Ia au i te hoê buka ite rahi, ua farii te mau philosopho Kerisetiano matamua i te manaˈo Heleni e mea pohe ore te hoê tuhaa o te taata, tei haapuaihia i roto ia ˈna i to ˈna iho â tôraa.—The New Encyclopædia Britannica (1988), buka 11, api 25.

“Te hoˈi nei oia i to ˈna ra repo; mou roa ˈtura ta ˈna i opua i taua mahana ra.”—Salamo 146:4.

E “varua” anei to te taata o te ora noa i te pohe? Te haapii ra te Bibilia e ua tuu te Atua i roto i te taata e te animara i te hoê puai ora, aore ra varua, atuatuhia e te hutiraa aho. Na taua puai ora ra e faaoraora i te tino. Ua faaea anaˈe râ te taata aore ra te animara i te huti i te aho, a ore atu ai te puai ora no ǒ mai i te Atua ra e atuatu-faahou-hia, o te pohe ïa. Aita a ratou e parau itea faahou.—Genese 3:19; Koheleta 3:19-21; 9:5.

Mai to ˈna haamataraa mai â, ua faatupu te tiaturiraa e e ora noa te hoê tuhaa o te taata i muri aˈe i te pohe i teie na uiraa: E haere taua tuhaa ra ihea? Eaha te tupu i nia i te feia ino ia pohe ratou? Ua farii te mau faahua Kerisetiano i teie haapiiraa, oia atoa ïa i te tahi atu tiaturiraa: te haapiiraa o te po auahi.

A hiˈo i teie mau irava: Koheleta 3:19; Mataio 10:28; Ohipa 3:23