Te faatura ra anei outou na mua i te mau hoa Kerisetiano?

“Ei atiraa aroha mau to outou ia outou iho, i te aroha taeae ra; i te faaturaraa ˈtu [“outou na mua,” MN] te tahi i te tahi.”—ROMA 12:10.

1, 2. (a) Eaha ta Paulo aˈoraa i roto i ta ˈna rata i to Roma? (b) Eaha te mau uiraa ta tatou e hiˈopoa?

 I ROTO i ta ˈna rata i to Roma, te haapapu ra te aposetolo Paulo i te faufaaraa ia faaite tatou ei Kerisetiano i te here i roto i te amuiraa. Te haamanaˈo maira oia e ei aroha “haavare ore” to tatou. Te faahiti atoa ra oia i “te aroha taeae” ia faaitehia ma te “atiraa aroha mau.”—Roma 12:9, 10a.

² E ere iho â te aroha taeae i te tahi noa huru aau mahanahana no vetahi ê. Ia faaitehia râ te reira na roto i te ohipa. Aita anaˈe, eita ïa te taata e ite i to tatou aroha e here. No reira Paulo e aˈo mai ai: ‘A faatura ˈtu [“outou na mua,” MN] te tahi i te tahi.’ (Roma 12:10b) Eaha tei taaihia i te faatura? No te aha mea faufaa ˈi ia faatura tatou na mua i te tahi atu mau Kerisetiano? E nafea ïa?

Eaha tei taaihia i te faaturaraa ia vetahi ê?

3. Eaha te auraa o te taˈo ‘faatura’ i roto i na reo tumu o te Bibilia?

³ Te manaˈoraa e mea faufaa te hoê taata te auraa o te taˈo tumu Hebera tei hurihia ei ‘faatura.’ Te haafaufaahia ra ïa te taata e faaturahia ra. (Gen. 45:13) I roto i te reo Heleni, e faufaa e e herehia te auraa o tera taˈo. (Pet. 1, 3:7) Oia mau, mea here e mea faufaa no tatou te feia ta tatou e faatura ra.

4, 5. Eaha tei taaihia i te faaturaraa ia vetahi ê? A faataa.

⁴ Eaha tei taaihia i te faaturaraa ia vetahi ê? E ere te faaturaraa i to tatou mau taeae i te tahi noa faaiteraa i te faatura. Ua taaihia te reira na mua roa i to tatou manaˈo ia ratou e i to tatou atoa huru i nia ia ratou.

⁵ E nafea te hoê Kerisetiano e faatura ˈi i to ˈna mau taeae e tuahine mai te peu e i to ˈna manaˈo aita e faufaa ia faatura ˈtu? (Ioa. 3, 9, 10) E tupu maoro maitai te hoê tumu raau ua aˈa anaˈe te reira i roto i te repo maitai. E vai maoro atoa ïa te faatura mau ua aˈa anaˈe te reira i roto i te aau. Eita te faatura haavarevare e vai maoro no te mea e ere no roto mai i te aau. (Ohi. 5:1-5) No reira Paulo i omua ˈi i ta ˈna aˈoraa e faatura ˈtu mai teie: “Ei aroha haavare ore â” to outou.—Roma 12:9; Pet. 1, 1:22.

A faatura i tei hamanihia “i to te Atua ra hohoˈa”

6, 7. No te aha e titauhia ˈi ia faatura tatou ia vetahi ê?

⁶ No te faatura ia vetahi ê, ei manaˈo haavare ore mau â to tatou no ratou. Eiaha ïa e haamoe i te mau tumu Bibilia e na reira ˈi i nia i to tatou mau taeae atoa. E hiˈo mai tatou e piti tumu.

⁷ Ua hamanihia te taata “i to te Atua ra hohoˈa,” eiaha râ te tahi atu mau mea ora o  te fenua. (Iak. 3:9) No reira tatou e faahotu ai i te mau huru maitatai o te Atua mai te here, te paari, e te parau-tia. A tapao na i ta te Atua Poiete i horoa atoa mai. Te na ô ra te papai salamo: “E Iehova . . . to oe ra hanahana, ua tuuhia e oe i nia iho i te mau raˈi ra! . . . I raro iti aˈe [te taata] i te mau melahi i te hamaniraahia e oe ra, e ua faakorona oe ia ˈna i te hinuhinu e te tura!” (Sal. 8:1, 4, 5; 104:1) * Ua faakorona, aore ra faanehenehe, te Atua i te taata i te tahi faito hanahana, hinuhinu, e tura. No reira, ia faatura tatou i te hoê taata, te faatura ra ïa tatou ia Iehova, tei horoa na te taata atoa i te tahi faito tura. Mai te peu e mea tano roa ia faatura i te taata atoa, hau atu â ïa i to tatou mau hoa Kerisetiano!—Ioa. 3:16; Gal. 6:10.

Melo o te hoê fetii otahi

8, 9. Eaha te tumu e faatura ˈi i to tatou mau hoa Kerisetiano ta Paulo i faahiti?

⁸ Ua faahiti Paulo i te tahi atu tumu e faatura ˈi te tahi i te tahi. Hou oia a horoa ˈi i te aˈoraa e faatura ˈtu, ua parau oia: “Ei atiraa aroha mau to outou ia outou iho, i te aroha taeae.” Te faataa ra te parau Heleni tei hurihia ei “atiraa aroha mau” i te taairaa puai e tahoê ra i te hoê utuafare e here ra e e turu ra te tahi i te tahi. Te haapapu ra ïa Paulo e ia puai atoa te taairaa î i te here i roto i te amuiraa mai to te hoê fetii piri roa. (Roma 12:5) A haamanaˈo atoa e ua papai Paulo i teie aˈoraa i te mau Kerisetiano faatavaihia, tei faariro-pauroa-hia e te hoê â Metua, o Iehova, ei tamarii na ˈna. Te auraa ïa e e fetii piri roa ratou. Te vai ra iho â te tumu papu e faatura ˈi te mau Kerisetiano faatavaihia i te tau o Paulo te tahi i te tahi. Oia atoa no te feia faatavaihia i teie tau.

⁹ E te mau “mamoe ê atu”? (Ioa. 10:16) Noa ˈtu e aitâ ratou i riro atura ei tamarii na te Atua, e nehenehe ratou e parau ma te tano te tahi i te tahi taeae e tuahine, no te mea e fetii Kerisetiano tahoê ratou i te ao nei. (Pet. 1, 2:17; 5:9) Ua taa maitai anaˈe ia ratou te reira, e tumu papu atoa ïa ta ratou no te faatura i to ratou mau hoa Kerisetiano ma te haavare ore.—A taio i te Petero 1, 3:8.

No te aha mea faufaa roa ˈi?

10, 11. No te aha mea faufaa roa ˈi ia faatura ˈtu?

¹⁰ No te aha mea faufaa roa ˈi ia faatura ˈtu? No te mea ia faatura tatou i to tatou mau taeae e tuahine, te paturu rahi ra tatou i te maitai e te auhoêraa o te amuiraa taatoa.

¹¹ Parau mau, ua ite tatou e na te taairaa piri e o Iehova e te turu a to ˈna varua na mua roa e haapuai ia tatou ei Kerisetiano mau. (Sal. 36:7; Ioa. 14:26) E itoito atoa tatou ia haafaufaa te mau taeae e tuahine ia tatou. (Mas. 25:11) E tamǎrûhia tatou ia parau aore ra ia rave te hoê taata i te tahi mea o te faaite ra i to ˈna faatura. E itoito atu â tatou i te haere â ma te oaoa e te faaoti papu na te eˈa o te ora. Eita e ore e ua ite atoa oe i te reira.

12. E nafea tatou taitahi e paturu ai i te here i roto i te amuiraa?

¹² Ua ite Iehova e e hinaaro iho â tatou ia faatura mai te taata. No reira oia e aˈo mai ai na roto i ta ˈna Parau ia ‘faatura oioi atu te tahi i te tahi.’ (Roma 12:10, V.C.J.S., huriraa Katolika reo Tahiti, neneiraa 1976; a taio i te Mataio 7:12.) Te paturu ra te mau Kerisetiano atoa o te haapao maite i teie aˈoraa taui ore, i te here i rotopu i te huitaeae. No reira, mea maitai ia uiui tatou, ‘Eaha te taime hopea i faaite ai au na roto i te parau e te ohipa i to ˈu faatura haavare ore i te hoê taeae aore ra tuahine o te amuiraa?’—Roma 13:8.

 E hopoia taa ê na te taatoaraa

13. (a) O vai na mua te faatura ia vetahi ê? (b) Te faaite ra ta Paulo parau i roto i te Roma 1:7 i te aha?

¹³ O vai na mua te faatura ia vetahi ê? I roto i ta ˈna rata i te mau Hebera, ua faataa Paulo i te mau matahiapo Kerisetiano mai “to outou mau aratai.” (Heb. 13:17) E aratai iho â ratou i roto e rave rau ohipa. Ei tiai râ o te nǎnǎ, mea faufaa roa e o ratou na mua te faatura i to ratou mau hoa Kerisetiano, te tahi atu mau matahiapo atoa. Ei hiˈoraa, ia putuputu te mau matahiapo no te hiˈopoa i te mau hinaaro pae varua o te amuiraa, e faatura ratou ma te faaroo maite i te mau tatararaa a te tahi e te tahi. Oia atoa ma te tâuˈa i te mau manaˈo o te taatoaraa ia rave ratou i te hoê faaotiraa. (Ohi. 15:6-15) Ia haamanaˈo râ tatou e e ere no te mau matahiapo noa ta Paulo rata i to Roma, oia atoa râ no te amuiraa taatoa. (Roma 1:7) No reira, no tatou pauroa i teie mahana te faaueraa e faatura tatou na mua te tahi i te tahi.

14. (a) A faataa i te taa-ê-raa ia faatura ˈtu e o tatou na mua te na reira. (b) Eaha ta tatou e ui?

¹⁴ A tapao atoa i teie tuhaa o te aˈoraa a Paulo. Ua faaue oia i to ˈna mau hoa Kerisetiano i Roma eiaha noa ia faatura ˈtu, oia atoa râ o ratou na mua te na reira. Eaha te taa-ê-raa? A feruri na i teie hiˈoraa. E faaue anei te hoê orometua haapii i ta ˈna mau piahi ite i te taio ia haapii i te taio? Eita. Ua ite ê na ratou i te taio. E hinaaro râ oia e tauturu ia ratou ia taio maitai atu â. Oia atoa, te faatura ê na ra tatou te tahi i te tahi no to tatou here ei faaiteraa e e Kerisetiano mau tatou. (Ioa. 13:35) E nehenehe râ tatou e haamaitai atu â ma te faatura tatou na mua, mai te mau piahi atoa tei ite i te taio o te nehenehe e haamaitai atu â i ta ratou taioraa. (Tes. 1, 4:9, 10) Na tatou taitahi teie hopoia taa ê. E ui tatou, ‘Te faatura ra anei au na mua ia vetahi ê i roto i te amuiraa?’

A faatura i “te taata rii”

15, 16. (a) Eiaha tatou e haamoe i te faatura ia vai ma, e no te aha? (b) Na te aha e faaite e te faatura mau ra tatou i to tatou mau taeae e tuahine atoa?

¹⁵ O vai ma i roto i te amuiraa eiaha tatou e haamoe i te faatura? Te na ô ra te Parau a te Atua: “O tei hamani maitai i te taata rii ra, ua horoa oia i te taoˈa na Iehova; e na ˈna e hopoi mai i ta ˈna utua.” (Mas. 19:17) Eaha te faahopearaa o te manaˈo tumu o  teie irava ia faaitoito tatou na mua i te faatura ia vetahi ê?

¹⁶ E farii oe e e faatura te rahiraa o te taata i to nia ˈˈe ia ratou, area i to raro mai, eita ïa. E ere râ Iehova mai tera. Te na ô ra oia: “O tei faatura mai ia ˈu ra o ta ˈu ïa e faatura ˈtu.” (Sam. 1, 2:30; Sal. 113:5-7) E faatura Iehova i te feia atoa e tavini ra e e faatura ra ia ˈna. Eita oia e haamoe i “tei haehaa,” aore ra te taata rii. (A taio i te Isaia 57:15; Par. 2, 16:9) E hinaaro iho â tatou e pee ia Iehova. No te ite e te faatura mau ra anei tatou ia vetahi ê, mea maitai ia ui tatou, ‘Eaha to ˈu huru i nia i te mau melo o te amuiraa aita ta ratou e hopoia, aore ra tiaraa?’ (Ioa. 13:14, 15) E faaite mai te pahonoraa o teie uiraa i te haavare ore o to tatou faatura ia vetahi ê.—A taio i te Philipi 2:3, 4.

E faatura tatou ma te horoa i to tatou taime

17. Eaha te hoê ravea faufaa roa e faatura ˈi tatou na mua ia vetahi ê, e no te aha?

¹⁷ Eaha te hoê ravea faufaa roa e faatura ˈi tatou na mua i te amuiraa taatoa? Ma te horoa ïa i to tatou taime. No te aha? E oraraa ohipa roa to tatou ei Kerisetiano. E no ta tatou mau ohipa faufaa rau i roto i te amuiraa, e iti mai to tatou taime. Mea faufaa roa hoi te taime no tatou. Te taa atoa ra ia tatou e eiaha e ani rahi roa i to tatou mau taeae e tuahine i to ratou taime. E mauruuru atoa tatou ia taa ia vetahi ê o te amuiraa e eiaha e ani rahi roa mai i to tatou taime.

18. Ia au i te hohoˈa i te api 26, e nafea ia faaite e ua ineine tatou i te horoa i te taime no to tatou mau hoa Kerisetiano?

¹⁸ Ua ite atoa râ tatou (te mau tiai iho â râ i roto i te amuiraa) e te vaiihoraa i ta tatou mau ohipa no te horoa maa taime no te mau hoa Kerisetiano, te faatura ra ïa tatou ia ratou. E nafea? Te na ô atu ra ïa tatou, ‘No to ˈu here rahi ia oe, mea faufaa aˈe no ˈu ia horoa ˈtu maa taime i te tamau â i ta ˈu e rave nei.’ (Mar. 6:30-34) Ia haamarirau râ tatou i te na reira, e nehenehe to tatou taeae e manaˈo e e ere oia i te mea faufaa roa no tatou. Te vai ra iho â te taime eita e nehenehe e vaiiho i te hoê ohipa ru. Te ineineraa aore ra te haamarirauraa i te horoa i te taime no vetahi ê, e faaite rahi ïa i te hohonu o to tatou faatura i roto i to tatou aau no te mau taeae e tuahine.—Kor. 1, 10:24.

A faaoti papu e faatura outou na mua

19. E nafea ˈtu â ia faatura i to tatou mau hoa Kerisetiano?

¹⁹ Te vai ra ˈtu â te ravea faufaa e faatura ˈi i to tatou mau hoa Kerisetiano. Ei hiˈoraa, ia horoa ˈtu tatou i te taime, ia tâuˈa atoa tatou ia ratou. Te na reira ra hoi Iehova. Te na ô ra te papai salamo Davida: “Tei te feia parau-tia ra to Iehova mata; e tei ta ratou pure to ˈna tariˈa.” (Sal. 34:15) E tutava tatou i te pee ia Iehova ma te haapao roa i to tatou mau taeae, o te ani mai iho â râ i te tauturu. Te faatura ra ïa tatou ia ratou.

20. E hinaaro tatou e haamanaˈo i te aha no nia i te faaturaraa ia vetahi ê?

²⁰ Ua hiˈopoa mai tatou e mea faufaa ia haamanaˈo no te aha e faatura ˈi i to tatou mau hoa Kerisetiano ma te haavare ore. E imi atoa tatou i te mau taime e faatura ˈi  tatou na mua i te taata atoa, tae noa ˈtu te taata rii. Ia na reira tatou e puai atu â ˈi te aroha taeae e te auhoêraa i roto i te amuiraa. No reira, e tamau anaˈe i te faatura tatou na mua te tahi i te tahi. Ua faaoti papu anei oe e na reira?

[Nota i raro i te api]

Te haamanaˈo ra anei outou?

• Eaha tei taaihia i te faaturaraa ia vetahi ê?

• Eaha te mau tumu e faatura ˈi i to tatou mau hoa Kerisetiano?

• No te aha mea faufaa ˈi ia faatura te tahi i te tahi?

• E nafea ia faatura i te tahi atu mau Kerisetiano?

[Uiraa haapiiraa]

[Hohoˈa i te api 26]

E nafea ia faatura i to tatou hoa Kerisetiano?