Mea faufaa anei ia ite?

“I to ˈu amuimuiraa e te mau tamaroa, 10 matahiti to ˈu. I te omuaraa, mea tapea rima e mea apapa noa. Aita râ i maoro, ua horomiri atura i te mero taatiraa, a tamata ˈtu ai i te mau peu taatiraa rau. Ua haamata vau i te rave i te ohipa i te 15raa o to ˈu matahiti e ua ani mai te mau tane i ta ˈu vahi raveraa ohipa e taoto ia ratou. Aita vau i taiâ i te amuimui e to ˈu mau hoa ohipa i roto i ta ratou mau mea atoa e rave. Ua hinaaro vau ia fariihia vau e ehia rahiraa taime to ˈu taotoraa ia vera ma.”—SARAH, * AUTERALIA.

E MAERE paha oe i te iteraa e ua paari Sarah i roto i te hoê utuafare tiaturi i te Atua. Ua faaitoito to ˈna na metua i te haapii ia ˈna ia ora ia au i te mau ture Bibilia no nia i te mea maitai e te mea ino. Aita râ Sarah i tâuˈa.

Mea rahi te parau e ua tano Sarah. I to ratou manaˈo, e ere no teie tau ta te Bibilia e haapii ra no nia i te taatiraa pae tino. E no te tahi atu, aita e fifi ia haere i te pureraa a taiata atoa ˈi.

Mea faufaa anei ia ite e ia haapao oe i ta te Bibilia e haapii ra no nia i te taatiraa pae tino? Ia au i te Timoteo 2, 3:16, mea faaurua te Bibilia e te Atua e e mea maitai ei haapiiraa. Te tiaturi ra anei oe e na te Atua i hamani i te taata e o te Bibilia ta ˈna Parau? Mai te peu e e, mea faufaa ïa ia ite i ta te Bibilia e parau ra.

Tera noa râ, te feaa ra e rave rahi i ta te Bibilia e haapii ra no nia i te taatiraa pae tino. Mea ê roa hoi te haapiiraa a te mau tia faaroo, o te parau ra e mea faatura ratou i te Bibilia. No reira i amahamaha ˈi e rave rahi haapaoraa.

Mea maitai aˈe ia hiˈopoa oe i te reira, eiaha râ e vare i ta te taata parau. I to muri nei tumu parau, te vai ra 10 uiraa no nia i te taatiraa pae tino e te mau pahonoraa papu no roto mai i te Bibilia. E faataa mai te toru o te tumu parau no te aha mea faufaa ˈi ia rave i te faaotiraa maitai.

[Nota i raro i te api]