A oaoa noa i te taime fifi
A oaoa noa i te taime fifi
“O te feia atoa . . . e tiaturi ia [Iehova] ra, ia oaoa ïa, ia faateitei i te reo i te oaoa eiaha ia mure.”—SAL. 5:11.
1, 2. (a) Eaha te faatupu i te ahoaho rahi i teie mahana? (b) Hau atu â i te mau ati matarohia, eaha ta te mau Kerisetiano mau e faaoromai?
E ROOHIA atoa te mau Ite no Iehova i te ati tei tupu i nia i te huitaata. Te fifihia ra e rave rahi o te nunaa o te Atua i te tamaˈi, te mau ohipa ino e te tia ore. E faatupu te mau ati natura, te veve, te maˈi e te pohe i te ahoaho rahi. Ua tano ïa te aposetolo Paulo i te papairaa: “Ua ite . . . tatou e, te uuru tahi nei te mau mea atoa i hamanihia nei ma te mauiui . . . e tae roa aˈenei i teie nei mahana.” (Roma 8:22) Te haafifi atoa ra to tatou huru tia ore ia tatou. E nehenehe tatou e parau mai te arii Davida: “Ua na nia ta ˈu nei mau hara i tau upoo, mai te hopoia teiaha e ore e maraa ia ˈu.”—Sal. 38:4.
2 Hau atu â i te mau ati tei matarohia e te huitaata, e amo te mau Kerisetiano mau i ta ratou pou haamauiuiraa taipe. (Luka 14:27) Mai ia Iesu, e ririhia e e hamani-ino-hia ta ˈna mau pǐpǐ. (Mat. 10:22, 23; Ioa. 15:20; 16:2) E titau ïa te peeraa i te Mesia ia faaitoito hua e ia faaoromai tatou a tiai noa ˈi i te mau haamaitairaa o te ao apî.—Mat. 7:13, 14; Luka 13:24.
3. Mea nafea tatou i ite ai e aita te Atua e hinaaro ra ia ora tatou i te hoê oraraa oto e te mauiui?
3 Te faaite ra anei te reira e e oraraa oaoa ore to te mau Kerisetiano mau? E oraraa oto e te mauiui anei to tatou e tae roa ˈtu i te hopea? Te hinaaro mau ra hoi Iehova ia oaoa tatou a tiai noa ˈi ia tupu ta ˈna i fafau. Te faataa pinepine ra te Bibilia e e nunaa oaoa te feia haamori mau. (A taio i te Isaia 65:13, 14.) Te na ô ra te Salamo 5:11: “O te feia atoa . . . e tiaturi ia [Iehova] ra, ia oaoa ïa, ia faateitei i te reo i te oaoa eiaha ia mure.” E nehenehe tatou e ite i te oaoa rahi, te hau o te feruriraa, e te mauruuru noa ˈtu e tei roto tatou i te ati. E hiˈo anaˈe e nafea te Bibilia e tauturu ai ia tatou ia faaû i te mau fifi e ia oaoa noa râ.
Iehova, te Atua oaoa
4. Mai te aha to te Atua huru a patoihia ˈi ta ˈna faatereraa?
4 Te horoa ra Iehova i te hiˈoraa. Ei Atua Manahope, te faatere ra o ˈna i te ao taatoa. Aita oia e ere ra i te tahi aˈe mea e navai noa o ˈna ia ˈna iho. Noa ˈtu to ˈna mana hau ê, ua huru ê mau Iehova i te orureraa te hoê o ta ˈna tamarii varua tei riro mai ei Satani. I muri aˈe, ua aehuehu te Atua i to te tahi atu â mau melahi tururaa i te orure hau. A manaˈo atoa na i te mauiui o te Atua i to Adamu raua Eva, te tuhaa maitai roa o ta ˈna poieteraa i te fenua, faarueraa ia ˈna. Mai reira mai, ua patoi te rahiraa o ta raua huaai i te faatereraa a Iehova.
5. E ahoaho Iehova i te aha?
5 Te uˈana noa ˈtura te orureraa a Satani. Fatata e 6 000 matahiti to Iehova hiˈo-noa-raa i te haamori idolo, te haavîraa uˈana, te taparahiraa taata, e te taiataraa faufau. (Gen. 6:5, 6, 11, 12) Hau atu â, ua faaroo oia i te mau haavare e pariraa ino mau. I te tahi taime, ua oto atoa te Atua i te haerea o te feia e haamori mau ra ia ˈna. Te faaite ra te Bibilia i teie huru tupuraa: “Te pinepine o ta ratou faaoooraa ˈtu ia ˈna i te fenua moemoe ra e! e te pinepine hoi o ta ratou faaririraa ˈtu [aore ra faaotoraa] ia ˈna i te medebara! Oia ïa, ua na nia iho ua na nia iho ratou i te faaooo i te Atua e ua aa ˈtu [aore ra haamauiui] i Tei Moˈa i Iseraela nei.” (Sal. 78:40, 41) E mauiui rahi to Iehova ia patoi to ˈna nunaa ia ˈna. (Ier. 3:1-10) E fa mai iho â te mau ohipa iino, e ia tupu te reira e ahoaho ïa Iehova.—A taio i te Isaia 63:9, 10.
6. E nafea Iehova e faaruru ai i te mau tupuraa ahoaho?
6 Aita râ te mauiui e te huru ê i tapea ia Iehova i te ohipa. I te faraa mai te fifi, ua rave oioi o ˈna i te mau faanahoraa o te faaiti i te ino e tupu mai. Ua imi atoa oia i te mau ravea no a muri aˈe ia tupu ta ˈna opuaraa i te pae hopea. Ia au i teie mau ohipa maitai, te tiai ru ra Iehova ma te oaoa i te faatiaraa o to ˈna mana arii e te mau haamaitairaa e tae mai i nia i to ˈna feia haamori taiva ore. (Sal. 104:31) E Atua oaoa noa o Iehova noa ˈtu e ua faahapa-rahi-hia.—Tim. 1, 1:11; Sal. 16:11.
7, 8. Ia fifihia tatou, e nafea tatou e pee ai ia Iehova?
7 Eita tatou e nehenehe e faaau ia tatou ia Iehova ia faatitiaifaro tatou i te mau fifi. E nehenehe râ tatou e pee ia Iehova ia atihia. E fiu iho â tatou ia fifihia tatou, eiaha râ e faaea noa i reira. No te mea ua poietehia tatou ia au i te huru o Iehova, e tia ia tatou ia feruri maitai ma te paari mau no te hiˈopoa i to tatou fifi e no te rave i te mau ohipa maitai ia nehenehe.
8 Te tahi mea faufaa te tauturu ia tatou ia faaû i te mau fifi o te oraraa, o te fariiraa ïa e aita hoi ta tatou e parau i te reira. E faarahi te manaˈonaˈo-noa-raa i to tatou mau fifi i te inoino a ere atu ai tatou i te oaoa e rave rau i taaihia i te haamoriraa mau. I muri aˈe i te raveraa i te mau ravea au noa no te faaafaro i te hoê fifi, mea maitai aˈe ia haere i mua e ia haapao i te mau ohipa maitatai. Te faaite papu ra te mau aamu Bibilia e faahitihia ˈtu i teie manaˈo.
Mea faufaa roa te feruriraa au noa
9. Mea nafea Hana i feruri ai ma te au noa?
9 A hiˈo na ia Hana te metua vahine o Samuela te peropheta. Ua mihi oia no te mea aita ta ˈna e tamarii. Ua faaooohia oia no te mea aita o ˈna i fanau. I te tahi taime, ua taˈi e aita o Hana i tamaa no to ˈna hepohepo rahi. (Sam. 1, 1:2-7) I to Hana haereraa i te sekene o Iehova, “ua inoino roa to ˈna aau, e ua pure atura ia Iehova, oto roa ˈtura.” (Sam. 1, 1:10) I muri aˈe i to Hana haamahorahoraraa i to ˈna aau i mua ia Iehova, ua haafatata ˈtu Elia te tahuˈa rahi ma te parau: “Ia ora na oe i te haerea; e ia faatia mai hoi te Atua no Iseraela i ta oe i ani atu ia ˈna.” (Sam. 1, 1:17) I reira to ˈna taa-mau-raa e ua rave o ˈna i tei maraa ia ˈna. Aita hoi ta ˈna e parau i to ˈna ereraa i te tama. Ua feruri Hana ma te au e “ua haere ihora [oia], e ua amu ihora i te maa, e aita ˈtura to ˈna mata i hana.”—Sam. 1, 1:18.
10. I mua i te hoê fifi i ore i tia ia ˈna ia tatara, eaha ïa te huru feruriraa tano ta Paulo i faaite?
10 Tera atoa te huru feruriraa o te aposetolo Paulo i mua i te ati. Ua ahoaho rahi oia no te hoê fifi ta ˈna i parau ‘te hoê tara i roto i to ˈna tino.’ (Kor. 2, 12:7) Noa ˈtu eaha te reira, ua imi oia i te mau ravea no te faaore i teie fifi ma te pure ia Iehova ia faaora ia ˈna. Ehia taime to ˈna tiaororaa ˈtu ia Iehova? E toru taime. I te toruraa râ, ua faaite te Atua ia Paulo e eita ‘te tara i roto i to ˈna tino’ e iriti-semeio-hia. Ua farii Paulo i te reira e ua haapuai i te tavini ia Iehova.—A taio i te Korinetia 2, 12:8-10.
11. E nafea te pure e tauturu ai ia tatou ia faaû i te ati?
11 Aita teie na hiˈoraa e faaite ra e eiaha tatou e pure ia Iehova no te mau tupuraa ahoaho. (Sal. 86:7) Area râ, te ani maira te Parau a te Atua: “Eiaha outou e ahoaho noa ˈtu i te mau mea atoa nei; e faaite hua râ i to outou hinaaro i te mau mea atoa nei i te Atua, i te pure, i te aniraa ˈtu ma te haamaitai.” E nafea Iehova e pahono ai i teie mau aniraa? Te na ô faahou ra te Bibilia: “E na te hau a te Atua, o tei hau ê atu i te ite taata nei, e faaitoito mai i to outou aau, e to outou manaˈo i te Mesia nei ia Iesu.” (Phil. 4:6, 7) Eita paha Iehova e faaore i to tatou fifi, e pahono râ oia i ta tatou mau pure ma te paruru i to tatou manaˈo. Ia oti tatou i te pure, e topa te hau, e e taa ohie aˈe tatou te tupuraa atâta o te ahoaho iti rahi.
Mea au roa ia rave i te hinaaro o te Atua
12. No te aha mea atâta ˈi ia aehuehu roa?
12 Te na ô ra te Maseli 24:10: “Ia [“tarapape to aau,” MN] i te mahana e ati ai ra, te iti hua ra to oe itoito.” Te na ô ra te tahi atu maseli: “Ia oto râ te aau ra e inoino ai te varua.” (Mas. 15:13) Ua aehuehu roa vetahi mau Kerisetiano a faaea ˈi ratou i te taio i te Bibilia e i te feruri maite i te Parau a te Atua. Aita ratou e pure hohonu faahou ra. E faataa ê paha ratou i to ratou mau hoa Kerisetiano. Mea atâta mau â teie huru anaanatae ore.—Mas. 18:1, 14.
13. Eaha te nehenehe e tauturu ia tatou no te faaiti i te aehuehu e ia oaoa rii?
13 E tauturu râ te hoê feruriraa maitai ia haapao tatou i te mau tuhaa o to tatou oraraa o te faaoaoa ia tatou. Ua papai Davida: “E mea au na ˈu te rave i to oe hinaaro, e tau Atua.” (Sal. 40:8) Ia fifihia tatou, eiaha roa tatou e haapae i ta tatou mau peu maitai pae varua. Te ravea maitai no te aro atu i te oto, o te raveraa ïa i te mau ohipa e faaoaoa ia tatou. Te faaite maira Iehova e ia taio e ia tamau tatou i te hiˈo hohonu i ta ˈna Parau e oaoa roa ˈi tatou. (Sal. 1:1, 2; Iak. 1:25) E fanaˈo tatou i “te parau maitai” o te faaitoito e o te faaoaoa i to tatou aau no roto mai i te mau Papai Moˈa e te mau putuputuraa Kerisetiano.—Mas. 12:25; 16:24.
14. Teihea tiaturiraa no ǒ mai ia Iehova te faaoaoa ia tatou i teie nei?
14 Te horoa nei te Atua e rave rahi tumu ia oaoa tatou. Te tumu rahi o te oaoa, o ta ˈna ïa parau fafau no nia i te faaoraraa. (Sal. 13:5) Ua ite tatou e noa ˈtu eaha te tupu mai i teie nei, e haamaitai iho â te Atua i te feia e imi mau ra ia ˈna i te pae hopea. (A taio i te Koheleta 8:12.) Ua faaite te peropheta Habakuka i teie huru tiaturiraa na roto i teie mau papai nehenehe mau: “Ore noa ˈtu â te ruperupe i te suke, e ore noa ˈtu te maa i nia i te mau vine; ore noa ˈtu te olive i te hotu mai, e ore noa ˈtu â te maa i nia i te fenua; mou noa ˈtu te nǎnǎ i roto i te aua, e ore noa ˈtu te puaatoro i roto i te vairaa ra: e oaoa vau ia Iehova, e ouˈauˈa noa vau i te Atua i to ˈu nei ora.”—Hab. 3:17, 18.
E oaoa ‘to te feia o Iehova to ratou Atua!’
15, 16. A faahiti i te tahi mau ô a te Atua ta tatou e fanaˈo a tiai noa ˈi i to a muri aˈe haamaitairaa.
15 A tiai noa ˈi tatou i te oraraa faahiahia no a muri aˈe, te hinaaro ra Iehova ia fanaˈo tatou i te mau mea maitai ta ˈna e ho mai. Te na ô ra te Bibilia: “Ite aˈera vau e aita ˈtu e maitai i taua mau mea ra, maori râ ia oaoa te taata e ia hamani maitai i te oraraa nei. O te reira ra, ua amu anaˈe te taata i te maa e ua inu i te pape, e ua rave oia i te maitai no ta ˈna ra ohipa, e mea ho-mai-hia mai ïa e te Atua.” (Koh. 3:12, 13) “Ia hamani maitai” tatou, e rave ïa tatou i te mau mea maitatai no vetahi ê. Ua parau Iesu e e mea maitai i te horoa ˈtu i te rave mai. E oaoa rahi te noaa mai ia hamani maitai tatou i to tatou hoa faaipoipo, metua, fetii e ta tatou mau tamarii. (Mas. 3:27) E oaoa rahi atoa ia aupuru, ia farii maitai, e ia faaore tatou i te mau hapa a to tatou mau taeae e tuahine pae varua. (Gal. 6:10; Kol. 3:12-14; Pet. 1, 4:8, 9) E haamaitairaa mau â ia tavini tatou ma te manaˈo haapae. E mauruuru ïa Iehova ia rave tatou i teie mau mea atoa.
16 Te faahiti ra teie mau parau a te Koheleta i nia nei i te amuraa i te maa e te inuraa ei oaoaraa au noa o te oraraa. Noa ˈtu e tei roto tatou i te ati, e nehenehe tatou e oaoa i te mau ô ta Iehova e ho mai. Hau atu â, e mea ho-mai-hia noa mai te toparaa mahana nehenehe, te unauna rahi o te fenua, te mau hauti arearea a te mau fanauˈa, e te tahi atu mau ohipa faahiahia o te natura. E î iho â tatou i te tura rahi e te oaoa. A feruri ai tatou i te reira, e rahi atu â to tatou here ia Iehova, te Atua tei ho mai i te mau mea maitatai atoa.
17. Eaha te faaora roa ia tatou i te mau ati, e i teie râ taime, eaha te tamahanahana ia tatou?
17 No to tatou here i te Atua, auraro i ta ˈna mau faaueraa e faaroo i te tusia taraehara e faaora-roa-hia ˈi tatou i te mau ati o teie oraraa ino a oaoa ˈtu ai e a muri noa ˈtu. (Ioa. 1, 5:3) I teie râ taime, e tamahanahanahia tatou i te iteraa e ua taa maitai ia Iehova to tatou mauiui taatoa. Ua papai Davida: “E oaoa vau, e mauruuru vau i to oe ra aroha; i hiˈo na hoi oe i to ˈu atiraa, e ua ite mai oe . . . i te mau ati no ˈu nei.” (Sal. 31:7) No to ˈna ïa here ia tatou e faaora ˈi Iehova ia tatou i te ati.—Sal. 34:19.
18. No te aha e mea tia ˈi ia oaoa rahi te nunaa o te Atua?
18 A tiai noa ˈi tatou i te tupuraa o ta ˈna mau parau fafau, e pee anaˈe ïa ia Iehova, te Atua oaoa. Eiaha te huru aau taiâ e tapea ia tatou ia tavini tamau i te Atua. Ia fifihia tatou, mea tano ia feruri maitai ma te paari mau. E tauturu mai Iehova ia haavî tatou i to tatou huru aau e ia haa, ia au i tei maraa, no te faaiti i te mau faahopearaa ino o te mau tupuraa ati. Ia au roa tatou i te mau mea maitatai pae tino e pae varua atoa ta ˈna e ho mai. Ma te faaea noa i pihai iho i te Atua e oaoa ˈi tatou i te mea e e oaoa ‘to te feia o Iehova to ratou Atua!’—Sal. 144:15.
Eaha ta outou i haapii?
• Ia roohia tatou i te ati, e nafea tatou e pee ai ia Iehova?
• E nafea te feruriraa au noa e tauturu ai ia tatou ia faaû i te ati?
• Ia ahoaho tatou, e nafea tatou e au roa ˈi ia rave i te hinaaro o te Atua?
[Uiraa haapiiraa]
[Hohoˈa i te api 19]
Te ahoaho ra Iehova i te mau ohipa iino e tupu ra
[Faaiteraa i te tumu]
© G.M.B. Akash/Panos Pictures
[Hohoˈa i te api 21]
Ua ho mai Iehova i te mau ravea ia oaoa noa tatou