E vai ara mai te mau aposetolo a Iesu
“E ara tatou.”—MAT. 26:38.
1-3. (a) Eaha te hape ta te mau aposetolo i rave i te po hopea a Iesu i nia i te fenua nei? (b) Na te aha e faaite ra e ua huti ratou i te haapiiraa?
TEI te po hopea tatou o to Iesu oraraa i te fenua nei. Apeehia e ta ˈna mau aposetolo taiva ore, tei te ô i Getesemane oia, i te pae hitia o te râ o Ierusalema. Hoê teie o te mau vahi ta ˈna e au roa. Mea rahi te ohipa faufaa te titauhia ia feruri oia, e te imi nei oia i te hoê vahi no te pure o ˈna anaˈe.—Mat. 26:36; Ioa. 18:1, 2.
2 Ua faaatea rii mai Iesu e na aposetolo Petero, Iakobo e Ioane. “E parahi i ǒ nei e ara tatou,” ta Iesu ïa i parau hou a haere ai e pure. I to ˈna hoˈiraa mai, te taoto ra to ˈna mau hoa. Taparu faahou atura oia: “E ara.” Teie râ, e piti â taime to ratou taotoraa! I taua noâ po ra, aita te taatoaraa o te mau aposetolo i vai ara i te pae varua. Ua faarue roa ratou ia Iesu e ua horo ê!—Mat. 26:38, 41, 56.
3 Aita te mau aposetolo i vai ara. Mea papu e ua tatarahapa ratou e ua huti oioi i te haapiiraa. Ia au i te buka Bibilia o te Ohipa, e hiˈoraa faahiahia ratou no te vai-ara-raa. Ua tauturu iho â to ratou haerea taiva ore i to ratou mau hoa Kerisetiano ia na reira atoa. I teie iho â mahana, e titauhia ia vai ara tatou. (Mat. 24:42) E hiˈo anaˈe e toru haapiiraa ta tatou e huti mai i roto i te buka Ohipa no nia i te vai-ara-raa.
UA VAI ARA I TE ARATAIRAA NO TE ITE IHEA E PORO AI
4, 5. Mea nafea te varua moˈa i te aratairaa ia Paulo e i to ˈna mau hoa?
4 Te haapiiraa matamua, oia hoi ua imi te mau aposetolo i te aratairaa no te ite ihea e poro ai. Te faaite ra te Bibilia mea nafea Iesu i te faaohiparaa i te varua moˈa o Iehova no te aratai i te aposetolo Paulo e to ˈna mau hoa i roto i te hoê tere anaanatae mau. (Ohi. 2:33) E apiti anaˈe ia ratou.—A taio i te Ohipa 16:6-10.
5 Ua faarue Paulo, Sila e Timoteo i te oire o Lusetera i te pae apatoa o Galatia. Tau mahana i muri aˈe, ua tapae ratou i te purumu Roma e aratai ra i te pae tooa o te râ, te tuhaa taata roa ˈˈe o te mataeinaa no Asia. Ua manaˈo ratou e rave i teie purumu no te haere na tera mau oire ia faaroo atoa ratou i te parau no nia i te Mesia. Ua tapea râ te tahi mea ia ratou. Te na ô ra te irava 6: “E ia ati aˈera ia ratou Pherugia e te fenua ra o Galatia, e tapeahia ihora ratou e te [v]arua [m]aitai, eiaha e parau haere i te parau i Asia.” Aita tatou i ite mea nafea, ua tapea te puai o te Atua i teie mau mitionare ia poro i Asia. E au ra e te hinaaro ra Iesu, maoti te varua o te Atua, e aratai ia Paulo e to ˈna mau hoa i te tahi atu vahi.
6, 7. (a) Eaha tei tupu i pihaiiho ia Bitunia? (b) Eaha te faaotiraa ta te mau pǐpǐ i rave, e ma teihea faahopearaa?
6 Ua haere ratou ihea? Te faataa ra te irava 7: “E tae atura ratou i Misia, tamata ˈtura ratou i te haere i Bitunia; aita râ ratou i tuua e te [v]arua o Iesu.” I te mea e ua tapeahia ratou ia poro i Asia, haere atura Paulo e to ˈna mau hoa i te pae apatoerau no te poro i Bitunia. I pihaiiho râ ia Bitunia, tapea faahou atura Iesu ia ratou maoti te puai no ǒ mai i to ˈna Metua. Ua uiui paha ratou no te aha. Ua ite ratou eaha te poro e e nafea ia poro, aita râ ratou i ite ihea e poro ai. E au ra ïa e ua patoto ratou i te opani e aratai ra i Asia, aita râ i matara. Ua patoto i te opani e aratai ra i Bitunia, hoê â huru. Ua faaea anei teie feia poro itoito rahi i te patoto? Aita roa ˈtu!
7 E maere paha tatou i te faaotiraa ta ratou i rave i muri mai. Te faatia nei te irava 8: “Na Misia ˈtura ratou i te haere e tae atura i raro i Teroa.” Ua haere ïa teie mau mitionare i te pae tooa o te râ e ua na raro ratou i te haere i nia e 563 kilometera i te atea. Hoê oire i muri i te tahi, tapae atura ratou i te uahu o Teroa, i reira hoi te taata e fano ai i Makedonia. No te toru o te taime, ua patoto faahou atura ratou i te uputa. E ua matara mai! Te faaite maira te irava 9 i tei tupu i muri iho: “Itea maira te hoê orama ia Paulo i te rui; ua tia maira te hoê taata no Makedonia, ua parau maira ia ˈna, na ô maira, E fano mai i Makedonia nei e tauturu mai ia matou.” I teie nei, ua ite Paulo ihea e poro ai. Ma te ore e tiai, fano atura ratou i Makedonia.
8, 9. Eaha te haapiiraa e huti mai i teie tere o Paulo?
8 Eaha te haapiiraa e huti mai? A tapao na e i muri aˈe noa to Paulo haereraa i Asia to te varua o te Atua aratairaa ia ˈna. I muri aˈe noa atoa to Paulo piriraa ia Bitunia to Iesu aratairaa ia ˈna. I te pae hopea, i muri aˈe noa to Paulo tapaeraa i Teroa to Iesu aratairaa ia ˈna i Makedonia. Ei upoo o te amuiraa, e na reira atoa mai Iesu i nia ia tatou. (Kol. 1:18) Peneiaˈe te feruri nei oe i te tavini ei pionie aore ra i te haere i te vahi e hinaaro-rahi-hia te taata poro. I muri aˈe noa râ oe i te faaitoitoraa ia raea ta oe fa e aratai ai Iesu ia oe maoti te varua moˈa o te Atua. A hiˈo na: E nehenehe te hoê taata faahoro e tipuu i te pae atau aore ra i te pae aui i te taime noa e tere ai to ˈna pereoo. Oia atoa, e aratai Iesu ia tatou ia faarahi i ta tatou taviniraa i te taime noa e haere ai tatou i mua, oia hoi ia faaitoito tatou ia raea ta tatou fa.
9 Ia aha râ oe ia ore ta oe mau tutavaraa ia haamaitai-oioi-hia? E taora anei oe i te tauera ma te manaˈo e aita te varua o te Atua e aratai ra ia oe? A haamanaˈo ïa e ua fifi-atoa-hia o Paulo. Ua imi e ua patoto noa râ o ˈna i te opani e tae roa ˈi i te taime i matara ˈi hoê. E haamaitai-atoa-hia oe ia tamau oe i te imi i te opani rahi o te aratai i te ohipa.—Kor. 1, 16:9.
UA VAI ARA MA TE PURE
10. Na te aha e faaite ra e mea faufaa roa ia tamau i te pure no te vai ara noa?
10 Te piti o te haapiiraa, oia hoi ua vai ara noa to tatou mau taeae Kerisetiano o te senekele matamua ma te pure. (Pet. 1, 4:7) Mea faufaa roa ia tamau i te pure no te vai ara noa. A haamanaˈo na e hou oia a tapeahia ˈi i te ô i Getesemane, ua parau Iesu i ta ˈna aposetolo e toru ia ‘ara e ia tamau i te pure.’—Mat. 26:41.
11, 12. No te aha e mea nafea Heroda i te hamani-ino-raa i te mau Kerisetiano, ia Petero atoa?
11 To reira atoa Petero i taua po ra. E i muri aˈe, ua ite oia i te faufaaraa o ta vetahi ê pure. (A taio i te Ohipa 12:1-6.) I te mau irava matamua o teie faatiaraa, te haapii nei tatou e ua hamani ino Heroda i te mau Kerisetiano ia auhia mai oia e te ati Iuda. E au ra e ua ite o ˈna e e aposetolo o Iakobo e mea piri roa raua Iesu. Taparahi atura oia ia Iakobo “i te ˈoˈe.” (Irava 2) Mea here roa na te amuiraa ia Iakobo. Auê ïa tamataraa no te mau taeae!
12 Eaha ˈtu â ta Heroda i rave? Te faataa ra te irava 3: “E ite aˈera oia, e te maitai ra te ati Iuda i te reira, ua titau atura oia e rave [aore ra tapea] atoa ia Petero.” Ua ite Heroda e ua matara ê na mai te mau aposetolo, tae noa ˈtu o Petero, i te fare tapearaa. (Ohi. 5:17-20) Aita roa ˈtu oia e hinaaro ra ia ora faahou Petero. Ua tuu atura ïa oia ia ˈna i “na pǔpǔ faehau e maha ra ei tiai ia ˈna; i manaˈo oia e, ia oti te pasa, aratai mai ai ia ˈna i rapae i te vahi taata ra a taparahi ai.” (Irava 4) A feruri na: Ua taamuhia Petero i te fǐfǐ i ropu e 2 tiai, a tuu atu ai 16 tiai i te rui e te ao ia ore teie aposetolo ia ora. Ua hinaaro Heroda e haapohe ia Petero ia oti te Pasa ia oaoa te nahoa. Eaha ta te mau hoa Kerisetiano o Petero e nehenehe e rave i roto i teie tupuraa peapea mau?
13, 14. (a) Ua aha te amuiraa a tapeahia ˈi Petero? (b) Eaha ta te hiˈoraa o te mau hoa Kerisetiano o Petero e haapii maira no nia i te pure?
13 Ua ite iho â te amuiraa eaha te rave. Te taiohia nei i roto i te irava 5: “Tiai-maite-hia ihora Petero i roto i te tapearaa ra; ua pure atura râ te ekalesia [aore ra amuiraa] i te Atua ia ˈna aita e faaea.” Ma te aau atoa, ua pure uˈana ratou no to ratou taeae here. I te poheraa Iakobo, aita ratou i paruparu e i manaˈo e aita e faufaa ia pure. Ua ite râ ratou e mea faufaa na Iehova te pure a te feia taiva ore e haamori ra ia ˈna. E pahono oia i te mau pure tei au i to ˈna hinaaro.—Heb. 13:18, 19; Iak. 5:16.
14 Eaha ta tatou e haapii mai i ta te mau hoa Kerisetiano o Petero i rave? Te vai-ara-raa, o te pure-atoa-raa ïa no to tatou mau taeae e tuahine, eiaha no tatou noa. (Eph. 6:18) Ua faaroo anei oe e te fifi nei to tatou mau hoa Kerisetiano? Te faaruru nei paha vetahi i te hamani-ino-raa aore ra te ati natura. E i te tahi mau fenua, ua opanihia te pororaa. Ma te aau atoa, e nehenehe oe e pure no ratou. Ua matau atoa paha oe i te tahi o te faaruru nei i te fifi aita te taatoaraa i ite, mai te fifi utuafare, te toaruaruraa aore ra te maˈi. A haamanaˈo e a faahiti i to ratou iˈoa a pure ai oe ia Iehova “tei faaroo i te pure.”—Sal. 65:2.
15, 16. (a) A faataa na mea nafea to te melahi a Iehova faaoraraa ia Petero i te fare tapearaa. (A hiˈo i te hohoˈa i raro nei.) (b) No te aha e puaihia ˈi to tatou faaroo ia feruri mea nafea to Iehova faaoraraa ia Petero?
15 Eaha ˈtura no Petero? Ua ite oia i te mau ohipa maere i te po hopea o to ˈna tapearaa. (A taio i te Ohipa 12:7-11.) A hiˈo na i tei tupu: A taoto ai oia i ropu i na tiai e piti, ua anaana maira te maramarama i roto i ta ˈna piha tapearaa. Aita te mau tiai i ite i te hoê melahi i te tiaraa i reira. Faatia oioi mai nei oia ia Petero, e topa atura na auri fǐfǐ i ta ˈna rima ra! Na pihaiiho i te mau tiai, ua aratai oia ia Petero i te opani auri rahi tei matara noa mai tera. A tapae ai raua i rapae, moe atura te melahi. Ua ora o Petero!
16 E puaihia to tatou faaroo ia feruri tatou i te mana o Iehova no te faaora i ta ˈna mau tavini. Eita iho â ïa tatou e tiai ia faaora semeio mai Iehova. Te tiaturi papu nei râ tatou e e faaohipa oia i to ˈna mana no to ˈna nunaa. (Par. 2, 16:9) Maoti to ˈna varua moˈa, e haapuai oia ia tatou ia faaoromai e rave rahi tamataraa. (Kor. 2, 4:7; Pet. 2, 2:9) Fatata roa Iehova i te horoa i te mana ia Iesu ra no te faaora e mirioni taata i te fare tapearaa ino roa ˈˈe: te pohe. (Ioa. 5:28, 29) E faaitoito mai te tiaturiraa i te mau parau fafau a Iehova ia faaoromai i te mau tamataraa.
UA FAAITE HUA I TE EVANELIA NOA ˈTU TE MAU FIFI
17. No te aha e hiˈoraa maitai ai o Paulo no te pororaa ma te itoito rahi e te manaˈo ru?
17 Te toru o te haapiiraa, oia hoi ua vai ara te mau aposetolo ma te faaite hua i te evanelia noa ˈtu te mau fifi. Mea faufaa roa ia poro ma te itoito rahi e te manaˈo ru no te vai ara. E hiˈoraa maitai te aposetolo Paulo i roto i teie tuhaa. Ma te itoito rahi, ua haere oia na tera e tera oire e ua haamau i te mau amuiraa. Ua rau te fifi ta ˈna i faaruru, ua tapea noa râ oia i to ˈna itoito rahi e i te manaˈo e mea ru teie ohipa.—Kor. 2, 11:23-29.
18. Mea nafea Paulo i te faaiteraa ˈtu i te evanelia a tapeahia ˈi oia i Roma?
18 Te taime hopea i faahitihia ˈi Paulo i roto i te buka Ohipa, tei te pene 28 ïa. Tei Roma Paulo no te tia ˈtu i mua ia Néron. Ua taamuhia paha oia i te fǐfǐ i te hoê tiai. Aita râ te reira i haamamû i teie aposetolo itoito! Ua imi noa oia i te ravea no te poro. (A taio i te Ohipa 28:17, 23, 24.) E toru noa mahana i muri aˈe, ua faahaere mai Paulo i te mau ati Iuda tiaraa teitei no te faaite atu i te evanelia. Ua maiti ratou i te hoê mahana ia horoa ˈtu â Paulo i te faaiteraa. Te na ô ra te irava 23: “E ia haapaohia e ratou [te ati Iuda no ǒ] te hoê mahana, ua haere maira ratou e rave rahi i to ˈna fare, ua haapii atura oia ia ratou, e faaite atura i te basileia o te Atua, e aˈo [aore ra haapapu] atura ia ratou i te mau parau o Iesu i roto i te ture a Mose, e te mau peropheta ra, mai te poipoi mai â e ahiahi noa ˈtura.”
19, 20. (a) No te aha te pororaa a Paulo i manuïa ˈi? (b) Eaha to Paulo huru a ore ai vetahi e farii i te evanelia?
19 No te aha te pororaa a Paulo i manuïa ˈi? Ta te irava 23 ïa e faaite maira: (1) Ua haapii atu oia no nia i te Basileia o te Atua e no nia ia Iesu Mesia. (2) Ua tauturu oia i te feia e faaroo ra ia ˈna ma te haapapu atu no te aha e tiaturi ai. (3) Ua haaferuri oia i nia i te mau Papai. (4) Ua tâuˈa oia ia vetahi ê ma te faaite i te evanelia “mai te poipoi mai â e ahiahi noa ˈtura.” Ua horoa Paulo i te hoê faaiteraa puai mau, aita râ te taatoaraa i farii i te reira. Te parau ra te irava 24: “Ua faaroo maira te tahi pae i taua mau parau i parauhia ra, e aore te tahi pae i faaroo.” Tupu ihora te aimârôraa e purara ˈtura te taata.
20 Ua paruparu anei Paulo no te mea aita te taatoaraa i farii i te evanelia? Aita roa ˈtu! Te faaoti ra te buka faaurua o te Ohipa i nia i teie mau parau mahanahana mau: “Parahi atura Paulo e e piti aˈera matahiti i roto i to ˈna iho fare tarahuhia, e farii maira i te taata atoa e haere atu ia ˈna ra. Parau maira i te basileia o te Atua, e haapii maira i te mau parau o te Fatu ra o Iesu Mesia ma te mǎtaˈu ore, e aore roa e taata i faaore atu.”—Ohi. 28:30, 31.
21. Eaha ta tatou e haapii mai no nia i te hiˈoraa o Paulo a tapeahia ˈi oia i roto i to ˈna fare tarahu?
21 Eaha ta tatou e haapii mai no nia i te hiˈoraa o Paulo? A tapeahia ˈi oia i roto i to ˈna fare tarahu, aita oia e nehenehe e poro i tera e tera fare. Ua faaite noa râ oia i te hoê feruriraa maitai ma te poro i te feia atoa o te haere mai ia ˈna ra. I teie atoa mahana, mea rahi te tavini a te Atua tei mau i te fare auri no to ratou faaroo. Te tapea noa nei râ ratou i to ratou oaoa e te tamau noa ra i te poro. Ua mau atoa vetahi o to tatou mau taeae e tuahine here i to ratou nohoraa aore ra i te fare ruau no te mea ua ruhiruhia ratou aore ra ua maˈihia. Ia au i tei maraa ia ratou, te poro nei ratou i te mau taote, te rave ohipa e te feia e haere mai e hiˈo ia ratou. Te hinaaro nei ratou e faaite hua i te Basileia o te Atua. Auê hoi to ratou hiˈoraa i te mea faufaa no tatou!
22. Eaha ta outou e faaoti a tiai noa ˈi te hopea o teie ao?
22 Mea rahi te haapiiraa e huti mai i te mau aposetolo e Kerisetiano o te senekele matamua tei faahitihia i roto i te buka Bibilia o te Ohipa no nia i te vai-ara-raa. A tiai noa ˈi tatou i te hopea o teie ao, e pee anaˈe i te hiˈoraa o teie mau Kerisetiano ma te poro ma te itoito rahi e te mǎtaˈu ore. Aita ˈtu e haamaitairaa rahi aˈe i te faaite-hua-raa i te Basileia o te Atua!—Ohi. 28:23.
[Uiraa haapiiraa]
[Hohoˈa i te api 16]
Ua aratai te hoê melahi ia Petero na te opani auri rahi
