A faaohipa maitai i ‘te ˈoˈe a te varua’
A faaohipa maitai i ‘te ˈoˈe a te varua’
‘A rave i te ˈoˈe a te varua, te parau a te Atua.’—EPH. 6:17.
1, 2. Eaha ta tatou e rave ia hinaaro-rahi-hia te feia poro i te Basileia?
I TO Iesu iteraa i te veve pae varua o te nahoa taata, ua parau oia i ta ˈna mau pǐpǐ: “Te rahi mau nei te auhune, te iti nei râ te feia e rave: e teie nei, e pure outou i te Fatu o te ohipa ia tono â oia i te rave ohipa ei ooti.” Aita Iesu i faaea noa i reira. I muri iho, ‘ua haaputuputu mai oia i ta ˈna mau pǐpǐ ahuru ma piti’ e ua tono atura ia ratou e poro, aore ra e “ooti.” (Mat. 9:35-38; 10:1, 5) I muri aˈe, “ua haapao atura te Fatu i e hitu ahuru, e tatoopiti atura i te tonoraa ia ratou” no tauâ ohipa ra.—Luka 10:1, 2.
2 I teie atoa mahana, te hinaaro-rahi-hia ra te feia poro i te Basileia. No te matahiti taviniraa 2009, 18 168 323 taata tei tae i te Oroa haamanaˈoraa i te ao nei. Hoê ahuru mirioni ïa taata hau i te numera taatoa o te mau Ite no Iehova. Ua auhune mau â te mau aua. (Ioa. 4:34, 35) E pure ïa tatou no te ani ia rahi te rave ohipa. E nafea râ ia ohipa ia au i teie aniraa? Ma te riro ïa ei tavini aravihi atu â a apiti ai tatou ma te itoito rahi i te pororaa i te Basileia e te faariroraa i te taata ei pǐpǐ.—Mat. 28:19, 20; Mar. 13:10.
3. E nafea te varua o te Atua e tauturu mau ai ia tatou ia riro ei tavini aravihi?
3 Ua faataa to na mua ˈtu tumu parau e mea faufaa ia arataihia tatou e te varua o te Atua no te ‘parau i ta ˈna parau ma te mǎtaˈu ore.’ (Ohi. 4:31) E tauturu atoa taua varua ra ia tatou ia riro ei tavini aravihi. Te hoê ravea, o te faaohipa-maitai-raa ïa i te mauhaa taa ê mau ta te Atua ra o Iehova i horoa mai, ta ˈna Parau te Bibilia tei papaihia i raro aˈe i te aratairaa a te varua moˈa. (Tim. 2, 3:16) Mea faaurua te poroi i roto e te Atua. No reira, ia faaohipa maitai tatou i te Bibilia no te haapii i te taata, te arataihia ra ïa tatou e te varua moˈa. Na mua aˈe râ, e feruri tatou i te puai rahi o taua Parau ra.
‘Mea puai rahi te parau a te Atua’
4. E nafea te Bibilia e taui ai i te taata?
4 Mea puai iho â te parau, aore ra poroi, a te Atua! (Heb. 4:12) Ei auraa taipe, mea oi aˈe te poroi o te Bibilia i te ˈoˈe atoa i hamanihia e te taata, e putapupû taipe hoi e taa ê noa ˈtu te ivi e te puo ivi. E ô te parau mau Bibilia i roto roa ia tatou e e faaite mai i to tatou mau manaˈo e huru aau, oia hoi to tatou huru mau. E nehenehe taua parau mau ra e ohipa puai a taui roa ˈtu ai tatou. (A taio i te Kolosa 3:10.) E taui iho â te Parau a te Atua i te taata!
5. E nafea te Bibilia e aratai ai ia tatou, e eaha te faahopearaa?
5 Hau atu â, e buka o te paari faito ore te Bibilia. E haamaramaramaraa faufaa to roto o te faaite mai e nafea ia ora i roto i teie nei ao fifi. E turama te Parau a te Atua i to tatou mau taahiraa e to tatou eˈa atoa. (Sal. 119:105) E tauturu rahi mai te reira ia fifi tatou aore ra ia maiti tatou i te hoa, te faaanaanataeraa, te ohipa, te ahu, e te vai ra ˈtu â. (Sal. 37:25; Mas. 13:20; Ioa. 15:14; Tim. 1, 2:9) Ia faaohipa tatou i te mau faaueraa tumu o te Parau a te Atua, e afaro maitai tatou e vetahi ê. (Mat. 7:12; Phil. 2:3, 4) Ia vaiiho tatou i te parau a te Atua ia turama i to tatou eˈa e ite ai tatou i te faahopearaa o ta tatou mau faaotiraa a muri aˈe. (Tim. 1, 6:9) Oia atoa, te faaite atea ra te mau Papai i te opuaraa a te Atua no a muri aˈe, a nehenehe atu ai tatou e tapi i te hoê huru oraraa e tuati i te reira. (Mat. 6:33; Ioa. 1, 2:17, 18) E oraraa faufaa mau to te hoê taata o te arataihia ra e te mau faaueraa tumu a te Atua!
6. Eaha te puai rahi o te Bibilia i roto i ta tatou tamaˈi pae varua?
6 A manaˈo atoa na i te puai rahi o te Bibilia i roto i ta tatou tamaˈi pae varua. Ua faahiti Paulo i te parau a te Atua, ‘te ˈoˈe a te varua.’ (A taio i te Ephesia 6:12, 17.) Ia faaitehia te poroi Bibilia ma te aravihi, e nehenehe te taata e tiamâ mai i te mana o Satani. E ˈoˈe teie o te faaora i te taata. Eiaha anei ïa tatou e tutava i te faaohipa maitai i te reira?
A tufa ˈtu ma te tia
7. No te aha mea faufaa ˈi ia haapii i te faaohipa maitai i ‘te ˈoˈe a te varua’?
7 Ia haapii e ia haamataro noa te hoê faehau i te faaohipa maitai i ta ˈna mau mauhaa tamaˈi, e aravihi ai oia. Oia atoa no ‘te ˈoˈe a te varua’ i roto i ta tatou tamaˈi pae varua. Ua papai Paulo: “E faaitoito ia vai maite â oe i mua i te aro o te Atua ma te itehia mai, ei rave ohipa aita e haamaraa, e te tia hoi i te tufa i te parau mau.”—Tim. 2, 2:15.
8, 9. Eaha te tauturu mai ia taa maitai ia tatou ta te Bibilia e parau ra? A horoa i te tahi hiˈoraa.
8 Eaha te tauturu mai ia ‘tufa i te parau mau ma te tia’ i roto i te taviniraa? Mea faufaa ia taa maitai tatou iho i ta te Bibilia e parau ra hou a faaite atu ai ia vetahi ê. E titauhia ïa ia hiˈo tatou i te mau irava tapiri, to na mua ˈtu e to muri iho.
9 No te taa maitai i te hoê irava Bibilia, e hiˈopoa tatou i te mau irava tapiri. A hiˈo na i ta Paulo i parau i roto i te Galatia 5:13. Ua papai oia: “I parauhia ˈtu hoi outou, e te mau taeae, ia noaa te tiamâ; eiaha râ taua tiamâ ra ei faatupu i ta te tino, ei auraro aroha râ to outou ia outou iho.” Teihea tiamâ ta Paulo e parau ra? I te hara e te pohe anei, i te mau tiaturiraa hape, aore ra i te tahi atu mea? Ia au i te mau irava tapiri, te faahiti ra Paulo i te tiamâ no to tatou ‘faaoraraahia i te faaino a te ture.’ (Gal. 3:13, 19-24; 4:1-5) Te faahiti ra oia i te tiamâ no te peeraa i te Mesia. Te feia tei mauruuru i taua tiamâ ra, ua auraro aroha ïa te tahi i te tahi. Area te feia aroha ore ra, ua faaino ïa e ua tatamaˈi ratou ratou iho.—Gal. 5:15.
10. No te taa maitai i te auraa o te mau Papai, eaha ta tatou e hiˈopoa e ihea e itehia ˈi te reira?
10 No te taa maitai i te auraa o te hoê irava, e hiˈopoa atoa tatou i te huru tupuraa, na vai i papai i tera buka Bibilia, inafea ra, e i roto i teihea tupuraa. Mea faufaa atoa ia ite i te tumu i papaihia ˈi taua buka ra e te mau peu i te pae totiare, morare, e faaroo i taua tau ra. *
11. E ara tatou i te aha ia faataa tatou i te mau irava?
11 No ‘te tufa i te parau mau ma te tia,’ eita e navai noa ia faataa i te pue parau mau Bibilia ma te tano. E ara tatou eiaha e faaohipa i te Bibilia no te haamǎtaˈu i te taata. E nehenehe tatou e faaohipa i te reira no te paruru i te parau mau, mai ia Iesu i to ˈna faahemaraahia e te Diabolo. E ere râ te reira i te hoê hamara no te tupai i te taata, ei auraa parau. (Deut. 6:16; 8:3; 10:20; Mat. 4:4, 7, 10) E pee tatou i te aˈoraa a te aposetolo Petero: “E faateitei . . . outou i te Fatu ra i te Mesia i roto i to outou aau: e ia vai ineine â outou ia parau atu i te taata atoa ia ui mai ia outou i te tiaturi i roto ia outou na, ma te mǎrû e te auraro maite atu.”—Pet. 1, 3:15.
12, 13. Eaha “te mau pare” ta te parau mau o te Bibilia e huri i raro? A horoa i te tahi hiˈoraa.
12 Ua faaohipa-maitai-anaˈe-hia, eaha ta te parau mau o te Bibilia e faatupu? (A taio i te Korinetia 2, 10:4, 5.) E huri ïa i “te mau pare” i raro, oia hoi e faaite roa i te mau haapiiraa hape, te mau peu ino, e te mau philosophia e haapii ra i te paari o te taata tia ore. E faaohipa tatou i te Bibilia no te faaore i te mau manaˈo tei ‘faateiteihia ia ore ia noaa te ite i te Atua.’ E tauturu te mau haapiiraa o te Bibilia i te taata ia faaau i to ratou huru feruriraa i nia i te parau mau.
13 A hiˈo na i te hoê vahine e 93 matahiti e ora ra i Initia. Mai to ˈna tamarii-rii-raa mai, ua haapiihia ia ˈna te fa-faahou-raa i roto i te tino ê. I to ˈna haamataraa i te haapii i te Bibilia na roto i te rata e ta ˈna tamaiti e faaea ra i te ara, ua farii oia i ta ˈna e ite ra no nia ia Iehova e ta ˈna mau parau fafau. No to ˈna tiaturi papu i te haapiiraa o te fa-faahou-raa i roto i te tino ê, aita oia i mauruuru i to ta ˈna tamaiti papairaa ia ˈna no nia i te huru o te taata pohe. Ua na ô oia: “Aita vau e taa ra i te parau mau o ta oe Bibilia. Te haapii nei te mau haapaoraa atoa e e tuhaa pohe ore to roto ia tatou. I tiaturi noa na vau e e pohe te tino e e fa faahou noa te hoê tuhaa itea ore i roto i te tahi atu mau tino e 8 400 000 taime. E haavare anei ïa teie? Ua hape anei te rahiraa o te mau haapaoraa?” E tia anei i ‘te ˈoˈe a te varua’ ia huri i raro i tera tiaturiraa e au i te pare? I muri aˈe i te tahi mau aparauraa Bibilia, ua papai oia tau hebedoma i muri aˈe: “Ua taa ˈtura ia ˈu eaha te parau mau no nia i te pohe. Te oaoa roa nei au i te iteraa e e farerei faahou tatou i tei herehia i te tia-faahou-raa. Te tiaturi nei au e ua fatata te Basileia o te Atua i te tae mai.”
A faaohipa ˈtu ma te haapapu i te manaˈo
14. Eaha te auraa e faaite hua i te parau i te taata?
14 Te faaohipa-maitai-raa i te Bibilia i roto i te taviniraa, e ere ïa i te faahiti-noa-raa i te reira. Ua ‘faaite hua,’ aore ra haapapu, Paulo i te parau, ia na reira atoa ïa tatou. (A taio i te Ohipa 19:8, 9.) E “haapapu i te manaˈo” te auraa o te parau e “faaite hua.” Ia ‘papu roa te manaˈo o te hoê taata e tiaturi ai oia i te hoê mea.’ Ia faaitoito tatou i te hoê taata ia farii i te hoê haapiiraa Bibilia, te haapapu atu ra ïa tatou e e nehenehe ta ˈna e tiaturi i te reira. Mea faufaa ia papu ia ˈna e e parau mau ta tatou e haapii ra. Teie te tahi mau ravea.
15. E nafea ia huti i te ara-maite-raa i nia i te Bibilia ia faaturahia te reira?
15 A huti i te ara-maite-raa i nia i te Parau a te Atua ia faaturahia te reira. Ia faahiti tatou i te hoê irava, e haafaufaa tatou i te manaˈo o te Atua no nia i te tumu parau. I muri aˈe i te tuuraa i te hoê uiraa ta te taata e pahono, e nehenehe tatou e parau, ‘E hiˈo mai tâua i te manaˈo o te Atua.’ Aore ra e nehenehe tatou e ui, ‘Eaha ta te Atua e parau ra no nia i teie tupuraa?’ Ia faaô tatou i te irava ma teie raveraa, e haapapu ïa tatou e no ǒ mai te Bibilia i te Atua, a faatura roa ˈtu ai te taata i te reira. Mea faufaa roa te reira ia poro tatou i te hoê taata e tiaturi ra i te Atua, aita râ i ite i ta te Bibilia e haapii ra.—Sal. 19:7-10.
16. Eaha te tauturu mai ia faataa maitai i te mau irava?
16 A taio e a faataa i te mau irava. Ua matau Paulo i ‘te haamahorahora e i te faaite papu’ i ta ˈna e haapii atu ra. (Ohi. 17:3) E pinepine, e ere hoê anaˈe manaˈo to te hoê irava, e e titauhia ia haamataratara i te mau parau taa maitai e tano i te aparauraa. Ma te faahiti faahou ïa i te mau taˈo faufaa aore ra ma te tuu i te mau uiraa o te tauturu i te taata ia ite i te reira. A faataa i te auraa o taua tuhaa ra o te irava. I muri iho, a faaite ia ˈna e nafea te reira e tano ai no ˈna iho.
17. E nafea ia haaferuri papu maitai i nia i te mau Papai?
17 A haaferuri papu maitai i nia i te mau Papai. Maoti te taparuparuraa aau tae e te manaˈo tano, ua haaferuri papu Paulo i te taata i nia i te mau Papai. (Ohi. 17:2, 4) Mai ia ˈna, a tutava i te haaputapû i te aau o te taata. E ite tatou eaha to roto i to ˈna aau ma te tuu i te mau uiraa e tano o te faaite i to tatou anaanatae mau ia ˈna. (Mas. 20:5) A faatano i te parau. A hohora i te mau manaˈo haaferuri ma te maramarama e te tano, turuhia e te mau haapapuraa e au. Ia niuhia ta tatou aparauraa i nia i te Parau a te Atua. Mea au aˈe e faaohipa maitai hoê irava ma te faataa i te manaˈo e te horoa i te tahi hiˈoraa, i te taio vitiviti e piti aore ra e toru irava. A faahiti atoa i te tahi mau manaˈo hau o te haapapu i ta tatou tatararaa. (Mas. 16:23) E titauhia paha i te tahi taime ia rave i te mau maimiraa no te mau haamaramaramaraa hau. Ua titauhia ia ite te vahine ruhiruhia i faahitihia aˈenei no te aha te haapiiraa o te varua pohe ore i parare roa ˈi. Mea faufaa roa ia taa ia ˈna nohea mai e mea nafea taua haapiiraa ra i te ôraa i roto i te rahiraa o te mau haapaoraa o te ao nei, a farii atu ai oia i ta te Bibilia e haapii ra. *
A tamau i te faaohipa maitai atu
18, 19. No te aha e tamau ai i te faaohipa maitai i ‘te ˈoˈe a te varua’?
18 “Te mou nei . . . te huru o teie nei ao,” ia au i te Bibilia. Te ino noa ˈtura te feia paieti ore. (Kor. 1, 7:31; Tim. 2, 3:13) Mea faufaa roa ïa ia tamau tatou i te huri i “te mau pare” i raro ma te faaohipa i ‘te ˈoˈe a te varua, te parau a te Atua.’
19 Auê tatou i te oaoa i te fanaˈoraa i te Parau a te Atua, te Bibilia, e te faaohiparaa i te poroi puai i roto no te iriti ê i te mau haapiiraa hape e no te haaputapû i te aau haavare ore! Aita e pare etaeta aˈe i taua poroi ra. E tutava maite anaˈe ïa i te faaohipa maitai i ‘te ˈoˈe a te varua’ i roto i te ohipa ta te Atua i horoa mai, te pororaa i te Basileia.
[Nota i raro i te api]
^ No nia i te mau buka Bibilia, e haamaramaramaraa to roto i “Te mau Papai atoa, e mea faaurua ïa e te Atua e e mea faufaa,” Étude perspicace des Écritures, e te mau tumu parau “Mea ora te parau a Iehova” o Te Pare Tiairaa.
^ A hiˈo i te buka rairai Eaha te tupu i nia ia tatou ia pohe tatou? api 5-16.
Eaha ta outou i haapii?
• Eaha te puai rahi o te Parau a te Atua?
• E nafea ia ‘tufa i te parau mau ma te tia’?
• E nafea te poroi o te Bibilia e huri ai i “te mau pare” i raro?
• E nafea ia haapapu atu â i te manaˈo i roto i te taviniraa?
[Uiraa haapiiraa]
[Tumu parau tarenihia/Hohoˈa i te api 20]
No te faaohipa papu maitai i te Parau a te Atua
▪ A faaitoito i te taata ia faatura i te Bibilia
▪ A faataa i te mau Papai
▪ A haaferuri papu maitai ia putapû te aau
[Hohoˈa i te api 18]
A haapii i te faaohipa maitai i ‘te ˈoˈe a te varua’