Te parau mau no nia i te hara

E NEHENEHE anei te hoê taata maˈi e haapapu e aita to ˈna e fiva ma te tuparari i te faito fiva? Eita iho â ïa! Hoê â atoa, e ere no te mea noa e rave rahi te patoi ra i to te Atua manaˈo no nia i te hara e aita iho â ïa e hara. Te faahiti rahi nei ta ˈNa Parau i te reira. Eaha ta te Bibilia e haapii mau ra no nia i te hara?

E hema paatoa tatou

Tau piti tausani matahiti aˈenei, ua faaite te aposetolo Paulo i to ˈna inoino i te mea e ‘te maitai ta ˈna i hinaaro ra, aore ïa oia i rave, area te ino hinaaro-ore-hia e ana ra, o ta ˈna ïa e rave.’ (Roma 7:19) Mai te peu e mea haavare ore tatou, e farii tatou e hoê â atoa no tatou. E hinaaro paha tatou e ora ia au i na Ture Ahuru aore ra ia au i te tahi atu ture aveia no nia i te haerea, tera râ e hema paatoa iho â tatou. E ere i te mea e ua opua tatou e ofati i te hoê ture, no to tatou râ paruparu. No te aha? Te pahono ra Paulo: “Te rave nei au i te mea hinaaro-ore-hia e au ra, e ere ïa vau tei rave ra, o te ino râ i vai i roto ia ˈu nei ra.”—Roma 7:20.

Mai ia Paulo, mea paruparu te taata atoa—haapapuraa o te hara e te huru tia ore i tutuuhia mai. “Ua rave paatoa . . . i te hara, e ua ere i te haamaitai a te Atua ra,” ta te aposetolo e parau ra. Eaha te tumu o taua tupuraa ra? Te parau faahou ra o Paulo: “No te taata hoê ra [Adamu] i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa.”—Roma 3:23; 5:12.

Ua faaatea ê te hara a to tatou na metua matamua ia tatou i te Atua e ua faaere ia tatou i te tia-roa-raa. Noa ˈtu e e rave rahi te patoi ra i teie manaˈo, tera ta te Bibilia e haapii ra. Ma te faahiti i te mau pene matamua o te Genese ei haapapuraa, ua faaite Iesu e te tiaturi ra oia i te aamu o Adamu raua o Eva.—Genese 1:27; 2:24; 5:2; Mataio 19:1-5.

Hoê o te mau haapiiraa faufaa roa o te poroi Bibilia, oia hoi ua haere mai Iesu i te fenua nei no te faaora i te taata e faaohipa i te faaroo ia ˈna i to ratou tiaraa taata hara. (Ioane 3:16) To tatou oraraa no a muri aˈe, tei to tatou ïa fariiraa i te ravea faaoraraa a Iehova i te huitaata mauruuru i te hoê tupuraa peapea o te ore e vî ia ratou. Ia ore râ tatou e maramarama maitai eaha te hara no te Atua, eita ïa tatou e haafaufaa i te ravea ta ˈna i haamau no te faaora ia tatou.

No te aha e titauhia ˈi te tusia o Iesu?

Ua horoa Iehova i te tiaturiraa o te ora mure ore i te taata matamua. Ia patoi noa ˈtu oia i te Atua, e ere Adamu i tera tiaturiraa faahiahia. Ua patoi atu Adamu e riro maira oia ei taata hara. (Genese 2:15-17; 3:6) Aita Adamu i ohipa ia au i to te Atua hinaaro, ua ere atura oia i te tia-roa-raa, e ua tâpû oia i to ˈna mau taairaa e te Atua. I to ˈna hararaa ma te ofati i ta te Atua ture, ruau aˈera e pohe atura. Ma te peapea, ua fanauhia te mau huaai atoa a Adamu, o tatou atoa, i roto i te hara, e o te pohe te faahopearaa. No te aha?

Mea ohie roa te tumu. Eita te mau metua tia ore e fanau mai i te mau tamarii tia roa. Ua fanauhia ta Adamu huaai ei feia hara, e mai ta Paulo i papai, “e utua te pohe no te hara.” (Roma 6:23) Te horoa maira te piti o te tuhaa o teie noâ irava i te tiaturiraa: “Area te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.” Oia hoi, maoti to Iesu pohe ei tusia e tamâhia  ˈi te huitaata mauruuru e te faaroo i te mau faahopearaa o ta Adamu hara. a (Mataio 20:28; Petero 1, 1:18, 19) Ia aha te reira i nia ia oe?

Te riro nei tatou i te aroha o te Mesia

Ma te faauruhia, ua horoa te aposetolo Paulo i ta te Atua pahonoraa i to nia nei uiraa. Ua papai oia: “Te riro nei . . . matou i te aroha o te Mesia ra, no te mea te parau nei matou e, i pohe te hoê no te taata atoa, . . . e i pohe hoi oia no te taata atoa, ia ore te feia e ora ra ia haapao faahou ia ratou iho i te oraraa nei, ia haapao râ ia ˈna, tei pohe e tei tia faahou no ratou ra.” (Korinetia 2, 5:14, 15) Ia farii te hoê taata e e faatiamâ to Iesu tusia ia ˈna i te mau faahopearaa o te hara—e ia hinaaro oia e faaite i te mauruuru no tera faanahoraa—e tutava ïa oia i te ora ia au i ta te Atua e opua ra no ˈna. E faaitoito atoa oia i te hiˈopoa i ta te Atua e titau ra, i te haamataro i to ˈna manaˈo haava i te mau ture aveia o te Bibilia, e i te ora ia au i te reira.—Ioane 17:3, 17.

E haafifi te haerea ino i to tatou mau taairaa e te Atua ra o Iehova. Aita e ore e, i to te arii Davida fariiraa i te ino rahi o ta ˈna faaturi e o Bate-seba e to ˈna haapoheraa i ta ˈna tane, ua haama roa oia. Te mea râ i haapeapea roa ia ˈna, e mea tano hoi, ua faaino ta ˈna mau hara i te Atua. Ua faˈi oia ma te haehaa ia Iehova: “I mua i to aro, to oe anaˈe ra, i hara ˈi au nei, e i mua i to mata i rave ai au i teie nei ino.” (Salamo 51:4) Oia atoa, i to Iosepha tamataraahia ia faaturi, ua turai to ˈna manaˈo haava ia ˈna ia parau: “Eaha hoi au e tia ˈi ia rave i tena na ino rahi, a hara ˈi i te Atua?”—Genese 39:9.

E ere ïa te hara i te haama no te mea ua itehia ta tatou ohipa ino i rave. E ere atoa i te faarururaa i te faahapahaparaa a te taata no te mea aita tatou i ohipa ia au i ta ratou i manaˈo no tatou. E haafifi te ofatiraa i ta te Atua mau ture i te pae taatiraa, haavare ore, faatura, haamoriraa e te vai ra ˈtu â, i to tatou mau  taairaa e o ˈna. Ia opua tatou i te rave tamau i te hara, te faariro ra ïa tatou ia tatou ei enemi no te Atua. E parau mau teie te tia ia ferurirurihia.—Ioane 1, 3:4, 8.

Eaha ˈtura ïa no te hara? Aita i taui. Te iˈoa noa ta te taata i taui ma te tiaturi e iti aˈe mai to ˈna faufaaraa. Te haamamû ra aore ra te tâuˈa ore ra e rave rahi i to ratou manaˈo haava. E mea tia ia patoi te feia atoa e hinaaro ra i te farii maitai a te Atua i teie huru feruriraa. Mai ta tatou i ite, te faahopearaa o te hara, e ere noa te haama, o te pohe râ. E tumu te hara no te ora aore ra no te pohe.

Te parau oaoa râ, oia hoi maoti te tusia taraehara o Iesu e faaorehia ˈi te hara ia tatarahapa mau tatou e ia faarue tatou i te reira. “Ua maitai te feia i faaorehia ta ratou hara, o tei tapoˈihia to ratou ino,” ta Paulo i papai. “Ua maitai te taata o tei ore roa Iehova e parau e, e hara ta ˈna.”—Roma 4:7, 8.

[Nota i raro i te api]

[Tumu parau tarenihia/Hohoˈa i te api 10]

Ua taui roa te Ekalesia i ta ˈna haapiiraa

No te rahiraa o te mau Katolika haere pure, ua riro noa na te limepo ei haapiiraa taa ore. I te mau ahuru matahiti i mairi, ua morohi riirii noa te reira a ore roa ˈtu ai e ite-faahou-hia i roto i te mau haapiiraa Katolika. I 2007, ua tuurima roa te Ekalesia Katolika i te “parau poheraa” o te limepo i roto i te hoê papai e faahiti ra i “te mau tumu faaroo e lituria ia tiaturi e e nehenehe te mau tamarii tei pohe ma te ore e bapetizohia e faaorahia e e ite i te oaoa mure ore.”—Tomite teologia nunaa rau.

No te aha te Ekalesia i taui roa ˈi i ta ˈna haapiiraa? Ua faatiamâ na mua te reira i te ekalesia iho i ta te papai vea Farani o Henri Tincq e parau ra “te hoê tufaa teimaha, tei paturuhia, mai te senekele 5 o to tatou tau e tae roa mai i te senekele i mairi, e te hoê Ekalesia taviri taata, o tei oaoa roa hoi i te faaohipa i te haamǎtaˈuraa o te limepo no te turai i te mau metua ia bapetizo oioi i ta ratou mau tamarii.” Ua fa mai râ te tahi atu mau mea i te taui-roa-raahia teie haapiiraa.

Tutuu aore ra Papai Moˈa? I te senekele 12, ua tupu te hoê aimârôraa faaroo no nia i te vahi tamâraa hara. Ua haapii te Ekalesia Katolika e e ora ˈtu te varua o te taata i muri aˈe i to ˈna poheraa. I tia na ïa i te Ekalesia ia faataa eaha te tupu i te varua o te mau tamarii tei ore e nehenehe e haere i nia i te raˈi i te mea hoi e aita ratou i bapetizohia e aita i au ia ratou te po auahi. Mea na reira te faraa mai te haapiiraa o te limepo.

Aita râ te Bibilia e haapii ra e e ora ˈtu te hoê tuhaa o te hoê taata ia pohe te tino. Te faahiti ra te mau Papai Moˈa i te pohe mai te hoê huru itea-ore-raa, tei au i te taoto. (Koheleta 9:5, 10; Ioane 11:11-14) I te mea e aita e tuhaa o te taata te ora ˈtu ia pohe te tino, aita ïa e vahi mai te limepo.

Te faaite ra te Bibilia e i te aro o te Atua e mea moˈa te mau tamarii e metua Kerisetiano to ratou. (Korinetia 1, 7:14) Mea faufaa ore teie parau ahiri e titauhia ia bapetizo i te mau tamarii no te faaora ia ratou.

Te faaino mau ra teie haapiiraa o te limepo i te Atua ma te faataa ia ˈna mai te hoê faatere haavî aroha ore e faautua ra i te feia hapa ore, eiaha râ mai te hoê Metua tia e î i te here. (Deuteronomi 32:4; Mataio 5:45; Ioane 1, 4:8) No reira, aita roa ˈtu te mau Kerisetiano haavare ore i turu aˈe i teie haapiiraa tu ore i te mau Papai!

[Hohoˈa i te api 9]

Ia ora tatou ia au i te Parau a te Atua, e maitai to tatou mau taairaa e o ˈNa e te taata