A hinaaro i te parau-tia ma to aau atoa

“I hinaaro oe i te parau-tia.”—SAL. 45:7.

1. Eaha te tauturu mai ia na nia noa i te eˈa parau-tia?

 MAOTI ta ˈna Parau e to ˈna varua moˈa e aratai ai Iehova i to ˈna nunaa na “te eˈa titiaifaro,” aore ra parau-tia. (Sal. 23:3) Ei taata tia ore râ, e tioi iho â tatou. E titauhia ïa te tutavaraa papu no te rave faahou i te mea tia. Eaha te tauturu mai? Mai ia Iesu, ia hinaaro tatou e rave i te mea tia.—A taio i te Salamo 45:7.

2. Eaha te eˈa parau-tia?

² Eaha te eˈa parau-tia? O to tatou ïa huru oraraa niuhia i nia i te mau ture aveia tia a te Atua. Te parau-tia ia au i te reo Hebera e Heleni, o te pee-maite-raa ïa i te mau faaueraa tumu morare. O Iehova “te vairaa o te parau-tia.” E ma te oaoa, te vaiiho nei ta ˈna mau tavini ia ˈna ia faaoti i te eˈa parau-tia i te pae morare e pee.—Ier. 50:7.

3. E nafea ia haapii hau atu â no nia i te parau-tia a te Atua?

³ Ma te tutava, ma to tatou aau atoa, i te ora ia au i ta te Atua mau ture aveia tia e faaoaoa ˈi tatou ia ˈna. (Deut. 32:4) E haapii anaˈe ïa na mua no nia i te Atua ra o Iehova maoti ta ˈna Parau, te Bibilia. Hau atu â tatou i te na reira, a piri noa ˈtu â ˈi ia ˈna, hau atu â ïa tatou i te hinaaro i ta ˈna parau-tia. (Iak. 4:8) Ia farii-atoa-hia te aratairaa a ta ˈna Parau faaurua ia rave tatou i te mau faaotiraa faufaa o te oraraa.

A imi i ta te Atua parau-tia

4. Eaha te imiraa i ta te Atua parau-tia?

⁴ A taio i te Mataio 6:33. E ere te imiraa i ta te Atua parau-tia i te poro-noa-raa i te evanelia. Ia farii Iehova i ta tatou taviniraa moˈa, e mea tia ia tu noa to tatou haerea i ta ˈna mau ture aveia teitei. Ia aha te feia atoa e imi ra i ta Iehova parau-tia? Ia ahu ratou i te huru ‘taata apî tei hamanihia ia au i te Atua, i te parau-tia e te maitai mau.’—Eph. 4:24.

5. Eaha te tauturu mai ia faaruru i te toaruaruraa?

⁵ A tutava ˈi tatou i te ora ia au i ta te Atua mau ture aveia tia, e toaruaru tatou no ta tatou mau hapa i te tahi taime. Eaha te tauturu mai ia faaruru i te toaruaruraa e ia haapii i te hinaaro i te parau-tia e i te rave i te reira? (Mas. 24:10) Ia pure tamau tatou ia Iehova “ma te aau haavare ore, ma te faaroo papu mau.” (Heb. 10:19-22) Ei Kerisetiano faatavaihia aore ra eita, e faatupu tatou i te faaroo i te tusia taraehara o Iesu Mesia e i ta ˈna ohipa ei Tahuˈa rahi hau ê. (Roma 5:8; Heb. 4:14-16) Ua papai te aposetolo Ioane: “Te mâ nei tatou i ta tatou mau hara atoa i te toto o . . . Iesu Mesia.” (Ioa. 1, 1:6, 7) “Ia uteute roa ta [ta]tou mau hara ra, e riro ïa mai te hiona,” ia au i te Bibilia. E faanahoraa faahiahia mau ta Iehova i rave no tatou maoti te tusia taraehara o ta ˈna Tamaiti here!—Isa. 1:18.

A hiˈopoa i to haana tamaˈi pae varua

6. No te aha mea faufaa roa ˈi ia hiˈopoa i to tatou haana tamaˈi pae varua?

⁶ Ia ahu noa tatou i “te tapoˈi ouma ra o te parau-tia,” tuhaa faufaa hoi o te haana tamaˈi pae varua a te Atua. (Eph. 6:11, 14) No  bapetizo noa ˈtura tatou aore ra mea maoro, mea faufaa roa ia hiˈopoa noa i to tatou haana tamaˈi. No te aha? Ua hurihia mai hoi te Diabolo e ta ˈna mau demoni i te fenua. (Apo. 12:7-12) E riri rahi to Satani, e taime poto hoi to ˈna. Te tairi uˈana nei ïa oia i to te Atua nunaa. Te taa ra anei ia tatou te faufaaraa ia ahu i “te tapoˈi ouma ra o te parau-tia”?

7. Ia taa ia tatou te faufaaraa o “te tapoˈi ouma ra o te parau-tia,” e nafea ïa tatou?

⁷ E paruru te tapoˈi ouma i te mafatu, e paruru ïa te parau-tia i to tatou aau. No to tatou huru tia ore, mea haavare e mea ino roa to tatou aau. (Ier. 17:9) Mea faufaa roa ïa ia haapii e ia aˈo i te reira. (Gen. 8:21) Ia taa ia tatou te faufaaraa o “te tapoˈi ouma ra o te parau-tia,” eita roa ïa tatou e tatara ˈtu ma te maiti i te mau faaanaanataeraa ta te Atua e riri. Eita atoa e manaˈo e rave i te ino aore ra e haamâuˈa i te taime i mua i te afata teata. E tutava noa râ tatou i te rave i ta Iehova e au. Ia hiˈa noa ˈtu tatou i te hemaraa i te manaˈo e te ohipa tia ore, e tia faahou mai tatou maoti Iehova.—A taio i te Maseli 24:16.

8. No te aha mea faufaa ˈi ‘te paruru o te faaroo’?

⁸ Te vai atoa ra ‘te paruru o te faaroo e pohe ai te mau ihe auahi atoa a te varua ino.’ (Eph. 6:16) E tauturu mai te faaroo e te here ia Iehova ma te aau atoa ia rave i te parau-tia e ia na nia noa i te eˈa o te ora mure ore. Ia haapii atu â tatou i te here ia Iehova, e haafaufaa ˈtu â tatou i ta ˈna parau-tia. E to tatou manaˈo haava ïa? E nafea te reira e tauturu noa mai ai ia hinaaro i te parau-tia?

Ei manaˈo haava maitai noa

9. E nafea tatou e faufaahia ˈi i te manaˈo haava maitai noa?

⁹ I te bapetizoraa, ua ani tatou ia Iehova i “te aau hapa ore.” (Pet. 1, 3:21) No to tatou faaroo i te hoo, e tapoˈi te toto o Iesu i ta tatou mau hara a riro atu ai tatou ei mea viivii ore i te aro o te Atua. Ei manaˈo haava maitai noa râ to tatou. Ia mauruuru tatou ia hauti e ia faaara mai to tatou manaˈo haava. E tapao faaite ïa e te haa noa ra te reira ia au i te mau eˈa tia o Iehova. (Tim. 1, 4:2) E ohipa ê atu â râ ta te manaˈo haava i nia i te feia e hinaaro ra i te parau-tia.

10, 11. (a) A faatia i te hoê tupuraa o te faaite no te aha e faaroo ai i to tatou manaˈo haava haapiihia e te Bibilia. (b) No te aha tatou e faufaa-mau-hia ˈi i te hinaaroraa i te parau-tia?

¹⁰ Ia hara tatou, e faahapa aore ra e haapeapea mai paha to tatou manaˈo haava. Ua faarue te hoê taurearea i te eˈa parau-tia. Ua matau oia i te mataitai i te hohoˈa faufau e ua puhipuhi i te raau taero. Ua huru ê roa o ˈna i te haereraa i te mau putuputuraa e no ˈna te haavare ra oia ia poro oia i te taata. Faaea ˈtura oia i te apiti i teie mau ohipa Kerisetiano. “Teie râ, aita vau i manaˈo e e faahapa noa mai to ˈu manaˈo haava,” ta ˈna ïa i parau. Oia atoa, “E maha matahiti to ˈu haamaau-noa-raa ia ˈu.” Feruri atura oia e  hoˈi i te parau mau. No ˈna, eita Iehova e faaroo mai i ta ˈna pure, ua pure noa ˈtu râ oia no te ani e ia faaorehia ta ˈna hara. Aitâ i ahuru minuti atura, haere mai nei to ˈna mama e ua faaitoito ia ˈna ia hoˈi faahou i te putuputuraa. Ua na reira oia e i te Piha a te Basileia ua ani ihora i te tahi haapiiraa Bibilia i te hoê matahiapo. Ua bapetizohia ˈtura oia e te mauruuru ra oia ia Iehova i te faaoraraa ia ˈna.

¹¹ E faufaa-mau-hia tatou i te raveraa i te mea tia. Ia haapii tatou i te hinaaro i te parau-tia e te rave maite i te reira, e oaoa ˈtu â tatou i te rave i ta to tatou Metua i te raˈi e au. A feruri na! Te piri maira te tau e hau noa ˈi te manaˈo haava o te taata atoa. E faaite roa ratou i te huru maitatai o te Atua. Ia hinaaro ïa tatou i te parau-tia ma to tatou aau atoa, e oaoa hoi Iehova.—Mas. 23:15, 16.

12, 13. E nafea ia haapii i to tatou manaˈo haava?

¹² E nafea ia haapii i to tatou manaˈo haava? Ia haapii tatou i te Bibilia e te mau papai Kerisetiano, mea faufaa ia haamanaˈo e ‘e imi te aau o te feia parau-tia i te parau ia parau.’ (Mas. 15:28) Mea maitai te reira no nia i te parau o te ohipa. Ia ore te tahi ohipa e tuati i te mau titauraa Bibilia, e oioi te rahiraa o tatou i te pee i te aratairaa a te tavini haapao maitai e te paari. Ia ore râ e papu ia tatou e e tano anei tera ohipa, e imi anaˈe ïa i te mau faaueraa tumu Bibilia a pure atu ai. * E au atoa i te faaueraa tumu eiaha e faaturori i to vetahi ê manaˈo haava. (Kor. 1, 10:31-33) Ia haapao iho â râ tatou i te mau faaueraa tumu no nia i to tatou taairaa e te Atua. Mai te peu e te vai mau ra Iehova no tatou, e ui na mua tatou, ‘E mauiui e e peapea anei Iehova ia rave au i tera ohipa?’—Sal. 78:40, 41.

¹³ Ia faaineine tatou i Te Pare Tiairaa aore ra te buka no te Haapiiraa Bibilia a te amuiraa, e haamanaˈo anaˈe i te feruriruri i te mau manaˈo faahitihia. Mea reni noa anei ta tatou i te mau pahonoraa? Eita ïa tatou e hinaaro roa ˈtu â i te parau-tia e eita to tatou manaˈo haava e tauturu mai. Ia haapii e ia feruri maite râ tatou i ta tatou e taio ra i roto i te Parau a te Atua. No te haapii i te hinaaro i te parau-tia ma to tatou aau atoa, e titauhia te tutavaraa!

Poia e poihâ i te parau-tia

14. Te hinaaro ra Iehova raua Iesu ia aha tatou i te taviniraa moˈa?

¹⁴ Te hinaaro ra te Atua ra o Iehova raua Iesu Mesia ia oaoa tatou i te taviniraa moˈa. Eaha te tauturu mai? Te hinaaro i te parau-tia! I roto i ta ˈna Aˈoraa i nia i te mouˈa, ua na ô Iesu: “E ao to tei poia e tei poihâ i te parautia ra: e faaî hia hoi ratou.” (Mat. 5:6, V.C.J.S., huriraa Katolika reo Tahiti, 1976) Eaha ïa te auraa no te feia e hinaaro i te parau-tia?

15, 16. E nafea e mâha ˈi te poia e te poihâ pae varua o te feia hinaaro i te parau-tia?

 ¹⁵ Na te varua ino e faatere ra i to tatou nei ao. (Ioa. 1, 5:19) I te mau fenua atoa, e faaite mai te vea i te ino e te haavîraa uˈana aita i itehia aˈenei. Te horuhoru nei te taata parau-tia no te ino o te taata. (Koh. 8:9) Ua ite tatou o te here nei ia Iehova e o ˈna anaˈe te haamâha i te poia e te poihâ pae varua o te feia e hinaaro ra e haapii i te parau-tia. E fatata oia i te haamou i te feia parau-tia ore e ta ratou mau ohipa ino. Eita ïa te feia hinaaro i te parau-tia e ahoaho faahou. (Pet. 2, 2:7, 8) Auê te oaoa e!

¹⁶ Ei tavini a Iehova e ei pǐpǐ a Iesu Mesia, ua ite tatou e e “faaî hia” te feia atoa e poia e e poihâ nei i te parau-tia. E mâha roa ratou maoti ta te Atua faanahoraa o te raˈi apî e te fenua apî i reira ‘e vai mau ai te parau-tia.’ (Pet. 2, 3:13) Eiaha ïa tatou e toaruaru aore ra e maere i ore ai te parau-tia i roto i teie ao a Satani no te faaheporaa e te haavîraa uˈana. (Koh. 5:8) Ua ite Iehova, Tei Teitei, i te mea e tupu ra e e fatata oia i te faaora i te feia hinaaro i te parau-tia.

Haamaitairaa ia hinaaro i te parau-tia

17. Eaha te tahi mau haamaitairaa ia hinaaro i te parau-tia?

¹⁷ Te haapapu ra te Salamo 146:8 i te haamaitairaa faahiahia ia na nia noa i te eˈa parau-tia. Ua himene te papai salamo: “O Iehova tei hinaaro i te feia parau-tia.” (Sal. 146:8) A hiˈo na! Mea here na te Arii o te ao taatoa ia tatou no to tatou hinaaro i te parau-tia! Mea papu ïa e e aupuru mai oia ia haapao na mua tatou i te mau ohipa taaihia i te Basileia. (A taio i te Salamo 37:25; Maseli 10:3.) I te pae hopea, o te feia hinaaro i te parau-tia te parahi i te fenua. (Mas. 13:22) No te raveraa i te parau-tia, e fanaˈo te nunaa o te Atua i te oaoa iti rahi e te ora mure ore i roto i te hoê paradaiso nehenehe i te fenua. I teie nei â, te ite nei ratou i te hau o roto o te tahoê i te mau melo o te utuafare e te amuiraa.—Phil. 4:6, 7.

18. Ia tamau tatou i te aha a tiai noa ˈi i te mahana o Iehova?

¹⁸ A tiai noa ˈi i te mahana rahi o Iehova, ia tamau tatou i te imi i ta ˈna parau-tia. (Zeph. 2:2, 3) Ia hinaaro mau â ïa tatou i te eˈa tia o Iehova. Te auraa ra, ia vai noa “te tapoˈi ouma ra o te parau-tia” i nia ia tatou no te paruru i to tatou aau. Ei manaˈo haava maitai noa atoa to tatou e oaoa ˈi tatou e te Atua.—Mas. 27:11.

19. Eaha ta tatou e faaoti papu e rave, e eaha ta te tumu parau i muri nei e faaite mai?

¹⁹ “Te hiˈo nei te mata o Iehova i to te ao atoa nei, ia horoa mai oia i te etaeta i te feia i tia te aau ia ˈna.” (Par. 2, 16:9) E parau mahanahana mau teie no tatou e rave nei i te mea tia noa ˈtu te papu ore o te oraraa, te haavîraa uˈana, e te ino e rahi noa ˈtura i roto i teie nei ao arepurepu! E maere paha te rahiraa o te taata tei atea ê i te Atua i to tatou haerea tia. E maitai rahi râ tatou i te ora ia au i ta Iehova parau-tia. (Isa. 48:17; Pet. 1, 4:4) E faaoti papu anaˈe ïa e hinaaro e e rave noa i te parau-tia ma to tatou aau atoa, a oaoa ˈtu ai tatou. E faufau atoa râ tatou i te ino. E faaite mai te tumu parau i muri nei i te auraa.

[Nota i raro i te api]

Eaha ta outou e pahono?

• No te aha e haafaufaa ˈi i te hoo no te hinaaro i te parau-tia?

• No te aha mea faufaa roa ˈi ia ahu i “te tapoˈi ouma ra o te parau-tia”?

• E nafea ia haapii i to tatou manaˈo haava?

[Uiraa haapiiraa]

[Hohoˈa i te api 26]

E tauturu mai te hoê manaˈo haava haapiihia no nia i te ohipa