Te vai ra anei o te tâuˈa maira?

Ua moemoe e ua hepohepo ê na anei oe, mai te mea ra e aita e taata e taa ra i to oe mau fifi? Noa ˈtu e ua ite ratou e e fifi to oe, e au ra e aita ratou e tâuˈa maira.

IA TUPU mai te fifi, e au to tatou oraraa i te are moana arepurepu. I te tahi mau taime, e faaoti paha tatou e no te teimaha e te tano ore o to tatou fifi, eita tatou e nehenehe e faaoromai faahou. Mai te reira iho â ia roohia tatou i te hepohepo o te aau, te ahoaho, te ati hapepa, te maˈi tamau, e te vai ra ˈtu â. No te rahi hoi o to tatou hepohepo e ui ai tatou ihea e imi ai i te tamahanahanaraa. Te vai ra anei o te tâuˈa maira?

Te tâuˈa maira “te Atua no ˈna anaˈe te mahanahana”

Te faataa ra te Bibilia i te Atua ei “Metua . . . o te aroha e o te Atua no ˈna anaˈe te mahanahana.” (Korinetia 2, 1:3) Ua ite te Atua ra o Iehova e e hinaaro tatou i te tamahanahanaraa. Te faaohipa ra te Bibilia e rave rahi taime i te taˈo “mahanahana” e rave rau huru, ma te faaite maitai e te taa ra te Atua i ta tatou e faaruru ra e te hinaaro atoa ra e tamahanahana ia tatou. E haapapuraa ïa teie e noa ˈtu e e au ra e aita vetahi ê e ite ra, e taa ra, aore ra e tâuˈa ra i to tatou fifi, o Iehova râ, oia ïa.

E ite-maitai-hia i roto i te Bibilia to Iehova haapeapea no te taata taitahi. Te na ô ra te mau Papai: “Tei te mau vahi atoa nei to Iehova mata, i te hiˈoraa mai i te ino e te maitai.” (Maseli 15:3) Te taio atoa nei tatou i roto i te Ioba 34:21: “Te hiˈo maira oia i to te taata nei haerea, e te hiˈopoa maira i to ˈna ra mau taahiraa.” Te hiˈopoa maira Iehova i to tatou haerea maitai aore ra ino e ua ite oia i to tatou mau tupuraa, a rave atu ai i ta ˈna i manaˈo e mea tano. Na ta Hanani peropheta i parau ia Asa arii o Iuda e haapapu maira: “Te hiˈo nei te mata o Iehova i to te ao atoa nei, ia horoa mai oia i te etaeta i te feia i tia te aau ia ˈna.”—Paraleipomeno 2, 16:7, 9.

Te hiˈo maira Iehova ia tatou no te tahi atu tumu. Te faataa ra Iesu: “E ore roa te taata e tae mai ia ˈu nei, maori râ ia faatae mai te Metua o tei tono mai ia ˈu nei ia ˈna.” (Ioane 6:44) Te hinaaro ra Iehova e paheru i te aau o te hoê taata no te ite e ua tae anei to ˈna aau ia ˈNa. Mai te peu e e, e tauturu oia ia ˈna ma te maere rahi. Ei hiˈoraa, i te Repupirita Dominicaine, ua mau te hoê vahine i te fare maˈi o te rapaau i te mariri ai taata. Ua pure taparu oia i te Atua ia tauturu ia ˈna ia ite i te haapaoraa mau. I muri noa ˈˈe, ua afai atu ta ˈna tane i te buka rairai Eaha ta te Atua e titau ra ia tatou? a ta te hoê Ite no Iehova i horoa ˈtu i taua poipoi ra. Ua taio taua vahine ra i te buka rairai e ua taa aˈera e e pahonoraa teie a te Atua i ta ˈna pure. Ua farii oia i te hoê haapiiraa bibilia e taua Ite ra, e aita i ono avaˈe, ua pûpû oia i to ˈna ora i te Atua e ua bapetizo.

I roto i te buka bibilia o te Salamo, mea rahi te parau mahanahana a te mau papai  salamo Hebera i tahito ra, mai te arii Davida, o te faataa ra i te aupuru î i te here a Iehova i ta ˈna mau tavini. I roto i te Salamo 56:8, te taparu ra te arii Davida i te Atua: “A tuu na oe i to ˈu nei roimata i roto i ta oe ra farii: aita anei i roto atoa i ta oe ra parau?” Ia au i teie faahohoˈaraa, ua taa ia Davida e ua ite Iehova eiaha noa i to ˈna mauiui i to ˈna atoa râ horuhoru. Ua ite mau â Iehova i to Davida oto e ua haamanaˈo oia i ta ˈna i faaruru. Te hiˈo maira iho â to tatou Atua Poiete i te feia atoa e tutava ra i te rave i to ˈna hinaaro, “te feia i tia te aau ia ˈna.”

Te tahi atu irava bibilia matau-roa ˈˈe-hia o te faataa ra i te aupuru î i te here a te Atua, o te Salamo 23 ïa. Te faaau ra te irava matamua i te Atua i te hoê tiai mamoe î i te here: “O Iehova to ˈu tiai, e ore roa vau e ere.” I te mau fenua i papaihia ˈi te Bibilia, e haapao te hoê tiai i ta ˈna mamoe taitahi. E horoa atoa oia i te iˈoa no ratou. I te mau mahana atoa, e pii o ˈna i te mamoe taitahi, e mirimiri atu e e fafa aita anei e pepe. Mai te peu e te vai ra, e parai oia i te monoˈi aore ra i te raau ia ora oioi te pepe. Mai te peu e e maˈi to te mamoe, e oomo te tiai i te raau i roto roa i to ˈna arapoa, a tapea noa ˈi ia ˈna ia ore oia e tarava, a pohe atu ai. E faahohoˈaraa maitai roa teie e nafea Iehova e aupuru ai i te feia e fariu atu ia ˈna ra.

Te pure e te tia-faahou-raa, e haapapuraa ïa e te tâuˈa maira te Atua

Aita teie e te tahi atu mau salamo nehenehe i papaihia i roto i te Bibilia no te au  noa o te taioraa. Te faaite maira te reira mea nafea te mau tavini haapao maitai a te Atua i tahito ra i te haamahoraraa i to ratou aau ia Iehova. Ua hinaaro hoi ratou i ta ˈna tauturu e ua mauruuru no ta ˈna aratairaa e haamaitairaa. Te faaite maitai ra te reira i te tiaturiraa papu o tera mau tavini a te Atua i ta ˈNa aupuru ia ratou. No tatou atoa ïa, ia taio e ia feruriruri tatou i teie mau parau haaputapû. E haapapuraa rahi ïa te faanahoraa o te pure e te tâuˈa maira te Atua.

I te tahi râ mau taime, no te teimaha rahi o to tatou fifi, eita tatou e taa faahou e nafea ia pure. Eita iho â anei ïa Iehova e ite i to tatou ahoaho? Te pahono ra te Roma 8:26: ‘Te turu atoa mai nei hoi te varua i to tatou nei paruparu, aore hoi tatou i ite maitai i te mea au ia pure tatou; na te varua iho i ani i ta tatou ma te uuru e ore e tia ia parau.’ Ia au i teie irava, e nehenehe te mau pure a te mau tavini a te Atua i tahito ra e faaite i to tatou mau huru aau e e farii Iehova, “tei faaroo i te pure,” i te reira.—Salamo 65:2.

O te tiaturiraa o te tia-faahou-raa te tahi atu haapapuraa o te anaanatae o te Atua i te taata taitahi. Ua parau Iesu Mesia: “Te fatata mai nei hoi te hora e faaroo ai te feia atoa i roto i te apoo ra i [to Iesu] reo, e e haere mai i rapae.” (Ioane 5:28, 29) E “apoo” te huriraa i ǒ nei o te taˈo Heleni, e “menema mehararaa” râ te huriraa tano aˈe. Te auraa ïa e te haamanaˈo ra te Atua i te huru o te taata i te roaraa o to ˈna oraraa.

A hiˈo na, no te faahoˈi mai i te hoê taata i te ora, e titauhia ia ite te Atua i te mau mea atoa no nia i taua taata ra, mai to ˈna hohoˈa, to ˈna mau huru no ǒ mai i te metua e tei noaa mai ia ˈna, e to ˈna mehara taatoa! (Mareko 10:27) Eita roa ˈtu e aramoina i te Atua tera taata. (Ioba 14:13-15; Luka 20:38) No reira, te haamanaˈo ra te Atua ra o Iehova i te mau mea atoa no nia i te mau miria taata i pohe. E haapapuraa rahi ïa e te tâuˈa maira te Atua ia tatou taitahi!

O Iehova te faautua maitai

Ia aha tatou ia haapeapea e ia tâuˈa mai te Atua ma te here? Na mua roa, ia faaite tatou e te tiaturi ra e te auraro ra tatou ia ˈna, e e faaroo to tatou ia ˈna. Te faataa ra te aposetolo Paulo i te taairaa i rotopu i te faaroo e te tâuˈaraa mai te Atua. Teie ta ˈna i papai: “Aore e faaroo ra e ore roa oia e mauruuru: o te haamori i te Atua ra, e faaroo oia e, e Atua, e tia ˈi, e o oia te faautua i te feia i imi papu ia ˈna.”—Hebera 11:6.

A tapao e e piti tuhaa to te huru faaroo ta te Atua e mauruuru. A tahi, ia “faaroo” tatou ‘e e Atua oia,’ oia hoi ia tiaturi tatou e te vai mau ra te Atua e o ˈna to tatou Faatere Mana hope, ta tatou e auraro e e haamori. A piti, ia tiaturi tatou e na ˈna e “faautua i te feia i imi papu ia ˈna.” Te faaroo mau, o te tiaturiraa ïa e te anaanatae ra te Atua i te maitai o te feia atoa e faaitoito mau ra i te rave i to ˈna hinaaro e na ˈna e faautua maitai ia ratou. Ia haapii oe i te Parau a te Atua e ia apiti i te feia o te auraro ia ˈna, e noaa ia oe atoa te huru faaroo e au i ta te Atua haamaitairaa e aupuru î i te here.

Mea rahi i teie mahana o te tiaturi ra e aita te Atua e anaanatae ra i te mau ohipa a te taata. Mai ta tatou râ i ite, te faataa maitai ra te Bibilia e mea here roa na te Atua te feia o te haapapu ra i to ratou faaroo mau ia ˈna. Noa ˈtu e ua î te oraraa i teie mahana i te ahoaho, te haapeapearaa, te inoino e te mauiui, eiaha tatou e hepohepo rahi. Te haapeapea maira iho â te Atua ra o Iehova. Te taparu ra hoi o ˈna ia tatou ma te here ia ani i ta ˈna turu. Ua parau te papai salamo: “E tuu oe i ta oe hopoia ia Iehova ra, e na ˈna oe e tauturu mai; e ore roa oia e vaiiho noa ˈtu i te taata parau-tia ia faaaueuehia.”—Salamo 55:22.

[Nota i raro i te api]

[Tumu parau tarenihia/Hohoˈa i te api 21]

Irava o te haapapu i to oe faaroo i ta te Atua aupuru î i te here ia oe

“Te hiˈo nei te mata o Iehova i to te ao atoa nei, ia horoa mai oia i te etaeta i te feia i tia te aau ia ˈna.”—PARALEIPOMENO 2, 16:9

“A tuu na oe i to ˈu nei roimata i roto i ta oe ra farii: aita anei i roto atoa i ta oe ra parau?”—SALAMO 56:8

“O Iehova to ˈu tiai, e ore roa vau e ere.”—SALAMO 23:1

“E tei faaroo i te pure ra, e tae atoa mai te taata atoa ia oe ra.”—SALAMO 65:2

“Na oe e tiaoro mai, e na ˈu e parau atu ia oe; e oto â oe i te ohipa a to rima i rave ra.”—IOBA 14:15

“O te haamori i te Atua ra, e faaroo oia e, e Atua, e tia ˈi, e o oia te faautua i te feia i imi papu ia ˈna.”—HEBERA 11:6

“E tuu oe i ta oe hopoia ia Iehova ra, e na ˈna oe e tauturu mai; e ore roa oia e vaiiho noa ˈtu i te taata parau-tia ia faaaueuehia.”—SALAMO 55:22