Ta Iesu e haapii maira

No nia i te haamoriraa mau

E farii anei te Atua i te mau haamoriraa atoa?

▪ Ua aroha Iesu i te taata o tei haavarehia e te haapaoraa hape. Ua parau oia e ara i ‘te orometua haavare o te haere mai ma te huru o te mamoe, area o roto ra, e luko taehae ïa.’ (Mataio 7:15) Ua tapao anei oe e te faaohipa ra te tahi mau taata i te haapaoraa no te mau tumu iino?

Ua pure Iesu i te Atua: “To parau na te parau mau.” (Ioane 17:17) Eita ïa te Atua e farii i te haamoriraa e patoi ra i te parau mau Bibilia. No reira Iesu i faatano ai i ta te Atua parau i nia i te tahi mau taata faaroo haavarevare: “E mea faufaa ore . . . ta ratou e pure ia ˈu nei, a haapii ai i tei tuuhia mai e te taata.”—Mataio 15:9.

Te vai ra anei te haapaoraa mau?

▪ I to Iesu farereiraa i te hoê vahine Samaria tei haavarehia e te haapaoraa hape, ua parau oia ia ˈna: ‘Aore outou i ite i ta outou e haamori nei. E haamori te feia haamori mau i te Metua, ma te varua e te parau mau: o te huru ïa o te feia haamori ta te Metua e titau nei.’ (Ioane 4:22, 23) E itehia iho â te haamoriraa mau.

Ua na ô Iesu: “Aore a ˈu peu rave noa, o ta tau Metua râ i haapii mai ia ˈu ra, o ta ˈu ïa e parau nei.” Ua ite ïa oia e o te haapaoraa mau ta ˈna e haapii ra i te taata e tera anaˈe. (Ioane 8:28) Ua parau oia: “O vau te eˈa, e te parau mau, e te ora, aore roa e taata e tae i te Metua ra, maori râ ei ia ˈu.” (Ioane 14:6) Mea tahoê te feia haamori mau i roto i te haafatataraa ˈtu i te Metua, mea tahoê atoa ïa ratou i roto i te haapaoraa mau hoê roa.

 E nafea ia ite i te feia haamori mau?

▪ E pee te hoê Kerisetiano ia Iesu Mesia. A hiˈopoa e maha ravea e itehia ˈi o vai ma te na reira nei.

1. Ua pure Iesu Mesia ia Iehova: ‘Ua faaite au i to oe iˈoa.’ (Ioane 17:26) Te na reira atoa nei te mau Kerisetiano mau.

2. Ua poro Iesu i te Basileia o Iehova e ua tono i ta ˈna mau pǐpǐ na te mau fare e na reira atoa. Ua parau oia: “Te oire e te oire iti ta outou e tomo ra, e ui atu i to reira taata au.” I muri aˈe, ua faaue oia ia ratou: “E haere outou e faariro i te mau fenua atoa ei pǐpǐ.” (Mataio 10:7, 11; 28:19) E ite-ohie-hia te mau Kerisetiano mau i teie mahana no te mea te rave noa ra ratou i teie ohipa.

3. Ua patoi Iesu i te paturu i te poritita. Ua na ô oia no ta ˈna mau pǐpǐ: “E ere ratou i to teie nei ao, mai ia ˈu nei hoi e ere i to teie nei ao.” (Ioane 17:14) Ia matau-maitai-hia te feia haamori mau no to ratou tiaraa amui ore i te poritita e tia ˈi.

4. Ua here Iesu ia vetahi ê ma te haapae ia ˈna iho. Ua parau oia: “O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioane 13:35) E aupuru te mau Kerisetiano mau te tahi i te tahi e eita e faaô i roto i te mau tamaˈi.

Eaha te mau maitai o te haamoriraa mau?

▪ No te haamori ia Iehova, ia ite maitai ïa oe ia ˈna. E tauturu te reira ia oe ia tapi i te huru oraraa maitai roa ˈˈe e ia here ia ˈna. Ua fafau Iehova i te ora mure ore i te feia e here ia ˈna. Ua parau hoi Iesu: “Teie hoi te ora mure ore, ia ite ratou ia oe i te Atua mau.”—Ioane 17:3.

No te faahohonu atu â, a hiˈo i te pene 15 o teie buka, Eaha ta te Bibilia e haapii mau ra? piahia e te mau Ite no Iehova.

[Hohoˈa i te api 8]

‘E ara i te orometua haavare o te haere mai ia outou ma te huru o te mamoe, area o roto ra, e luko taehae ïa.’—Mataio 7:15