E nehenehe outou e maramarama i te Bibilia

1. A ani i te tauturu a te Fatu

“I taio na vau i te Bibilia hou a taoto ai,” ta Ninfa ïa, e faaea ra i Italia, e faatia ra. “Ua ite hoi au e e Parau na te Atua, e noa ˈtu e aita vau i anaanatae, ua hinaaro râ vau e ite eaha ta te Atua i papai i roto i te Bibilia. I opua na vau e taio i te Bibilia taatoa. Mea ohie te taioraa i te omuaraa, ia tae râ i te mau faatiaraa, mea fifi ïa, e ua faaea ˈtura vau.”

MAI te reira atoa anei no outou? No te taata e rave rahi, oia ïa. Mai ta tatou râ i ite i te tumu parau na mua ˈtu, te hinaaro ra te Atua ra o Iehova, te Fatu hoi o te Bibilia, ia maramarama outou i ta ˈna Parau. E nafea râ ïa outou? Na mua, a ani i te tauturu a te Fatu.

I hiˈohia na te mau aposetolo a Iesu ei feia “haapii-ore-hia . . . e te itea ore,” no te mea aita ratou i fanaˈo i te hoê faaineineraa faaroo i te mau haapiiraa a te mau rabi. (Ohipa 4:13) Ua haapapu râ Iesu ia ratou e e nehenehe ratou e maramarama i te Parau a te Atua. E nafea? Ua faataa Iesu: ‘Na te faaaˈo, na te varua moˈa, o ta te Metua e tono mai ma to ˈu nei iˈoa, na ˈna e haapii mai ia outou i te mau mea atoa.’ (Ioane 14:26) Ua faaohipa te Atua i to ˈna varua moˈa, aore ra puai ohipa, no te poiete i te fenua e te mau  mea ora atoa i nia iho. (Genese 1:2) Ua faaohipa atoa oia i te reira no te faauru e 40 taata no te papai i to ˈna mau manaˈo i roto i te Bibilia. (Petero 2, 1:20, 21) E tauturu taua noa varua ra i te feia e imi ra i te maramarama i te Bibilia.

E nafea e noaa ˈi ia outou te varua moˈa o te Atua? Ia ani ïa outou ma te faaroo e ma te tamau atoa paha e tia ˈi. “E ani [noa], e noaa ïa ia outou,” ta Iesu ïa i parau. ‘Te ite na outou i te horoa i te mea maitai na ta outou tamarii, e rahi atu ïa to outou Metua i te ao ra i te horoa i te varua moˈa i te feia i ani atu ia ˈna.’ (Luka 11:9, 13) Ua ineine Iehova i te horoa i to ˈna varua moˈa i te feia e ani atu ia ˈna ma te haavare ore. E tauturu taua puai ohipa ra ia outou ia taa i te auraa o te mau parau faaurua i papaihia i roto i te Bibilia a tausani matahiti aˈenei. E tauturu atoa te varua o te Atua ia outou ia ite e nafea ia faaohipa i te poroi puai o te Bibilia i roto i to outou oraraa.—Hebera 4:12; Iakobo 1:5, 6.

No reira, i te mau taime atoa e taio ai outou i te Bibilia, a pure i te Atua no te ani i te tauturu a to ˈna varua moˈa ia maramarama outou i ta ˈna Parau.