4 A tinai i to oe mau manaˈo feaa

“E teie nei taata faaroo haraini [aore ra tapetepete], eaha oe i mǎtaˈu ai?”—Mataio 14:31.

EAHA TE HAAFIFIRAA? I feaa atoa na te mau pǐpǐ a Iesu i te tahi taime. (Mataio 14:30; Luka 24:36-39; Ioane 20:24, 25) Inaha, te faataa ra te Bibilia i te ereraa i te faaroo mai “te ino e hara ˈi tatou nei.” (Hebera 12:1) Ua papai te aposetolo Paulo e: “Aore . . . i ati paatoa te taata i te faaroo.” (Tesalonia 2, 3:2) E ere e aita e maraa ra ia vetahi ia faahotu i teie huru maitai. Aita râ e rave rahi e haa ra ia noaa mai te reira. E haamaitai te Atua i te mau tutavaraa a te feia e na reira.

EAHA TA OE E NEHENEHE E RAVE? A faataa eaha te haafeaa ra ia oe. Ei hiˈoraa, aita te pǐpǐ Toma i tiaturi e ua faatiahia mai Iesu, noa ˈtu e ua parau te tahi atu mau pǐpǐ e ua ite ratou ia ˈna. Ua hinaaro Toma i te mau haapapuraa.  Ua horoa Iesu i te mau haapapuraa ta ˈna i hinaaro ia puai to ˈna faaroo.—Ioane 20:24-29.

Na roto i te Bibilia, te horoa maira te Atua ra o Iehova i te mau pahonoraa ta tatou e hinaaro no te tinai i to tatou mau manaˈo feaa. Ei hiˈoraa, mea rahi o te ere ra i te faaroo i te Atua no te mea te parau ra ratou ma te tanai aore ra ma te tanai ore e o ˈna te tumu o te mau tamaˈi, te haavîraa uˈana, e te ati ta te huitaata e faaruru ra. Eaha ïa ta te Bibilia e parau ra?

Aita te Atua e faatere ra na roto i te mau faatereraa a te taata. Ua faahiti Iesu i te varua itea ore o Satani te iˈoa mai “te arii o teie nei ao.” (Ioane 14:30) Ua pûpû Satani ia Iesu i te mana faatere i nia i te mau basileia atoa o te fenua no te hoê noa ohipa haamoriraa, ma te parau e: “E horoa ˈtu vau i te hau, e te hinuhinu i teie nei mau fenua ia oe, ua pûpûhia mai hoi teie ia ˈu, e na ˈu e horoa ˈtu na ta ˈu taata i hinaaro.” Aita Iesu i parau e aita to Satani e mana faatere. Ua na ô râ Oia e: “Ua papaihia e, O te Fatu ra o te Atua ta oe e tahopu, e oia anaˈe ra ta oe e haamori.” (Luka 4:5-8) O Satani e te mau faatereraa a te taata te tumu o te mauiui o te ao nei, e ere te Atua.—Apokalupo 12:9, 12.

E fatata te Atua ra o Iehova i te faaore i te mau tumu atoa o te mauiui. Ua haamau ê na oia i te hoê Basileia, aore ra faatereraa, o ta ˈna Tamaiti te Mesia ra o Iesu te Arii, no te faatere i te huitaata. (Mataio 6:9, 10; Korinetia 1, 15:20-28) Ia au i te parau tohu bibilia, te porohia nei te evanelia o teie Basileia e ati aˈe te fenua. (Mataio 24:14) E fatata teie Basileia i te iriti ê i te feia atoa o te patoi i te reira e i te faaore i te mau tumu atoa o te mauiui o te taata.—Daniela 2:44; Mataio 25:31-33, 46; Apokalupo 21:3, 4.

EAHA TE HAAMAITAIRAA? E au te feia o te feaa i te mau are o te aueue noa i ‘te mataˈi ra i tera parau i tera parau, i te ravea a te taata nei.’ (Ephesia 4:14; Petero 2, 2:1) Area te feia o te ite i te mau pahonoraa tano i ta ratou mau uiraa, e tia ïa “ia mau papu i te faaroo.”—Korinetia 1, 16:13.

E hinaaro te mau Ite no Iehova, o te nenei ra i teie vea, e tauturu ia oe ia ite i te mau pahonoraa i te mau uiraa o te nehenehe e haafifi i to oe faaroo. Te titau manihini ra ratou ia oe ia amui ia ratou e ia hiˈopoa o oe iho i ta ratou mau haapiiraa. Ia na reira oe, e puai roa ïa to oe faaroo i te Atua.

Ei haamaramaramaraa hau, a hiˈo i te pene 8, “Eaha te Basileia o te Atua?” e te pene 11, “No te aha te Atua e faatia ˈi i te mauiui?” o te buka Eaha ta te Bibilia e haapii mau ra? a

[Nota i raro i te api]

[Hohoˈa i te api 9]

Te feia o te ite i te mau pahonoraa tano i ta ratou mau uiraa, e niu papu ïa to to ratou faaroo