E imi anaˈe i te haapuraa i roto i te nunaa o te Atua
E imi anaˈe i te haapuraa i roto i te nunaa o te Atua
“E haamaitai au ia oe i roto i te amuiraa rahi.”—SAL. 35:18.
1-3. (a) E nafea te tahi mau Kerisetiano e fifi ai i te pae varua? (b) Ihea te nunaa o te Atua e paruruhia ˈi?
I TE tau faafaaearaa, te hopu ra Joe e ta ˈna vahine i te miti na te pae aˈau no te mataitai i te iˈa tino e û rau e rave rahi. Ua ǎu rii mua ˈtu raua no te mataitai i te parare. Ia tae raua i te tapemoana, ua na ô mai te vahine a Joe, “Ua atea roa tâua.” “Eiaha e haapeapea,” ta Joe ïa i pahono. “Ua ite au eaha ta ˈu e rave ra.” I muri iti noa ˈˈe, te haamanaˈo ra Joe i to ˈna uiraa, ‘Teihea râ te mau iˈa?’ Ma te riaria, tera mai te maˈo na te vahi hohonu mai. Auê te ati e! Fatata hoê noa metera ia ˈna i tioi ai te maˈo e moe atu ai.
2 E nehenehe te hoê Kerisetiano e umehia e te ao a Satani na roto i te faaanaanataeraa, te ohipa, te mau taoˈa, ma te ore e ite e ua tae oia i roto i te hoê tupuraa atâta. Te na ô ra Joe, e matahiapo Kerisetiano oia: “No ta ˈu i farerei, ua manaˈo vau i te feia ta tatou e amuimui. A ǎu na, na te vahi papu e te au maitai, oia hoi te amuiraa!” Eiaha e ǎu na te vahi moana hohonu o oe anaˈe, a atea ê atu ai oe i te amuiraa, e a roohia ˈi i te ati. Ia atea ê noa ˈtu oe, a hoˈi oioi i te ‘vahi papu.’ Ia ore anaˈe, e fifi to oe taairaa e o Iehova.
3 I teie mahana, e vahi atâta mau teie nei ao no te mau Kerisetiano. (Tim. 2, 3:1-5) Ua ite Satani e ua poto to ˈna taime e te imi ra ia pau ia ˈna te taata aita e vai ara ra. (Pet. 1, 5:8; Apo. 12:12, 17) Tera râ, te vai ra te parururaa. Ua faanaho Iehova i te hoê haapuraa pae varua no to ˈna nunaa, oia hoi te amuiraa Kerisetiano.
4, 5. Eaha te manaˈo o te taata e rave rahi i to ratou ananahi, e no te aha?
4 E paruru rii noa te totaiete ia tatou i te ati i te pae tino e aau. Te manaˈo nei e rave rahi taata e te fifi ra to ratou oraraa i te haavîraa uˈana, te ohipa ino, te moni rahi o te oraraa, e te viiviiraa o te natura. Te faaruru ra te taatoaraa i te ruhiruhiaraa e te maˈi. E te ui nei te feia e ea huru maitai to ratou, e ohipa, e fare e e moni navai, e vai noa anei râ te reira.
5 Aita atoa i noaa i te rahiraa te hau o te aau. Ma te peapea hoi, e rave rahi tei manaˈo e ite i te hau e te oaoa i roto i te faaipoiporaa e te fanauraa i te tamarii, aita râ te reira i naea. I te imiraa i te haapuraa pae varua, ua vai taa ore noa e rave rahi taata haere pure, ma te feaa i te faufaaraa o te aratairaa i horoahia mai. I to ratou iho â râ iteraa i te haerea ino o to ratou mau aratai haapaoraa e ta ratou mau haapiiraa tu ore e te Bibilia. Te manaˈo ra e rave rahi taata e aita ˈtu e ravea maoti râ te tiaturiraa i te ihi aivanaa aore ra i te tauturu e te manaˈo tae o te taata-tupu. Eita ïa tatou e maere e taiâ ˈi te taata aore ra e ore ai e manaˈo atea i to ratou ananahi.
6, 7. (a) No te aha i taa ê ai te tiairaa a te feia e tavini ra i te Atua e te feia aita e na reira ra? (b) Eaha ta tatou e hiˈopoa?
6 Mea taa ê roa te tiairaa a te mau melo o te amuiraa Kerisetiano e a to rapae! Hoê â haapeapearaa e fifi to tatou, te nunaa o Iehova, e to te taata-tupu, mea taa ê roa râ to tatou huru. (A taio i te Isaia 65:13, 14; Malaki 3:18.) No te aha? Ua ite hoi tatou i te auraa mau o te huru tupuraa o te huitaata ia au i te Bibilia, e ua ineine tatou i te faaruru i te mau fifi o te oraraa. Eita ïa tatou e haapeapea roa no to tatou ananahi. E paruruhia tatou e haamori nei ia Iehova i te mau manaˈo tano ore e te tu ore e te Bibilia, te mau peu taiata, e te mau faahopearaa o te reira. Te fanaˈo ra te mau melo o te amuiraa Kerisetiano i te hau, aita râ vetahi ê.—Isa. 48:17, 18; Phil. 4:6, 7.
7 E tauturu te tahi mau hiˈoraa ia tatou ia feruri maite i te parururaa e fanaˈohia ra e te feia e tavini ra ia Iehova, eiaha râ te feia aita e na reira ra. E turai teie mau hiˈoraa ia tatou ia hiˈopoa i to tatou iho manaˈo e ohipa e ia feruri e te faaohipa ˈtu â ra anei tatou i te mau aˈoraa a te Atua, ei parururaa ia tatou.—Isa. 30:21.
“Ua fatata tau avae i te pahee”
8. Ua aha noa te mau tavini a Iehova?
8 Mai te omuaraa o te tuatapaparaa o te huitaata, ua tutava te feia tei maiti i te tavini e te auraro ia Iehova eiaha e amuimui i te feia aita e na reira ra. Ua faaite iho â Iehova e e tupu te au ore i rotopu i ta ˈna mau tavini e te feia e pee ia Satani. (Gen. 3:15) No to ratou haapao-maite-raa i te mau faaueraa tumu a te Atua, i taa ê ai to ˈna nunaa i te feia e haaati ra ia ratou. (Ioa. 17:15, 16; Ioa. 1, 2:15-17) E ere iho â i te mea ohie ia na reira. Ua uiui hoi vetahi mau tavini a Iehova no nia i te faufaaraa o te hoê oraraa haapae.
9. A faataa i te fifi o te taata i papai i te Salamo 73.
9 Ua feaa te hoê tavini a Iehova tei papai i te Salamo 73, te hoê paha huaai o Asapha, e ua rave anei o ˈna i te mau faaotiraa paari. Ua ui te papai salamo no te aha te paieti ore i manuïa ˈi, i oaoa ˈi, e i onahia ˈi, area tei tutava i te tavini i te Atua, te roohia ra ïa i te ati e te fifi.—A taio i te Salamo 73:1-13.
10. No te aha mea faufaa ˈi no outou taitahi te mau uiraa ta te papai salamo i faahiti?
10 Ua ui atoa anei oe mai te papai salamo? Mai te peu e e, eiaha roa e faahapahapa ia oe aore ra e manaˈo e te ere ra oe i te faaroo. Tera hoi te manaˈo o e rave rahi tavini a Iehova e o vetahi atoa tei papai i te Bibilia. (Ioba 21:7-13; Sal. 37:1; Ier. 12:1; Hab. 1:1-4, 13) E titauhia ia feruri maite e ia farii te feia atoa e hinaaro e tavini ia Iehova i te pahonoraa o teie uiraa: O te taviniraa e te auraroraa i te Atua anei te ohipa maitai roa ˈˈe? Ua taaihia teie uiraa i te tumu parau rahi o te mana arii o te ao taatoa o te Atua, ta Satani i mârô i te ô i Edene. (Gen. 3:4, 5) No reira ïa tatou paatoa e feruri ai i ta te papai salamo i faahiti. E feii anei tatou i te paieti ore teoteo e au ra e aita to ratou e fifi? E faaea anei tatou i te tavini ia Iehova no te pee i to ratou haerea? Tera iho â ta Satani e hinaaro nei.
11, 12. (a) Mea nafea te papai salamo i faaea ˈi i te feaa, e eaha ta te reira e haapii maira? (b) Eaha tei tauturu ia tatou taitahi ia tae i te hoê â faaotiraa e te papai salamo?
11 Eaha tei tauturu i te papai salamo ia faaea i te feaa? Noa ˈtu e ua faˈi oia e ua fatata o ˈna i te faarue i te parau-tia, ua taui râ to ˈna manaˈo i to ˈna haereraa i “te vahi moˈa a te Atua.” Ua amui oia e te feia e haamori ra i te Atua i roto i te hiero ma te feruri maite i te opuaraa a te Atua. Ua taa ˈtura ia ˈna e eita o ˈna e hinaaro i te hoê â hopea e to te feia ohipa ino. Ua ite oia e tei te vahi heehee ratou no to ratou haerea e ta ratou mau faaotiraa i roto i te oraraa. Ua taa i te papai salamo e e pohe vave iho â te feia atoa e faarue ia Iehova, area te feia e tavini ra ia ˈNa, e tauturuhia ïa. (A taio i te Salamo 73:16-19, 27, 28.) Ua ite mau â outou e e parau mau tera. Mea au paha na te taata e rave rahi e ora no ratou anaˈe ma te ore e haapao i te ture a te Atua. E itehia râ te hopea ino o teie huru haerea.—Gal. 6:7-9.
12 Eaha ˈtu â ta te papai salamo i ora e haapii maira? Ua ite oia i te haapuraa e te paari i roto i te nunaa o te Atua. Ua haamata oia i te feruri maitai ma te tano i to ˈna haereraa i te vahi e haamorihia ˈi Iehova. I teie atoa mahana, i te mau putuputuraa a te amuiraa e ite ai tatou i te feia aˈo î i te paari e e fanaˈo ai i te maa maitai i te pae varua. No reira ïa Iehova e titau ai i ta ˈna mau tavini ia haere i te mau putuputuraa. I reira ratou e faaitoitohia ˈi e e turaihia ˈi ia ohipa ma te paari.—Isa. 32:1, 2; Heb. 10:24, 25.
A maiti maitai i to outou mau hoa
13-15. (a) Eaha tei tupu i nia ia Dina, o te haapapu i te aha? (b) No te aha e parururaa ˈi te amuimuiraa e te mau hoa Kerisetiano?
13 A hiˈo na ia Dina te tamahine a Iakoba tei roohia i te ati i to ˈna amuimuiraa e te mau hoa o teie nei ao. Te faaite ra te faatiaraa a te Genese e ua matau oia i te haere e hiˈo i te mau vahine no Kanaana i te vahi e faaea ˈi to ˈna utuafare. E ture aveia morare teitei ta te feia haamori ia Iehova, eiaha râ to Kanaana. Ia au i ta te mau ihipǎpǎ i ite mai, ua î roa Kanaana i te haamoriraa idolo, te taiataraa, te haamoriraa faufau o te melo taatiraa, te haavîraa uˈana e te peu tahutahu no to ratou mau haerea. (Exo. 23:23; Lev. 18:2-25; Deut. 18:9-12) A haamanaˈo na i te ati i to Dina amuimuiraa e tera mau taata.
14 Te parauhia ra e e ‘taata o Sekema no taua vahi ra tei hau noa i te tura i te fetii o to ˈna metua.’ Ua ite oia ia Dina e “ua rave ihora, e taoto atura ia ˈna, e hamani ino atura.” (Gen. 34:1, 2, 19) Auê te oto e! A feruri na, ua manaˈo anei Dina e e hamani-ino-hia oia? Peneiaˈe ua hinaaro noa oia e faahoa i te feia apî no taua vahi ra. I to ˈna manaˈo, e ore ratou e rave ino ia ˈna. Ua hape roa râ Dina.
15 Eaha ta teie faatiaraa e haapii maira? Eita tatou e nehenehe e amuimui e te feia e ere i te Kerisetiano a manaˈo atu ai e eita tatou e fifi. Te na ô ra te mau Papai: “E ino te parau [aore ra peu] maitai i te amuiraa iino.” (Kor. 1, 15:33) E parururaa râ te amuimuiraa e te feia hoê â ta outou tiaturiraa, ture aveia morare teitei, e here no Iehova. E faaitoito teie mau amuimuiraa maitatai ia outou ia ohipa ma te paari.—Mas. 13:20.
‘Ua horoihia outou’
16. Eaha ta te aposetolo Paulo i parau no vetahi o te amuiraa no Korinetia?
16 Ua tauturu te amuiraa Kerisetiano e rave rahi taata ia tamâ ia ratou i te mau peu viivii. I to te aposetolo Paulo papairaa i ta ˈna rata matamua i te amuiraa no Korinetia, ua faaite oia i te mau tauiraa ta to reira mau Kerisetiano i rave no te ora ia au i te mau ture aveia a te Atua. Na mua ˈˈe, e poreneia vetahi, faaturi, haamori idolo, mahu, eiâ, taero ava, e te vai ra ˈtu â. “Ua horoihia râ outou,” ta Paulo ïa i parau.—A taio i te Korinetia 1, 6:9-11.
17. Mea nafea te oraraa ia au i te mau ture aveia Bibilia i taui ai i te oraraa o e rave rahi?
17 Te ere ra te taata aita to ratou e faaroo i te aratairaa papu a te mau faaueraa tumu. Na ratou noa e aratai ia ratou aore ra te pee ra i te taiataraa a te feia e haaati ra ia ratou, mai vetahi mau Korinetia i tahito hou a riro mai ai ei Kerisetiano. (Eph. 4:14) E mana râ to te ite mau i te Parau a te Atua e i ta ˈna mau opuaraa no te haamaitai i te oraraa o te taata atoa e tiaturi ra i te aratairaa a te mau Papai e o te faaohipa ra i te reira. (Kol. 3:5-10; Heb. 4:12) Mea rahi te melo o te amuiraa Kerisetiano i teie mahana te faaite ia outou e hou ratou a ite ai e a faaohipa ˈi i te mau ture aveia tia a Iehova, i ora na ratou ma te morare ore. Aita râ ratou i oaoa na. Ua ite ratou i te hau i to ratou noa haamataraa i te amuimui e te nunaa o te Atua e i te ora ia au i te mau faaueraa tumu Bibilia.
18. Eaha ta te hoê potii i ora, o te haapapu i te aha?
18 Ua tatarahapa roa râ vetahi tei faarue na i te ‘vahi papu’ o te amuiraa Kerisetiano. Te faataa ra te hoê tuahine ta tatou e parau o Tania e “ua paraparauhia ia ˈna te parau mau.” I te 16raa râ o to ˈna matahiti, ua faarue oia i te amuiraa no “te mau mea navenave o teie nei ao.” Ei faahopearaa, ua hapû oia ma te hinaaro ore e ua haamarua i ta ˈna aiû. I teie nei, te na ô ra oia: “Ua ahoaho roa to ˈu aau i na matahiti e toru i rapae i te amuiraa. Ua haapohe au i ta ˈu aiû i roto i to ˈu opu, o te ore roa ïa e moe ia ˈu. . . . Te hinaaro nei au e parau i te feia apî atoa e opua ra e ‘tamata’ i teie nei ao noa ˈtu maa taime noa: ‘Eiaha roa ˈtu!’ Mea monamona na mua, mea maramara roa râ i te pae hopea. E mauiui anaˈe ta teie nei ao e pûpû mai. Ua ite au. Ua tamata vau. A faaea noa i roto i te faanahonahoraa a Iehova! Tera anaˈe te huru oraraa e faaoaoa.”
19, 20. Eaha te parururaa ta te amuiraa Kerisetiano e pûpû mai, e e nafea?
19 A feruri noa na eaha te hopea ia faarue oe i te parururaa a te amuiraa Kerisetiano. Eita roa e rave rahi e hinaaro e feruri i to ratou huru oraraa faufaa ore hou a farii ai i te parau mau. (Ioa. 6:68, 69) E fanaˈo oe i te haapuraa e te parururaa i mua i te mau ati e mauiui o te ao a Satani ma te amuimui noa e to oe mau taeae e tuahine Kerisetiano. Ia na reira oe ma te haere tamau i te mau putuputuraa a te amuiraa e haamanaˈo ai oe i te paari o te mau ture aveia tia a Iehova. E e faaitoito atoa ïa ia oe ia ora ia au i te reira. E tano roa ïa ia ‘haamaitai oe ia Iehova i roto i te amuiraa rahi,’ mai te papai salamo.—Sal. 35:18.
20 I te tahi mau taime, mea fifi iho â no te mau Kerisetiano atoa ia tapea i to ratou hapa ore no te mau tumu rau. E hinaaro ratou ia faaite atu te hoê Kerisetiano i te mea tano e rave. Eaha ïa ta oe, e oia atoa te toea o te amuiraa, e rave no te tauturu i to oe mau hoa Kerisetiano? E tuatapapa to muri nei tumu parau e nafea oe e ‘haamahanahana ˈi i to oe mau taeae e e faatupu ai i te maitai.’—Tes. 1, 5:11.
Eaha ta outou e pahono?
• Eaha ta te taata i papai i te Salamo 73 i ora na e haapii maira?
• Eaha ta Dina i ora na e haapii maira?
• No te aha outou e ite ai i te haapuraa i roto i te amuiraa Kerisetiano?
[Uiraa haapiiraa]
[Hohoˈa i te api 11]
A ǎu na, na te vahi papu; a faaea noa i roto i te amuiraa!