou oraraa, no te aha ïa e rave ai i te mau faanahoraa no te paruru ia tatou? No te aha ïa e taamu ai i te hatua ia tere tatou na nia i te pereoo? E no te aha eiaha ˈi e faahoro i te pereoo ua taero anaˈe tatou?’

Aita roa ˈtu te Bibilia e faatia ra i tera huru haerea feruri ore. Aita te Bibilia e haapii ra e ua faataa-ê-na-hia te mau mea atoa, ua faaue râ i te mau Iseraela ia haapao maite ia ore ratou ia fifi. Ei hiˈoraa, ua faauehia ratou ia hamani i te hoê paruru haehaa e ati aˈe te tafare parahurahu o to ratou mau fare. Te fa, ia ore te tahi taata ia topa noa mai i raro. Aita ïa e tumu e horoa ˈi te Atua i teie faaueraa, ahani ua faataa-ê-na-hia e e topa mai te hoê taata i raro, a pohe atu ai.—Deuteronomi 22:8.

E te feia ïa e pohe ra no te mau ati natura aore ra te tahi atu mau ati eita e vî ia ratou? Ua faataa-ê-na-hia anei to ratou “taio mahana poheraa”? Aita, te haapapu maira Solomona, arii tei papai i te Bibilia, e ‘e tau e e tupuraa manaˈo-ore-hia to tatou paatoa.’ (Koheleta 9:11, MN) Noa ˈtu ïa te huru maere aore ra papu ore o te mau tupuraa, aita te mau ati i faataa-ê-na-hia.

Te manaˈo ra râ vetahi e te patoi ra teie parau i ta Solomona i faahiti na mua ˈtu: “E tau to te mau mea atoa nei, e taime to te mau mea atoa i imihia i raro aˈe i te raˈi nei. E taime to te fanau, e taime to te pohe.” (Koheleta 3:1, 2) Te turu ra iho â anei Solomona i te manaˈo e ua faataahia te oraraa? E hiˈo maitai ïa tatou i teie mau parau.

Aita Solomona e parau ra e ua faataa-ê-na-hia te mau fanauraa e te mau poheraa. Aita, te faataa ra oia e e ite-noa-hia te mau fanauraa e te mau poheraa, mai e rave rahi mea i roto i te oraraa, aita e hopea. E farerei iho â te taata i te mau tupuraa maitatai e te mau tupuraa peapea. “E taime to te oto, e taime to te ata,” ta Solomona ïa e parau ra. Ia au ia Solomona e mea matauhia tera mau tupuraa tamau e ati manaˈo-ore-hia i roto i te oraraa, i roto i “te mau mea atoa i imihia i raro aˈe i te raˈi nei.” (Koheleta 3:1-8; 9:11, 12) Teie ïa ta ˈna faaotiraa, eiaha e haapao noa i ta tatou mau ohipa o te mau mahana atoa, a haamoe atu ai i tei Hamani ia tatou.—Koheleta 12:1, 13.

Noa ˈtu e te taa roa ra i tei Hamani ia tatou te ora e te pohe, aita oia e faataa ê na ra ma te faahepo i to tatou oraraa. Te haapii ra te Bibilia e te pûpû ra te Atua ia tatou paatoa i te tiaturiraa e ora e a muri noa ˈtu. Aita râ te Atua e faahepo ra ia tatou ia farii i taua pûpûraa ra. Aita, te na ô ra ta ˈna Parau e: “E tei hinaaro ra, a rave noa mai oia i te pape ora.”—Apokalupo 22:17.

E mea tia iho â ia hinaaro tatou e ‘rave mai i te pape ora.’ No reira, aita to tatou oraraa no a muri aˈe i faataa-ê-na-hia. E faahopearaa hoi to ta tatou iho mau faaotiraa, to tatou mau haerea, e ta tatou mau ohipa i nia i to tatou oraraa no a muri aˈe.