Ta te Parau a te Atua e haapii maira

Eaha te Basileia o te Atua?

I roto i teie tumu parau, e ite oe i te mau uiraa ta oe paha i uiui na e ihea e taio ai i te pahonoraa i roto i ta oe Bibilia. E oaoa te mau Ite no Iehova i te aparau no nia i teie mau pahonoraa e oe.

1. Eaha te Basileia o te Atua?

E faatereraa i nia i te raˈi te Basileia o te Atua. E mono te reira i te mau faatereraa atoa a faatupu atu ai i te hinaaro o te Atua i te raˈi e i nia i te fenua. O te Basileia o te Atua te ravea e mâha ˈi to tatou hinaaro o te hoê faatereraa maitai.—A taio i te Daniela 2:44; Mataio 6:9, 10.

Ua maiti Iehova i ta ˈNa Tamaiti Iesu ei Arii o to ˈNa Basileia.—A taio i te Luka 1:30-33.

2. No te aha o Iesu ai te Faatere maitai roa ˈˈe?

O te Tamaiti a te Atua te Arii maitai roa ˈˈe. No te aha? Mea mǎrû oia, te turu ra oia i te mea tia e e mana to ˈna no te tauturu i te taata. (Mataio 11:28-30) I muri aˈe i to ˈna faatia-faahou-raahia, ua haere Iesu i nia i te raˈi e ua parahi i te rima atau o Iehova. (Hebera 10:12, 13) I teie nei, ua horoa te Atua i te mana ia ˈna ra no te faatere mai nia mai i te raˈi.—A taio i te Daniela 7:13, 14.

3. O vai ma te faatere e o Iesu?

Ua maiti te Atua i te hoê pǔpǔ parauhia “te feia moˈa” no te faatere e o Iesu i nia i te raˈi. (Daniela 7:27) O te mau aposetolo taiva ore a Iesu tei maiti-matamua-hia ei feia moˈa. E te maiti noa ra Iehova i te mau tane e vahine taiva ore. Mai ia Iesu, e faahoˈihia ratou i te ora ei tino varua.—A taio i te Ioane 14:1-3; Korinetia 1, 15:42-45.

Ehia taata te haere i nia i te raˈi? Ua parau Iesu no ratou e e “nǎnǎ iti.” (Luka 12:32) I te pae hopea, 144 000 ratou paatoa. E faatere ratou i te fenua e o Iesu.—A taio i te Apokalupo 5:9, 10; 14:1.

  4. Inafea te Basileia o te Atua i te haamataraa i te faatere?

Ua riro Iesu ei Arii i 1914. a Ua huri mai o ˈna ia Satani e ta ˈna mau demoni i nia i te fenua nei. (Apokalupo 12:7-10, 12) Mai reira mai, ua rahi roa ˈtu â te ino i te fenua nei. Te faaite ra te tamaˈi, te aueueraa fenua, te oˈe, te maˈi e te ohipa ino e te ora nei tatou i te mau mahana hopea. (Timoteo 2, 3:1-5) E fanaˈo tatou i te mau haamaitairaa a te Basileia o te Atua ia haapii tatou e nafea ia riro ei pǐpǐ a te Arii ra o Iesu.—A taio i te Luka 21:7, 10, 11, 31, 34, 35.

5. Eaha ta te Basileia o te Atua e faatupu?

Maoti te hoê ohipa pororaa na te ao atoa nei, te tauturu ê na ra te Basileia o te Atua e mirioni taata ia haapii no nia i te Atua. (Mataio 24:14) E haamou te Basileia i te ao ino a Satani e e paruru râ i te hoê “nahoa rahi” taiva ore ta Iesu e faatere.—A taio i te Apokalupo 7:9, 10, 13-17.

E faariro te Basileia o te Atua i te fenua ei paradaiso i te roaraa e tausani matahiti. Ia oti, e faahoˈi Iesu i te Basileia i to ˈna Metua. (Korinetia 1, 15:24-26) E taata anei ta oe e nehenehe e paraparau atu no nia i te Basileia o te Atua?—A taio i te Salamo 37:10, 11, 29.

No te faahohonu atu â, a hiˈo i te pene 8 e 9 o teie buka, Eaha ta te Bibilia e haapii mau ra?, piahia e te mau Ite no Iehova.

[Nota i raro i te api]