2 Ia noaa te ite mau i te Atua

“Teie hoi te ora mure ore, ia ite ratou ia oe i te Atua mau ra.”—Ioane 17:3.

EAHA TE HAAFIFIRAA? Te parau ra vetahi e aita te Atua e vai mau ra. Te tiaturi ra te tahi atu e e puai rahi ihotaata ore te Atua. E te feia e tiaturi ra e e ihotaata mau oia, te haapii ra ïa ia vetahi ê i te mau mea tuati ore no nia ia ˈna e to ˈna mau huru maitatai.

EAHA TA OE E NEHENEHE E RAVE? Te hoê ravea e noaa ˈi te ite i te Atua, o te hiˈoraa ïa i te mau mea ta ˈna i hamani. Ua parau te aposetolo Paulo e: ‘Te mau mea [“huru maitatai,” MN] o te Atua e ore e tia ia hiˈo ra, te ite-papu-hia nei ïa i te mau mea i hamanihia nei, mai te  hamaniraa mai â o teie nei ao; oia hoi to ˈna ra mana hope ra e te Atuaraa.’ (Roma 1:20) Ma te hiˈopoa maitai i te natura e haapii rahi ai oe no nia i te paari e te puai o to tatou Atua Poiete.—Salamo 104:24; Isaia 40:26.

Ia noaa râ te ite mau i te huru o te Atua, e titauhia ia iriti te taata taitahi i te Parau a te Atua, te Bibilia, e ia hiˈopoa o ˈna iho i te reira. Eiaha e vaiiho ia vetahi ê ia faaoti eaha ta oe e manaˈo. A pee râ i teie aˈoraa bibilia: “Eiaha e faaau atu i teie nei ao; ei huru ê râ to outou i te faahouraa i to outou aau, ia ite outou i taua hinaaro tia o te Atua ra, e te au, e te maitai hoi.” (Roma 12:2) Teie te tahi mau mea ta te Bibilia e faaite ra no nia i te Atua.

E iˈoa to te Atua. E tausani taime te papai-matamua-raahia te iˈoa o te Atua i roto i te Bibilia. I roto e rave rahi huriraa, te vai ra tera iˈoa i roto i te Salamo 83:18, o te na ô ra e: “Ia ite te taata atoa e, o Iehova to oe iˈoa, e o oe anaˈe tei Teitei i te fenua atoa nei.”

E huru aau to te Atua ra o Iehova o te hauti ia au i te mau ohipa a te taata. I muri aˈe i to Iehova faatiamâraa i te nunaa Iseraela i te faatîtîraa i Aiphiti, ua tâuˈa ore ratou i te tahi taime i ta ˈna mau aˈoraa paari. Ua ‘faariri’ to ratou haerea orure hau ia ˈna; “ua aa ˈtu i Tei Moˈa i Iseraela.”—Salamo 78:40, 41.

Te haapeapea ra Iehova no tatou ei taata taitahi. Teie ta Iesu i parau i ta ˈna mau pǐpǐ: “E ere anei taipiti manu rii ia hoo i te moni veo hoê nei? e ore râ te hoê o taua na manu rii ra e moe i to outou Metua ia mairi i raro i te repo. Eiaha ˈtu â ïa, ua hope atoa ra te rouru o to outou upoo na i te taiohia. Eiaha maori outou e mǎtaˈu, e maitai rahi hoi to outou i to te manu e ia rahi noa ˈtu.”—Mataio 10:29-31.

Aita te Atua e faaherehere ra i te hoê noa nunaa aore ra taˈere. Ua parau te aposetolo Paulo i to Heleni i Ateno e na te Atua “i hamani i te taata i te mau fenua atoa nei i te toto o te taata hoê ra, ei parahi i te mau fenua atoa nei.” Ua parau atoa oia e ‘aita te Atua i atea ê atu ia tatou atoa nei.’ (Ohipa 17:26, 27) Ua na ô te aposetolo Petero e: “E ore te Atua e haapao i te huru o te taata. O tei mǎtaˈu ra ia ˈna, e o tei rave i te parau-tia i te mau fenua atoa ra, o te itehia mai ïa e ana.”—Ohipa 10:34, 35.

EAHA TE HAAMAITAIRAA? E “itoito to [vetahi] i ta te Atua, e ere râ i te itoito ite.” (Roma 10:2) Ia ite oe i ta te Bibilia e haapii mau ra no nia i te Atua, eita ïa oe e vare e e tia ia oe ia “haafatata ˈtu i te Atua.”—Iakobo 4:8.

Ei haamaramaramaraa hau, a hiˈo i te pene 1, “Eaha te parau mau no nia i te Atua?” o te buka Eaha ta te Bibilia e haapii mau ra? a

[Nota i raro i te api]

[Hohoˈa i te api 6]

Te hoê ravea e noaa ˈi te ite i te Atua, o te hiˈoraa ïa i te mau mea ta ˈna i hamani