A tiaturi ia Iehova “te Atua no ˈna anaˈe te mahanahana”
A tiaturi ia Iehova “te Atua no ˈna anaˈe te mahanahana”
“Ia haamaitaihia te Atua, te Metua o to tatou Fatu ra o Iesu Mesia, te tumu o te aroha e o te Atua no ˈna anaˈe te mahanahana.”—KOR. 2, 1:3.
1. E hinaaro tatou paatoa i te aha?
MAI to tatou fanauraahia mai e hinaaro ai tatou i te tamahanahanaraa. E taˈi te hoê aiû no to ˈna paha hinaaro ia amoamohia oia aore ra no te poia. Ia ruhiruhia atoa tatou e ia fifi iho â râ, e hinaaro noa tatou ia tamahanahanahia mai.
2. Eaha ta Iehova e haapapu ra i te feia e tiaturi ra ia ˈna?
2 E nehenehe to tatou fetii e hoa e tamahanahana mai, eiaha râ i roto i te mau tupuraa mauiui atoa. O Iehova anaˈe te tamahanahana mai noa ˈtu eaha to tatou fifi. Te haapapu maira ta ˈna Parau: “Te fatata maira Iehova i te feia e tiaoro atu ia ˈna . . . E faaroo mai oia i ta ratou tiaoro.” (Sal. 145:18, 19) Te na ô atoa ra te Salamo 34:15 e “tei te feia parau-tia ra to Iehova mata; e tei ta ratou pure to ˈna tariˈa.” No te fanaˈo râ i ta te Atua tauturu e tamahanahanaraa, ia tiaturi ïa tatou ia ˈna. Ta Davida ïa i haapapu ma te parau: “E haapuraa hoi Iehova no te feia i hamani-ino-hia; e haapuraa i te anotau ahoaho ra. Te feia i ite i to oe ra iˈoa, e tiaturi ïa ia oe; o tei imi hoi ia oe ra, e Iehova, o tei ore roa ïa e faaruehia e oe.”—Sal. 9:9, 10.
3. Mea nafea to Iesu faataaraa e mea here roa na Iehova ia tatou?
3 Mea here roa na Iehova i te feia e haamori ra ia ˈna. Ua parau Iesu: “E ere anei taipae manu rii i hoohia i na asario e piti nei? e aita te hoê i taua na manu ra i moe i te Atua. E ua hope atoa te rouru o to outou mau upoo na i te taiohia. Eiaha hoi outou e mǎtaˈu; e rahi to outou maitai i to te manu.” (Luka 12:6, 7) I roto i te Ieremia 31:3, ua parau Iehova ia Iseraela: “Ua herehia oe e au i te hereraa mure ore ra; i faatae mai ai au ia oe i te aroha hamani maitai.”
4. No te aha e tiaturi ai i te mau parau fafau a Iehova?
4 Ma te tiaturi ia Iehova e i ta ˈna mau parau fafau, e tamahanahanahia tatou i te mau taime fifi. Ia tiaturi iho â tatou i te Atua mai ia Iosua tei parau: “Aore roa te hoê o te mau mea maitatai ta to outou Atua ta Iehova i parau mai ia outou ra i ore i te tia; ua hope roa i te tupu ia outou, aore roa te hoê i toe.” (Ios. 23:14) E noa ˈtu e te mauiui ra tatou no te mau tupuraa fifi, eita roa ˈtu te Atua e faarue i ta ˈna mau tavini taiva ore, ‘e parau mau hoi ta ˈna.’—A taio i te Korinetia 1, 10:13.
5. No te aha e nehenehe ai e tamahanahana ia vetahi ê?
5 Te faahiti ra te aposetolo Paulo ia Iehova “te Atua no ˈna anaˈe te mahanahana.” Te auraa e tamahanahana, e tamǎrû ïa i te hoê taata e mauiui ra aore ra e oto ra ma te faaiti mai i to ˈna peapea, a topa ˈtu ai to ˈna hau. O ta Iehova ïa e rave. (A taio i te Korinetia 2, 1:3, 4.) Aita hoê aˈe mea e haafifi i to tatou Metua i te raˈi ia tamahanahana i te feia e here ra ia ˈna. I te mea ua tamahanahana oia ia tatou, e nehenehe atoa ïa tatou e na reira i to tatou mau taeae i roto i te ati. O Iehova anaˈe te tamahanahana roa i te feia e hepohepo ra!
Tupuraa mauiui
6. Eaha te tahi mau tupuraa mauiui?
6 E hinaaro tatou i te tamahanahanaraa i roto e rave rahi tupuraa o te oraraa. Ia pohe tei herehia, te hoê hoa faaipoipo aore ra tamarii iho â râ, mea mauiui roa. Oia atoa ia hiˈo-ino-hia te tahi atu, ia maˈihia, ia ruhiruhia, ia vevehia, ia fifi te faaipoiporaa, aore ra no te mau mea iino e tupu ra i te ao nei.
7. (a) I te mau taime ahoaho, e hinaaro tatou i te aha? (b) E nafea Iehova e rapaau ai i te aau ‘paruparu e te oto’?
7 I te mau taime ahoaho, e hinaaro tatou i te tamahanahanaraa o te tamǎrû i to tatou aau, feruriraa, horuhoru, tino e o te haapuai i to tatou faaroo. Te parau ra te Salamo 51:17 e e nehenehe to tatou aau ‘e paruparu e e oto.’ E tauturu mai iho â Iehova, e ‘rapaau hoi oia i te feia aau paruparu e e taamu i to ratou mau puta.’ (Sal. 147:3) I roto atoa i te mau tupuraa fifi roa, e tamǎrû Iehova i to tatou aau oto ia pure tatou ia ˈna ma te faaroo e ia haapao tatou i ta ˈna mau faaueraa.—A taio i te Ioane 1, 3:19-22; 5:14, 15.
8. E nafea Iehova e tauturu mai ai ia ahoaho tatou?
8 No te mau fifi rau ta tatou e farerei ra, e hinaaro tatou ia tamǎrûhia to tatou feruriraa. Eita râ e maraa ia faaruru i teie mau tamataraa i to tatou faaroo maoti noa to tatou puai. Ua parau te papai salamo: “I rotopu i to ˈu nei manaˈo tapitapi i roto ia ˈu nei, na to haamahanahana e faaoaoa mai.” (Sal. 94:19) Ua papai atoa Paulo i roto i te Philipi 4:6, 7: “Eiaha outou e ahoaho noa ˈtu i te mau mea atoa nei; e faaite hua râ i to outou hinaaro i te mau mea atoa nei i te Atua, i te pure, i te aniraa ˈtu ma te haamaitai. E na te hau a te Atua, o tei hau ê atu i te ite taata nei, e faaitoito mai i to outou aau, e to outou manaˈo i te Mesia nei ia Iesu.” Ia ahoaho tatou, e taio anaˈe i te Bibilia, a feruriruri atu ai. E tamahanahanaraa rahi te reira.—Tim. 2, 3:15-17.
9. Na te aha e tamǎrû i to tatou horuhoru?
9 I te tahi taime, e horuhoru tatou no te toaruaru rahi. E manaˈo paha tatou e eita e maraa ia tatou te tahi hopoia i roto i te amuiraa. E tamahanahana e e tauturu mai Iehova. A hiˈo na i to te Atua faaueraa ia Iosua e aratai ia Iseraela ia aro i te mau nunaa enemi puai. Ua parau Mose ia Iosua: “Ia etaeta, e faaitoito; o oe hoi te aratai i teie nei feia i te fenua ta Iehova i tǎpǔ mai i to ratou ra hui metua e e horoa mai oia no ratou; e na oe ratou e faanoho i reira. O Iehova iho hoi te na mua ia oe, e ei pihai-atoa-iho oia ia oe; e ore oia e faarue ia oe, e ore e taiva ia oe.” (Deut. 31:7, 8) Maoti te turu a Iehova i tia ˈi ia Iosua ia aratai i te nunaa o te Atua i te Fenua tǎpǔhia e ia upootia i nia i to ratou mau enemi atoa. O Mose atoa ta Iehova i tauturu na i te miti Uteute.—Exo. 14:13, 14, 29-31.
10. Eaha te tauturu mai ia haafifi te mau tupuraa hepohepo i to tatou tino?
10 E nehenehe te mau tupuraa hepohepo e haafifi i to tatou tino. Ia tamaa iho â tatou ma te au, ia haamâha i te rohirohi, ia faaetaeta i te tino, e ia mâ noa to tatou tino e to tatou fare, e maitai ïa tatou. Oia atoa ia feruri tatou i ta te Bibilia e faataa ra no nia i te tau no a muri aˈe. No reira, ia û tatou i te fifi, e haamanaˈo anaˈe i ta Paulo atoa i faaruru e i ta ˈna parau faaitoito: “Ua ati matou i te pohe, aita râ i apǐapǐ; ua peapea matou, aita râ i ahoaho: ua hamani-ino-hia, aita râ i faarue-roa-hia: ua hurihia i raro, aita râ i pohe roa.”—Kor. 2, 4:8, 9.
11. Eaha te rave ia paruparu to tatou faaroo?
11 E nehenehe to tatou faaroo e paruparu no te tahi mau tamataraa. E tauturu mai â Iehova. Te haapapu maira te Salamo 145:14 e “te mau ra Iehova i te feia e hiˈa ra, e ua faatia i te feia e piˈo i raro.” Ia ite tatou e te paruparu ra to tatou faaroo, e ani anaˈe i te tauturu a te mau matahiapo. (Iak. 5:14, 15) E haamanaˈo atoa anaˈe i te tiaturiraa Bibilia o te ora mure ore, o te faaitoito mai ia tamatahia to tatou faaroo.—Ioa. 17:3.
Tavini ta te Atua i tamahanahana
12. Mea nafea to Iehova tamahanahanaraa ia Aberahama?
12 Ua na ô te hoê papai salamo ia Iehova: “A haamanao à oe i to parau i to tavini nei. Te parau ta oe i faariro ei tiaturi raa noˈu; O toˈu teie tamahanahana i roto i toˈu nei faahaehaaraa hia, Na ta oe na poroi i faaoraora mai iaˈu.” (Sal. 118:49, 50, Te Bibilia Moˈa V.C.J.S., 1976) I teie mahana, te vai ra te Bibilia, te Parau papaihia a Iehova, o te faaite ra mea nafea to ˈna tamahanahanaraa i ta ˈna mau tavini. A hiˈo na ia Aberahama tei haapeapea roa i to ˈna faarooraa e e haamou Iehova ia Sodoma e ia Gomora. Ua ui oia i te Atua: “E haamou atoa anei oe i te feia parau-tia, e te paieti ore?” Ua tamahanahana Iehova ia ˈna ma te haapapu atu e ia itehia mai e 50 taata parau-tia, eita Oia e haamou ia Sodoma. Ua parau faahou râ Aberahama peneiaˈe e 45 te itehia, e 40, 30, 20, 10. Aita Iehova i riri, ua fafau râ e ia 10 noa ˈtu taata parau-tia to reira, eita Sodoma e mou. Aita i raea taua numera ra, ua faaora râ Iehova ia Lota e ta ˈna na tamahine.—Gen. 18:22-32; 19:15, 16, 26.
13. Mea nafea to Hana faaiteraa i to ˈna tiaturi ia Iehova?
13 Ua oto roa Hana, te vahine a Elikana, no to ˈna hinaaro rahi i te tamarii eita râ e noaa. Ua pure oia ia Iehova e ua na ô atu Elia tahuˈa rahi: “Ia faatia mai hoi te Atua no Iseraela i ta oe i ani atu ia ˈna.” Mahanahana aˈera to Hana aau, aita ˈtura oia i oto faahou. (Sam. 1, 1:8, 17, 18) Ua tiaturi oia ia Iehova, ma te vaiiho i to ˈna fifi i roto i to ˈNa rima. Aita oia i ite eaha te tupu, ua topa râ to ˈna hau. I muri aˈe, ua pahono Iehova i ta ˈna pure. Ua hapû Hana e ua fanau mai i te hoê tamaroa, ta ˈna i mairi i te iˈoa o Samuela.—Sam. 1, 1:20.
14. No te aha Davida i hinaaro ai i te tamahanahanaraa? Ua ani oia ia vai?
14 Ua tamahanahana atoa te Atua i te arii Davida. I to ˈna maitiraa ia ˈna ei arii no Iseraela, ua ite Iehova o te ‘hiˈo i te aau’ e e hinaaro iho â oia e rave i te mea tia e mea au roa na ˈna te haamoriraa mau. (Sam. 1, 16:7; Sam. 2, 5:10) I muri aˈe râ, ua faaturi oia ia Bate-seba e ua huna i ta ˈna hara ma te haapohe i ta ˈna tane. I to ˈna taaraa e e hara rahi ta ˈna i rave, ua pure oia ia Iehova: “No te rahi o to oe ra hamani maitai: e parai oe i ta ˈu nei mau hara. E horoi hua mai oe ia ˈu i to ˈu nei ino, tamâ hua mai ia ˈu i ta ˈu nei hara. Te faˈi nei hoi au i ta ˈu nei hara, e te vai noa nei â to ˈu ino i pihai iho ia ˈu.” (Sal. 51:1-3) Ua tatarahapa mau â Davida e ua faaore Iehova i ta ˈna hara. Ua faaruru râ te arii i te faahopearaa o ta ˈna i rave. (Sam. 2, 12:9-12) Ua tamahanahana râ to Iehova aroha hamani maitai ia ˈna.
15. Hou rii to Iesu poheraa, mea nafea to Iehova tautururaa ia ˈna?
15 I te fenua, ua farerei Iesu e rave rahi tupuraa fifi. Ua faatia te Atua i teie mau tamataraa i to ˈna faaroo e ua tapea Iesu i to ˈna taiva ore ei taata tia roa tei tiaturi noa ia Iehova e tei turu i to ˈNa mana arii. Hou rii oia a hoohia ˈi e a haapohehia ˈi, ua pure oia ia Iehova: “Ia tupu . . . to oe hinaaro eiaha to ˈu.” Ua fa maira te hoê melahi tei faaitoito ia ˈna. (Luka 22:42, 43) Ua tamahanahana, ua faaitoito e ua tauturu te Atua ia Iesu.
16. I mua i te pohe no to tatou faaroo, e nehenehe Iehova e aha mai?
16 I mua atoa i te pohe no to tatou faaroo, e nehenehe Iehova e tauturu mai ia tapea i to tatou taiva ore ia ˈna. E na reira iho â oia. E tamahanahanaraa atoa te tiaturiraa o te tia-faahou-raa. Te tiai ru nei tatou i te mahana e mou ai te enemi hopea, oia hoi te pohe. (Kor. 1, 15:26) Eita roa Iehova e haamoe i ta ˈna mau tavini taiva ore, e te tahi atu, tei pohe. E faahoˈi mai oia ia ratou i te ora. (Ioa. 5:28, 29; Ohi. 24:15) Ia tiaturi tatou i te tia-faahou-raa ta Iehova i fafau, e tamahanahanahia tatou a ore atu ai e aueue i te tau hamani-ino-raa.
17. E nafea Iehova e tamahanahana mai ai ia pohe tei herehia?
17 Mea mahanahana mau â ia ite e e faahoˈihia mai to tatou mau taata here tei pohe i te ora i roto i te hoê ao apî faahiahia! Aita e mauiui faahou. Ia mou teie nei ao ino, e ora ˈtu te “feia rahi roa,” te mau tavini a Iehova. Na ratou e manava e e haapii i te feia e faatiahia mai i te fenua nei. Auê ïa ratou i te fanaˈo e!—Apo. 7:9, 10.
E pare te Atua mai tahito mai â
18, 19. Mea nafea Iehova i te tamahanahanaraa i ta ˈna mau tavini e hamani-ino-hia ra?
18 I roto i te hoê himene faaitoito e te mahanahana, ua parau Mose ia Iseraela: “O te Atua ra, o te matamua mau to oe pare.” (Deut. 33:27) I muri aˈe, o Samuela peropheta tei parau ia Iseraela ‘eiaha e taiva i to ratou peeraa ia Iehova; e haamori râ ia ˈNa ma to ratou aau atoa. No to ˈna iˈoa rahi e ore ai Iehova e faarue i to ˈna mau taata.’ (Sam. 1, 12:20-22) A haamori noa ˈi tatou i te Atua ma te taiva ore, eita oia e faarue ia tatou. E tauturu mai iho â oia ia hinaaro tatou.
19 Te tauturu nei e te tamahanahana nei Iehova i to ˈna nunaa i teie anotau hopea ati rahi. I te roaraa o te tau, mea rahi o to tatou mau taeae i te ao nei tei hamani-ino-hia e tei tapeahia no te mea te haamori ra ratou ia Iehova. Te haapapu ra to ratou hiˈoraa e e tamahanahana iho â Iehova i ta ˈna mau tavini i te mau taime fifi. I Rusia, ua faautuahia te hoê taeae no to ˈna faaroo e 23 matahiti tapearaa. I reira atoa, ua tae noa mai ta ˈna mau papai Bibilia tei faaitoito e tei tamahanahana ia ˈna. Teie ta ˈna i parau: “I tera mau matahiti, ua haapii au i te tiaturi ia Iehova e ua faaitoito oia ia ˈu.”—A taio i te Petero 1, 5:6, 7.
20. Na te aha e haapapu maira e e ore Iehova e faarue ia tatou?
20 Noa ˈtu eaha ta tatou e faaruru â, e haamanaˈo anaˈe i te parau mahanahana o te Salamo 94:14 e ‘e ore Iehova e faarue i to ˈna mau taata.’ E hinaaro iho â tatou taitahi i te tamahanahanaraa, e na reira atoa râ tatou ia vetahi ê. E faaite mai to muri nei tumu parau e nafea ia tamahanahana i te feia e mihi ra i roto i teie nei ao arepurepu.
Eaha ta outou e pahono?
• Eaha te tahi mau tupuraa mauiui?
• E nafea Iehova e tamahanahana ˈi i ta ˈna mau tavini?
• I mua i te pohe, eaha te tamahanahana mai?
[Uiraa haapiiraa]
[Tumu parau tarenihia/Hohoˈa i te api 23]
TAUTURU NO NIA I TO TATOU . . .
▪ aau Sal. 147:3; Ioa. 1, 3:19-22; 5:14, 15
▪ feruriraa Sal. 94:19; Phil. 4:6, 7
▪ horuhoru Exo. 14:13, 14; Deut. 31:7, 8
▪ tino Kor. 2, 4:8, 9
▪ faaroo Sal. 145:14; Iak. 5:14, 15
