A apiti roa i te auhune rahi pae varua

“Ia rahi â te rave i te ohipa a te Fatu.”—KOR. 1, 15:58.

1. Eaha ta Iesu i titau i ta ˈna mau pǐpǐ?

 I TO ˈNA haereraa na Samaria i te pae hopea o te matahiti 30, ua faafaaea Iesu i te hoê apoo pape piri i te oire o Sikara. Ua parau oia i ta ˈna mau pǐpǐ: “E faateitei i to outou mata, e hiˈo i te mau aua ra, ua teatea ïa i teie nei ua auhune.” (Ioa. 4:35) Te faahiti ra Iesu i te hoê haaputuputuraa i te mau taata aau tia o te riro mai ei pǐpǐ, eiaha râ i te hoê auhune mau. Te titau ra oia i ta ˈna mau pǐpǐ ia haa. Mea rahi te ohipa, mea iti râ te taime no te rave i te reira!

2, 3. (a) Eaha te faaite ra e te ora nei tatou i te tau auhune? (b) E hiˈopoa teie tumu parau i te aha?

² E auraa taa ê to te parau a Iesu no nia i te auhune no to tatou anotau. Te ora nei tatou i te tau ‘ua teatea te aua o te huitaata, ua auhune.’ I te mau matahiti atoa, te titau-manihini-hia ra te mau mirioni taata ia haapii i te pue parau mau ora, e e tausani pǐpǐ apî te bapetizohia. E fanaˈoraa taa ê na tatou te apitiraa i te auhune rahi roa ˈˈe i raro aˈe i te aratairaa a te Fatu o te ohipa, te Atua ra o Iehova. Mea ‘rahi anei ta oe e rave ra’ i roto i teie auhune?—Kor. 1, 15:58.

³ I te roaraa o ta ˈna taviniraa e toru matahiti e te afa i te fenua, ua faaineine Iesu i ta ˈna mau pǐpǐ ei rave ohipa i roto i te auhune. E hiˈopoa teie tumu parau e toru haapiiraa faufaa ta Iesu i horoa i ta ˈna mau pǐpǐ. E faaite te haapiiraa taitahi i te hoê huru faufaa rahi no tatou a tutava ˈi tatou i te rave i te maraa no te haaputuputu i te mau pǐpǐ i teie nei mahana. E hiˈopoa hoê hoê anaˈe i teie mau huru.

Mea titauhia te haehaa

4. Mea nafea to Iesu faataaraa i te faufaaraa o te haehaa?

⁴ No mârô noa ˈtura te mau pǐpǐ o vai tei rahi aˈe. Te ite-maitai-hia ra te feii e te riri i nia i to ratou hohoˈa mata. No reira Iesu i parau ai i te hoê tamaiti iti ia tia i rotopu ia ratou e ua na ô atura: ‘O tei faahaehaa ia ˈna iho mai teie nei tamaiti iti, oia te rahi i te basileia’ o te raˈi. (A taio i te Mataio 18:1-4.) Eiaha te mau pǐpǐ ia manaˈo mai teie nei ao o te faaau i te hoê taata ia au i to ˈna mana, tiaraa e ta ˈna faufaa. Ia taa râ ia ratou e ua taaihia to ratou rahi i ‘te faahaehaaraa ia ratou’ i mua i te taata. E haamaitai e e faaohipa Iehova ia ratou ia haehaa mau ratou.

5, 6. No te aha ia haehaa ˈi tatou no te apiti roa i te auhune? A faataa.

⁵ I teie mahana, te tapi ra e rave rahi i te mana, te faufaa, e te tiaraa i te roaraa o to ratou oraraa. Mea iti ïa to ratou taime aore ra aita roa ˈtu no te haapii no nia i te Atua e no te tavini ia ˈna. (Mat. 13:22) Te oaoa ra râ te nunaa o Iehova i te ‘faahaehaa ia ratou’ i mua i te taata ia haamaitaihia e ia fariihia ratou e te Fatu o te ohipa.—Mat. 6:24; Kor. 2, 11:7; Phil. 3:8.

⁶ A hiˈo na ia Francisco te hoê matahiapo  i Marite Apatoa. I to ˈna apîraa, ua faarue oia i te haapiiraa teitei no te taviniraa pionie. Te haamanaˈo ra oia: “I muri aˈe i to ˈu opuaraa e faaipoipo, e nehenehe e noaa mai te tahi ohipa moni maitai na mâua ta ˈu vahine. Ua maiti râ mâua i te hoê oraraa au noa no te tavini noa ma te taime taatoa. I muri aˈe, ua tamariihia mâua e ua rahi atu â te fifi. Ua tauturu mai râ Iehova ia tapea i ta mâua faaotiraa.” Te parau ra Francisco i te pae hopea: “Ua hau atu i te 30 matahiti to ˈu taviniraa ei matahiapo e i roto atoa e rave rahi atu â hopoia taa ê. Aita mâua i tatarahapa noa ˈˈe i teie oraraa au noa.”

7. Ua tamata anei outou taitahi i te faaohipa i te aˈoraa o te Roma 12:16, e eaha te faahopearaa?

⁷ Ia patoi oe i “te mea teitei” o teie nei ao no te ‘faaau atu i te mea haehaa,’ e nehenehe atoa oe e fanaˈo i te mau haamaitairaa e hopoia rau i roto i te auhune.—Roma 12:16; Mat. 4:19, 20; Luka 18:28-30.

E haamaitaihia te ohipa-maite-raa

8, 9. (a) A faataa poto na i ta Iesu parabole o te taleni. (b) E faaitoito iho â râ teie parabole ia vai ma?

⁸ O te ohipa-maite-raa te tahi atu huru faufaa no te apiti roa i te auhune. Ua faahohoˈa Iesu i te reira i roto i te parabole o te mau taleni. * Ua horoa te hoê taata i ta ˈna mau taoˈa i e toru tavini hou oia a reva ˈi i te ara. E pae taleni ta te tavini matamua, e piti ta te piti e hoê ta te toru. I te revaraa to ratou fatu, ua ohipa maite na tavini matamua e ua imi oioi i te ravea ia rahi atu â te taleni a te fatu. Ua “faatau” râ te toru o te tavini. Ua huna oia i ta ˈna taleni i raro i te repo. I to te fatu hoˈiraa mai, ua haamaitai oia i na tavini matamua ma te faatiaau ia raua “i nia iho i te mea rahi.” Ua rave oia i te taleni ta ˈna i horoa i te toru o te tavini e ua tiahi ia ˈna i rapae i to ˈna utuafare.—Mat. 25:14-30.

⁹ E hinaaro iho â oe e pee i na tavini itoito o te parabole a Iesu, a apiti roa ˈtu ai i te ohipa faariroraa i te taata ei pǐpǐ ia au i te maraa. Mea iti roa paha ta oe e rave nei no te tahi mau tupuraa. E nafea ïa? No te fifi i te pae moni, e faahepohia oe ia rave i te hora hau no te aupuru i to oe utuafare. Aore ra e ruhiruhia paha oe o te ere ra i te itoito e te ea maitai. E poroi faaitoito ïa ta te parabole o te taleni no oe.

10. Mea nafea to te fatu o te parabole faaiteraa i te huru au noa, e no te aha te reira e faaitoito ai ia outou taitahi?

¹⁰ Ua ite te fatu o te parabole  e e ravea taa ê ta ta ˈna tavini taitahi. Ua faaite oia i te reira i to ˈna horoaraa i te mau taleni ‘i tei au i taua na taata ra.’ (Mat. 25:15) Mea rahi aˈe ïa te taleni i noaa i te tavini matamua i ta te piti o te tavini. Ua haafaufaa râ te fatu i ta raua tutavaraa itoito ma te parau e e tavini “maitai e te haavare ore” raua e ma te horoa ˈtu i te hoê â haamaitairaa. (Mat. 25:21, 23) Ua ite atoa te Fatu o te ohipa, te Atua ra o Iehova, e te rave nei oe i tei maraa ia oe i roto i ta ˈna taviniraa ia au i to oe mau tupuraa. E haafaufaa iho â oia i ta oe mau tutavaraa ma to aau e puai atoa no te tavini ia ˈna. E haamaitai atoa oia ia oe ia au i te reira.—Mar. 14:3-9; a taio i te Luka 21:1-4.

11. A faataa e nafea te ohipa-maite-raa i roto i te fifi e haamaitai-rahi-hia ˈi.

¹¹ Te faaite ra te hiˈoraa o Selmira, te hoê tuahine e ora ra i Beresilia, e aita te ohipa-maite-raa i roto i te taviniraa i te Atua i taaihia i te mau tupuraa maitai o te oraraa. A 20 matahiti i teie nei, ua pupuhihia ta ˈna tane e te tahi mau taata eiâ, ma te vaiiho mai e toru tamarii. Ei vahine tamâ fare, e ohipa o ˈna e rave rahi hora ma te tere na nia i te faurao î i te taata, mea rohirohi roa. Noa ˈtu teie mau fifi, ua faanaho oia e tavini ei pionie tamau. I muri aˈe, ua apiti atu e piti o ta ˈna na tamarii ia ˈna i te taviniraa pionie. Te faatia ra oia: “I te roaraa o te mau matahiti, ua hau atu i te 20 taata tei haapii i te Bibilia, e tei riro mai ei melo o to ˈu ‘utuafare.’ I teie mahana, e hoa matou e here ra te tahi i te tahi. Eita te moni e hoo mai i teie mea faufaa roa.” Ua haamaitai iho â te Fatu o te ohipa i te mau tutavaraa itoito a Selmira!

12. E nafea tatou e ohipa maite ai i roto i te pororaa?

¹² Te iti nei paha to oe taime i roto i te taviniraa no te mau tupuraa o te oraraa, e nehenehe â oe e apiti atu â i te auhune ma te tavini maitai atu â. Ia faaohipa maitai oe i te mau manaˈo tauturu e faaitehia i te Putuputuraa no te taviniraa hebedoma, e poro maitai atu â oe ma te tamata i te mau ravea apî. (Tim. 2, 2:15) E nehenehe atoa oe e faanuu aore ra e vaiiho i te mau ohipa e ere i te mea faufaa roa no te turu tamau i te mau faanahoraa o te pororaa a te amuiraa.—Kol. 4:5.

13. Eaha te ravea faufaa e ohipa maite noa ˈi tatou?

¹³ A haamanaˈo e no te aau î i te mauruuru e ohipa maite ai tatou. (Sal. 40:8) Ua mǎtaˈu te toru o te tavini o ta Iesu parabole i to ˈna fatu, ma te faariro ia ˈna ei taata iria e te etaeta. No reira oia i huna ˈi i ta ˈna taleni, aita râ i faaohipa i te reira ia rahi te faufaa a to ˈna fatu. Eiaha e pee i tera huru faatau. E faatupu e e atuatu râ tatou i te taairaa piri e o Iehova, te Fatu o te ohipa. A faaherehere i te taime no te haapii e te feruri maite i to ˈna mau huru au rahi, mai to ˈna here, faaoromai, e aroha. E turai ïa to aau ia oe ia tavini maite ia ˈna.—Luka 6:45; Phil. 1:9-11.

‘Ia moˈa outou’

14. Ia faaî te feia e hinaaro e ooti i teihea titauraa faufaa?

¹⁴ Ma te faahiti i te mau Papai Hebera, te faaite ra te aposetolo Petero i te hinaaro o te Atua no ta ˈna mau tavini i te fenua: “Mai ia ˈna hoi i parau mai ia outou e moˈa ra, ia moˈa atoa outou i ta outou mau parau atoa: ua oti hoi i te papaihia e, Ia maitai [aore ra moˈa] outou; te maitai [aore ra moˈa] nei hoi au.” (Pet. 1, 1:15, 16; Lev. 19:2; Deut. 18:13) Te haapapu ra teie irava e ia vai mâ te feia ooti i te pae morare e varua. E nehenehe tatou e faaî i teie titauraa faufaa ma te rave i te mau taahiraa ia mâ tatou i te auraa taipe. E nafea ïa? Maoti ïa te parau mau a te Atua.

15. Eaha ta te parau mau a te Atua e nehenehe e rave?

 ¹⁵ Ua faaauhia te parau mau a te Atua i te pape o te tamâ. Ua papai te aposetolo Paulo e mea mâ te amuiraa o te mau Kerisetiano faatavaihia i te aro o te Atua, mai te hoê vahine faaipoipo viivii ore na te Mesia, tei tamâ ia ratou ‘i te horoiraa pape e te parau, ia moˈa hoi, e te ino ore.’ (Eph. 5:25-27) I faahiti atoa na Iesu i te ohipa tamâraa a te parau a te Atua, ta ˈna i faaite haere. Ua parau oia i ta ˈna mau pǐpǐ: “Ua mâ ra outou i tena na, i te parau ta ˈu i haapii atu ia outou na.” (Ioa. 15:3) No reira, e nehenehe te parau mau a te Atua e tamâ i te pae morare e varua. Ia farii tatou i te reira e mauruuru ai te Atua i ta tatou haamoriraa.

16. E nafea tatou e vai mâ noa ˈi i te pae varua e morare?

¹⁶ No te riro ei rave ohipa i roto i te auhune a te Atua, ia haapae ïa tatou i te mau peu viivii atoa i te pae morare e varua i roto i to tatou oraraa. Ia nehenehe tatou e amo noa i tera fanaˈoraa taa ê, e haapao maitai ïa tatou i te mau ture aveia teitei a Iehova i te pae morare e varua. (A taio i te Petero 1, 1:14, 15.) E haapao maitai tatou i te mâraa o to tatou tino, ia farii noa ïa tatou i te ohipa tamâraa a te parau mau a te Atua. Na roto ïa i te taioraa i te Bibilia e te haereraa i te mau putuputuraa Kerisetiano. Na roto atoa i te tutavaraa ma te aau tae i te faaohipa i te mau haamanaˈoraa a te Atua i roto i to tatou oraraa. Mea na reira ïa tatou e aro ai i to tatou iho mau huru hara e e patoi ai i te haaviiviiraa a teie nei ao. (Sal. 119:9; Iak. 1:21-25) Mea mahanahana mau â te iteraa e maoti te parau mau a te Atua e ‘horoihia ˈi’ tatou i te hara!—Kor. 1, 6:9-11.

17. E pee tatou i teihea mau aˈoraa Bibilia no te vai mâ noa?

¹⁷ Te farii ra anei oe i te ohipa tamâraa a te parau mau a te Atua i roto i to oe oraraa? E nafea oe ia faaarahia oe i te mau fifi atâta o te faaanaanataeraa faufau a teie nei ao? (Sal. 101:3) Te ara ra anei oe i te ore e amuimui i te mau hoa haapiiraa e ohipa e ere hoê â tiaturiraa ta outou? (Kor. 1, 15:33) Te tutava mau ra anei oe i te haavî i to oe iho mau paruparu, o te haaviivii ia oe i te aro o Iehova? (Kol. 3:5) Te faataa ê maira anei oe ia oe i te mau aimârôraa poritita e te manaˈo here aiˈa o te mau tataˈuraa tuaro a teie nei ao?—Iak. 4:4.

18. E nafea te vai-mâ-raa i te pae morare e varua e tauturu ai ia tatou ia riro ei rave ohipa hotu maitai?

¹⁸ E ite oe i te mau hotu maitai ia faaroo maite oe. Ua faaau Iesu i ta ˈna mau pǐpǐ faatavaihia i te mau amaa vine i te na ôraa: “Te mau amaa hotu ore atoa i roto ia ˈu nei ra, na [to ˈu Metua] ïa e tâpû ê atu; e te mau amaa hotu atoa ra, na ˈna ïa e tope ia maitai, ia rahi atu â te hotu.” (Ioa. 15:2) Ia farii oe i te ohipa tamâraa a te parau mau Bibilia, e rahi atu â ta oe hotu.

Te mau haamaitairaa i teie nei e a muri aˈe

19. Mea nafea ta Iesu mau pǐpǐ i haamaitaihia ˈi no ta ratou mau tutavaraa ei rave ohipa i roto i te auhune?

¹⁹ Ua noaa i te mau pǐpǐ haapao maitai tei farii i ta Iesu faaineineraa te mana o te varua moˈa i te Penetekose 33 ei ite “e tae  noa ˈtu i te hopea o te fenua.” (Ohi. 1:8) Ua tavini ratou ei melo o te tino aratai, ei mitionare, ei matahiapo ratere, e e tuhaa faufaa ta ratou i roto i te pororaa i te evanelia “i te taata atoa i raro aˈe i teie nei raˈi.” (Kol. 1:23) Ua fanaˈo mau â ratou i te mau haamaitairaa e ua faaoaoa ia vetahi ê!

20. (a) Ua fanaˈo outou i teihea mau haamaitairaa no te apiti-roa-raa i te auhune pae varua? (b) Eaha ta outou i faaoti papu?

²⁰ Ma te faaite i te haehaa, ma te ohipa maite e ma te haapao i te mau ture aveia teitei o te Parau a te Atua, e tamau ai tatou i te apiti maitai roa i te auhune rahi pae varua e tupu nei. Te mauiui e te inoino ra e rave rahi i te tapiraa i te huru oraraa nounou taoˈa e te navenave, area tatou nei, te oaoa e te mauruuru mau ra ïa. (Sal. 126:6) Hau roa ˈtu â, ‘e ere i te mea faufaa ore te ohipa a te Fatu ta tatou e rave ra.’ (Kor. 1, 15:58) E haamaitai te Fatu o te ohipa, te Atua ra o Iehova, ia tatou e a muri noa ˈtu no ‘ta tatou ohipa e to tatou hinaaro i to ˈna iˈoa.’—Heb. 6:10-12.

[Nota i raro i te api]

Te haamanaˈo ra anei outou?

A tutava ˈi outou i te apiti roa i te auhune . . .

• no te aha e titauhia ˈi te haehaa?

• e nafea outou e ohipa maite noa ˈi?

• no te aha mea faufaa ˈi ia vai mâ noa i te pae morare e varua?

[Uiraa haapiiraa]

[Hohoˈa i te api 25]

Maoti te haehaa e ora au noa ˈi tatou ma te paturu i te Basileia