Mea faufaa ore te oraraa, tera mau anei?

UA PAPAI te arii Solomona e e mahana rii faufaa ore te oraraa nei e pee noa mai te maru. Tera mau anei? (Koheleta 6:12) Te fafau ra te Bibilia, te hoê buka haamaramaramaraa papu, e e riro te oraraa ei mea faufaa mau a muri aˈe.—Timoteo 2, 3:16, 17.

Te faataa ra te Bibilia eaha te opuaraa a te Atua no te fenua i te omuaraa e no te aha i rahi ai te ohipa tano ore, te haavîraa, e te mauiui i te ao nei. Ia taa ia tatou te reira. No te aha? Aita te taata i ite aore ra aita e tâuˈa ra i te opuaraa a te Atua no te fenua e no te huitaata. No reira ratou i manaˈo ai e mea faufaa ore te oraraa.

Eaha te opuaraa a te Atua no te fenua?

Ua hamani te Atua ra o Iehova a i te fenua ei nohoraa paradaiso maitai roa no te taata. I reira te tane e te vahine e oaoa mau ai i te oraraa ma te tia roa e a muri noa ˈtu. Mea ê roa râ ta te taata e tiaturi ra, oia hoi ua hamani te Atua i te fenua ei vahi tamataraa i te taata no te ite e e tano anei ia ratou ia fanaˈo i te hoê oraraa maitai aˈe i roto i te ao varua. Aita râ te Bibilia e haapii ra i te reira.—A hiˈo i te tumu parau  “I roto i te ao varua anei tatou e oaoa mau ai?” i te api 6.

 Mea maitai roa te tane e te vahine i to te Atua poieteraa ia raua ia au i to ˈNa huru, a nehenehe atu ai e pee i to ˈNa mau huru maitatai. (Genese 1:26, 27) Aita raua i ere noa ˈˈe i te tahi mea no te ora ma te oaoa e a muri noa ˈtu. Ia faaî e ia haapao atoa raua i te fenua, o te riro mai ei paradaiso mai te ô i Edene.—Genese 1:28-31; 2:8, 9.

Mea nafea te ino i ô mai ai?

E fifi râ tei tupu. I teie mahana, aita te rahiraa o te taata e pee ra i to te Atua mau huru maitatai. E ere te fenua nei i te paradaiso. No te aha? Ua hinaaro Adamu raua Eva, to tatou na metua matamua, e riro mai te Atua. Oia hoi na raua iho e faaoti eaha te mea maitai e te mea ino no raua. Aita ïa raua i faaohipa maitai i to raua tiamâraa e maiti. Ua pee raua ia Satani te Diabolo orure hau.—Genese 3:1-6.

Aita te Atua i opua ia tupu te ino. I to Satani râ e to Adamu raua Eva i muri aˈe patoiraa i te faatereraa a te Atua i ô mai ai te ino. Ua ere atura to tatou na metua matamua i te paradaiso e te oraraa maitai roa. Ua hopoi mai raua i te hara e te pohe i to raua huaai, te huitaata nei. (Genese 3:17-19; Roma 5:12) No teie mau tupuraa i manaˈo ai te taata e mea faufaa ore te oraraa.

No te aha te Atua i ore ai i faaore i te ino?

E na ô paha vetahi, ‘Ahani te Atua i haamou ia Satani e ia Adamu raua Eva, e ore ïa te ino.’ A feruri na. Ia patoi te hoê taata i te hoê faatereraa mana, eaha to oe huru ia faaroo oe e ua haapohe-oioi-hia o ˈna? E au anei oe i te hoê faatereraa mai tera? Eita paha ïa.

Aita te Atua i haamou i reira iho i na orure hau. Ua vaiiho râ i te taime ia afaro roa te fifi i tupu i te ô i Edene, oia hoi ua faahapahia ta ˈna huru faatereraa.

E faaore roa te Atua i te ino

A haamanaˈo e eita te Atua e vaiiho noa i te ino. Ia haapapuhia te tia-mau-raa o ta ˈna huru faatereraa tei faahapahia, e haamou ai te Atua i te ino e te mauiui atoa.

E tupu iho â ta te Atua opuaraa no te fenua e no te huitaata. Mai ta ˈna i parau ia Isaia peropheta, na ˈNa i hamani i te fenua ia taatahia eiaha râ ia vai-taata-ore-noa-hia. (Isaia 45:18) E fatata roa oia i te faariro i te fenua ei paradaiso mai i te haamataraa. Ia haapapu-roa-hia te tia-mau-raa o ta ˈna faatereraa e faaohipa ˈi oia i to ˈna puai rahi no te faatupu i to ˈna hinaaro e no te faaore roa i te ino. (Isaia 55:10, 11) Ta Iesu Mesia ïa i ani i te Atua i roto i ta ˈna pure tuiroo: “Ia haapaohia to oe hinaaro i te fenua nei mai tei te raˈi atoa na.” (Luka 11:2) Eaha ïa te auraa?

Te hinaaro o te Atua no te fenua

E parahi te feia mǎrû i te fenua. (Salamo 37:9-11, 29; Maseli 2: 21, 22) E faaora Iesu Mesia i te feia veve e tiaoro ra e tei ati ra i te faaheporaa e te haavîraa uˈana. (Salamo  72:12-14) E ore te tamaˈi, te pohe, te oto e te mauiui. (Salamo 46:9; Apokalupo 21:1-4) E hoˈi mai e rave rahi taata tei pohe i te ora i te fenua nei. E nehenehe ratou e fanaˈo i teie mau haamaitairaa e te tahi atu.—Ioane 5:28, 29.

E faaore iho â Iehova i te ino i tupu no ta Satani orureraa hau, a moe roa ˈtu ai te oto e te mauiui atoa. (Isaia 65:16-19) Mea papu te reira, eita hoi te Atua e haavare. E tupu iho â ta ˈna atoa i fafau. E ere faahou te oraraa i te mea faufaa ore, mai te amuraa i te mataˈi. (Koheleta 2:17) Mea oaoa mau râ.

I teie nei â, e faufaahia to oe oraraa ia ite oe eaha ta te Bibilia e haapii ra e eaha te opuaraa a te Atua no te fenua. Na to muri iho tumu parau e faataa mai.

[Nota i raro i te api]

[Tumu parau tarenihia i te api 6]

 I roto i te ao varua anei tatou e oaoa mau ai?

Mea maoro to te taata, tei ore i ite i te opuaraa a te Atua no te fenua, haapiiraa e i roto i te ao varua tatou e oaoa mau ai.

Ua manaˈo vetahi e i fanaˈo na te hoê mea pohe ore o te taata i te hoê oraraa maitai roa hou a ô atu ai i roto i te tino o te hoê taata. (New Dictionary of Theology) No te tahi atu, ua tapeahia teie mea pohe ore i roto i te tino taata no te ino ta ˈna i rave i nia i te raˈi.—Cyclopedia of Biblical, Theological, and Ecclesiastical Literature.

I haapii na Socrate e Platon na philosopho Heleni: Ia faarue teie mea pohe ore i te tino o te hoê taata, eita te reira e overe faahou mai te maamaa e ma te riaria e e mou to ˈna mau hinaaro tia ore e mauiui atoa no te ora i pihai iho i te mau atua e a tau a hiti noa ˈtu.—Plato’s Phaedo, 81, A.

Ua faaô atoa mai te mau aratai faahua Kerisetiano i roto i ta ratou haapiiraa i te manaˈo philosopho Heleni e e mea pohe ore to te taata.—Christianity—A Global History.

A faaau i teie mau manaˈo e na parau mau faufaa e toru o te Bibilia:

1. Te opuaraa a te Atua no te fenua, ei nohoraa ïa no te huitaata e a muri noa ˈtu, eiaha râ ei vahi tamataraa no te ite o vai te ora i pihai iho ia ˈna i te raˈi. Ahani Adamu raua Eva i faaroo i te mau ture a te Atua, te ora noa ra ïa raua i roto i te paradaiso i te fenua.—Genese 1:27, 28; Salamo 115:16.

2. Te haapii ra te rahiraa o te mau haapaoraa e mea pohe ore to roto i te taata. Aita roa te Bibilia e haapii ra i te reira, te parau ra râ e e nehenehe te taata e taparahihia aore ra e haamouhia. (Salamo 146:4; Koheleta 9:5, 10) Ua pohe mau â Adamu te taata matamua, e ua hoˈi oia i te repo fenua e mou roa aˈera.—Genese 2:17; 3:19.

3. Ua fafau te Atua i te tia-faahou-raa no te feia pohe ia ora ratou i roto i te paradaiso i te fenua. Tera te tiaturiraa no a muri aˈe, eiaha râ ia haere te hoê mea pohe ore o te taata i roto i te ao varua.—Daniela 12:13; Ioane 11:24-26; Ohipa 24:15.