E fifi na te ao nei, e ravea hoê roa
E fifi na te ao nei, e ravea hoê roa
TEI te vahi atoa te mauiui, e mea rahi te taata aumihi e tauturu i tei mauiui ra. Ei hiˈoraa, e haa te mau taote e tuati e rave rahi hora no te tauturu i te feia maˈi aore ra pepe. E tutava te mau tupohe auahi, mutoi, iriti ture, e feia tauturu i te tamǎrû aore ra i te faaore i te mauiui o vetahi ê. E tauturu rahi teie mau tutavaraa, aita râ ta te tahi taata aore ra faanahonahoraa e ravea no te faaore i te mauiui i te ao nei. Ta te Atua râ, oia ïa.
Te haapapu maira te buka hopea o te Bibilia: “Na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito.” (Apokalupo 21:4) A manaˈo na i te rahiraa o te taata o te fanaˈo i te reira. Te opua ra te Atua e faaore i te mauiui atoa. E na reira oia ma te faaore i te tamaˈi, te poia, te maˈi, te parau-tia ore, e te feia iino atoa i te ao nei. Aore e taata e faatupu i te reira.
Ta te Basileia o te Atua e rave
E faatupu te Atua i ta ˈna mau parau fafau na roto i te piti o te ihotaata mana roa ˈˈe i te ao taatoa, o Iesu Mesia tei faatiahia mai. Te fatata maira te taime e faatere ai Iesu ei Arii o te fenua taatoa. Eita te huitaata e faatere-faahou-hia e te mau arii taata, peretiteni, aore ra tia poritita. E faaterehia râ ratou e te hoê anaˈe iho Arii e te hoê anaˈe iho faatereraa, te Basileia o te Atua.
E haamou taua Basileia ra i te mau faatereraa taata atoa. Ua tohu atea mai te Bibilia: “E faatupu . . . te Atua o te raˈi ra i te hoê basileia, o te ore roa ïa e mou, e ore roa hoi e riro ia vetahi ê; e hope roa hoi taua mau basileia ra i te parari e e pau, e vai tera e a muri noa ˈtu.” (Daniela 2:44) E tahoê to te fenua atoa i raro aˈe i te hoê faatereraa parau-tia, te Basileia o te Atua.
I to Iesu parahiraa i te fenua, ua faahiti pinepine oia i taua Basileia ra. I roto atoa i te hohoˈa pure ta ˈna i haapii i ta ˈna mau pǐpǐ: “Ia tae to oe ra basileia. Ia haapaohia to oe hinaaro i te fenua nei mai tei te raˈi atoa na.” (Luka 11:2) Te faaite ra Iesu e ua taaihia te Basileia i te tupuraa o te hinaaro o te Atua i te fenua nei, e faaore i te mauiui i te ao nei.
E hopoi mai te faatereraa parau-tia a te Atua i te haamaitairaa, eiaha râ te faatereraa a te taata. A haamanaˈo e ua horoa Iehova i ta ˈna Tamaiti ei hoo ia fanaˈo te taata i te ora mure ore. I raro aˈe i te faatereraa maitai a te Basileia e hoˈi ai te taata i te tia-roa-raa. Te faahopearaa? “E haamou roa [Iehova] i te pohe e a muri noa ˈtu; e na te Fatu ra, na Iehova, e horoi i te roimata i te mau mata atoa.”—Isaia 25:8.
E uiui paha vetahi: ‘Eaha hoi te Atua i ore ai i ohipa oioi mai? Eaha ta ˈna e tiai ra?’ E nehenehe ta Iehova e faaore ê na i te mauiui atoa. Ua faatia râ oia i te reira, eiaha no ˈna noa, no te maitai mure ore râ o ta ˈna mau tamarii i te fenua. E vaiiho te mau metua î i te here i ta ratou tamarii ia fifi mai te peu e ua ite ratou e e maitai roa ratou i muri iho. E tumu maitai atoa i vaiiho ai Iehova i te taata ia mauiui no te hoê taime poto. Ua faataahia teie mau tumu i roto i te Bibilia, oia hoi te tiamâraa e maiti, te hara, e te tumu parau o te tia-mau-raa o te faatereraa a Iehova. Te faataa atoa ra te Bibilia e ua vaiihohia te hoê varua ino ia faatere i te ao no te hoê taime poto. a
Eita e navai te api i ǒ nei no te faataa i teie mau tumu, e piti râ manaˈo te horoa mai i te tiaturiraa e te faaitoitoraa. A tahi: E hau aˈe ta Iehova haamaitairaa i te mau mauiui ta tatou i faaruru. Te haapapu atoa maira te Atua: “E ore hoi tei mutaaihora e manaˈohia, e ore e faatupu-faahou-hia i roto i te aau.” (Isaia 65:17) E faaore roa te Atua i te ahoaho e te mauiui i tupu mai i te vaiihoraahia te ino no te hoê taime poto.
Te piti: Ua faataa te Atua i te hoê taime papu no te faaore i te mauiui. A haamanaˈo e ua ui te peropheta Habakuka mai te aha te maoro e faatia ˈi Iehova i te haavîraa uˈana e te tamaˈi. Ua pahono Iehova: “No te taime i haapaohia ra taua orama nei . . . E ore e haamaoro hua.” (Habakuka 2:3) E ite tatou i roto i to muri nei tumu parau e ua fatata taua “taime i haapaohia” ra.
[Nota i raro i te api]
a No te haamaramaramaraa hau i te mau tumu e faatia ˈi te Atua i te mauiui, a hiˈo i te pene 11 o te buka Eaha ta te Bibilia e haapii mau ra? piahia e te mau Ite no Iehova.
[Tumu parau tarenihia i te api 7]
Irava e faaite ra i te hoê oraraa oaoa a muri aˈe
E ORE TE TAMAˈI:
“A haere mai na, a hiˈo i ta Iehova i rave! te pau ta ˈna i rave i te fenua nei! Ua faaore oia i te tamaˈi e tae roa aˈenei i te hopea fenua!”—Salamo 46:8, 9.
E HOˈI MAI TEI HEREHIA:
“E tia-faahou-raa to tei pohe, te feia parau-tia e te feia parau-tia ore.”—Ohipa 24:15.
E MAA TA TE TAATA ATOA:
“E maa sitona tei te fenua i nia i te tupuai o te mau mouˈa.”—Salamo 72:16.
E ORE TE MAˈI:
“E ore hoi to reira e parau e, Ua paruparu vau i te maˈi.”—Isaia 33:24.
E MOU TE FEIA INO:
“E tâpû-ê-hia ra te paieti ore i te fenua nei, e te feia i rave i te hara ra, e taihitumuhia ïa.”—Maseli 2:22.
E TUPU TE PARAU-TIA:
“Inaha, e parahi mai te hoê arii [te Mesia ra o Iesu] ma te hau parau-tia ra, e te tahi pǔpǔ arii atoa ra ma te parau au.”—Isaia 32:1.
[Hohoˈa i te api 7]
E faaore te Basileia o te Atua i te mauiui atoa ta tatou i faaruru