No te aha e pee ai i te aratairaa a te varua o te Atua?

“O oe hoi tau Atua. Ia arataihia vau e to varua maitai.”—SAL. 143:10.

1. A faataa e nafea te hoê puai itea ore e aratai ai i te taata.

 UA FAAOHIPA ê na paha oe i te hoê aveia. E taoˈa nainai te reira o te tauturu i te hoê taata ia ite i to ˈna eˈa. Maoti te hoê puai itea ore e tohu ai te nira o te aveia i te apatoerau. E rave rahi matahiti to te taata faaohiparaa i te aveia ei aratai i roto i to ratou mau tere na te fenua e te tai.

2, 3. (a) Eaha te puai rahi ta Iehova i faaohipa mea maoro aˈenei? (b) Eaha te haapapuraa e e ohipa te puai o te Atua i roto i to tatou oraraa?

² Te vai ra te tahi atu puai itea ore faufaa roa o te aratai ia tatou. Te faataa ra na irava matamua e piti o te Bibilia eaha taua puai ra. No nia i ta te Atua i rave mea maoro aˈenei, te na ô ra te Genese: “Hamani ihora te Atua i te raˈi e te fenua i te matamua ra.” Ua faaohipa oia i te hoê puai rahi mau, te na ô ra hoi te Bibilia e ‘ua faaarepurepu te varua o te Atua i nia iho i te moana.’ (Gen. 1:1, 2) O to ˈna ïa varua moˈa taua puai ohipa ra. Te mauruuru nei tatou i to Iehova faaohiparaa i teie varua no te horoa mai i te ora e no te hamani i te tahi atu mau mea atoa.—Ioba 33:4; Sal. 104:30.

³ Teie râ, e ohipa atoa anei teie puai i roto i to tatou oraraa? E. Ua parau te Tamaiti a te Atua i ta ˈna mau pǐpǐ e ‘na te varua e aratai ia ratou i te mau parau mau atoa.’ (Ioa. 16:13) Eaha ïa teie varua? E no te aha e pee ai i ta ˈna aratairaa?

Eaha te varua moˈa?

4, 5. (a) Eaha te varua maitai no te feia tiaturi i te Toru tahi? (b) A faataa eaha te varua moˈa.

⁴ Te tiaturi ra te tahi mau taata ta tatou e poro atu i te Toru tahi. No ratou, e taata te varua maitai tei faito i te Atua Metua. (Kor. 1, 8:6) I roto e rave rahi Bibilia, ua papaihia Varua Maitai. Aita râ te Bibilia e haapii ra i te Toru tahi.

⁵ Eaha ïa te varua moˈa? I roto i te Genese 1:2, ua hurihia te taˈo Hebera rouaḥ ei “varua,” ei “mataˈi” atoa râ e te tahi atu mau taˈo e faataa ra i te hoê puai ohipa itea ore. (A hiˈo i te Genese 3:8; 8:1.) Eita tatou e ite i te mataˈi, i ta te reira râ e rave. Hoê â huru no te varua moˈa. E ere ïa te reira i te hoê taata. E faaohipa te Atua i taua varua ra i nia i te taata e te mau mea ia tupu to ˈna hinaaro. Mea maere anei ïa e no ǒ mai taua puai rahi ra i te Atua mana hope? E ere roa ˈtu!—A taio i te Roma 1:20.

6. Eaha ta Davida i ani ia Iehova?

⁶ E faaohipa noa anei Iehova i to ˈna  varua no te aratai ia tatou? Ua haapapu oia ia Davida: “E haapii atu vau ia oe, e faaite au ia oe i ta oe eˈa ia haere.” (Sal. 32:8) Ua hinaaro iho â Davida i te aratairaa a te Atua, ua pure hoi oia: “E haapii mai oe ia ˈu ia rave au i to oe ra hinaaro; o oe hoi tau Atua. Ia arataihia vau e to varua maitai.” (Sal. 143:10) Mea faufaa atoa ia arataihia tatou e te varua o te Atua. No te aha? E hiˈo mai tatou e maha tumu.

Eita tatou e nehenehe e aratai ia tatou iho

7, 8. (a) No te aha e ore ai e nehenehe e aratai ia tatou iho? (b) No te aha mea faufaa ˈi te aratairaa a te Atua i roto i teie nei ao ino? A horoa i te tahi hiˈoraa.

⁷ Mea faufaa te aratairaa a te varua o te Atua, no te mea eita tatou e nehenehe e aratai ia tatou iho. Te tumu matamua ïa. Aita Iehova i hamani i te taata ia aratai oia ia ˈna iho. E hape atoa tatou no to tatou tiaraa taata hara. Ua papai te peropheta Ieremia: “Ua ite hoi au, e Iehova, e ere tei te taata iho to ˈna haerea; e ere hoi tei taua taata e haere ra i te haapao i to ˈna taahiraa.” (Ier. 10:23) Te faaite maira te Atua i te tumu i roto i te Ieremia 17:9: “E haavare rahi to te aau i te mau mea atoa nei, e ua ino roa; o vai te ite?”—Mat. 15:19.

⁸ E opua paha te hoê taata e haere i te hoê peho aita oia i matau maitai. Ia haere o ˈna anaˈe, aita e aratai e aita atoa e aveia, mea atâta ïa. Ia fifi aore ra ia ihu oia e aita i ite e nafea, e nehenehe o ˈna e pohe. Oia atoa no te taata e manaˈo ra e e nehenehe ta ˈna e aratai ia ˈna iho i roto i teie nei ao ino, a ore atu ai e ani i te Atua ia faaite mai i te eˈa maitai. E pee râ tatou ia Davida, tei pure ia Iehova: “E tauturu mai oe i to ˈu haerea i to oe na mau eˈa, ia ore ia pahee o ˈu pue avae.” (Sal. 17:5; 23:3) E nafea e noaa mai ai tera aratairaa?

9. Ia au i te hohoˈa i te api 18, e nafea te varua o te Atua e riro ai ei aratai papu no tatou?

⁹ Ia haehaa e ia tiaturi tatou ia Iehova, e horoa mai iho â oia i to ˈna varua moˈa ei aratai papu no tatou. Eaha ta taua puai ohipa ra e rave? Ua faataa Iesu i ta ˈna mau pǐpǐ e ‘e haapii te varua maitai ta te Metua e tono mai ma to ˈna iˈoa, ia ratou i te mau mea atoa e e faaite faahou mai ia ratou i te mau parau atoa ta ˈna i parau ia ratou.’ (Ioa. 14:26) Ia pure e ia haapii tamau tatou i te Bibilia, oia atoa te mau parau a te Mesia, e tauturu  mai te varua moˈa ia taa i te paari rahi o Iehova, a faaroo atu ai tatou ia ˈna. (Kor. 1, 2:10) E ia tupu te tahi mau mea manaˈo-ore-hia i roto i to tatou oraraa, e faaite mai te varua o te Atua eaha te rave. E haamanaˈo mai to ˈna varua i te pue parau mau tumu Bibilia ta tatou i ite ê na e e tauturu mai ia taa e nafea ia faaohipa i te reira no te rave i te mau faaotiraa maitatai.

Ua arataihia Iesu e te varua o te Atua

10, 11. Eaha ta Iesu i ite no nia i te varua moˈa? Mea nafea te varua moˈa i te tautururaa ia ˈna?

¹⁰ Ua arataihia te Tamaiti iho a te Atua e te varua moˈa. Te piti ïa o te tumu mea faufaa ˈi te aratairaa a te varua o te Atua. Hou oia a haere mai ai i te fenua, ua ite ê na Iesu i teie parau tohu: “E vai â te varua o Iehova i nia ia ˈna; te varua o te paari e no te ite; te varua faaaˈo e no te puai; te varua no te ite, e no te mǎtaˈu ia Iehova.” (Isa. 11:2) E ere i te mea ohie te oraraa i te fenua no Iesu. No reira oia i hinaaro roa ˈi i te tauturu a te varua o te Atua.

¹¹ Ua tupu iho â ta Iehova i tohu. Te parau ra te Luka 4:1 e i muri iti aˈe i to Iesu bapetizoraa, ‘ua hoˈi maira oia mai Ioridana mai ma te î i te varua maitai, e arataihia ˈtura e te varua i te medebara.’ I reira, a haapae ai Iesu i te maa, a pure e a feruri maite ai, e au ra e ua haapii e ua faaineine Iehova ia ˈna no ta ˈna e rave i muri aˈe. Ua ohipa te varua o te Atua i nia i to Iesu manaˈo e aau ma te aratai i to ˈna feruriraa e ta ˈna mau faaotiraa. Mea na reira Iesu i ite ai eaha te hinaaro o to ˈna Metua e ua rave oia i te reira.

12. No te aha e ani ai i te Atua ia aratai ia tatou maoti to ˈna varua?

¹² Ua ite Iesu i te faufaaraa o te varua o te Atua i roto i to ˈna iho oraraa. Ua faaitoito roa oia i ta ˈna mau pǐpǐ ia ani i taua varua ra e ia pee i ta ˈna aratairaa. (A taio i te Luka 11:9-13.) No te aha mea faufaa ˈi ia na reira atoa tatou? No te mea e taui te varua i to tatou feruriraa, a tu atu ai i te manaˈo o te Mesia. (Roma 12:2; Kor. 1, 2:16) Ia arataihia tatou e te varua o te Atua, e pee ïa tatou i te hiˈoraa o te Mesia.—Pet. 1, 2:21.

Ia ore ia hema i te varua o teie nei ao

13. Eaha te varua o teie nei ao? E turai te reira i te taata ia aha?

¹³ Mea faufaa te aratairaa a te varua o te Atua ia ore tatou e hema i te varua o teie nei ao o te ohipa ra i nia i te rahiraa  o te taata i teie mahana. Te toru ïa o te tumu. Eita teie varua e tauturu i te taata ia pee i te manaˈo o te Mesia, e turai râ ia ratou ia rave i te mau mea o te patoi ra i te ohiparaa a te varua moˈa, a hohoˈa ˈtu ai ia Satani, te arii o teie nei ao. (A taio i te Ephesia 2:1-3; Tito 3:3.) Ia hema te hoê taata i te varua o teie nei ao a rave atu ai i ta te tino, eita oia e parahi i te Basileia o te Atua.—Gal. 5:19-21.

14, 15. E nafea ia patoi i te varua o teie nei ao?

¹⁴ Ua horoa mai Iehova i te ravea no te patoi i te varua o teie nei ao. Ua parau te aposetolo Paulo e ‘ia itoito i te Fatu e i to ˈna puai rahi ia tia ia patoi atu i te enemi i te mahana ino.’ (Eph. 6:10, 13) Maoti to ˈna varua e haapuai ai Iehova ia tatou ia patoi i ta Satani mau tutavaraa i te faahema ia tatou. (Apo. 12:9) E varua puai to teie nei ao e tei te vahi atoa. E nehenehe râ e patoi atu. E tauturu mai te varua moˈa tei hau aˈe i te puai.

¹⁵ Ua taiva te tahi mau Kerisetiano i te senekele matamua. Ua parau te aposetolo Petero: “Ua faarue ratou i te eˈa mau, haere ê atura.” (Pet. 2, 2:15) Ua noaa râ ia tatou te varua no ǒ mai i te Atua, eiaha to teie nei ao. Ia mauruuru ïa tatou no te reira! (Kor. 1, 2:12) Ma te pee i te aratairaa a te varua moˈa e ma te faaohipa i ta Iehova mau faanahoraa atoa ia piri noa tatou ia ˈna, e tia ˈi ia tatou ia patoi i te varua o teie nei ao ino a Satani.—Gal. 5:16.

 E faahotu te varua moˈa i te mau huru maitatai

16. Eaha ta te varua moˈa e faatupu i roto ia tatou?

¹⁶ Te maha o te tumu mea faufaa ˈi te aratairaa a te varua o te Atua, oia ïa e faatupu te reira i te mau huru maitatai i roto i te oraraa o te feia e arataihia ra e taua varua ra. (A taio i te Galatia 5:22, 23.) E hinaaro iho â tatou paatoa e faahotu atu â i te here, te oaoa e te hau. E hinaaro tatou pauroa e faaoromai e e hamani maitai atu â. Mea maitai atoa no tatou paatoa ia puai te faaroo e ia rahi te mǎrû e te hitahita ore. E hoona tatou, to tatou utuafare e te amuiraa i teie mau huru. E rohi anaˈe i te faahotu i ta te varua e faatupu. Mea rahi roa hoi te huru maitatai e nehenehe e faatupu.

17. E tutava ˈtu â tatou i te faaite i te hotu a te varua ma te aha?

¹⁷ E haerea paari ia hiˈopoa ia tatou iho. Te faaite ra anei ta tatou mau parau e ohipa e te arataihia ra tatou e te varua moˈa e te faahotu ra i te mau huru maitatai? (Kor. 2, 13:5; Gal. 5:25) No te faahotu atu â i te tahi mau huru maitatai, e vaiiho anaˈe i te varua moˈa ia ohipa ˈtu â ma te haapii i te huru maitai taitahi i roto i te Bibilia e ta tatou mau papai. E ite ïa tatou e nafea ia faaite i te hotu a te varua i roto i to tatou oraraa, a tutava ˈtu ai i te na reira. a A ite ai tatou i te ohiparaa a te varua o te Atua i roto i te oraraa o to tatou mau taeae e tuahine e to tatou iho, e taa ïa ia tatou te faufaaraa ia pee i te aratairaa a te varua moˈa.

Te pee ra anei oe i te aratairaa a te varua o te Atua?

18. Ua aha Iesu i arataihia ˈi oia e te varua o te Atua?

¹⁸ Te faaite ra te Bibilia e o te varua moˈa o te Atua tei riro ei puai rahi i roto i te oraraa o Iesu a parahi ai oia i te fenua. Ua farii e ua pee oia i te aratairaa a taua varua ra ma te ohipa ia au i te reira. (Mar. 1:12, 13; Luka 4:14) Te na reira atoa ra anei oe?

19. Ia aha tatou e arataihia ˈi tatou e te varua moˈa?

¹⁹ Te ohipa noa nei te varua o te Atua i nia i te manaˈo e te aau o te feia e farii ra i ta ˈna aratairaa. E nafea oe e aratai-maitai-hia ˈi? A pure tamau ia Iehova ia horoa mai i to ˈna varua moˈa e ia tauturu ia oe ia pee i ta ˈna aratairaa. (A taio i te Ephesia 3:14-16.) A haa ia au i ta oe mau pure ma te imi i te aˈoraa i roto i te Bibilia, ta te Atua Parau faaurua e te varua moˈa. (Tim. 2, 3:16, 17) A faaohipa i te mau haapiiraa paari o te Bibilia e a farii i te aratairaa a te varua moˈa. Ia na reira oe e faaite ai oe i te faaroo ia Iehova o te aratai maitai ia oe na roto i teie nei ao ino.

[Nota i raro i te api]

Ua taa anei ia outou te mau manaˈo faufaa?

• E nafea te varua moˈa e ohipa ˈi i roto i to tatou oraraa?

• Eaha e maha tumu mea faufaa ˈi ia arataihia tatou e te varua o te Atua?

• Ia aha tatou e aratai-maitai-hia ˈi tatou e te varua moˈa?

[Uiraa haapiiraa]

[Hohoˈa i te api 17]

Ua aratai te varua o te Atua ia Iesu i roto i to ˈna oraraa

[Hohoˈa i te api 18]

Te ohipa nei te varua o te Atua i nia i te manaˈo e te aau o te feia e farii ra i ta ˈna aratairaa