Te hopea o te ohipa ino, e mea papu iho â!

UA HOROA mai te Atua i ta ˈna Parau faaurua, o te faataa maira hoi no te aha te taata e rave ai i te mau ohipa iino. Ua horoa atoa mai oia i te tiamâraa e maiti e te ravea no te haavî ia tatou, ia ore tatou ia na reira atoa. (Deuteronomi 30:15, 16, 19) Maoti te reira e nehenehe ai tatou e ite i to tatou mau hinaaro iino e e faatitiaifaro i te reira. I te pae hopea, ia ore tatou e rave i te mau ohipa iino, e oaoa tatou e te feia atoa e ati aˈe ia tatou.—Salamo 1:1.

Noa ˈtu râ ta tatou mau tutavaraa eiaha e  rave i te ino, te î noa ˈtura teie nei ao i te mau ohipa iino. Te faaara ra te Bibilia: “E tupu te ati rahi i taua anotau hopea nei, ia ite mai oe.” No te aha e anotau “ati rahi” ai teie? Te na ô-faahou-hia ra: “E riro te taata nei ei miimii, e nounou moni, e faaahaaha, e teoteo, e faaino, e faaroo ore i te metua, e mauruuru ore, e te viivii, e aroha ore, e tahemo parau au, e pari haavare noa, e haapao ore, e iria, e te au ore i te taata maitatai ra, e haavare, e mârô, e faateitei, e te hinaaro i te mau mea e navenave ai ra aore hinaaro i te Atua, e hohoˈa paieti hoi to ratou, o te puai râ o te reira ra, ua hunahia ïa ia ratou, e fariu ê oe i te reira.”—Timoteo 2, 3:1-5.

Ua tapao paha oe i te parau “anotau hopea” i roto i te parau tohu i nia nei. Eaha ïa no oe? Ia au i tei taahia, ia parauhia te “anotau hopea,” ua fatata ïa te tahi mea i te mou. Teihea ïa? A hiˈo na i ta te Atua e fafau ra i roto i ta ˈna Parau.

E haamou-roa-hia te feia iino.

“No parahirahi aˈe te paieti ore, e aita ra; oia â ïa, e hiˈo â oe i to ˈna vahi, e aita nei. Area te feia mǎrû ra, e parahi ïa i te fenua, e oaoa ratou i te rahi o te hau ra.”—SALAMO 37:10, 11.

“Te tiai nei Iehova i te feia i hinaaro ia ˈna; area te feia paieti ore ra, e haamouhia ïa e ana.”—SALAMO 145:20.

E ore roa te haavîraa.

“O tei veve ra e ua tiaoro maira, na ˈna ïa e faaora; e tei ati ra e aita o ˈna e tauturu. E faaora oia ia ratou i te haavare e te rave ino ra.”—SALAMO 72:12, 14.

“E faatiamaˈtoa hia te mau mea hamani hia i te tîtîraa o te tahutiraa, ia apiti hia i te tiamaraa hinuhinu o te tamarii a te Atua.”—ROMA 8:21, V.C.J.S., HURIRAA KATOLIKA REO TAHITI (1976).

E haamâhahia te mau hinaaro o te taata.

“E parahi . . . ratou o te taata atoa i raro aˈe i ta ˈna iho vine, e i raro aˈe i ta ˈna iho suke, e aore roa e taata e haamǎtaˈu mai ia ratou.”—MIKA 4:4.

“E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira. E ore ratou e patu, e na vetahi ê e parahi; e ore ratou e tanu, e na vetahi ê e amu; mai te mau mahana o te raau nei te mau mahana o to ˈu ra mau taata, e vai taiata te aho o to ˈu ra feia i maitihia i to te mau mea ta ratou i hamani.”—ISAIA 65:21, 22.

E vai mai te parau-tia.

“E ore anei te Atua e faatia mai i to ˈna ra taata maitihia, o tei tiaoro atu ia ˈna i te rui e te ao? . . . E faaite atu vau ia outou, e faatia mai ïa oia ia ratou e ore roa e mahia.”—LUKA 18:7, 8.

“E mea au . . . na Iehova te parau-tia, e ore hoi oia e faarue i tana feia moˈa ra. E vai â ratou e a muri noa ˈtu.”—SALAMO 37:28.

E mono te parau-tia i te miimii.

“Te haapii nei to te ao nei i te parau-tia i reira.”—ISAIA 26:9.

“Te tatari nei . . . tatou i te raˈi apî e te fenua apî ta ˈna i parau maira, i te vai-mau-raa o te parau-tia ra.”—PETERO 2, 3:13.

 Te taui nei te taata—i teie nei iho â mahana

E mea au iho â na tatou paatoa i teie mau parau fafau a te Atua e ere anei? Na te aha râ e haapapu ra e e tupu mau â te reira? E haapapuraa to teie mahana. Teihea ïa? Tau mirioni taata na te ao atoa nei tei manuïa ê na i te tinai i te huru miimii, morare ore, e te haavî uˈana e ua haapii atura ratou i te riro mai ei taata haavare ore, hau, e te mǎrû. I teie mahana, e fetii nunaa rau teie na hitu mirioni tiahapa Ite no Iehova, tei na nia ê i te mau taa-ê-raa i te pae o te nunaa, iri, here aiˈa, poritita, e totiare. O tera hoi mau mea te tumu o te riri, te haavîraa uˈana e te haamaniiraa toto e rave rahi i roto i te tuatapaparaa. a E niu papu teie mau tauiraa itehia i teie mahana no te tiaturi e e tupu ta te Atua i fafau e ati aˈe te ao.

Eaha hoi tei faataui ia ratou? Tei roto te pahonoraa i te tahi atu parau fafau Bibilia i papaihia e te peropheta ra o Isaia:

“Ei reira te luko e parahi atoa ˈi raua o te arenio; e te nemera e te pinia mamoe, e apiti atoa ïa i te taotoraa; e te fanauˈa puaatoro, e te liona apî, e te puaatoro haaporia ra, hoê â amuiraa mai, e na te hoê tamaiti iti e aratai. . . . E amu hoi te liona i te aihere mai te puaatoro atoa ra. E hauti noa hoi te tamarii aiû i te apoo o te asepi, e te tamaiti no mairi aˈe te û ra, e tuu ïa i te rima i nia i te pupuniraa o te zepho ra. E ore ratou e hauti, e ore e rave ino, i to ˈu atoa nei mouˈa moˈa, te na reira maira Iehova; e î hoi te fenua i te ite ia Iehova, mai te vairaa miti e î i te miti ra.”—Isaia 11:6-9.

Te faataa noa ra anei teie parau tohu i te hoê tau e ora amui ai te animara e te taata?  Aita, e ere tera anaˈe. A tapao na e te faaite ra te hopea o te irava 9 eaha te faatupu i teie tauiraa: “E î hoi te fenua i te ite ia Iehova.” E taui anei te ite i te Atua i te huru o te animara? Aita roa ˈtu. Tera râ, e nehenehe e e taui te reira i te huru o te taata! Te faataa ra teie parau tohu e e taui te feia e au to ratou huru i to te animara e e faahotu ratou i te huru e au i to te Mesia maoti ta ratou haapiiraa e faaohiparaa i te Bibilia.

A hiˈo na ia Pedro. b I manaˈo na oia e te aro ra oia no te parau-tia i to ˈna apitiraa ˈtu i te hoê pǔpǔ taata totoa. Ua faaineinehia oia e ua faauehia ia tupita i te hoê aua mutoi. A fatata ˈi oia i te na reira i haruhia ˈi oia. Ua mau Pedro 18 avaˈe i te fare auri i reira to ˈna tamauraa i ta ˈna ohipa orure hau. Area ta ˈna vahine, ua haamata ïa oia i te haapii i te Bibilia e te mau Ite no Iehova. I to Pedro matararaa mai, ua haamata atoa oia i te haapii i te Bibilia e ua turai ta ˈna i haapii no nia i te Atua ra o Iehova ia ˈna ia taui i to ˈna huru e to ˈna manaˈo i te ora. “Te haamauruuru ra vau ia Iehova e aita roa ˈtu vau i taparahi aˈe i te taata ei taata totoa,” ta Pedro e parau ra. “Te faaohipa nei au i te ˈoˈe a te varua o te Atua, te Bibilia, no te faaite i te hoê poroi no te hau e te parau-tia  i te mau taata: te parau apî maitai o te Basileia o te Atua.” Ua haere atoa Pedro i te aua mutoi ta ˈna i opua na e tupita no te faaite i ta ˈna poroi no te hau e no te hoê ao aita e haavîraa uˈana.

I te mea e e mana puai to te Parau a te Atua i nia i te taata, e tiaturi rahi atu â ïa tatou i te parau fafau a te Atua e e hope iho â te mau ohipa iino atoa. Oia mau, eita te taata e haa ino faahou e a muri noa ˈtu, e riro mai râ ratou ei taata maitai aˈe. Ua fatata Iehova i te haamou i te tumu o te mau ohipa iino, Satani te Diabolo, o te mana nei i nia i teie nei ao. Te na ô ra te Bibilia: “Te vai noa nei to te ao atoa i raro aˈe i taua varua ino ra.” (Ioane 1, 5:19) Ua fatata râ oia i te haamouhia. Hoê â atoa no te feia e onoono ra i roto i to ratou haerea ino. E mea faahiahia mau ia ora i taua taime ra!

Ia aha te taata no te fanaˈo i tera oraraa? A haamanaˈo e na “te ite ia Iehova” e taui i te taata i teie mahana e e taui atoa i te ao i mua nei. Ma te titau i te ite mau o te Bibilia e te faaohiparaa i te reira, mai ia Pedro, e nehenehe atoa oe e tiaturi e ora i roto i te hoê ao i reira ‘e vai mau ai te parau-tia.’ (Petero 2, 3:13) Te faaitoito nei matou ia oe ia haapii iho â no nia i te Atua e ia Iesu Mesia. O te ora mure ore hoi te reira no oe.—Ioane 17:3.

[Nota i raro i te api]

[Parau iti faaôhia i te api 9]

E nehenehe atoa oe e tiaturi e ora i roto i te hoê ao i reira ‘e vai mau ai te parau-tia.’—PETERO 2, 3:13