Ta te Parau a te Atua e haapii maira

No te aha te Atua e faatia ˈi i te ino e te mauiui?

I roto i teie tumu parau, e ite oe i te mau uiraa ta oe paha i uiui na e ihea e taio ai i te pahonoraa i roto i ta oe Bibilia. E oaoa te mau Ite no Iehova i te aparau no nia i teie mau pahonoraa e oe.

1. Mea nafea te ino i te haamataraa?

Ua haamata te ino i te fenua nei e te haavare matamua a Satani. E ere o ˈna i te mea ino a poietehia ˈi, e melahi tia roa, ‘aita râ oia i haapao i te parau mau.’ (Ioane 8:44) Ua hinaaro oia i te haamoriraa e au noa hoi i te Atua. Ma te haavare, ua turai Satani i te vahine matamua ia Eva ia faaroo ia ˈna eiaha i te Atua. Ua pee atoa Adamu ia Eva ma te faaroo ore i te Atua. Te faahopearaa o ta Adamu faaotiraa, o te mauiui ïa e te pohe.—A taio i te Genese 3:1-6, 17-19.

Ua patoi Satani i te mana arii o te Atua i to ˈna turairaa ia Eva ia faaroo ore ia ˈNa. Ua apiti te rahiraa o te taata ia Satani ma te patoi i te Atua ei Faatere. O Satani hoi i teie nei “te arii o teie nei ao.”—A taio i te Ioane 14:30; Apokalupo 12:9.

2. Mea ino anei te poieteraa a te Atua?

E nehenehe te taata e te mau melahi poietehia e te Atua e auraro i ta ˈna mau titauraa. (Deuteronomi 32:4, 5) Ua poiete o ˈna ia tatou e te tiamâraa e maiti i te rave i te maitai e te ino. Maoti tera tiamâraa e faaite ai tatou i to tatou here i te Atua.—A taio i te Iakobo 1:13-15; Ioane 1, 5:3.

3. No te aha te Atua i faatia ˈi i te mauiui?

Ua faatia Iehova ia patoihia to ˈna mana arii no te hoê noa taime. No te aha? No te faaite e aita anaˈe o ˈna, aita e faatereraa e hopoi mai i te maitai i te huitaata. (Ieremia 10:23) Tera ïa ta tatou e ite ra i muri aˈe e 6 000 matahiti tuatapaparaa. Aita te mau tia faatere i manuïa i te faaore i te tamaˈi, te ohipa ino, te parau-tia ore e te maˈi.—A taio i te Koheleta 7:29; 8:9; Roma 9:17.

Area te feia e farii i te Atua ei Faatere, e maitaihia ïa. (Isaia 48:17, 18) Ua fatata Iehova i te haamou i te mau faatereraa taata atoa. O te feia anaˈe te farii e na te Atua e faatere ia ratou te parahi i nia i te fenua.—Isaia 2:3, 4; 11:9; a taio i te Daniela 2:44.

  4. Ia aha tatou a faaoromai noa ˈi te Atua?

Ua parau Satani e eita te taata e auraro ma te taiva ore i te Atua. A faaoromai noa ˈi Iehova e tia ia tatou paatoa ia faaite e o ta ˈna anei faatereraa ta tatou e hinaaro aore ra ta te taata. Na to tatou huru oraraa ïa e faaite.—A taio i te Ioba 1:8-11; Maseli 27:11.

5. E nafea tatou e farii ai i te Atua ei Faatere?

E farii tatou i te Atua ei Faatere ia imi tatou i te haamori mau ia ˈna ia au i ta ˈna Parau, te Bibilia. (Ioane 4:23) Mai ia Iesu, eita atoa tatou e faaô i roto i te poritita e te tamaˈi.—A taio i te Ioane 17:14.

Te faaohipa ra Satani i to ˈna puai no te turu i te mau peu morare ore e te hairiiri. E faaooo aore ra e patoi mai paha vetahi mau hoa e fetii ia haapae tatou i te reira. (Petero 1, 4:3, 4) Na tatou ïa e maiti. E amui anei tatou i te feia e here i te Atua? E auraro anei tatou i ta ˈna mau ture î i te paari e te here? Mai te peu e e, e haapapu tatou e ua haavare Satani ia ˈna i parau e aita e taata e haa ia au i ta te Atua e parau ra.—A taio i te Korinetia 1, 6:9, 10; 15:33.

No te faahohonu atu â, a hiˈo i te pene 11 o teie buka, Eaha ta te Bibilia e haapii mau ra?, piahia e te mau ite no Iehova.

[Hohoˈa i te api 30]

E faaotiraa ino ta Adamu i rave

[Hohoˈa i te api 31]

E faaite ta tatou mau maitiraa e te hinaaro ra anei tatou i te Atua ei Faatere