To tatou Aratai itoito i teie mahana
To tatou Aratai itoito i teie mahana
“Haere atura oia ma te upootia ia upootiaˈtu â.”—APO. 6:2, V.C.J.S., huriraa Katolika reo Tahiti (1976).
1, 2. (a) Mea nafea te Bibilia i faataa ˈi i te ohipa a te Mesia ei Arii mai 1914 mai? (b) Eaha ta te Mesia i rave mai to ˈna faateronoraa mai?
UA FAATERONOHIA te Mesia ei Arii o te Basileia o Iehova i 1914. A feruri na, mai te aha to ˈna huru i teie nei? Mai te hoê arii ohipa ore anei i nia i to ˈna terono, o te faaoao ra e te aha ra ta ˈna amuiraa i te fenua? Mai te peu e e, e taui anaˈe ïa i to tatou manaˈo. Ia au i te Salamo e te Apokalupo, e arii itoito oia i nia i te puaahorofenua e ‘haere ra ma te upootia ia upootia ˈtu â,’ e ia manuïa roa ˈtu.—Apo. 6:2, V.C.J.S.; Sal. 2:6-9; 45:1-4.
2 Ei Arii i muri aˈe i to ˈna faateronoraa, ua upootia te Mesia i nia i “te teni e ta ˈna ra mau melahi.” O ta ˈna ïa ohipa matamua i rave. Ei Mikaela te melahi rahi e ta ˈna mau melahi, ua huri te Mesia ia Satani e ta ˈna mau demoni i rapae i te mau raˈi moˈa e ua tapea ia ratou i te hiti o te fenua. (Apo. 12:7-9) I muri aˈe, ei “vea a te faufaa” na Iehova, ua haere mai Iesu e to ˈna Metua e hiˈopoa i te hiero pae varua. (Mal. 3:1) Ua haava oia i te Amuiraa faaroo Kerisetiano, te tuhaa o “Babulonia Rahi” tei hara rahi roa ˈˈe i te haamaniiraa toto e te faaturiraa i te mau tia poritita o teie nei ao.—Apo. 18:2, 3, 24.
E tamâ te Mesia i ta ˈna tavini i te fenua
3, 4. (a) Eaha ta te Mesia i rave ei “vea” na Iehova? (b) I te hiˈopoaraa o te hiero, eaha tei itehia mai? (c) O vai ta Iesu ei Upoo o te amuiraa i faariro ei tiaau?
3 I roto i ta Iehova e ta ˈna “vea” hiˈopoaraa, ua ite atoa raua i te hoê pǔpǔ Kerisetiano mau i roto i te aua i te fenua o te hiero pae varua. Aita ratou i roto i te mau haapaoraa a te Amuiraa faaroo Kerisetiano. Ia tamâ-atoa-hia râ teie mau Kerisetiano faatavaihia, aore ra “tamarii a Levi.” Mai ta te peropheta Malaki i tohu: “E parahi mai oia [Iehova] mai te tamâ e te haamaitai i te ario ra: e na ˈna e tamâ i te tamarii a Levi, e haamaitai hoi ia ratou mai te auro e te ario ra, e na ratou e hopoi mai i te tusia parau-tia ia Iehova.” (Mal. 3:3) Ua faaohipa Iehova i ta ˈna “vea a te faufaa,” te Mesia ra o Iesu, no te tamâ i teie mau Iseraela pae varua.
4 Ua ite râ te Mesia i teie noa mau Kerisetiano faatavaihia haapao maitai i te horoa-maite-raa i te maa varua i te hora mau na to ratou mau hoa i roto i te faaroo. Mai 1879 mai â to ratou piaraa i te pue parau mau Bibilia no nia i te Basileia o te Atua i roto i teie vea i te taime fifi aore ra maitai. I tohu na Iesu e ia haere mai oia e hiˈopoa i to ˈna utuafare i “te hopea o teie nei ao,” e ite oia i te hoê tavini e horoa ra i ta ratou “maa i te hora mau.” E haapopou oia i taua tavini ra ma te “faariro . . . ia ˈna ei tiaau i te mau taoˈa atoa na ˈna” i te fenua. (Mat. 24:3, 45-47) Ei Upoo o te amuiraa Kerisetiano, ua faaohipa te Mesia i teie “tavini haapao maitai e te paari” no te tiaau i ta ˈNa mau mea atoa i te fenua tei taaihia i te Basileia. Ua horoa oia i te aratairaa na te “utuafare” faatavaihia e to ratou mau hoa o te mau “mamoe ê atu” maoti te hoê Tino aratai.—Ioa. 10:16.
Ootiraa i te fenua
5. Ua ite orama Ioane i te Arii Mesia ia aha?
5 Ua ite orama te aposetolo Ioane i te tahi atu mea ta te Arii Mesia e rave i “te mahana o te Fatu,” i muri aˈe i to ˈna faateronoraahia i 1914. Ua papai Ioane: “Ua hiˈo atura vau, e inaha, e ata teatea, e te parahi ra te hoê i nia iho i taua ata ra, mai te Tamaiti a te taata ra te huru, ma te korona auro i nia i tana upoo, e ma te mauhaa ooti ooi i tana rima.” (Apo. 1:10; 14:14) Ua faaroo Ioane i te hoê melahi no ǒ mai ia Iehova ra i te parauraa i teie Taata ooti ia rave i ta ˈna tipi fefe “ua auhune paari roa hoi te fenua.”—Apo. 14:15, 16.
6. Ia au i ta Iesu parau, eaha te tupu i te roaraa o te tau?
6 Te haamanaˈo maira teie ootiraa i te fenua i ta Iesu parabole o te sitona e te zizania. Ua faaau Iesu ia ˈna i te hoê taata tei ueue i te huero sitona i roto i ta ˈna aua ma te tiaturi e ooti rahi mai i te sitona maitai, “te tamarii ïa o te basileia,” te mau Kerisetiano mau faatavaihia o te faatere e oia i roto i to ˈna Basileia. Ia po râ, ua ueue te enemi ra “te diabolo” i te zizania, “te tamarii ïa a te varua ino.” Ua faaue te taata ueue i ta ˈna mau tavini ia vaiiho i te sitona e te zizania ia tupu apipiti noa e ia auhune, “te hopea ïa o teie nei ao.” I reira oia e tono ai i ta ˈna mau melahi e faataa ê i te sitona i te zizania.—Mat. 13:24-30, 36-41.
7. E nafea te Mesia e aratai ai i te ootiraa i te fenua?
7 Ia au i ta Ioane i ite orama, te aratai ra Iesu i te hoê ootiraa e ati aˈe te ao nei. Ua haamata te ootiraa i te fenua i te haaputuputuraahia te toea o na 144 000 ‘tamarii o te basileia,’ “te sitona” o ta Iesu parabole. No te mea ua ite-maitai-hia te taa-ê-raa i rotopu i te mau Kerisetiano mau e te mau Kerisetiano haavare i muri aˈe i te Tamaˈi rahi Matamua, ua haaputuputuhia te mau mamoe ê atu, te piti ïa o te tuhaa o te ootiraa i te fenua. E ere ratou i ‘te tamarii o te basileia,’ e “feia rahi roa” râ e auraro maite ra i taua Basileia ra. No roto mai ratou i “te taata atoa, e te mau fenua atoa, e te reo atoa.” Te auraro ra ratou i te Basileia Mesia, oia hoi te Mesia ra o Iesu e na 144 000 “feia moˈa” i roto i tera faatereraa i te raˈi.—Apo. 7:9, 10; Dan. 7:13, 14, 18.
Aratairaa i te mau amuiraa
8, 9. (a) Eaha te faaite ra e te hiˈopoa ra te Mesia i te haerea e te huru oraraa o te mau melo atoa o te amuiraa taitahi? (b) Ia au i te hohoˈa i te api 31, e haapae tatou i teihea “parau hohonu a Satani”?
8 I to na mua ˈtu tumu parau, ua ite tatou e te hiˈopoa maite ra te Mesia i te ohipa e tupu ra i roto i te amuiraa taitahi i te senekele matamua. I to tatou tau, ei Arii faatere tei pûpûhia ˈtu “te mana atoa i te raˈi e te ao,” te aratai ra te Mesia i te mau amuiraa i te ao nei e to ratou mau tiaau. (Mat. 28:18; Kol. 1:18) Ua faariro Iehova ia ˈna “ei upoo i nia iho i te mau mea atoa i te ekalesia,” aore ra amuiraa, o te feia faatavaihia. (Eph. 1:22) Ei upoo o te amuiraa, te ite ra oia i te mau mea atoa e tupu ra i roto i na 100 000 tiahapa amuiraa taitahi a te mau Ite no Iehova.
9 Teie ta Iesu poroi i te amuiraa no Tuatira: “Te na ô maira te Tamaiti a te Atua, o tei au to ˈna mata i te ura auahi ra, . . . Ua ite au i ta oe ohipa.” (Apo. 2:18, 19) Ua aˈo etaeta oia i te mau melo o tera amuiraa no to ratou huru oraraa taiata e te faatia noa: “O vau tei hiˈopoa i te manaˈo e te aau; e na ˈu e ho atu ia outou atoa i te au i ta outou na ohipa.” (Apo. 2:23) Te hiˈopoa ra ïa te Mesia i te haerea e te huru oraraa o te mau melo atoa o te amuiraa taitahi. Ua haapopou Iesu i te mau Kerisetiano no Tuatira “aore hoi i ite i te parau hohonu a Satani.” (Apo. 2:24) I teie mahana, te haapopou atoa ra oia i te feia apî e te ruhiruhia aita e imi maite ra i “te parau hohonu a Satani” i nia i te Internet e te mau hauti video haavî uˈana e aita atoa e faatia noa ra i te mau manaˈo taata. Te oaoa mau nei oia i te iteraa i te mau tutavaraa e haapaeraa a te Kerisetiano e rave rahi i teie mahana, o te faaitoito ra i te pee i ta ˈna aratairaa i roto i te mau tuhaa atoa o to ratou oraraa!
10. Mea nafea te aratairaa te Mesia i te mau matahiapo o te amuiraa i faahohoˈahia ˈi, ia farii râ ratou i te aha?
10 Te tiaau ra te Mesia ma te here i ta ˈna mau amuiraa i te fenua maoti te mau matahiapo. (Eph. 4:8, 11, 12) I te senekele matamua, ua faatavaihia te mau tiaau atoa i te varua. Te faahohoˈa ra te Apokalupo ia ratou i te mau fetia i roto i te rima atau o te Mesia. (Apo. 1:16, 20) I teie mahana, no te mau mamoe ê atu te rahiraa o te mau matahiapo o te amuiraa. Te aratai-atoa-hia ra ratou e te Mesia no te mea e riro mai ratou ei matahiapo i muri aˈe e rave rahi pure e aratairaa a te varua moˈa. (Ohi. 20:28) Te farii nei râ ratou e te faaohipa ra te Mesia i te hoê pǔpǔ iti tane Kerisetiano faatavaihia ei Tino aratai no ta ˈna mau pǐpǐ i te fenua.—A taio i te Ohipa 15:6, 28-30.
“A haere mai, e te Fatu, e Iesu”
11. No te aha tatou e tiai ru ai ia haere vave mai to tatou Aratai?
11 I roto i te apokalupo tei horoahia i te aposetolo Ioane, e rave rahi taime to Iesu parauraa e e haere vave mai oia. (Apo. 2:16; 3:11; 22:7, 20) Te faahiti ra iho â oia i to ˈna haereraa mai e haava ia Babulonia Rahi e te toea o te ao ino a Satani. (Tes. 2, 1:7, 8) No to ˈna hinaaro ru e ite i te tupuraa o te mau mea faahiahia atoa tei tohuhia, ua parau te aposetolo ruhiruhia o Ioane: “Amene. Oia ïa, a haere mai, e te Fatu, e Iesu e!” Te tiai ru atoa ra tatou, e ora nei i te tau hopea o teie ao ino, ia haere mai to tatou Aratai e Arii ei faatere o te Basileia o te Atua no te faaraa i te iˈoa o to ˈna Metua e no te faatia i to ˈNa mana arii.
12. Eaha ta te Mesia e rave hope roa hou a tuuhia ˈi na mataˈi o te haamouraa?
12 Hou Iesu e haamou ai i te faanahonahoraa itehia a Satani, e tapao-roa-hia te melo hopea o na 144 000 Iseraela pae varua. Te faaite maitai ra te Bibilia e ia oti roa teie tapaoraa i na 144 000 e tuuhia ˈi na mataˈi o te haamou i te ao a Satani.—Apo. 7:1-4.
13. E nafea te Mesia e faaite ai i to ˈna taeraa mai i te tuhaa matamua o te “ati rahi”?
13 Aita te rahiraa o te huitaata i ite i te vairaa mai o te Mesia mai 1914 mai â. (Pet. 2, 3:3, 4) Ua fatata râ oia i te tae mai no te faatupu i ta Iehova mau haavaraa i nia i te mau tuhaa rau o te ao a Satani. E ite-roa-hia ‘te anaana o to ˈna taeraa mai’ ia haamouhia te “taata hara,” te pǔpǔ ekalesiatiko o te Amuiraa faaroo Kerisetiano. (A taio i te Tesalonia 2, 2:3, 8.) E haapapu maitai te reira e te ohipa ra te Mesia ei Haava ta Iehova i faatoroa. (A taio i te Timoteo 2, 4:1.) E mou te Amuiraa faaroo Kerisetiano, te tuhaa o “Babulonia Rahi” tei hara rahi roa ˈˈe, hou te hau emepera o te ao atoa o te haapaoraa hape e haamou-roa-hia ˈi. E tuu Iehova i roto i te aau o te mau tia poritita i te manaˈo e haamou i teie faaturi. (Apo. 17:15-18) Tera ïa te tuhaa matamua o te “ati rahi.”—Mat. 24:21.
14. (a) No te aha te tuhaa matamua o te ati rahi e haapotohia ˈi? (b) Eaha te auraa o ‘te tapao o te Tamaiti a te taata’ no te nunaa o Iehova?
14 Ua parau Iesu e e haapotohia te tau ati rahi “no te feia maitihia,” te toea o te mau Kerisetiano faatavaihia i te fenua nei â. (Mat. 24:22) Eita Iehova e faatia ia mou atoa te mau Kerisetiano faatavaihia e to ratou mau hoa o te mau mamoe ê atu i roto i teie haamouraa i te haapaoraa hape. Ua parau atoa Iesu e “i muri iho â i taua anotau pohe ra,” e piri to roto i te mahana, te avaˈe, e te mau fetia, e ‘i reira e itea mai ai te tapao o te Tamaiti a te taata i nia i te raˈi.’ E “oto” te mau nunaa o te fenua, eiaha râ te feia faatavaihia o te tiaturi ra e ora i te raˈi e to ratou mau hoa o te tiaturi ra e ora i te fenua. ‘E nânâ ratou i to ratou mata i nia, e faateitei i to ratou upoo, te fatata maira hoi to ratou ora.’—Mat. 24:29, 30; Luka 21:25-28.
15. Eaha ta te Mesia e rave ia haere mai oia?
15 Hou oia e upootia ˈtu â ˈi, e haere mai te Tamaiti a te taata no te tahi atu â ohipa. Ua tohu oia: “Ia tae maira te Tamaiti a te taata ma ta ˈna hanahana, e te mau melahi moˈa atoa ra, ei reira oia e parahi ai i nia iho i to ˈna terono hanahana; e e haaputuhia to te mau fenua atoa i mua i to ˈna aro: e na ˈna e faataa ia ratou mai te tiai mamoe e faataa i te mamoe i te puaaniho ra: e e tuu oia i te mamoe i tana rima atau, e te puaaniho i te rima aui.” (Mat. 25:31-33) Te faaite ra te reira i te haereraa mai te Mesia ei Haava o te faataa ê i “to te mau fenua atoa”: “te mamoe,” te feia tei turu maite i to ˈna mau taeae pae varua (te mau Kerisetiano faatavaihia i te fenua) e “te puaaniho,” te feia “tei ore i faaroo i te evanelia o to tatou Fatu o Iesu Mesia.” (Tes. 2, 1:7, 8) E fanaˈo te mamoe tei faaauhia i “te feia parau-tia” i “te ora mure ore” i te fenua, area te puaaniho, e “haere ê ïa e rave i te pohe mure ore.”—Mat. 25:34, 40, 41, 45, 46.
E upootia ˈtu â Iesu
16. E nafea to tatou Aratai te Mesia e upootia ˈtu â ˈi?
16 Ua tapao-roa-hia anaˈe to ˈna mau apiti arii e tahuˈa e ua tuuhia anaˈe te mau mamoe i ta ˈna rima atau no te ora, e haere ai te Mesia ma te ‘upootia ˈtu â.’ (Apo. 5:9, 10; 6:2, V.C.J.S.) Ei raatira o te nuu melahi puai e o to ˈna mau taeae tei faatiahia mai, e haamou oia i te faanahoraa poritita, faehau, e tapihoo a Satani i te fenua. (Apo. 2:26, 27; 19:11-21) E upootia ˈtu â te Mesia ia haamou oia i te ao ino a Satani. I reira oia e huri ai ia Satani e te mau demoni i roto i te abuso hoê tausani matahiti.—Apo. 20:1-3.
17. I te roaraa o te Faatereraa tausani matahiti, e aratai te Mesia i ta ˈna mau mamoe ê atu ihea, e ia aha ïa tatou?
17 No nia i te “feia rahi roa” o te mau mamoe ê atu, o te ora ˈtu i te ati rahi, ua tohu te aposetolo Ioane e “na te Arenio . . . tei parahi i ropu i te terono ra e faaamu ia ratou, e e aratai hoi ia ratou i te mau pape ora pihaa.” (Apo. 7:9, 17) I te roaraa o ta ˈna Faatereraa tausani matahiti, e aratai noa te Mesia i te mau mamoe ê atu, o te faaroo mau i to ˈna reo, i te ora mure ore. (A taio i te Ioane 10:16, 26-28.) Ia pee maite ïa tatou i to tatou Aratai ei Arii i teie nei e tae noa ˈtu i roto i te ao apî ta Iehova i fafau!
Ei haamanaˈoraa
• Eaha ta te Mesia i rave i muri aˈe i to ˈna faateronoraahia?
• O vai ma ta te Mesia e faaohipa ra i te fenua no te aratai i te mau amuiraa?
• E nafea to tatou Aratai te Mesia e haere mai â ˈi?
• E nafea te Mesia e aratai noa ˈi ia tatou i roto i te ao apî?
[Uiraa haapiiraa]
[Hohoˈa i te api 32]
E tae mai te Mesia no te haamou i te ao ino a Satani
