E hinaaro oia ia manuïa tatou
E haafatata ˈtu i te Atua
E hinaaro oia ia manuïa tatou
E HINAARO te mau metua î i te here ia manuïa e ia fanaˈo ta ratou mau tamarii i te hoê oraraa maitai e auraa to te reira. E hinaaro atoa o Iehova, to tatou Metua i te raˈi, ia manuïa ta ˈna mau tamarii i te fenua. Ei faaiteraa i ta ˈna aupuru î i te here, te faataa maira oia e nafea. A hiˈo na i ta Iehova i parau ia Iosua i roto i te Iosua 1:6-9.
A feruri na i te tupuraa i te pae atau. I muri aˈe i te poheraa o Mose, na Iosua i aratai ia Iseraela, ua mirioni ratou. Te faaineine ra o Iseraela i te tomo i te fenua ta te Atua i fafau i to ratou hui metua. Ua horoa te Atua i te aˈoraa ia Iosua. Ia pee oia i te reira, e manuïa oia. E ere râ o ˈna anaˈe, o tatou atoa ia faaohipa tatou i te reira.—Roma 15:4.
Ua parau o Iehova ia Iosua ia etaeta e ia itoito, eiaha hoê noa taime e toru râ. (Irava 6, 7, 9) E hinaaro iho â o Iosua i te reira no te aratai i te nunaa ma te manuïa i te Fenua tǎpǔhia. Teie râ, e nafea ïa oia?
E nehenehe o Iosua e etaeta e e itoito maoti te mau papai faaurua. Te parau ra o Iehova: “Ia haapao hua oe i te ture atoa a tau tavini a Mose i faaue ia oe.” (Irava 7) I tera ra tau, mea iti paha ta Iosua buka o te Bibilia. a Teie râ, eita te fanaˈo-noa-raa i te Parau a te Atua e navai no te manuïa. E mea tia ia rave Iosua e piti ohipa.
A tahi, ia faaî Iosua i to ˈna aau i te parau a te Atua. Te na ô ra o Iehova: “Ia haamanaˈo maite oe i te reira i te rui e te ao.” (Irava 8) Te parau ra te hoê papai: “Te faaue ra te Atua ia Iosua ia haamanaˈo i ta ˈNa Ture ma te ‘paraparau’ ia ˈna iho no nia i te reira, ma te ‘feruriruri,’ aore ra ‘manaˈonaˈo’ i te reira.” E tauturu te taioraa e te feruriruriraa i te parau a te Atua i te mau mahana atoa, ia Iosua ia faaû i te fifi e tupu mai.
Te piti, ia faaohipa Iosua i ta ˈna e haapii ra i roto i te Parau a te Atua. Te na ô ra Iehova ia ˈna: “Ia haapao hua oe i tei papai-atoa-hia i roto ra, . . . ei reira oe e manuïa roa ˈi.” (Irava 8) E manuïa Iosua ia rave oia i te hinaaro o te Atua, aita ˈtu. E tupu noa iho â te hinaaro o te Atua.—Isaia 55:10, 11.
Ua haapao o Iosua i te aˈoraa a Iehova. Ei faahopearaa, e oraraa oaoa mau â to ˈna ei tavini haapao maitai a Iehova.—Iosua 23:14; 24:15.
E hinaaro anei oe i te hoê oraraa oaoa mau mai ia Iosua? E hinaaro o Iehova ia manuïa oe. Teie râ, eita e navai ia fanaˈo noa i ta ˈna Parau, te Bibilia. Ua horoa te hoê Kerisetiano haapao maitai taime roa i teie manaˈo: “A taio e a faaohipa i te Bibilia.” Ia tamau oe i te faaî i to oe aau i te parau a te Atua e i te faaohipa i roto i to oe oraraa i ta oe e haapii ra, e ‘manuïa roa ïa oe’ mai ia Iosua.
[Nota i raro i te api]
a I roto i te mau papai faaurua ta Iosua e nehenehe e fanaˈo, te vai atoa ra na buka e pae a Mose (Genese, Exodo, Levitiko, Numera, Deuteronomi), te buka a Ioba, e hoê aore ra e piti salamo.