E nehenehe anei tatou e maramarama i te Bibilia?
E nehenehe anei tatou e maramarama i te Bibilia?
“E taio to matou utuafare i te Bibilia i te mau Tapati atoa. Aita râ vau i anaanatae roa. Ua ite au e e Parau na te Atua te Bibilia, te rahiraa râ o te mau mea ta ˈu i taio, mea fifi roa ïa ia maramarama.”—Steven, Beretane.
“I te 17raa o to ˈu matahiti, ua tamata vau i te taio i te Bibilia. No te mea râ e mea fifi no ˈu ia maramarama, ua faaea ˈtura vau.”—Valvanera, Paniora.
“I taio na vau i te Bibilia no te mea ei Katolika mea titauhia ia na reira. E toru matahiti i hope ai ia ˈu te taioraa! Maa vahi iti noa râ ta ˈu i maramarama mai.”—Jo-Anne, Auteralia.
O TE Bibilia noa te buka matau-roa ˈˈe-hia e te hoo-roa ˈˈe-hia i te ao nei. E fanaˈo ïa e rave rahi atu â taata i te reira na roto e rave rau reo e ravea, mai te ripene haruharu e video. Teie râ, no te feia e Bibilia ta ratou, mea fifi ïa ia maramarama i te reira. No oe atoa anei ïa?
Te hinaaro ra anei te Fatu ia maramarama tatou i ta ˈna Parau?
Te faaite ra te Bibilia: “Te mau parau moˈa atoa i papaihia ra e mea faaurua mai ïa e te Atua.” (Timoteo 2, 3:16) O te Atua ra o Iehova iho â te Fatu o te Bibilia. Te hinaaro ra anei o ˈna ia maramarama tatou i ta ˈna Parau? Aore ra ua opua anei oia eiaha te taata atoa e maramarama i te reira, te tahi pae noa râ, mai te mau ekalesiatiko e aivanaa bibilia?
A hiˈo na i teie mau irava o te Bibilia:
“E ere . . . teie nei parau ta ˈu e parau atu ia oe i teie nei mahana i te mea itea ore e oe ra, e ere hoi tei te atea ê.”—Deuteronomi 30:11.
“Tei te heheuraa o ta oe ra parau e noaa ˈi te maramarama, e noaa ˈi hoi te ite i te taata ite ore ra.”—Salamo 119:130.
“Oaoa ˈtura [Iesu] i taua hora ra, na ô atura, E haamaitai au ia oe, e tau Metua, e te Fatu o te raˈi e te fenua, i te mea, huna ê noâ oe i teie nei mau parau i te feia paari e te ite ra, ua faaite mai oe i te tamarii nei.”—Luka 10:21.
Te hinaaro ra iho â te Fatu o te Bibilia ia maramarama outou i ta ˈna Parau! No te taata aau haavare ore e rave rahi râ, mea fifi ïa. Te vai ra anei te ravea? Te faataa ra te mau tumu parau i muri iho e toru manaˈo tauturu e maramarama ˈi outou i te Bibilia.