E haere paatoa anei te feia maitai i nia i te raˈi?

I MURI aˈe i ta Iesu amuraa maa hopea e ta ˈna mau aposetolo i te po hou oia e haapohehia ˈi, ua fafau Iesu ia ratou i te hoê parahiraa i nia i te raˈi. Ua na ô oia: “E rave rahi te parahiraa mau i te fare o tau Metua ra; ahiri aita ra, ua parau atu ïa vau ia outou. Te haere nei au e haamaitai i te hoê vahi no outou.” (Ioane 14:2) No te aha Iesu e horoa ˈi i te hoê parahiraa no ratou i nia i te raˈi? Eaha ta ratou ohipa i reira?

Te manaˈo ra Iesu i te hoê ohipa taa ê no ta ˈna mau pǐpǐ. I te reira iho â po, ua parau oia: “O outou te feia e tia i pihai iho ia ˈu i tau mau atiraa nei. E mai tau Metua i haapao i te tahi basileia no ˈu ra; ua haapao atoa vau ia outou.” (Luka 22:28, 29) Ua fafau te Atua ia Iesu e o ˈna te Arii o te hoê faatereraa maitai o te haamâha i te hinaaro rahi roa ˈˈe o te taata. E faaora Iesu i te taata i te ati e e haamou oia i te feia e hamani ino ra ia ratou. Noa ˈtu e e tino huiraatira ta Iesu e “tae noa ˈtu i te hopea o te fenua,” tei nia to ˈna terono i te raˈi.—Salamo 72:4, 8; Daniela 7:13, 14.

E ere râ o Iesu anaˈe te faatere. Ua fafau oia i ta ˈna mau aposetolo i te hoê parahiraa i nia i te raˈi. O ratou ïa tei maiti-matamua-hia no te arii mai i te fenua nei.—Apokalupo 5:10.

Ehia te haere i nia i te raˈi? Mai i roto i te mau faatereraa atoa, mea iti te feia faatere i roto i te Basileia i te raˈi o te Atua ia faaauhia i te tino huiraatira. Ua parau Iesu i te feia e faatere e o ˈna: “Eiaha e mǎtaˈu, e tau nǎnǎ iti e; e mea hinaaro na to outou Metua i te horoa mai i te basileia no outou.” (Luka 12:32) Ua naea 144 000 te numera o tera “nǎnǎ iti” i te pae hopea. (Apokalupo 14:1) E mea iti ratou ia faaauhia i te mau mirioni taata e fanaˈo i te ora mure ore i te fenua nei ei tino huiraatira taiva ore o te Basileia.—Apokalupo 21:4.

E ere ïa te feia maitai paatoa te haere i nia i te raˈi. Ma te taa maitai, ua na ô te aposetolo Petero no nia i te arii maitai ra o Davida: “Aita . . . Davida i tae i nia i te raˈi.” (Ohipa 2:34) E taata maitai Ioane Bapetizo, ua faaite râ Iesu e eita oia e faateiteihia ei arii i nia i te raˈi. “I ta te vahine i fanau nei,” ta Iesu i parau, “aita ˈtu ïa peropheta rahi i itea ia Ioane Bapetizo nei, o tei iti roa râ i te basileia o te ao ra, e rahi ïa ia ˈna.”—Mataio 11:11.

E fanaˈo anei oe i te haamaitairaa o te feia maitai?

E nafea te hoê taata e fanaˈo ai i te ora mure ore i te fenua? Ua parau Iesu: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16) A tapao na e ua turai te here o te Atua i teie nei ao ia faanaho e ia noaa i te taatoaraa te ora mure ore, o te feia noa râ e faaohipa i te faaroo te haamaitai-mau-hia.

Ia niuhia te faaroo i nia i te ite mau e tia ˈi. (Ioane 17:3) E taata maitai oe ia haapii hau atu â oe no nia i ta Iehova opuaraa no te taata. Ia turai te faaroo i roto i ta oe e haapii ra ia oe ia ohipa. E ia papu ia oe e e nehenehe atoa oe e ora e a muri noa ˈtu.

 [Tumu parau tarenihia i te api 7]

Ta te Bibilia e parau ra

Uiraa:

Eaha te tupu i te feia maitai ia pohe ratou?

Pahonoraa:

“Aita . . . a te feia i pohe ra e parau itea.”—KOHELETA 9:5.

Uiraa:

Eaha te tiaturiraa o te feia maitai no te a muri aˈe?

Pahonoraa:

“Te fatata mai nei . . . te hora e faaroo ai te feia atoa i roto i te apoo ra i tana [Iesu] reo, e e haere mai i rapae.”—IOANE 5:28, 29.

Uiraa:

Ihea te rahiraa o te feia maitai e ora ˈi?

Pahonoraa:

“E parahi te feia parau-tia i nia i te fenua, e parahi tamau â ratou i reira.”—SALAMO 37:29.