E horo anaˈe ma te faaoromai tamau
E horo anaˈe ma te faaoromai tamau
“A horo tamau maite . . . i teie nei hororaa i mua ia tatou nei.”—HEB. 12:1.
1, 2. Ua faaau te aposetolo Paulo i te oraraa Kerisetiano i te aha?
I TE mau matahiti atoa, e tupu te hororaa atea i te fenua e rave rahi. Hoê noa fa ta te mau aito, ia noaa te re. Ta te tahi atu râ, o te faaotiraa ïa i te hororaa.
2 Te faaau ra te Bibilia i te oraraa Kerisetiano i te hoê hororaa. Ta te aposetolo Paulo ïa i faataa i roto i ta ˈna rata matamua i to ˈna mau taeae i Korinetia i tahito. Ua papai oia: “Aita outou i ite e, o te feia horo i te hororaa e horo paatoa ïa, hoê roa râ e rave i te berabeio [aore ra re]? E faaau i to outou hororaa ia noaa te berabeio.”—Kor. 1, 9:24.
3. No te aha Paulo i parau ai e hoê noa taata horo te re?
3 Aita Paulo e parau ra e hoê anaˈe Kerisetiano te noaa te re o te ora mure ore. Ua ite te mau Kerisetiano no Korinetia e o te feia horo atoa te titau i te re, noa ˈtu e hoê noa te upootia. No reira te feia horo e faaineine maitai ai e e tutava roa ˈi. Tera atoa to Paulo hinaaro, ia tutava to ˈna mau taeae i te faaoti i ta ratou hororaa. Te mau Kerisetiano atoa e na reira, e noaa ïa te re o te ora mure ore.
4. Ia ite tatou i te aha no nia i te hororaa a te mau Kerisetiano?
4 E parau faaitoito teie no tatou, o te haaferuri atoa râ no nia i to tatou huru oraraa i teie mahana. No te aha? E tiaturiraa faahiahia mau to tatou e ora i nia i te raˈi aore ra i roto i te paradaiso i te fenua. E hororaa atea ta tatou e te atâta. E nehenehe vetahi e faaiti aore ra e faaea roa i te tavini ia Iehova. (Mat. 7:13, 14) Ua na reira hoi te tahi mau Kerisetiano. Eaha te tahi mau marei e fifi atâta i roto i te hororaa no te ora? E noa ˈtu te reira, e nafea ia faaoti i ta oe hororaa a noaa ˈtu ai te re?
A faaoromai tamau e noaa ˈi te re
5. Eaha ta Paulo i faataa i roto i te Hebera 12:1?
5 I roto i ta ˈna rata i te mau Kerisetiano Hebera i Ierusalema e i Iudea, ua faahiti â Paulo i te feia horo. (A taio i te Hebera 12:1.) Ua faataa oia no te aha e tamau ai i ta ratou hororaa e ia aha ratou e noaa ˈi te re. Na mua, e hiˈo mai tatou no te aha Paulo i papai ai i teie rata e ta ˈna i faaitoito ia ratou ia rave. I muri iho, te mau haapiiraa e huti mai.
6. Ua aha te mau aratai haapaoraa i te mau Kerisetiano?
6 Te faaruru ra te mau Kerisetiano o te senekele matamua, to Ierusalema e to Iudea iho â râ, i te fifi e rave rahi. Te faahepo ra te mau aratai haapaoraa ati Iuda i te taata ia faaroo ia ratou. E 30 matahiti na mua ˈtu, i turai na ratou i te taata ia faahapa ia Iesu Mesia ei orure hau a haapohe atu ai ia ˈna ei taata ohipa ino. Aita ratou i faaea. I roto i te buka Ohipa, e ite tatou i tei tupu i muri aˈe i te Penetekose 33. Ua hamani ino ratou i te mau Kerisetiano e rave rahi taime ia faaea ratou i te poro. Mea fifi mau â ïa no te mau Kerisetiano taiva ore.—Ohi. 4:1-3; 5:17, 18; 6:8-12; 7:59; 8:1, 3.
7. I ora na te mau Kerisetiano ta Paulo i papai i teihea tau fifi?
7 I ora atoa na teie mau Kerisetiano hou Ierusalema e te nunaa ati Iuda taiva i haamouhia ˈi. I faaite atoa na Iesu i ta ˈna mau pǐpǐ eaha te tupu hou te reira, a horoa ˈtu ai i te mau faaueraa papu maitai eaha te rave e ora ˈi ratou. (A taio i te Luka 21:20-22.) Teie ta Iesu faaararaa: “E ara . . . ia outou, o te teimaha outou i te rahi o te maa e te taero, e te peapea o teie nei ao, a roohia mai ai outou e taua mahana ra aore i manaˈohia.”—Luka 21:34.
8. No te aha paha vetahi Kerisetiano i faaiti aore ra i faaea roa ˈi i te tavini ia Iehova?
8 Ua papai Paulo i ta ˈna rata i te mau Hebera fatata e 30 matahiti i muri aˈe i to Iesu horoaraa i teie faaararaa. Ua aha ratou i tera roaraa? No te mau faateimaharaa e haapeapearaa o te mau mahana atoa, ua faaea vetahi i te haapii no nia ia Iehova. Aita ˈtura to ratou e taairaa piri faahou e te Atua. (Heb. 5:12-14) Ua manaˈo paha te tahi atu e mea ohie aˈe ia ora mai te rahiraa o te mau ati Iuda e tiaturi noa ra hoi i te Atua e e auraro noa ra i ta ˈna Ture. Te faahepo ra vetahi o te amuiraa i te tahi atu ia pee i te Ture a Mose e te mau tutuu. Eaha ta Paulo i parau no te faaitoito i to ˈna mau taeae ia vai ara noa e ia faaoromai tamau i roto i te hororaa?
9, 10. (a) Eaha ta Paulo faaitoitoraa i te hopea o te Hebera pene 10? (b) No te aha Paulo i faatia ˈi i te mau ohipa ta te mau ite i tahito i rave no to ratou faaroo?
9 Ua aratai Iehova ia Paulo ia papai i teie rata no te faaitoito i te mau Hebera. I te pene 10, ua faataa Paulo e “e ata” te Ture “no te mau mea maitatai a muri atu” e ua faaite papu i te faufaaraa o te tusia taraehara o te Mesia. I te hopea o taua pene ra, teie ta Paulo faaitoitoraa: “Ia faaoromai tamau outou e tia ˈi, ua oti anaˈe ia outou te haapao i to te Atua ra hinaaro, ia noaa ia outou te utua i parauhia maira. E vahi iti poto roa te toe, e tae mai ai tei ta[e] mai, e ore roa e faaroaroa.”—Heb. 10:1, 36, 37.
10 I te pene 11, ua faataa maitai Paulo eaha te faaroo mau i te Atua e ua faahiti atura i te tahi mau tane e vahine i tahito tei faaite i taua huru ra. No te aha oia i taui ai i te tumu parau? Ua ite oia e maoti te faaroo mau e noaa ˈi i to ˈna mau taeae te itoito e te faaoromai tamau. E tauturu te hiˈoraa maitai o taua mau tavini taiva ore i tahito ra ia ratou ia faaruru i te fifi. I muri aˈe i to ˈna faatiaraa i te mau ohipa ta taua mau tavini ra i rave no to ratou faaroo, ua na ô oia: “Ua haaatihia tatou e taua nahoa rahi i ite nei, e haapae tatou i te mau mea teimaha atoa, e te ino e hara ˈi tatou nei, a horo tamau maite ai i teie nei hororaa i mua ia tatou nei.”—Heb. 12:1.
Te hoê ‘nahoa rahi ite’
11. Ma te feruri maite i te hiˈoraa o te ‘nahoa rahi ite’ e aha ˈi tatou?
11 E ere te ‘nahoa rahi ite’ i te feia mataitai noa i te hororaa no te hiˈo o vai te re. I horo atoa na ratou. Ua oti râ ta ratou hororaa e ua re ratou. E faaitoito to ratou hiˈoraa ia vetahi ê ia horo tamau maite. A feruri na e to roto tatou i te hoê hororaa e te mataitai ra te mau aito ia tatou a faaitoito mai ai ia tamau i te horo, e tutava iho â ïa tatou i te faaoti i te hororaa. Ia feruri maite ïa te mau Kerisetiano Hebera e tatou atoa i te hiˈoraa o te mau tavini a Iehova i tahito. Maoti te reira e itoito ai ratou e tatou atoa no te “horo tamau maite” noa ˈtu te fifi ia noaa te re.
12. Eaha ta te mau hiˈoraa ta Paulo i faahiti e haapii maira?
12 Hoê â huru tupuraa to tatou e to te tavini taiva ore e rave rahi ta Paulo i faahiti. Ei hiˈoraa, i ora na o Noa hou Iehova i diluvi ai i te ao i taua tau ra. Te ora atoa ra tatou i te hoê tau ua fatata Iehova i te haamou i te ao a Satani. Ua ani Iehova ia Aberahama raua Sara ia faarue i to raua fenua ma te fafau atu i te faariro ia raua ei nunaa o te haamori ia ˈna. Ua tiai raua i te tupuraa o te reira. Te ani atoa ra Iehova ia tatou i te tahi mau haapaeraa no te tavini ia ˈna. E farii e e haamaitai mai ïa oia. No te haere i te Fenua tǎpǔhia, ua na roto atu Mose i te medebara atâta. E na roto atoa ˈtu tatou i teie nei ao ino e tae atu ai i te ao apî fafauhia. Mea faufaa ïa ia hiˈopoa i te oraraa o teie mau tavini, ta ratou i rave a mauruuru ai te Atua e ta ratou atoa i rave a riri ai oia.—Roma 15:4; Kor. 1, 10:11.
Eaha tei tauturu ia ratou ia faaoti i te hororaa?
13. E ere i te mea ohie no Noa ia aha? Maoti te aha i rave ai oia mai ta Iehova i faaue?
13 Maoti te aha i faaoromai tamau ai teie mau tavini a Iehova, a faaoti atu ai i ta ratou hororaa? A hiˈo i ta Paulo i papai no nia ia Noa. (A taio i te Hebera 11:7.) Aita Noa i ite aˈenei i te hoê diluvi o te haapohe i te mau taata e animara atoa. (Gen. 6:17) No to ˈna râ faaroo, ua ite oia e e tupu iho â ta Iehova parau. Aita oia i manaˈo e mea fifi roa ia pee i ta ˈNa faaueraa. Hamani i te pahi, haaputuputu i te animara, haapue i te maa na ratou e na te animara, faaara i te taata no nia i te diluvi e tauturu i to ˈna utuafare ia puai to ratou faaroo ia Iehova, e ere ïa i te ohipa nainai. Ua “rave maite” râ oia mai ta te Atua i faaue ma te faaroo e te faaoromai tamau. (Gen. 6:22) Ua faaora e ua haamaitai Iehova ia ˈna e to ˈna utuafare.
14. I roto i teihea tupuraa i faaite ai Aberahama raua Sara i to raua faaroo i te Atua? Eaha te haapiiraa?
14 Ua faahiti atura Paulo ia Aberahama raua Sara i roto i te ‘nahoa ite e haaati ra ia tatou.’ Ua taui to raua oraraa i to te Atua faaueraa ia raua e faarue i to raua nohoraa i Ura. Aita raua i ite eaha to raua ananahi. E faaroo puai râ to raua ia Iehova e ua auraro atu noa ˈtu te fifi. No ta ˈna mau haapaeraa i rave no Iehova i parau ai te Bibilia ia Aberahama te ‘metua no tei faaroo atoa.’ (Roma 4:11) Ua ite maitai te mau Kerisetiano Hebera i to Aberahama oraraa e to to ˈna utuafare ma te faaroo, no reira Paulo i faahiti ai vetahi noa o ta ratou mau ohipa. E haapiiraa puai râ ta ˈna i horoa: “I pohe anaˈe atura taua feia ra [mai ia Aberahama e to ˈna utuafare] ma te faaroo, aita i noaa tei parauhia maira, ua hiˈo râ ratou i taua mau mea ra i te atea ê, e ua faaroo papu e ua farii maite, e ua faˈi hua e, e taata ěê ratou e te purutia i teie nei ao.” (Heb. 11:13) E tauturu ïa to ratou faaroo i te Atua e to ratou taairaa e o ˈna i te mau Kerisetiano Hebera ia horo ma te faaoromai tamau.
15. No te aha Mose i ora ˈi i rotopu i te nunaa o te Atua e haamauiuihia ra?
15 O Mose te tahi atu tavini a Iehova i roto i te ‘nahoa ite.’ Ua haapae oia i te hoê oraraa fanaˈo e te hanahana no te ora i rotopu i te nunaa o te Atua e haamauiuihia ra. No te aha? Ua pahono Paulo e ua ‘haapao maite oia i te utua ei hoo. Itoito maite atura oia i te hiˈoraa ˈtu i te Atua, i tei ore e itea ia hiˈo.’ (A taio i te Hebera 11:24-27.) Aita Mose i hema i te navenave poto noa o te hara. Ua ite oia e te vai mau ra te Atua e e tupu iho â ta ˈna mau parau fafau. No reira oia i itoito e i faaoromai roa ˈi, a tutava maite atu ai i te aratai ia Iseraela i rapaeau ia Aiphiti i te Fenua tǎpǔhia.
16. Eaha te faaite ra e aita Mose i inoino i te oreraa e tomo i te Fenua tǎpǔhia?
16 Mai ia Aberahama, aita atoa Mose i ite i te tupuraa o ta te Atua i fafau. I mârô na Iseraela ia Mose raua Aarona e no to raua riri ‘i hara ˈi raua i te Atua i roto i te tamarii a Iseraela i te pape i Meriba.’ Hou Iseraela i tomo ai i te Fenua tǎpǔhia i parau ai te Atua ia Mose: “E ite ra oe i taua fenua nei i mua ia oe ra, eita râ oe e tae i nia iho i taua fenua ra, ta ˈu e horoa nei na te tamarii a Iseraela.” (Deut. 32:51, 52) Ua inoino anei Mose? Aita. Ua ani oia ia Iehova ia haamaitai i te nunaa i te na ôraa: “E ao to oe, e Iseraela e! o vai tei au ia oe ra? e feia i faaorahia e Iehova! o to oe ïa turu e te paruru, e te ˈoˈe maitai roa no oe ra!”—Deut. 33:29.
Te tahi mau haapiiraa no tatou
17, 18. (a) Eaha ta tatou i haapii mai i te oraraa o te ‘nahoa rahi ite’? (b) Eaha ta tatou e hiˈopoa mai i roto i to muri nei tumu parau?
17 Ua haapii mai tatou no nia i te oraraa o te tahi o teie ‘nahoa rahi ite e haaati ra ia tatou.’ Mea titauhia ïa te faaroo rahi i te Atua e i ta ˈna i fafau no te faaoti i ta tatou hororaa. (Heb. 11:6) Ia itehia teie faaroo i roto i to tatou oraraa. Ua papu ia tatou e e oraraa maitai roa a muri aˈe ta Iehova i fafau e te vai mau ra “te Atua, i tei ore e itea ia hiˈo.” E faaoti anaˈe ïa i ta tatou hororaa ma te faaoromai tamau.—Kor. 2, 5:7.
18 E ere te hororaa Kerisetiano i te mea ohie. E nehenehe râ e faaoti i ta tatou hororaa. Eaha ˈtu â te tauturu mai? E pahono mai to muri nei tumu parau.
E nehenehe anei outou e faataa?
• No te aha Paulo i papai ai no nia i te mau ohipa ta te mau ite i tahito i rave no to ratou faaroo?
• E nafea te hiˈoraa o te ‘nahoa rahi ite e haaati ra ia tatou’ e faaitoito mai ai ia horo ma te faaoromai tamau?
• Eaha ta te hiˈoraa o Noa, Aberahama raua Sara e o Mose e haapii maira?
[Uiraa haapiiraa]
[Hohoˈa i te api 22]
Ua ineine Aberahama raua Sara i te faarue i to raua oraraa fanaˈo i Ura
