Ua ite-faahou-hia te tiaturiraa o te ora mure ore i te fenua

“E Daniela, e opani i teie nei mau parau . . . e tae noa ˈtu i te tau hopea ra: e rave rahi hoi te horo i nia e i raro, e tupu atura te ite i te rahiraa.”—DAN. 12:4.

1, 2. Eaha te mau uiraa e hiˈopoahia i roto i teie tumu parau?

 UA MARAMARAMA maitai te mau mirioni taata i teie mahana i te tiaturiraa niuhia i nia i te Bibilia e ora e a muri noa ˈtu i te hoê fenua paradaiso. (Apo. 7:9, 17) I te haamataraa o te tuatapaparaa o te huitaata, ua faaite te Atua e ua hamanihia te taata ia ora oia e a muri noa ˈtu, eiaha râ tau matahiti noa a pohe atu ai.—Gen. 1:26-28.

² Te hoˈi-faahou-raa te huitaata i te tia-roa-raa ta Adamu i ere, e tuhaa ïa o te tiaturiraa o Iseraela. Te faataa ra te mau Papai Heleni Kerisetiano e nafea te Atua e horoa ˈi i te ora mure ore no te huitaata i te Paradaiso i te fenua. No te aha hoi e mea tia ˈi ia ite-faahou-hia ta te taata i tiaturi na? Mea nafea te reira i te faaiteraahia ˈtu i te mau mirioni taata?

Ua haapourihia te hoê tiaturiraa

3. No te aha e ere ai i te mea maere e ua haapourihia te tiaturiraa o te ora mure ore i te fenua no te huitaata?

³ Ua tohu Iesu e e ruri ê te mau peropheta haavare i ta ˈna mau haapiiraa e e vare te rahiraa o te taata. (Mat. 24:11) Ua faaara te aposetolo Petero i te mau Kerisetiano: “E riro atoa i te orometua haavare to roto ia outou.” (Pet. 2, 2:1) Ua faahiti te aposetolo Paulo i “te tau e ore ai [te taata] e farii i te parau mau, no te anoenoe ra o to ratou tariˈa, e haaputu ïa ratou i te orometua i au i to ratou iho hinaaro.” (Tim. 2, 4:3, 4) O Satani hoi te tumu no te haavare i te taata e ua faaohipa oia i te Amuiraa faaroo Kerisetiano apotata no te haapouri i te parau mau mahanahana o te opuaraa a te Atua no te taata e te fenua.—A taio i te Korinetia 2, 4:3, 4.

4. Ua faarue te mau aratai haapaoraa apotata i teihea tiaturiraa no te huitaata?

⁴ Te faataa ra te Bibilia e e faatereraa te Basileia o te Atua i te raˈi, e na te reira e tuparari e e haamou i te mau hau taata atoa. (Dan. 2:44) I te faatereraa tausani matahiti a te Mesia e hurihia ˈi e e tapeahia ˈi Satani i roto i te abuso, e faatia-faahou-hia ˈi tei pohe, e e faahoˈihia ˈi te huitaata i te tia-roa-raa i te fenua. (Apo. 20:1-3, 6, 12; 21:1-4) Ua rave mai râ te mau aratai haapaoraa apotata a te Amuiraa faaroo Kerisetiano i te tahi atu mau manaˈo. Ei hiˈoraa, ua faahapa Origène no Alexandrie, te Metua o te Ekalesia no te senekele toru i te feia i tiaturi e e hopoi mai te anotau tausani matahiti i te mau haamaitairaa i te fenua. “Ua paturu” Augustin no Hippone (354-430 o to tatou tau) taata maimi i te pae faaroo Katolika “i te manaˈo e aita e anotau tausani matahiti,” ta te hoê titionare (The Catholic Encyclopedia) e parau ra. a

5, 6. No te aha Origène raua o Augustin i patoi ai i te tiaturiraa i te anotau tausani matahiti?

⁵ No te aha Origène raua o Augustin i patoi ai i te tiaturiraa i te anotau tausani matahiti? Ua rave mai Origène i te manaˈo o te varua pohe ore i ǒ te taˈere Heleni. Te tapao ra Werner Jaeger, taata maimi i te pae faaroo e “ua faaô” Origène “i te manaˈo o Platon no nia i te varua pohe ore i roto i te tooma Kerisetiano” no te mea ua riro roa Origène i te manaˈo o  Platon. No reira, ua haapii atu Origène e e tupu te mau haamaitairaa o te anotau tausani matahiti i roto i te ao varua, eiaha râ i nia i te fenua.

⁶ I te 33raa o to Augustin matahiti, ua fariu oia i te Kerisetiano apotata. Hou râ i te reira, ua riro o ˈna ei taata paturu i te philosophia a Platon tei faaapîhia e Plotin i te senekele toru. I muri aˈe i to Augustin fariuraa, tera noa iho â to ˈna manaˈo. “Tei roto i to ˈna feruriraa te anoiraahia te mau haapiiraa a te Faufaa Apî e te tutuu a Platon o te philosophia Heleni,” ta te hoê titionare (The New Encyclopædia Britannica) e parau ra. Ua parau te tahi atu titionare (The Catholic Encyclopedia) e te faataa ra Augustin e “e faahohoˈaraa taipe noa” te Faatereraa tausani matahiti o te Apokalupo pene 20. Te na ô faahou ra ïa: “Ua fariihia teie tatararaa . . . e te feia maimi faaroo Heleni-Roma, e aita ˈtura te tiaturiraa tumu i te anotau tausani matahiti i turu-faahou-hia.”

7. Eaha te tiaturiraa hape tei faaino riirii i te tiaturiraa o te ora mure ore i te fenua no te taata e mea nafea?

⁷ Ua faaino-riirii-hia te tiaturiraa o te ora mure ore i te fenua no te huitaata e te manaˈo e varua pohe ore to te taata no ǒ roa mai ia Babulonia i tahito ra e o tei parare e ati aˈe te ao. I to te Amuiraa faaroo Kerisetiano fariiraa i tera manaˈo, ua ruri ê te feia maimi i te pae faaroo i te mau Papai tei faataa i te tiaturiraa e ora i te raˈi no te haapii atu ïa e haere te feia maitai atoa i te raˈi. Ia au i teie manaˈo, e oraraa poto noa to te hoê taata i te fenua ei tamataraa no te ite e e au anei ia ˈna ia haere i te raˈi. Tera atoa tei tupu i te tiaturiraa tumu ati Iuda o te ora mure ore i te fenua. I to te ati Iuda farii-rii-raa i te manaˈo Heleni o te pohe-ore-raa te hoê tuhaa i roto i te tino taata, ua moe to ratou tiaturiraa matamua e ora e a muri noa ˈtu i te fenua. E mea taa ê mau te reira i te faataaraa a te Bibilia! E tino iˈo to te taata, e ere i te tino varua. Ua parau Iehova i te taata matamua: “E repo hoi oe.” (Gen. 3:19) O te fenua te nohoraa mure ore o te taata, eiaha râ te raˈi.—A taio i te Salamo 104:5; 115:16.

Te anaparaa te parau mau i roto i te pouri

8. Eaha ta te tahi feia ite o te mau matahiti 1600 i parau no nia i ta te taata i tiaturi na?

⁸ Noa ˈtu e aita te rahiraa o te mau haapaoraa faahua Kerisetiano i haapii i te tiaturiraa o te ora mure ore i te fenua, aita Satani i manuïa, i te mau tau atoa, i te haapouri i te parau mau. I te roaraa o te tau, mea iti roa te feia taio maite i te Bibilia i ite i te anaparaa te parau mau i to ratou maramaramaraa i te tahi mau tuhaa o te raveraa a te Atua no te faahoˈi i te huitaata i te tia-roa-raa. (Sal. 97:11; Mat. 7:13, 14; 13:37-39) Mai te mau matahiti 1600, ua hurihia e ua neneihia te Bibilia a noaa ohie ai i te taata te mau Papai Moˈa. I 1651, ua papai te hoê taata ite e na roto ia Adamu te taata “i ere ai i te Paradaiso, e te Oraraa Mure Ore i te Fenua,” na roto hoi ia Iesu “e hope ai te taata atoa i te ora i te Fenua.” (A taio i te Korinetia 1, 15:21, 22.) Ua papai te hoê rohipehe reo Beretane tuiroo o John Milton (1608-1674), i te buka Paradaiso i moe e te buka hopea Paradaiso faahou â. Te faahiti ra Milton i roto i teie na buka, i te utua maitai ta te feia taiva ore e fanaˈo i te fenua paradaiso. Noa ˈtu e ua faahohonu Milton i te Bibilia i to ˈna oraraa  taatoa, ua ite o ˈna e eita e taa-roa-hia te parau mau e tae roa ˈtu i te vairaa mai o te Mesia.

9, 10. (a) Eaha ta Isaac Newton i papai no nia i te tiaturiraa o te huitaata? (b) No te aha Newton i manaˈo ai e e mea maoro roa te vairaa mai o te Mesia?

⁹ Ua anaanatae roa atoa Isaac Newton tane e matematika tuiroo (1642-1727) i te Bibilia. Ua taa ia ˈna e e faatiahia te feia moˈa no te ora i te raˈi e no te faatere ma te itea ore e te Mesia. (Apo. 5:9, 10) Ua papai oia no te mau melo huiraatira o te Basileia: “E taata-noa-hia te fenua e te feia tahuti noa i muri aˈe i te mahana haavaraa e e ora ratou e a muri noa ˈtu eiaha râ 1 000 matahiti anaˈe iho.”

¹⁰ Ua manaˈo Newton e e mea maoro roa te vairaa mai o te Mesia, e rave rahi ïa senekele. Ua parau te taata tuatapapa o Stephen Snobelen: “No te aha hoi Newton i manaˈo ai, tei te tau no a muri roa ˈˈe te Basileia o te Atua? No te mea ua taiâ roa oia i te taivaraa rahi o te feia turu i te Toru Tahi na pihai iho ia ˈna.” Ua huna-noa-hia te parau apî maitai. Aita hoi Newton i ite i te hoê taatiraa Kerisetiano te nehenehe e poro i te reira. Ua papai oia: “Eita iho â e taahia teie mau parau tohu a Daniela e a Ioane [ta Ioane i papai i roto i te Apokalupo] e tae roa ˈtu ai i te anotau hopea.” Ua faataa Newton: “‘E,’ ta Daniela i parau, ‘e rave rahi hoi te horo i nia e i raro, e tupu atura te ite i te rahiraa.’ Ia porohia te Evanelia i te mau fenua atoa hou te ati rahi e te hopea o teie nei ao e tia ˈi. E ore e pau ia taio te feia rahi roa e tamara i to ratou rima tei haere mai mai roto mai i te ati rahi, ahiri e aita te pororaa i te Evanelia hou te hopea e tae mai ai.”—Dan. 12:4; Mat. 24:14; Apo. 7:9, 10.

11. No te aha i haapourihia ˈi te tiaturiraa o te huitaata no te rahiraa o te taata i te tau o Milton raua Newton?

¹¹ E mea atâta roa i te tau o Milton raua Newton ia faaite i te mau manaˈo taa ê i te tooma haamanahia a te haapaoraa. I muri aˈe râ i to raua poheraa i neneihia ˈi ta raua mau maimiraa no nia i te Bibilia. I te senekele 16, ua faarue vetahi i te haapaoraa Katolika e te tahi o ta ratou mau haapiiraa. Ua parauhia ratou e Porotetani. Aita râ te reira i taui i te haapiiraa no nia i te pohe-ore-raa te hoê tuhaa i roto i te tino taata. Ua tamau noa te mau Ekalesia Porotetani tumu i te haapii i to Augustin manaˈo e ere te anotau tausani matahiti no a muri aˈe, ua mairi aˈena râ. Ua haere anei te ite i te rahi i te anotau hopea?

‘E tupu te ite i te rahiraa’

12. Anafea te ite mau i te tupuraa i te rahi?

¹² No nia i “te tau hopea,” ua tohu Daniela i te hoê haereraa i mua maitai roa. (A taio i te Daniela 12:3, 4, 9, 10.) Ua tohu atoa Iesu: “Ei reira te feia parau-tia e anaana mai ai . . . mai te anaana o te mahana.” (Mat. 13:43) Mea nafea te ite mau i te tupuraa i te rahi i te tau hopea? E hiˈopoa anaˈe i te tahi mau haereraa i mua tei tupu i te mau matahiti 1870 e tae atu i 1914, te matahiti ïa i haamata ˈi te tau hopea.

13. Eaha ta Charles Taze Russell i papai i muri aˈe i te hiˈopoaraa i te tumu parau o te noaa-faahou-raa te tia-roa-raa?

¹³ I te hopea o te mau matahiti 1800, ua maimi haere maa taata haavare ore ia maramarama ratou i “te hiroa parau mau” (Tim. 2, 1:13) O Charles Taze Russell te tahi. I 1870, ua haamau oia e te tahi atu feia imi i te parau mau i te hoê pǔpǔ haapiiraa i te Bibilia. I 1872, ua hiˈopoa ratou i te tumu parau o te noaa-faahou-raa te tia-roa-raa. I muri aˈe, ua papai Russell: “Tae roa i taua taime ra, aita matou i maramarama maitai i te taa-ê-raa rahi i rotopu i te utua maitai no te ekalesia (te amuiraa o te mau Kerisetiano faatavaihia) e tamatahia ra i teie nei e te utua maitai no te huitaata taiva ore.” Teie ïa te piti o te utua maitai “te noaa-faahou-raa i te taata te tia-roa-raa i fanaˈohia na i Edene e to ratou metua e upoo o Adamu.” Ua farii Russell e ua tauturuhia o ˈna e vetahi i roto i ta ˈna haapiiraa i te Bibilia. O vai ma ïa?

14. (a) Mea nafea Henry Dunn i taa ˈi i te Ohipa 3:21? (b) O vai ma ta Dunn i parau e ora e a muri noa ˈtu i te fenua?

¹⁴ O Henry Dunn te tahi atu. Ua papai oia no te tau “e tia ˈi te mau mea atoa nei, ta te Atua i parau mai i te vaha o te mau peropheta moˈa atoa no ˈna mai te matamua mai â.” (Ohi. 3:21)  Ua ite Dunn e te noaa-faahou-raa te tia-roa-raa o te faahoˈi-faahou-raa ïa te huitaata i te tia-roa-raa i te fenua i raro aˈe i te Faatereraa tausani matahiti a te Mesia. Ua hiˈopoa atoa Dunn i te hoê uiraa ta e rave rahi i uiui na, O vai ma hoi te ora e a muri noa ˈtu i te fenua? Ua faataa oia e e mirioni taata te faatia-faahou-hia, te haapiihia te parau mau, e te nehenehe e faatupu i te faaroo i te Mesia.

15. Eaha ta George Storrs i haroaroa no nia i te tia-faahou-raa?

¹⁵ I 1870, ua faaoti atoa George Storrs e e faatia-faahou-hia te feia parau-tia ore ia noaa paha ia ratou te ora mure ore. Ua ite maite atoa oia i roto i te mau Papai e noa ˈtu e ‘hoê hanere matahiti to te taata rave hara’ tei faatia-faahou-hia e “pohe” ïa o ˈna no te mea aita oia i haafaufaa i te reira. (Isa. 65:20) Ua noho Storrs i Brooklyn, New York, e ua nenei oia i te hoê vea Hiˈopoaraa i te Bibilia (Beretane).

16. No te aha i taa ê roa ˈi te Feia haapii Bibilia i te rahiraa o te Amuiraa faaroo Kerisetiano?

¹⁶ Ua ite maite Russell i roto i te Bibilia e ua tae te tau ia parare te parau apî maitai. No reira i 1879, ua haamata oia i te nenei i Te Pare Tiairaa a Ziona e te Vea o te vairaa mai o te Mesia (Beretane), tei parauhia i teie nei Te Pare Tiairaa e faaite ra i te Basileia o Iehova. Na mua ˈˈe, e mea iti roa te taata tei ite i te parau mau no nia i te tiaturiraa no te huitaata. I teie nei râ e pǔpǔ Feia haapii Bibilia o te fenua e rave rahi te fanaˈo ra e te haapii ra i Te Pare Tiairaa. Mea taa ê roa te Feia haapii Bibilia i te rahiraa o te Amuiraa faaroo Kerisetiano no to ratou tiaturiraa e mea iti te haere i nia i te raˈi, e mirioni râ te nehenehe e ora ma te tia roa i te fenua.

17. Mea nafea te tupuraa te ite mau i te rahi?

¹⁷ Ua haamata “te tau hopea” i tohuhia i 1914. Ua tupu anei te ite mau no nia i te tiaturiraa no te huitaata i te rahiraa? (Dan. 12:4) Ia tae i 1913, ua neneihia te mau oreroraa a Russell i roto e 2 000 vea e 15 000 000 rahiraa taata i taio. I te hopea o te 1914, ua mataitai e 9 000 000 e tiahapa taata i roto e toru fenua rarahi i te “Hohoˈa Darama o te Poieteraa” (Beretane). E hohoˈa taviri ïa e oia atoa te pataraa hohoˈa tei faataa i te Faatereraa tausani matahiti a te Mesia. Mai te 1918 e tae atu i te 1925, ua vauvau te mau tavini a Iehova i te oreroraa parau “E ore roa te mau mirioni taata e ora ra i teie nei  e pohe.” Ua faataahia te tiaturiraa o te ora mure ore i te fenua na roto e 30 e tiahapa reo i te ao nei. Mai 1934 mai â, ua taa i te mau Ite no Iehova e e mea tia ia bapetizo te feia e tiaturi ra e ora i te fenua e a muri noa ˈtu. I to ratou maramaramaraa i te reira ua itoito faahou roa ratou no te poro i te parau apî maitai o te Basileia. Ua mauruuru roa te mau mirioni taata ia Iehova no te tiaturiraa o te ora mure ore i te fenua.

Te tiamâ hanahana a muri aˈe!

18, 19. Teihea huru oraraa tei tohuhia i roto i te Isaia 65:21-25?

¹⁸ Ua turai te varua i te peropheta Isaia ia papai no nia i te huru oraraa ta te nunaa o te Atua e fanaˈo i te fenua. (A taio i te Isaia 65:21-25.) Te ora noa nei â vetahi tumu raau i ora na e 2 700 matahiti aˈenei i to Isaia papairaa i teie mau parau. Te ite ra anei oe ia oe e te tino pautuutu e te oraora maitai e a tau a hiti noa ˈtu?

¹⁹ E ravea hope ore to tera oraraa no te patu, te tanu e te haapii, e ere râ mai teie nei e oraraa ahoaho poto. A manaˈo noa na i te mau taata ta oe e faahoa ˈtu. E rahi noa ˈtu â teie taairaa piri î i te here e a muri noa ˈtu. E fanaˈo ïa tatou i “te tiamâ maitai,” aore ra hanahana “o te tamarii a te Atua” i te fenua.—Roma 8:21.

[Nota i raro i te api]

E nehenehe anei outou e faataa?

• Mea nafea te haapouriraahia te tiaturiraa no te huitaata e ora i te fenua?

• Ua maramarama vetahi feia taio Bibilia i te aha i te mau matahiti 1600?

• A piri ai te 1914, mea nafea i maramarama ˈi te tiaturiraa mau no te huitaata?

• Mea nafea te tupuraa te ite no nia i te tiaturiraa no te ora i te fenua i te rahi?

[Uiraa haapiiraa]

[Hohoˈa i te api 19]

Ua ite te rohi pehe o Milton (i te pae aui) e te matematika o Isaac Newton (i te pae atau) i te tiaturiraa o te ora mure ore i te fenua

[Hohoˈa i te api 21]

Ua ite maite te Feia haapii Bibilia matamua i roto i te mau Papai e ua tae i te tau ia faaitehia te tiaturiraa mau no te huitaata ati aˈe te ao