Parau oaoa no tei veve

TE HAAPAPU maira te Parau a te Atua: “E ore . . . te taata rii e haamoe-roa-hia ˈtu.” (Salamo 9:18) E te parau atoa ra no to tatou Atua Poiete: “Te heheu nei oe i to rima, e te haamâha nei i te hiaai o te mau mea ora atoa nei.” (Salamo 145:16) E ere teie tiaturiraa i te hoê noa moemoeâ. E nehenehe te Atua Mana hope e faaore i te veve. Eaha ta te feia veve e hinaaro ra?

Ia au i te hoê taata ite i te pae o te faanavairaa faufaa no Afirika, e hinaaro te mau fenua veve i te hoê faatere hamani maitai tei ia ˈna te mana atoa. E titauhia ïa te hoê taata e mana to ˈna no te faaore i te veve e e hinaaro ra i te na reira. Mea tano ïa ia riro atoa oia ei faatere o te fenua taatoa. E pinepine hoi o te aifaito-ore-raa o te nunaa rau te tumu o te veve rahi. Hau atu â, e tia atoa i teie faatere ia arai i te tumu hoê o te veve, to tatou huru miimii. Ihea ïa e itehia ˈi teie huru faatere?

Ua tono te Atua ia Iesu e te parau oaoa no tei veve. I to Iesu faaiteraa i ta ˈna ohipa no ǒ mai i te Atua, ua parau oia: “Tei nia iˈau te Varua o te Fatu [o Iehova], no te mea ua faatahinu mai oia iaˈu ei faaite haere i te parau oaoa i te feia veve.”—Luka 4:16-18, Te Faufaa Api.

Eaha te parau oaoa?

Ua faatoroa te Atua ia Iesu ei Arii. E parau oaoa mau â teie! O ˈna te Faatere tano maitai no te faaore i te veve no te mea (1) o te huitaata atoa ta ˈna e faatere e e mana to ˈna no te ohipa; (2) e haa o ˈna ma te aumihi i nia i tei veve e e haapii i ta ˈna mau pǐpǐ ia aupuru ia ratou; e (3) e nehenehe o ˈna e faaore i te tumu o te veve, to tatou mau hinaaro miimii. E hiˈo anaˈe i na tuhaa e toru o te parau oaoa.

1. To Iesu mana i nia i te mau nunaa atoa Te na ô ra te Parau a te Atua no Iesu: “Ua horoahia maira te mana [ia ˈna] ia auraro mai te taata atoa, e te mau fenua atoa, e te reo atoa ia ˈna.” (Daniela 7:14) Hoê anaˈe ïa faatereraa to te huitaata atoa. Te taa ra anei ia oe te mau maitai? E ore ïa te mau aimârôraa e aroraa no te mau faufaa o te fenua. E fanaˈo te taata atoa i te reira ma te aifaito. Ua haapapu Iesu iho e e riro oia ei Faatere mana o te fenua: “O te mana atoa i te raˈi e te ao atoa nei ua pûpûhia mai tei ia ˈu anaˈe.”—Mataio 28:18.

2. To Iesu aumihi no tei veve A tavini ai Iesu i te fenua, ua haa oia ma te aumihi i nia i tei veve. A hiˈo na i teie vahine ua pau roa ta ˈna taoˈa i te imiraa i te raau. No to ˈna hinaaro e ora i to ˈna maˈi, ua tapea oia i te ahu o Iesu. E tapahi to ˈna a 12 matahiti i teie nei e ua anemia roa paha oia. Ia au i te Ture, e viiviihia te taata atoa ta ˈna e tapea. Mea mǎrû râ Iesu a parau ai oia: “E tau tamahine, i ora oe i to faaroo; a haere ma te hau, e ma te ora i to maˈi.”—Mareko 5:25-34.

E puai to ta Iesu mau haapiiraa no te taui i te huru o te taata ia haa atoa ratou ma te aumihi. A hiˈo na i te pahonoraa a Iesu i te hoê taata tei hinaaro e ite e nafea ia faaoaoa i te Atua. Ua ite oia e e hinaaro te Atua ia here tatou i to tatou taata-tupu, ua ui râ oia ia Iesu: “O vai hoi to ˈu taata-tupu?”

Faaite atura Iesu i te parabole matauhia o te hoê taata tei eiâhia e tei faaruehia “fatata i te pohe” o te haere ra i Ieriko mai Ierusalema  mai. Haere maira te hoê tahuˈa e na te tahi pae eˈa ˈtura oia i te haere. Ua na reira atoa te hoê ati Levi. “Te hoê taata râ no Samaria i haere noa i to ˈna haerea, e tae atura i taua vahi ra, e ite atura oia ia ˈna, aroha ˈtura.” Ua rapaau oia i tera taata, ua afai atu i te hoê fare tipaeraa, e ua aufau i te fatu o tera fare no te haapao i te taata i pepe. “O vai te taata-tupu [o] te taata i roohia i te nǎnǎ eiâ hara ra?,” ta Iesu ïa i ui. “O tei aroha ia ˈna ra” tei pahonohia ˈtu. Parau atura Iesu: “E na reira atoa.”—Luka 10:25-37.

E haapii te feia e riro mai ei Ite no Iehova i taua mau haapiiraa ra a Iesu e e taui ratou i to ratou huru no te tauturu i te feia e ati ra. Ei hiˈoraa, teie ta te hoê vahine no Lettonie i papai i roto i ta ˈna buka (Women in Soviet Prisons) no nia i to ˈna maˈi a ohipa ai oia i roto i te aua faautuaraa no Potma i te afaraa o te mau matahiti 1960: “I te roaraa o to ˈu maˈi, ua riro [te mau Ite] ei tuati haapao maitai. Aita hoi e rapaauraa maitai aˈe ta ˈu e nehenehe e tiai.” Te na ô atoa ra oia: “Ua faariro te mau Ite no Iehova i te reira ei hopoia na ratou e tauturu i te mau taata atoa, noa ˈtu eaha ta ratou haapaoraa aore ra to ratou nunaa.”

I to te faanavairaa faufaa toparaa i Ancón, i Équateur, aita faahou e ohipa e e moni ta te tahi mau Ite no Iehova. Ua faaoti atura to ratou mau hoa Kerisetiano i te hoê ravea ia noaa mai te moni: e faaineine i te maa no te hoo i te feia taiˈa e hoˈi mai i ta ratou taiˈaraa (hohoˈa i te pae atau). Ua ohipa amui te amuiraa, te mau tamarii atoa. Ua haamata ratou i te hora hoê i te mau aahiata atoa ia ineine te maa ia tae mai te mau poti i te hora maha. Ua horoahia te moni i noaa mai ia au i te fifi o te Ite taitahi.

E haapapuraa ïa te reira e e nehenehe iho â te hiˈoraa o Iesu e ta ˈna mau haapiiraa e taui i te huru o te taata no nia i te tautururaa i te feia i roto i te fifi.

3. To Iesu mana no te taui i te huru tia ore o te taata E farii tatou paatoa e e haa iho â te taata ma te miimii. O te hara ïa ia au i te Bibilia. Ua papai atoa te aposetolo Paulo: “Te ite nei au i te hoê ture, e ia hinaaro vau i te rave i te mea maitai ra, tei pihai iho te ino ia ˈu i reira.” Oia atoa: “Na vai ra vau e faaora i teie nei tino pohe? E haamaitai au i te Atua [maoti] Iesu Mesia.” (Roma 7:21-25) Te faaite ra Paulo i ǒ nei e nafea te Atua, maoti Iesu, e faaore ai i te mau hinaaro tia ore o te mau taata e haamori mau ra ia ˈna, oia atoa ïa te miimii, te tumu o te veve. E nafea oia?

I muri iti noa ˈˈe i to Iesu bapetizoraa, teie ta Ioane Bapetizo i parau no Iesu: “A hiˈo na i te Arenio a te Atua, o tei hopoi ê atu i te hara o te ao.” (Ioane 1:29) Ua fatata te fenua i te î i te taata tei tiamâ mai i te hara i tutuuhia mai, oia atoa te hinaaro miimii. (Isaia 11:9) Ua faaore ïa Iesu i te tumu o te veve.

A feruri na i te taime e fanaˈo ai te taata atoa i ta ratou e hinaaro mau ra, auê te oaoa e! Te parau ra te Bibilia: “E parahi . . . te taata atoa i raro aˈe i ta ˈna iho vine, e i raro aˈe i ta ˈna iho suke, e aore roa e taata e haamǎtaˈu mai ia ratou.” (Mika 4:4) Te faataa ra teie mau parau nehenehe mau i te taime e mauruuru ai te taatoaraa i ta ratou ohipa, e faaea hau noa ˈi e e oaoa roa ˈi i te ora i roto i te hoê ao aore e veve, ei arueraa ïa ia Iehova.