Te faufau ra anei outou i te ino?
Te faufau ra anei outou i te ino?
“I faufau na [Iesu] i te parau ino.”—HEB. 1:9.
1. Eaha ta Iesu i haapii no nia i te here?
NO TE haapapu i te faufaaraa o te aroha, aore ra here, ua parau Iesu Mesia i ta ˈna mau pǐpǐ: “E tuu atu vau i te parau apî na outou, E aroha outou ia outou iho, mai ia ˈu e aroha ˈtu ia outou na, e aroha atoa hoi outou ia outou iho. O te mea teie e ite ai te taata atoa e, e pǐpǐ outou na ˈu, ia aroha outou ia outou iho.” (Ioa. 13:34, 35) Ua faaue Iesu i ta ˈna mau pǐpǐ ia here te tahi i te tahi ma te pipiri ore, e itehia ˈi e e pǐpǐ mau ratou na ˈna. Ua aˈo atoa ˈtu oia ia ‘aroha i to ratou mau enemi e ia pure no tei hamani ino mai ia ratou.’—Mat. 5:44.
2. Ia faufau te mau pǐpǐ a te Mesia i te aha?
2 Hau atu â râ i te here, ua haapii Iesu eaha te faufau atu. Ua parauhia no ˈna: “I hinaaro na oe i te parau-tia, e i faufau na oe i te parau ino.” (Heb. 1:9; Sal. 45:7) Eiaha noa ïa tatou ia hinaaro i te parau-tia, ia faufau atoa râ i te hara, aore ra i te faahapa i te ture. O ta te aposetolo Ioane e faataa maitai ra: “O tei rave i te hara ra, ua faahapa ïa i te ture; o te faahapa hoi i te ture ra, o te hara ïa.”—Ioa. 1, 3:4.
3. Eaha te mau tuhaa o te oraraa ta teie tumu parau e hiˈopoa no nia i te faufauraa i te ino?
3 Ei Kerisetiano, ia ui ïa tatou, ‘Te faufau ra anei au i te ino?’ E hiˈopoa anaˈe ïa e nafea tatou e na reira ˈi i roto e maha tuhaa o te oraraa: (1) te inu-hua-raa i te ava, (2) te mau peu tahutahu, (3) te peu morare ore, e (4) te feia hinaaro i te ino.
Ia vai noa te ava i to ˈna vairaa
4. No te aha Iesu i faaara roa ˈtu ai no nia i te inu-hua-raa?
4 I te tahi taime ua inu Iesu i te uaina e ua ite e e ô teie na te Atua. (Sal. 104:14, 15) Aita roa ˈtu râ oia i inu hua. (Mas. 23:29-33) No reira oia i faaara roa ˈtu ai no nia i tera peu. (A taio i te Luka 21:34.) E hara ino atu â ia inu hua i te ava. Ua papai te aposetolo Paulo: “Eiaha ia taero i te uaina e tupu ai te taiata ra; ia î râ outou i te [v]arua.” (Eph. 5:18) Ua faaara atoa oia i te mau vahine paari o te amuiraa eiaha ia “inu hua i te uaina.”—Tito 2:3.
5. Ia inu te taata i te ava, ia uiui ratou i te aha?
5 Ia inu oe i te ava, ia uiui ïa oe: ‘Hoê â anei to ˈu manaˈo e to Iesu no nia i te inu-hua-raa? E tia anei ia ˈu ia aˈo roa ˈtu ia vetahi ê ia titauhia? E inu anei au no te tamǎrû i to ˈu hepohepo aore ra ahoaho? Eaha ta ˈu faito ava i te mau hebedoma atoa? Ia parau mai te tahi taata e te inu rahi nei au, e nafea vau? E huru ê aore ra e inoino anei au?’ Ia inu hua tatou, eita tatou e feruri maitai faahou e e rave i te mau faaotiraa paari. E tutava te mau pǐpǐ a te Mesia i te paruru i to ratou feruriraa.—Mas. 3:21, 22.
A haapae i te mau peu tahutahu
6, 7. (a) Ua aha Iesu ia Satani e i te mau demoni? (b) No te aha te mau peu tahutahu i parare roa ˈi i teie mahana?
6 I te fenua, ua patoi hua Iesu ia Satani e i ta ˈna mau demoni. Ua tapea noa oia i to ˈna taiva ore i mua i ta Satani mau faahemaraa. (Luka 4:1-13) Ua haroaroa e ua patoi atoa oia i te mau tamataraa haavarevare e faahuru ê i to ˈna feruriraa e ta ˈna mau haaraa. (Mat. 16:21-23) Ua tauturu oia i te feia aau rotahi ia tiamâ mai i te haavîraa aroha ore a te mau demoni.—Mar. 5:2, 8, 12-15; 9:20, 25-27.
7 I to ˈna ariiraa mai i 1914, ua tamâ Iesu i te raˈi i te mana viivii o Satani e ta ˈna mau demoni. Ua faaoti papu Satani i teie nei e “haavare i to te ao atoa nei.” (Apo. 12:9, 10) E ere ïa i te mea maere e te anaanatae noa ˈtura te taata i te mau peu tahutahu. E nafea ia paruru ia tatou?
8. Ia hiˈopoa tatou taitahi i te aha a maiti ai i te faaanaanataeraa?
8 Te faaara maitai ra te Bibilia i te mau fifi atâta taaihia i te peu tahutahu. (A taio i te Deuteronomi 18:10-12.) Te ohipa nei Satani e ta ˈna mau demoni i nia i te feruriraa o te taata maoti te mau hohoˈa teata, buka, e hauti eretoroni e paturu ra i tera mau peu. A maiti ai i te faaanaanataeraa, ia uiui ïa tatou taitahi: ‘I te mau avaˈe aˈenei, ua maiti anei au i te mau hohoˈa teata, porotarama afata teata, hauti eretoroni, buka aore ra aamu e peu huru ê to roto? Ua taa anei ia ˈu te faufaaraa ia haapae i tera mau peu iino, aore ra te manaˈo ra anei au e e ere i te mea atâta? Ua feruri ê na anei au i to Iehova huru i ta ˈu faaanaanataeraa? Mai te peu e ua farii au i te mau ravea a Satani, e faaitoito anei to ˈu here no Iehova e to ˈu hinaaro i ta ˈna mau faaueraa tumu tia ia haapae roa ˈtu i te reira?’—Ohi. 19:19, 20.
A faaroo i ta Iesu faaararaa no nia i te peu morare ore
9. E nafea te hoê taata e atuatu ai i te hinaaro i te ino?
9 Ua turu Iesu i ta Iehova ture aveia morare i te pae taatiraa. Ua na ô oia: “Aita outou i taio e o tei hamani i te taata i te matamua ra, i hamani ïa i te tane hoê e te vahine hoê, e ua na ô aˈera, E faarue ai te taata i tana metua tane e tana metua vahine a ati atu ai i tana vahine; e riro hoi raua ei hoê? E teie nei, e ere atura raua i te toopiti, hoê râ. E ta te Atua i taati ra, eiaha te taata e faataa ê atu.” (Mat. 19:4-6) Ua ite Iesu e e ohipa ta tatou e ite i nia i to tatou aau. I roto i ta ˈna Aˈoraa i nia i te mouˈa, ua parau oia: “Ua faaroo hoi outou, e i parauhia mai te feia tahito ra e, Eiaha oe e faaturi. Te parau atu nei râ vau ia outou, O te hiˈo noa ˈtu i t[a] vetahi ê ra vahine ei faatupu i te hinaaro, ua faaturi ïa ia ˈna i to ˈna ihora aau.” (Mat. 5:27, 28) Te atuatu mau ra te feia e tâuˈa ore ra i ta Iesu faaararaa i te hinaaro i te ino.
10. E nehenehe e tiamâ mai i te hohoˈa faufau, a faatia i te hoê tupuraa.
10 Te paturu ra Satani i te peu morare ore na roto i te hohoˈa faufau, tei parare i roto i teie nei ao. Mea fifi no te taata tei mataitai i te reira ia ore e manaˈo faahou. E matau roa atoa paha ratou i tera mau hohoˈa. A hiˈo na i te tupuraa o te hoê Kerisetiano. Te na ô ra oia: “Ua mataitai huna vau i te hohoˈa faufau. I hamani na vau i te hoê ao feruri-noa-hia tei taa ê roa i te ao i reira vau i tavini ai ia Iehova. Mea ino iho â teie peu, no ˈu râ, mea maitai noa ta ˈu taviniraa i te Atua.” Eaha to ˈna manaˈo i taui ai? Te parau ra oia: “Ua faaite au i to ˈu fifi i te mau matahiapo, noa ˈtu e o te mea fifi roa ˈˈe ïa ta ˈu i rave.” Ua tiamâ mai teie taeae i tera peu viivii. “I to ˈu haapaeraa i tera hara,” ta ˈna e faˈi ra, “ite mau atura vau i te manaˈo haava mâ.” Ia haapii te feia e riri roa ra i te ino ia faufau i te hohoˈa hairiiri.
11, 12. A maiti ai i te upaupa, e nafea ia faaite e te faufau ra tatou i te ino?
11 E haaputapû te upaupa e to roto mau parau i to tatou mau manaˈo hohonu, i to tatou atoa ïa aau. E ô teie na te Atua tei faaohipa-maoro-hia i roto i te haamoriraa mau. (Exo. 15:20, 21; Eph. 5:19) Te faatietie nei râ te upaupa o te ao ino a Satani i te peu morare ore. (Ioa. 1, 5:19) E nafea ia ite e te haaviivii ra anei te upaupa ta outou e faaroo ra ia outou?
12 A ui na mua: ‘Te faatietie ra anei te mau himene ta ˈu e faaroo ra i te taparahi taata, te faaturi, te poreneia, e te faaino? Ia taio vau i te mau parau o te tahi mau himene i te hoê taata, e manaˈo anei o ˈna e te faufau ra vau i te ino, aore ra e faaite te reira e ua viivii to ˈu aau?’ Eita e tia ia parau e te faufau nei tatou i te ino a faaroo noa ˈi i te upaupa o te faatietie ra i te reira. “Ta te vaha e haapuai mai, no roto mai ïa i te aau,” ta Iesu i parau, “o te mea ïa e viivii ai te taata. No roto mai hoi i te aau te manaˈo iino, te taparahi taata, e te faaturi, te poreneia, e te eiâ, te haavare, e te faaino.”—Mat. 15:18, 19; a hiˈo i te Iakobo 3:10, 11.
A pee i to Iesu manaˈo i te feia hinaaro i te ino
13. Eaha to Iesu manaˈo i te feia tei onoono i te rave i te hara?
13 Ua parau Iesu e ua haere mai oia ia tatarahapa te feia hara, aore ra rave parau ino. (Luka 5:30-32) Eaha râ to ˈna manaˈo i te feia e onoono ra i te rave i te hara? Ua faaara puai Iesu eiaha ia riro mai ia ratou. (Mat. 23:15, 23-26) Ua faaite papu oia: “E ore te feia e parau mai ia ˈu ra e, E te Fatu, e te Fatu, e hope paatoa i te tae i te basileia ra o te ao, o te taata râ i haapao i te hinaaro o tau Metua i te ao ra. E rave rahi te parau mai ia ˈu ia tae i taua mahana [a faatupu ai te Atua i ta ˈna haavaraa], E te Fatu, e te Fatu, e ere anei ua haapii matou ma to oe iˈoa, e ua tatai i te mau demoni i to oe iˈoa, e ua rave i te semeio e rave rahi i to oe iˈoa?” E patoi râ oia i te feia rave parau ino tatarahapa ore, ma te parau: “E haere ê atu outou.” (Mat. 7:21-23) No te aha teie huru haavaraa? No to ratou faatura-ore-raa i te Atua e haamauiuiraa ia vetahi ê e ta ratou mau peu tia ore.
14. No te aha te feia hara tatarahapa ore e tiavaruhia ˈi?
14 Te faaue ra te Parau a te Atua ia tiavaru i te feia hara tatarahapa ore. (A taio i te Korinetia 1, 5:9-13.) E toru aˈe tumu e titauhia ˈi te reira: (1) ia ore te iˈoa o Iehova ia faainohia, (2) no te paruru i te amuiraa i te viivii, e (3) no te tauturu i te taata hara ia tatarahapa, ia nehenehe.
15. Eaha te uiui ia hinaaro tatou e vai taiva ore noa ia Iehova?
15 Hoê â anei to tatou manaˈo e to Iesu i te feia e haerea ino to ratou? Ia uiui ïa tatou: ‘E amuimui noa anei au i tei tiavaruhia aore ra tei iriti ia ˈna i te amuiraa Kerisetiano? Eaha ïa no te fetii piri aita faahou i te fare?’ E tamataraa mau teie tupuraa i to tatou hinaaro i te parau-tia e taiva ore i te Atua.
16, 17. (a) Eaha ta te hoê metua vahine Kerisetiano i faaruru? (b) Eaha tei tauturu ia ˈna ia paturu i te faanahoraa o te tiavaruraa?
16 A hiˈo na i te tupuraa o te hoê tuahine. I here na ta ˈna tamaiti ia Iehova. Ua maiti râ oia i muri aˈe e rave i te mea ino ma te tatarahapa ore e tiavaruhia ˈtura oia. Mea here na to tatou tuahine ia Iehova e i ta ˈna tamaiti atoa râ. Mea fifi roa ïa no ˈna ia pee i te faaueraa Bibilia eiaha e amui ia ˈna.
17 Eaha ta oe e parau i teie tuahine? Ua tauturu te hoê matahiapo ia ˈna ia haamanaˈo e te taa ra Iehova i to ˈna mauiui. Ua haaferuri na mua te taeae ia ˈna i to Iehova mauiui a orure hau ai vetahi o ta ˈna mau tamaiti melahi. E noa ˈtu e ua ite Oia e mea mauiui, e titau Oia ia tiavaruhia te feia hara tatarahapa ore. Ua haafaufaa te tuahine i te reira e ua paturu ma te taiva ore i te faanahoraa o te tiavaruraa. a E oaoa Iehova i teie huru taiva ore.—Mas. 27:11.
18, 19. (a) E faaite maitai te tâpûraa oe i te taairaa e tei rave i te ino e te faufau ra oe i te aha? (b) Eaha paha te tupu ia taiva ore tatou i te Atua e i ta ˈna faanahoraa?
18 Mai tera atoa anei no oe? A haamanaˈo na e te aumihi nei Iehova ia oe. Ma te tâpû i te taairaa e tei tiavaruhia aore ra tei iriti ia ˈna, e faaite oe e te faufau ra oe i to ˈna haerea e ta ˈna i rave. Oia atoa râ i to oe here no ˈna e to oe hinaaro i te mea maitai aˈe no ˈna. No to oe taiva ore ia Iehova, e tatarahapa e e hoˈi mai paha oia ia Iehova ra.
19 Ua papai te hoê taata i tiavaruhia e i faahoˈihia mai i muri aˈe: “Te oaoa nei au e no to Iehova here i to ˈna nunaa e haapao ai oia ia vai mâ noa ta ˈna faanahonahoraa. E manaˈo paha to rapaeau e mea etaeta, e faanahoraa titauhia râ tera e te î i te here.” No oe, e na reira anei teie taata ahani i amui noa na te mau melo o te amuiraa, o to ˈna utuafare atoa, ia ˈna a tiavaruhia ˈi oia? E faaite maitai to tatou patururaa i te faanahoraa Bibilia o te tiavaruraa i to tatou hinaaro i te parau-tia e te farii ra tatou i te tiaraa o Iehova e haamau i te mau ture aveia no nia i te haerea.
“Ia riaria outou i te ino”
20, 21. No te aha mea faufaa ˈi ia haapii i te faufau i te ino?
20 “E haapao maitai, e faaitoito,” ta te aposetolo Petero ïa e faaara ra. No te aha? “Te hahaere nei hoi to outou enemi o te diabolo, mai te liona uuru ra, i te imiraa i te taata e pau ia ˈna.” (Pet. 1, 5:8) O oe anei tera taata? Tei ta oe noa ïa haapiiraa i te faufau i te ino.
21 E ere i te mea ohie ia faufau i te ino. E taata hara tatou e ora ra i roto i te hoê ao e turai ra ia pee i to tatou mau hinaaro pae tino. (Ioa. 1, 2:15-17) E maraa râ ia tatou ma te pee i te hiˈoraa o Iesu Mesia e ma te here mau i te Atua ra o Iehova. E faaoti papu anaˈe ïa e riaria aore ra e faufau i te ino, ma te tiaturi roa e ‘te tiai ra Iehova i to ˈna feia moˈa,’ aore ra taiva ore, “e te faaora ra oia ia ratou i te rima o te paieti ore.”—Sal. 97:10.
[Nota i raro i te api]
a A hiˈo atoa i te tuhaa hau o te buka “Ia vai maite outou i roto i te here o te Atua,” api 207-209.
Eaha ta outou e pahono?
• Eaha te tauturu mai ia hiˈopoa i to tatou huru i mua i te ava?
• Eaha te rave no te paruru ia tatou i te mau peu tahutahu?
• No te aha mea atâta ˈi te hohoˈa faufau?
• E nafea ia faaite e te faufau ra tatou i te ino ia tiavaruhia te hoê taata herehia?
[Uiraa haapiiraa]
[Hohoˈa i te api 29]
Ia uiui oe i te aha ia inu oe i te ava?
[Hohoˈa i te api 30]
A ara i te mau ravea a Satani no nia i te faaanaanataeraa
[Hohoˈa i te api 31]
E atuatu te taata e mataitai i te hohoˈa faufau i te hinaaro i te aha?
