A imi papu i ta Iehova haamaitairaa
A imi papu i ta Iehova haamaitairaa
‘O te Atua te faautua [maitai] i te feia i imi papu ia ˈna.’—HEB. 11:6.
1, 2. (a) Eaha ta te taata e rave ia haamaitaihia mai e te Atua? (b) No te aha tatou e hinaaro mau ai i ta Iehova haamaitairaa?
“IA HAAMAITAI te Atua ia oe!” I te tahi mau fenua, tera ta te mau taata ěê e parau ia maitihe te hoê taata. E haamaitai te pǔpǔ ekalesiatiko o te mau haapaoraa rau i te mau taata, te mau animara, e te mau taihaa. E tere te taata i te tahi mau vahi haamoriraa ia haamaitaihia ratou. Ua matau te mau tia poritita i te tau i te Atua ia haamaitai i to ratou nunaa. I to outou manaˈo, e aniraa tano anei teie? E pahonohia mai anei? O vai mau â ta te Atua e haamaitai, e no te aha?
2 Ua tohu Iehova e i te anotau hopea, e nunaa viivii ore e te hau to ˈna no te mau fenua atoa, o te poro i te evanelia o te Basileia e ati aˈe te fenua noa ˈtu te riri e te patoiraa. (Isa. 2:2-4; Mat. 24:14; Apo. 7:9, 14) E hinaaro iho â tatou, tei farii i te hopoia e riro ei melo o teie nunaa, i te haamaitairaa a te Atua. Aita anaˈe, eita ïa tatou e manuïa. (Sal. 127:1) E nafea râ e noaa mai ai ta te Atua haamaitairaa?
E haamaitai-rahi-hia te feia faaroo
3. Ia faaroo Iseraela, eaha te faahopearaa?
3 A taio i te Maseli 10:6, 7. Hou te nunaa Iseraela i tomo ai i te Fenua tǎpǔhia, ua faaite Iehova e e ruperupe mau â e e paruruhia ratou ia faaroo ratou i to ˈna reo. (Deut. 28:1, 2) E haamaitai iho â Iehova i to ˈna nunaa. Mea papu te reira no te feia faaroo.
4. Ua taaihia te faarooraa ma te aau tae i te aha?
4 Ia faaroo Iseraela ma teihea huru? Ia au i te Ture a te Atua, eita oia e mauruuru ia ore to ˈna nunaa e tavini ia ˈna “ma te oaoa, e ma te rearea o te aau.” (A taio i te Deuteronomi 28:45-47.) Eita Iehova e hinaaro ia faaroo tatou mai tera noa i ta ˈna mau faaueraa papu, mai ta te animara e te demoni. (Mar. 1:27; Iak. 3:3) E faaiteraa i te here te faarooraa i te Atua ma te aau tae. E itehia mai te oaoa no te tiaturiraa e e ere te mau faaueraa a Iehova i te mea teimaha e “o oia te faautua [maitai] i te feia i imi papu ia ˈna.”—Heb. 11:6; Ioa. 1, 5:3.
5. Mea nafea te tiaturi i te parau fafau a Iehova i tauturu ai i te hoê taata ia auraro i te ture o te Deuteronomi 15:7, 8?
5 A feruri i tei itehia mai i to te hoê taata auraroraa ma te tiaturi i te Deuteronomi 15:7, 8. (A taio.) Ua maitai rii mai paha te feia veve i to ˈna auraroraa i teie ture noa ˈtu e ma te amuamu. Teie râ, ua tupu anei te taairaa maitai i rotopu i te nunaa o te Atua? Ua faaite anei te reira i te tiaturi e e nehenehe Iehova e aupuru i ta ˈna mau tavini e i te mauruuru ma te pee i to ˈna huru horoa noa? Aita! Ua ite maitai te Atua i te huru aau o te taata horoa mau e ua fafau e haamaitai i ta ˈna mau ohipa atoa e ta to ˈna rima atoa e rave. (Deut. 15:10) Ua turai te tiaturi i taua parau fafau ra ia ohipa e ua haamaitai-rahi-hia te reira.—Mas. 28:20.
6. Te haapapu maira te Hebera 11:6 i te aha?
6 Hau atu i te tiaturi e e haamaitai Iehova i ta ˈna mau tavini, te haapapu ra te Hebera 11:6 i te tahi atu huru maitai faufaa roa no te fanaˈo i te reira. A tapao e e haamaitai Iehova i te feia “i imi papu ia ˈna.” Te faataa ra te taˈo tumu i faaohipahia i ǒ nei i te onoono e te tutavaraa tamau. E irava mahanahana mau â teie! Ia tutava mau tatou e haamaitai mai ai te Atua mau hoê roa, e “ore e tia ia haavare.” (Tito 1:2) Ua faaite oia i te roaraa o te tau e e nehenehe e tiaturi i ta ˈna e fafau. E tupu iho â ta ˈna mau parau. (Isa. 55:11) Mea papu maitai e ia faaite tatou i te tiaturi mau, e haamaitai mai Iehova.
7. E nafea tatou e fanaˈo mau ai i te haamaitairaa maoti te huero o Aberahama?
7 O Iesu Mesia te tuhaa matamua o te huero o Aberahama, maoti hoi oia e tae mai ai te haamaitairaa i fafauhia. O te mau Kerisetiano faatavaihia te piti o te tuhaa o taua huero tohuhia ra. Ua faauehia ratou ia ‘faaite hua i te maitai o tei parau mai ia ratou i to roto i te pouri, ia tae i to ˈna maramarama umerehia.’ (Gal. 3:7-9, 14, 16, 26-29; Pet. 1, 2:9) Eita tatou e faatupu i te taairaa maitai e o Iehova ia tâuˈa ore tatou i te feia ta Iesu i faatoroa i nia i ta ˈna mau taoˈa. Eita tatou e taa i te taatoaraa o ta tatou e taio i roto i te Parau a te Atua aore ra e ite e nafea ia faaohipa, aita anaˈe te tauturu a “te tavini haapao maitai e te paari.” (Mat. 24:45-47) Ma te faaohipa i ta tatou e haapii ra i roto i te Bibilia e fanaˈo mau ai tatou i te haamaitairaa a te Atua.
A haamanaˈo maite i te hinaaro o te Atua
8, 9. Mea nafea to te patereareha Iakoba tutavaraa i te haa ia au i te parau fafau a te Atua?
8 A haamanaˈo i te patereareha Iakoba tei tutava uˈana ia haamaitaihia o ˈna e te Atua. Aita oia i ite e nafea ta te Atua i fafau ia Aberahama e tupu ai, ua papu râ ia ˈna e e faarahi Iehova i te huaai o to ˈna tupuna tane ei nunaa rahi. I 1781 hou to tatou tau, ua reva ˈtura Iakoba i Harana e imi i te hoê vahine na ˈna. Aita noa oia i hinaaro i te tahi apiti nehenehe e te au, i te hoê râ vahine paari i te pae varua e haamori ra ia Iehova e o te riro mai ei metua vahine maitai no ta ˈna mau tamarii.
9 Ua ite tatou e ua farerei Iakoba i to ˈna fetii ia Rahela. Ua here oia ia ˈna e ua farii e tavini i to ˈna metua tane o Labana e hitu matahiti ia riro mai oia ei vahine na ˈna. E ere teie i te hoê noa aamu o to raua here. Ua ite maitai Iakoba i ta te Atua Mana hope i fafau i to ˈna tupuna o Aberahama e i faahiti faahou i to ˈna metua o Isaaka. (Gen. 18:18; 22:17, 18; 26:3-5, 24, 25) Ua parau Isaaka i ta ˈna tamaiti ia Iakoba: “Ia haamaitai mai hoi te Atua Puaihope ra ia oe, e ia tamariihia ta oe, e ia faarahi ia oe, ia riro oe ei rave rahi roa: e ia horoa mai oia i te maitai i parauhia mai ia Aberahama, no oe, e no to oe ra huaai; ia noaa ia oe te fenua ta oe e purutia noa na, ta te Atua i horoa mai no Aberahama.” (Gen. 28:3, 4) Ua faaite ta Iakoba tutavaraa ia noaa mai te vahine maitai ia huaaihia oia i to ˈna tiaturi i ta Iehova i parau na.
10. No te aha Iehova i mauruuru ai i te haamaitai ia Iakoba?
10 Aita Iakoba i imi i te haaputu i te taoˈa rahi no to ˈna utuafare. Aita i moe ia ˈna ta Iehova i fafau no to ˈna huaai. Te manaˈo maite ra oia i te tupuraa o te hinaaro o Iehova. Ua tutava uˈana Iakoba noa ˈtu te mau fifi ia haamaitai te Atua ia ˈna. Ua na reira noa oia e tae noa ˈtu i to ˈna ruhiruhiaraa, e ua haamaitai Iehova ia ˈna.—A taio i te Genese 32:24-29.
11. Ia tutava tatou i te aha ia au i te hinaaro o te Atua tei faaitehia i roto i ta ˈna Parau?
11 Mai ia Iakoba, aita tatou i ite i te mau mea atoa no nia i te tupuraa o te opuaraa a Iehova. Ma te haapii râ i te Parau a te Atua e haroaroa ˈi tatou i te tuhaa rahi o te tupu mai no nia i ‘te mahana o Iehova.’ (Pet. 2, 3:10, 17) Ei hiˈoraa, aita tatou i ite afea roa taua mahana ra e tae mai ai, ua ite râ tatou e ua fatata. Te tiaturi ra tatou i te Bibilia e parau ra e e ora tatou e te feia e faaroo mai ia poro hope roa tatou i teie tau poto e toe nei.—Tim. 1, 4:16.
12. E nehenehe tatou e tiaturi i te aha?
12 Ua ite tatou e e tae mai te hopea i te taime ta Iehova i faataa. Eita oia e tiai ia porohia te taata taitahi o te fenua. (Mat. 10:23) Te fanaˈo atoa nei tatou i te aratairaa papu e nafea ia poro maitai. Ma te taiva ore, te apiti ra tatou i teie ohipa ia au i te maraa ma te faaohipa i ta tatou mau ravea atoa. E poro noa anei tatou i roto i te mau tuhaa fenua farii maitai? E nafea hoi tatou e ite ai? (A taio i te Koheleta 11:5, 6.) Ta tatou ohipa, o te pororaa ïa, e e haamaitai mai iho â Iehova. (Kor. 1, 3:6, 7) E nehenehe tatou e tiaturi e te ite ra te Atua i ta tatou mau tutavaraa uˈana e maoti to ˈna varua moˈa e horoa mai ai oia i te aratairaa hinaarohia.—Sal. 32:8.
A ani i te varua moˈa
13, 14. Mea nafea te iteraahia te ohiparaa te varua moˈa o te Atua no te faaaravihi i ta ˈna mau tavini?
13 E nafea ia manaˈo tatou e eita e maraa ia amo i te hoê hopoia aore ra ia poro? Ia ani ïa tatou ia Iehova i to ˈna varua moˈa ia aravihi atu â tatou i roto i ta ˈna taviniraa. (A taio i te Luka 11:13.) E nehenehe te varua o te Atua e faaaravihi i te taata no te hoê ohipa aore ra hopoia noa ˈtu to ratou mau tupuraa aore ra ite na mua ˈˈe. Ei hiˈoraa, i muri iti aˈe i to ratou faarueraa ia Aiphiti, maoti te varua o te Atua i upootia ˈi te mau tiai mamoe e te mau tîtî i nia i to ratou mau enemi noa ˈtu to ratou aravihi ore i te tamaˈi. (Exo. 17:8-13) I muri rii aˈe, ua faaaravihi tauâ varua ra ia Bezaleela e ia Aholiaba no te hamani i te sekene nehenehe ia au i te hohoˈa ta te Atua i horoa.—Exo. 31:2-6; 35:30-35.
14 Ua faaaravihi taua varua puai ra i te mau tavini a te Atua no teie tau ia haapao i te mau hinaaro o te faanahonahoraa i te titauraahia ia haamata ratou i te nenei. Ua faataa Taeae Robert Martin, tiaau o te neneiraa i tera tau, i roto i te hoê rata i tei tupu i 1927. “I te taime au, ua iriti te Fatu i te uputa; e ua noaa mai ta matou matini neneiraa, noa ˈtu e mea maˈua roa matou no nia i to ˈna hamaniraa e ohiparaa. Ua ite râ te Fatu e nafea ia tauturu i te feia o te ohipa maite no ˈna. . . . Maa hebedoma noa i muri aˈe, ua tere maitai te matini ia matou; e te tere noa ra, aita hoi te feia hamani i manaˈo e e rave teie matini i taua ohipa ra.” Ua haamaitai Iehova i tera mau tutavaraa itoito e tae noa mai i teie mahana.
15. E nafea te Roma 8:11 e faaitoito ai i te feia e faahemahia ra?
15 Ua rau te ohiparaa a te varua o Iehova. O te mau tavini atoa a te Atua te fanaˈo i taua varua ra, o te tauturu ia ratou ia faaruru i te mau fifi rahi. E nafea ia faahema-roa-hia tatou? E nehenehe ta Paulo i parau i roto i te Roma 7:21, 25 e te 8:11 e faaitoito mai. Na ‘te varua o tei faatia mai ia Iesu i te pohe’ e ohipa no tatou, ma te haapuai mai ia upootia i nia i te mau hinaaro o te tino. Ua papaihia tera mau irava no te mau Kerisetiano faatavaihia i te varua, e tano râ te manaˈo tumu no te mau tavini atoa a te Atua. E noaa ia tatou paatoa te ora ma te faaroo i te Mesia, ma te haavî uˈana i te mau hinaaro tia ore, e ma te pee i te aratairaa a te varua.
16. Ia aha tatou no te fanaˈo i te varua moˈa o te Atua?
16 E horoa mai iho â anei te Atua i to ˈna puai ohipa ma te ore tatou e tutava? Eita. Ia ani tatou i te reira na roto i te pure e ia haapii maite atoa i te Parau faaurua a te Atua. (Mas. 2:1-6) Hau atu â, tei nia te varua o te Atua i te amuiraa Kerisetiano. Ia tae tamau tatou i te mau putuputuraa, te hinaaro ra ïa tatou e faaroo i ta te varua e parau ra i te mau amuiraa. (Apo. 3:6) E titauhia atoa ia farii haehaa tatou i ta tatou e haapii ra. Te aˈo maira te Maseli 1:23: “E fariu mai outou i ta ˈu e aˈo atu nei; inaha! e ninii hua ˈtu vau i tau varua ia outou.” E horoa iho â te Atua i to ˈna varua moˈa ‘i te feia e faaroo ra ia ˈna.’—Ohi. 5:32.
17. E nehenehe e faaau i te faahopearaa o ta te Atua haamaitairaa i ta tatou mau tutavaraa i te aha?
17 E titauhia ia tutava ma te aau tae ia haamaitai mai te Atua, a haamanaˈo râ e eita te mau maitai rahi ta Iehova i horoa na to ˈna nunaa e noaa i te ohipa puai anaˈe. E nehenehe e faaau i te faahopearaa o ta ˈna haamaitairaa i ta tatou mau tutavaraa, i te faufaaraa o te maa maitai no to tatou tino. Ua hamani te Atua i to tatou tino ia au tatou i te maa, a oraora maitai atu ai. E horoa atoa mai oia i te maa. Aita hoi tatou i taa roa eaha te mau maitai i roto i te maa aore ra e nafea te tino e itoito ai i te maa ta tatou e amu. Ua ite noa tatou e mea maitai e no reira tatou e tamaa ˈi. Ia faaoti tatou e amu i te maa maitatai, mea maitai atoa ïa te faahopearaa. Oia atoa, ua haamau Iehova i te mau titauraa no te ora e a muri noa ˈtu, e te horoa maira i te tauturu hinaarohia no te faaî i te reira. Te tauturu rahi mai ra iho â oia, e mea tano ia arue ia ˈna. Ia ohipa râ tatou e o ˈna ia au i to ˈna hinaaro e haamaitaihia ˈi tatou.—Hag. 2:18, 19.
18. Eaha ta outou e faaoti e rave, e no te aha?
18 A tutava ïa ma te aau tae i te amo i te mau hopoia atoa ia au i te maraa. A tiaturi noa ia Iehova no te manuïa. (Mar. 11:23, 24) Ia papu ia outou e “o tei imi ra, ua itea ïa.” (Mat. 7:8) E haamaitaihia te feia faatavaihia i te varua i “te korona ora” i nia i te raˈi. (Iak. 1:12) E oaoa te mau “mamoe ê atu” a te Mesia o te tutava ra ia haamaitaihia ratou maoti te huero o Aberahama, i te faaroo ia ˈNa ia parau: “A haere mai outou, e tei haamaitai hia e taˈu Metua, a mau i te basileia i haapao hia no outou mai te faatumuraa hia mai â o teienei ao.” (Ioa. 10:16; Mat. 25:34, V.C.J.S., huriraa Katolika reo Tahiti, neneiraa 1976) ‘E riro mau â i te feia tei haamaitaihia e te Atua te fenua, e parahi tamau â ratou i reira.’—Sal. 37:22, 29.
E nehenehe anei outou e faataa?
• Ua taaihia te faarooraa ma te aau tae i te aha?
• Eaha te titauhia ia haamaitai mai te Atua?
• E nafea tatou e fanaˈo ai i te varua moˈa o te Atua, e e nafea te reira e ohipa ˈi no tatou?
[Uiraa haapiiraa]
[Hohoˈa i te api 13]
Ua taputô Iakoba e te hoê melahi ia haamaitai Iehova ia ˈna
Te tutava maite atoa ra anei oe?
[Hohoˈa i te api 14]
Ua faaaravihi te varua moˈa o te Atua ia Bezaleela e ia Aholiaba
