Te hoê haava e turu maite ra i te mea tia
E haafatata ˈtu i te Atua
Te hoê haava e turu maite ra i te mea tia
E HOROA paha te hoê haava taata i te utua tano ore e te etaeta roa ino. E ere râ te Atua ra o Iehova mai te reira, ‘mea au hoi na ˈna te parau-tia.’ (Salamo 37:28) Mea faaoromai oia, eita râ e faatia noa. E turu maite oia i te mea tia. A hiˈo na e ua nafea oia a tupu ai te hoê peapea e orureraa hau, tei faatiahia i roto i te Numera pene 20.
A fatata ˈi to ratou overe-haere-raa na te medebara i te hope, ua ere te mau Iseraela i te pape. a Ua haamata ihora te nunaa i te mârô ia Mose raua Aarona: “Eaha hoi orua i aratai mai ai i te amuiraa i ǒ nei i teie nei medebara, ia pohe matou e ta matou mau puaa atoa i ǒ nei?” (Irava 4) Ua autâ te nunaa e e “vahi ino” te medebara, e vahi “suke ore, e te vine ore, e te remuna ore”—te maa hotu iho ta te mau manu Iseraela i faahoˈi mai mai te Fenua Tǎpǔhia mai tau matahiti na mua ˈtu—e e vahi “pape ore hoi ia inu.” (Irava 5; Numera 13:23) Te auraa, te faahape ra ïa ratou ia Mose raua Aarona e e ere te medebara mai te fenua hotu maitai ta to ratou mau metua ohumu i patoi i te tomo atu!
Aita Iehova i faarue i te feia ohumu, ua faaue râ oia ia Mose ia rave e toru mea: e rave i ta ˈna raau, e haaputuputu i te nunaa, e “a parau atu ai i te mato i mua mau i to ratou mata; e na te reira e tuu mai i te pape.” (Irava 8) Ua auraro Mose i na faaueraa matamua e piti, aita râ i haapao i te toru. Aita oia i parau i te mato ma te faaroo ia Iehova, ma te inoino râ ua na ô oia i te nunaa: “A faaroo mai na, tena na mau faaroo-atâ; e tia anei ia mâua ia hopoi atu i te pape na outou no roto i teie nei mato?” (Irava 10; Salamo 106:32, 33) Tairi ihora Mose i te mato e piti aˈe taime, “ua tahe maira te pape e mea rahi roa.”—Irava 11.
Ua hara ino mau Mose e o Aarona atoa. “Ua haapao-atâ orua i ta ˈu parau,” ta te Atua i na ô atu ia raua. (Numera 20:24) No to raua auraro-ore-raa i ta te Atua faaueraa i taua taime ra, ua riro maira Mose raua Aarona ei haapao-atâ, aore ra orure hau, mai ta raua i faahapa na i te nunaa. Mea papu maitai ta te Atua haavaraa: Eita Mose raua Aarona e aratai roa ia Iseraela i te Fenua Tǎpǔhia. Mea etaeta roa anei te utua? Aita. No teie mau tumu.
A tahi, aita te Atua i faaue ia Mose ia paraparau i te nunaa, e aita atoa i faaue atu ia faahapa ia ratou ei faaroo-atâ, aore ra orure hau. A piti, aita Mose raua Aarona i faahanahana i te Atua. ‘Aita aˈenei orua i faatura ia ˈu,’ ta te Atua i parau. (Irava 12) Ma te parau “e tia anei ia mâua ia hopoi atu i te pape,” mai te huru ra ïa te parau ra Mose e na ˈna e o Aarona—eiaha râ te Atua—i faatahe semeio mai i te pape. A toru, ua tano maitai te utua e ta ˈNa mau haavaraa i tahito ra. Aita te Atua i farii ia tomo atu te ui orure hau i na mua ˈtu i Kanaana, ua na reira atoa ïa oia ia Mose raua Aarona. (Numera 14:22, 23) A maha, e aratai hoi raua no Iseraela. I te aro o te Atua, mea rahi te titauhia i te feia e amo ra i te hopoia e rave rahi.—Luka 12:48.
Mea turu maite Iehova i te mea tia. No te mea mea au na ˈna te parau-tia, eita roa ˈtu oia e faautua ma te tano ore. Oia mau, e au i taua Haava ra to tatou tiaturi e to tatou faatura.
[Nota i raro i te api]
a I muri aˈe i te faarueraa ia Aiphiti, ua ineine te mau Iseraela i te tomo i Kanaana, te fenua ta te Atua i tǎpǔ ia Aberahama. No te faatiaraa ino râ a na manu 10, ua amuamu ihora te nunaa ia Mose. No reira, ua faaoti Iehova e e faaea ratou e 40 matahiti i roto i te medebara, te maororaa e tano ia pohe te mau melo orure hau o taua ui ra.