Taoˈa rahi no ǒ mai i te Atua ra

MAI te peu e e taata haapao maitai outou i te Atua, e faaona anei oia ia outou? Peneiaˈe e, eiaha râ i te huru taoˈa rahi ta outou e tiaturi ra. A hiˈo na ia Maria, te metua vahine o Iesu. Ua fa ˈtu te melahi Gaberiela ia ˈna ma te parau atu e mea “here-hua-hia” oia e te Atua e e fanau mai oia i ta ˈNa Tamaiti. (Luka 1:28, 30-32) E ere hoi oia i te vahine taoˈa rahi. I muri aˈe i te fanauraa o Iesu, ua pûpû Maria ei tusia “e piti uupa, e aore ra, e piti uuairao fanauˈa,” ta te feia veve hoi i matau i te horoa na Iehova.—Luka 2:24; Levitiko 12:8.

E vahine veve o Maria, te auraa anei ïa e aita te Atua i haamaitai ia ˈna? E ere, i to ˈna haereraa e hiˈo i to ˈna fetii ia Elisabeta, ‘î aˈera Elisabeta i te varua maitai [aore ra moˈa], e ua pii hua maira te reo, na ô maira, O oe [Maria] tei hau i te maitai i te vahine nei, e e maitai hoi te huaai o to oe opu.’ (Luka 1:41, 42) Mea fanaˈo Maria i te riroraa ei metua vahine i te fenua no te Tamaiti here a te Atua.

E ere o Iesu i te taata taoˈa rahi. Ua fanauhia e ua paari mai oia i rotopu i te mau taata riirii. E taata veve oia i te roaraa o to ˈna oraraa i te fenua nei. Ua parau oia i te hoê taata tei hinaaro e riro ei pǐpǐ na ˈna: “E ana to te alope, e tauraa to te manu o te reva; area te Tamaiti a te taata nei, aita o ˈna tuâroi.” (Luka 9:57, 58) Auaˈe râ Iesu Mesia i haere mai i te fenua i taoˈa-rahi-hia ˈi ta ˈna mau pǐpǐ. Ua papai te aposetolo Paulo: “No outou . . . riro mai nei oia ei veve, ia rahi ta outou taoˈa i taua veve no ˈna ra.” (Korinetia 2, 8:9) Teihea huru taoˈa ta Iesu i horoa na ta ˈna mau pǐpǐ? E i teie mahana ïa?

Teihea huru taoˈa?

E haafifi pinepine te faufaa materia i te faaroo, i te mea e e tiaturi te hoê taata taoˈa rahi i ta ˈna moni eiaha râ i te Atua. Ua parau Iesu: “Te faaô taiata o te feia taoˈa rahi i te Basileia o te Atua e!” (Mareko 10:23) Te taa ra ïa ia tatou e e ere te moni te mau  taoˈa rahi ta Iesu i horoa na ta ˈna mau pǐpǐ.

Mea veve te rahiraa o te mau Kerisetiano i te senekele matamua. I te aniraa te hoê taata pirioi mai te fanauraa mai i te moni, ua pahono Petero: “Aita a ˈu ario e te auro, e ta ˈu râ e vai nei, o ta ˈu ïa e horoa ˈtu na oe: A tia oe i nia, a haere i te iˈoa o Iesu Mesia i Nazareta.”—Ohipa 3:6.

Te faaite atoa ra te pǐpǐ Iakobo e mea veve te rahiraa o te mau melo o te amuiraa Kerisetiano. Ua papai oia: “A faaroo mai na, e au mau taeae here e, E ere anei o te feia taoˈa ore o teie nei ao ta te Atua i maiti ei feia taoˈa i te faaroo ra, e ei feia aiˈa i te basileia ta ˈna i parau e horoa mai i te feia e hinaaro ia ˈna ra?” (Iakobo 2:5) Ua parau atoa te aposetolo Paulo e aita rea ‘taata paari i te pae tino’ aore ra “taata mana,” aore ra “taata teitei fanau[hia]” tei riro ei melo o te amuiraa Kerisetiano.—Korinetia 1, 1:26.

Mai te peu e te mau taoˈa rahi ta Iesu i horoa na ta ˈna mau pǐpǐ e ere te moni, eaha ïa? I roto i te hoê rata ta Iesu i faatae i te amuiraa no Semurina, ua parau oia: “Ua ite au i . . . to oe ati, e to oe veve, (e taoˈa rahi râ ta oe).” (Apokalupo 2:8, 9) Noa ˈtu to ratou veve, e taoˈa rahi faufaa aˈe i te ario e te auro ta te mau Kerisetiano i Semurina. Mea ona ratou no to ratou faaroo e hapa ore i te Atua. Mea faufaa roa te faaroo, ‘aita râ i ati paatoa te taata’ i te reira. (Tesalonia 2, 3:2) I te aro o te Atua, mea veve mau â te feia aita e faaroo to ratou.—Apokalupo 3:17, 18.

Taoˈa rahi maoti te faaroo

Eaha hoi te faufaa o te faaroo? E fanaˈo te feia e faaroo to ratou i te Atua i ‘ta  ˈna hamani maitai rahi e to ˈna faaoromai.’ (Roma 2:4) E ‘faaore-atoa-hia ta ratou hara’ no to ratou faaroo i te tusia taraehara o Iesu. (Ephesia 1:7) E fanaˈo atoa ratou i te huru paari ta “te parau a te Mesia” e horoa na te feia e faaroo to ratou. (Kolosa 3:16) Ia pure ratou i te Atua ma te faaroo, e faaitoito “te hau a te Atua, o tei hau ê atu i te ite taata nei” i to ratou aau e feruriraa, a ite atu ai ratou i te mauruuru e te oaoa.—Philipi 4:7.

Hau atu â i teie mau maitai atoa, e tiairaa faahiahia to te feia e tiaturi i te Atua na roto i ta ˈna Tamaiti, o Iesu Mesia, e ora e a muri noa ˈtu. Mea matauhia teie mau parau a Iesu Mesia: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16) E papu maitai teie tiaturiraa faufaa roa ia noaa i te taata te ite mau i te Metua e te Tamaiti, ua parau hoi Iesu: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.”—Ioane 17:3.

E haamaitai iho â te Atua i te pae varua, e maitai atoa râ te vai ra i te pae aau e te pae tino. A hiˈo na ia Dalídio i Beresilia. Hou oia a ite ai i te opuaraa a te Atua, mea inu roa o ˈna. Ua ino roa to ˈna oraraa utuafare. E fifi rahi atoa to ˈna i te pae moni. I muri aˈe, ua haapii oia i te Bibilia e te mau Ite no Iehova e ua taui roa oia.

Ua faaea o Dalídio i te rave i ta ˈna mau peu ino no ta ˈna i haapii i roto i te Bibilia. No te mea ua haere maitai roa oia i mua i te pae varua, ua parau oia, “I haere na vau na te mau fare inuraa; i teie nei na te mau fare ïa.” Ua riro oia ei tavini taime taatoa no te Parau a te Atua. Maoti taua tauiraa ra, ua maitai mai to ˈna oraraa i te pae o te ea e te pae moni. Ua parau Dalídio, “Te faaohipa nei au i te moni ta ˈu i hue na i roto i te ava, no te tauturu ia vetahi ê i roto i te fifi aore ra no te hoo mai i te mau mea ta ˈu e hinaaro mau.” Mea rahi atoa to ˈna hoa mau no to ˈna amuimuiraa i te feia e farii ra i te manaˈo o te Atua i nia i te mau mea. Te fanaˈo nei Dalídio i te hau o te feruriraa e te mauruuru, hau aˈe i ta ˈna e nehenehe e manaˈo hou to ˈna iteraa i te Atua.

O Renato te tahi atu taata ua maitai mai to ˈna oraraa ma te faatupu i te faaroo i te Atua ra o Iehova. Ia ite outou i to ˈna mata ataata e te oaoa i teie mahana, eita outou e manaˈo e ua rave-ino-hia oia. I to ˈna fanauraahia, ua faarue to ˈna mama ia ˈna. Ua tuuhia oia i roto i te hoê pute i raro aˈe i te hoê parahiraa. Ua pahure e ua pepe maitai oia e aita to ˈna pito i tâpûhia. Ua ite e piti vahine tei haere na reira i te hautiutiraa te pute. Ua manaˈo raua na mua e e fanauˈa mimi tei faaruehia i reira. I to raua iteraa e e aiû fanau apî, ua afai oioi raua ia ˈna i te hoê fare maˈi tapiri.

E Ite no Iehova hoê o na vahine, o tei faatia ia Rita, te tahi atu Ite, no nia i te aiû. E rave rahi taime to Rita fanauraa ua pohe ta ˈna aiû, e hoê anaˈe tamahine ta ˈna. No to ˈna hinaaro rahi i te tamaroa, ua faaamu oia ia Renato.

Ua faaite Rita ia Renato i to ˈna apîraa e e ere o ˈna to ˈna mama fanau. Ua aupuru râ oia ia ˈna ma te here e te aroha e ua tutava i  te haapii ia ˈna i te mau faaueraa tumu bibilia. I to ˈna paariraa mai, ua anaanatae Renato i te Bibilia. Ua rahi atoa to ˈna mauruuru no to ˈna faaoraraahia ma te manaˈo-ore-hia. E taˈi oia i te mau taime atoa e taio ai oia i ta te papai salamo Davida i parau: “Faarue noâ tau metua tane e tau metua vahine ia ˈu, ei reira Iehova e rave mai ai ia ˈu.”—Salamo 27:10.

Ei faaiteraa i to ˈna mauruuru no ta Iehova atoa i rave no ˈna, ua bapetizohia Renato i 2002 e ua riro oia ei tavini Kerisetiano taime taatoa i te matahiti i muri iho. Aitâ oia i ite atura o vai to ˈna na metua fanau e peneiaˈe eita roa ˈtu. Ua taa râ ia Renato e o te iteraa e te tiaturiraa ia Iehova ei Metua hamani maitai î i te here, hoê o te mau ô faufaa roa ˈˈe ta ˈna i fanaˈo.

Te hinaaro ra paha oe e faatupu i te hoê taairaa piri î i te here e te Atua, o te haamaitai mau â i to oe oraraa. O te taata atoa, ona e veve, te nehenehe e faatupu i te hoê taairaa e te Atua ra o Iehova e ta ˈna Tamaiti, o Iesu Mesia. Eita paha te reira e horoa mai i te faufaa materia, e hopoi mai râ i te hau o roto e te mauruuru ta te moni atoa i te ao nei e ore e tia ia hoo mai. Ua tano roa ta te Maseli 10:22 e parau ra: “Na Iehova te maitai i taoˈahia ˈi te taoˈa; e ore hoi e apiti-atoa-hia mai te ino i te reira.”

Te anaanatae roa ra te Atua ra o Iehova i te taata e haafatata ˈtu ia ˈna: “Ahiri oe i faaroo mai i te mau faaue na ˈu e; ua riro ïa to oe maitai mai te pape pue ra; e ta oe utua mai te are moana ra.” (Isaia 48:18) E te fafau ra oia e e haamaitai-rahi-hia te feia o te haafatata ˈtu ia ˈna ma te manaˈo turai e te haerea tia: “Te utua o te faahaehaa e te mǎtaˈu ia Iehova, o te taoˈa rahi ïa, o te tura ïa, o te ora ïa.”—Maseli 22:4.

[Parau iti faaôhia i te api 6]

E hopoi mai te faaroo i te Atua i te hau, te mauruuru, e te oaoa

[Hohoˈa i te api 5]

Noa ˈtu to ratou veve, ua haamaitai-rahi-hia to Iesu utuafare i te fenua e te Atua