Te imiraa i te hoê aratai papu

TE IMI ra anei oe i te aˈoraa? E mea rahi ïa. O te ohipa tauturu ia ˈna iho te hoê o te mau tapihaa maraa oioi roa ˈˈe o te ao. I te mau vahi huru rau mai ia Beretane, Marite Latino, Tapone, e te Hau amui, o te mau buka aratai te mea hoo-roa ˈˈe-hia. Ua tui atoa te roo o te mau hohoˈa, apooraa, e porotarama afata teata no nia i te reira. Te tumu, e nehenehe oe iho e faatitiaifaro i to oe mau fifi, ma te ore e imi i te tauturu a te hoê taote manaˈo, taata aˈo i te pae faaipoiporaa, aore ra aratai haapaoraa. Eaha ïa te tuatapapahia?

Te manuïaraa, te iteraa i te hoê apiti maitai, e te aupururaa i te tamarii, o te tahi ïa mau manaˈo tumu matau-roa ˈˈe-hia. Te vai atoa ra te faarururaa i te hepohepo, te oto, e te faataaraa. E rave rahi atoa taata e hinaaro ra i te aˈoraa no nia i te amu-hua-raa, te puhipuhiraa i te avaava, e te inu-hua-raa. E mea tano anei tera mau aˈoraa? I te tahi noa mau taime. E haerea paari ïa ia feruri i te faaararaa a te Bibilia: “Te faaroo ra te ite ore i te mau parau atoa ra; te hiˈo maitai ra râ te taata haapao ra i to ˈna taahiraa.”—Maseli 14:15.

Mea taa ê roa te mau buka aratai i te mau buka e haapii ra i te tahi mau aravihi mai te pataraa hohoˈa, te ohipa numeraraa faufaa, aore ra te reo. E ravea manuïa e te mâmâ taua mau buka ra no te fanaˈo i te hoê haapiiraa taa ê. Mea ê te mau buka aratai, no nia anei i te ohipa, te faaipoiporaa, te hopoia metua, aore ra te ea i te pae feruriraa, o te faaitoito pinepine i te hoê huru oraraa aore ra i te tahi huru feruriraa. E haerea paari ïa ia uiui: ‘Na vai e horoa ra i te aˈoraa? Nohea mai ta ˈna mau haamaramaramaraa?’

Eita te feia aravihi e niu noa i to ratou manaˈo i nia i te mau haapapuraa maimi-maitai-hia. E horoa paha vetahi i te aˈoraa hoo-maitai-aˈe-hia, ua ite hoi ratou e e moni rahi te noaa mai ia parau i te taata i ta ratou e hinaaro e faaroo. I te hoê noa fenua, e noaa i te tapihaa tautururaa ia ˈna iho hau atu i te vau miria tara Marite i te matahiti hoê!

E tauturu iho â anei te mau buka aratai?

Ia taio oe i te mau buka aratai, e tiaturi oe i te ite mai i te mau aˈoraa tauturu. I vetahi râ  mau taime, e ite noa oe i te aˈoraa na nia nia noa aore ra papu ore. E parau noa ˈtu tera mau buka e: ‘Ia manaˈo maitai oe, e manuïa iho â oe. Ia hinaaro oe i te moni, te ea, aore ra te hoê taairaa oaoa e te vai ra ˈtu â, e noaa mai iho â ia manaˈo maitai noa oe.’ E mea tano anei tera aˈoraa? E tauturu anei te reira ia oe ia faaû i te mau tupuraa e inoinoraa o te oraraa?

A hiˈo na i te mau buka matau-roa ˈˈe-hia no nia i te mau taairaa e te faaipoiporaa. E tauturu anei te reira i te taata ia haamau i te utuafare aueue ore e te oaoa? I te tahi noa mau taime. Ia au i te hoê vahine hiˈopoa, “te poroi ra” te taata papai o te mau buka aratai no nia i te here tei tui oioi te roo i Marite Latino “i te feia taio e nafea ia faatupu i te mau taairaa maitatai e ia faatura ia ratou iho.” Te parau ra te taata papai e ia faaea noa te hoê taata i roto i te hoê taairaa aita e manuïa ra, te haavare ra ïa o ˈna ia ˈna iho. Te poroi mau, oia hoi e mea faufaa aˈe ia rave i te hoê mea e maitai ai o ˈna eiaha râ ia farii i to ˈna mau fifi e ia tamata i te faaafaro atu.

Parau mau, te vai ra te aˈoraa maitai i roto i te mau buka aratai. Te vai atoa ra râ te aˈoraa atâta. E manaˈo tauturu faufaa paha to te hoê taata aravihi i nia i te hoê tumu parau, i roto râ i te tahi atu tuhaa, e ere roa ˈtu ïa. Eita roa ˈtu e nehenehe e maiti i rotopu i te rahiraa manaˈo o teie mau buka, e pinepine mea tuea ore. Ta vai ïa aˈoraa ta oe e nehenehe e tiaturi? A ui ia oe iho: ‘Mea maimi-maitai-hia anei tera aˈoraa, aore ra no te taata papai noa teie manaˈo? Te ohipa rahi ra anei te tapiraa i te taoˈa rahi aore ra te tiaraa teitei i nia i te hapa ore o te taata papai?’

Te hoê aratai o tei manuïa i te roaraa o te tau, o te Bibilia ïa. Te pûpû ra te reira i te aˈoraa papu i nia e rave rahi tumu parau ta te mau buka aratai e tuatapapa ra. Ua turai te reira i te mau mirioni taata ia haa ia au i teie aˈoraa: “Ei huru ê . . . to outou i te faahouraa i to outou aau.” (Roma 12:2) Te horoa ra te Bibilia i te ite hohonu paari no nia i te tumu o to tatou mau fifi e te haapii mai ra e nafea ia faaruru i te reira. Te mea faufaa roa ˈˈe, te horoa ra te reira i te mau tumu papu maitai no te rave i te mea tia. Na to muri nei tumu parau e faataa e nafea.