Eiaha ‘e hiˈo i muri’

“O te taata e tuu i te rima i nia i te arote a hiˈo ai i muri, e ore ïa e au i te basileia o te Atua.”—LUKA 9:62.

EAHA TA OUTOU E PAHONO?

No te aha ia ‘haamanaˈo ai tatou i te vahine a Lota’?

Eiaha tatou ia manaˈonaˈo noa i teihea na ohipa e toru?

E nafea tatou e haere noa ˈi i mua e te faanahonahoraa a Iehova?

1. Eaha te faaararaa ta Iesu i horoa, e eaha te uiraa e hiti mai?

 “E HAAMANAˈO i te vahine a Lota.” (Luka 17:32) E faaararaa puai teie ta Iesu i horoa a fatata e 2 000 matahiti aˈenei tei faufaa roa ˈtu â i teie mahana. Eaha râ ta Iesu i hinaaro e parau? Aita te mau ati Iuda e faaroo ra ia ˈna i hinaaro i te faataaraa hau, ua ite hoi ratou eaha tei tupu i te vahine a Lota a horo ê ai oia ia Sodoma e to ˈna utuafare. Ma te faaroo ore, ua hiˈo oia i muri e ua riro atura ei pou miti.—A taio i te Genese 19:17, 26.

2. No te aha te vahine a Lota i hiˈo ai i muri, e eaha tei tupu?

² No te aha râ te vahine a Lota i hiˈo ai i muri? Ua hinaaro anei o ˈna e hiˈo eaha te tupu ra? Mea fifi anei no ˈna ia tiaturi e te haamouhia ra te oire? Te ere ra anei oia i te faaroo? Te mihi ra anei o ˈna i te mau mea atoa ta ˈna i vaiiho i Sodoma? (Luka 17:31) Noa ˈtu eaha te tumu i hiˈo ai oia i muri, ua pohe o ˈna no to ˈna faaroo ore. A feruri na! Ua pohe o ˈna i te hoê â mahana e te feia ino o Sodoma e Gomora. No reira Iesu i na ô ai: “E haamanaˈo i te vahine a Lota”!

3. Mea nafea Iesu i te haapapuraa i te faufaaraa ia ore e hiˈo i muri?

³ Te ora atoa nei tatou i te hoê tau mea faufaa roa ia ore e hiˈo i muri, aore ra e manaˈo noa i te mau mea ta tatou i vaiiho. O ta Iesu ïa i haapapu a pahono ai i te uiraa a te hoê taata tei hinaaro e hoˈi e aroha ˈtu i to ˈna utuafare hou a riro ai ei pǐpǐ: “O te taata e tuu i te rima i nia i te arote a hiˈo ai i muri, e ore ïa e au i te basileia o te Atua.” (Luka 9:62) Mea etaeta anei te pahonoraa a Iesu? Aita, ua ite hoi o ˈna e e otoheraa noa teie no te ape i te  hopoia e riro ei pǐpǐ. No Iesu, te hiˈo ra ïa tera taata i muri. E nehenehe te hoê taata e arote nei e hiˈo i muri maa taime aore ra e vaiiho i ta ˈna mauhaa a fariu roa ˈtu ai i muri. Eita râ o ˈna e haapao faahou i tei titauhia ia rave o ˈna e eita o ˈna e rave maitai i ta ˈna ohipa.

4. Ia tiatonu to tatou mata i te aha?

⁴ Ia tiatonu to tatou mata i te mau mea i mua, eiaha tatou e haapao faahou i te mea tahito. Tera ïa ta te Maseli 4:25 e faataa maitai ra: “E hiˈo tia ˈtu to mata i mua ia oe, e fariu i to opani mata i mua ˈtu ia oe.”

5. No te aha eiaha ˈi e hiˈo i muri?

⁵ Te vai ra te tumu maitai e ore ai tatou e hiˈo i muri: te ora nei tatou i te “anotau hopea.” (Tim. 2, 3:1) Fatata roa te ao taatoa nei, eiaha noa e piti oire iino, i te haamouhia. Eaha te tauturu ia tatou ia ore e ite i te hoê â faahopearaa e te vahine a Lota? Na mua roa, mea faufaa ia ite eaha te mau mea i muri ia tatou. (Kor. 2, 2:11) E hiˈopoa anaˈe ïa eaha tera mau ohipa e ia aha no te ore e tiatonu i tera mau mea.

TE MANAˈO E MEA AU AˈE I TERA TAU RA

6. No te aha eiaha ˈi e tiaturi noa i ta tatou e haamanaˈo ra?

⁶ E nehenehe tatou e manaˈo ma te hape e mea au aˈe te oraraa i tera tau ra. Eiaha râ e tiaturi noa i ta tatou e haamanaˈo ra. E manaˈo paha tatou e e ere to tatou mau fifi tahito i te mea ino roa e mea oaoa aˈe tatou i na mua ˈˈe. E haamata paha tatou i te hinaaro e hoˈi i taua oraraa tahito ra. Te faaara maira râ te Bibilia: “Eiaha oe e parau e, Eaha te mea i maitai ai tei mutaaihora anotau i teie nei anotau? aore hoi oe i ui maitai i te reira parau.” (Koh. 7:10) No te aha mea atâta roa ˈi teie huru feruriraa?

7-9. (a) Eaha tei tupu i te mau Iseraela i Aiphiti? (b) No te aha te mau Iseraela e oaoa ˈi? (c) Ua haamata te mau Iseraela i te amuamu i te aha?

⁷ A hiˈo na i tei tupu i te mau Iseraela i te tau o Mose. I te omuaraa, ua farii-maitai-hia ratou i Aiphiti. I muri aˈe râ i te tau o Iosepha, “ua tuu aˈera [to Aiphiti] i te feia faaau-ohipa i nia [i te mau Iseraela] ei faateiaha ia ratou i te hopoia.” (Exo. 1:11) I te pae hopea, ua faaue Pharao e ia haapohehia te mau aiû tamaroa a Iseraela, ia ore ratou ia rahi roa mai. (Exo. 1:15, 16, 22) No reira Iehova i parau ai ia Mose: “Ua hiˈo papu vau i te pohe [o] to ˈu ra mau taata i Aiphiti, e ua faaroo vau i to ratou auê i ta ratou mau faaau ohipa; e ua ite hoi au i to ratou oto.”—Exo. 3:7.

⁸ Auê te mau Iseraela i te oaoa a faarue ai ratou ia Aiphiti ei nunaa tiamâ! Ma te faahiahia, ua ite ratou i te mana o Iehova a tairi ai o ˈna ia Pharao teoteo e to ˈna nunaa i na ati ahuru. (A taio i te Exodo 6:1, 6, 7.) Aita noa to Aiphiti i faatiamâ i te mau Iseraela, ua onoono maite atoa râ ia ratou ia faarue i to ratou fenua ma te horoa i te auro e te ario e rave rahi i parauhia ˈi e ua “pau ihora to Aiphiti” i te nunaa o te  Atua. (Exo. 12:33-36) Ua oaoa atoa Iseraela i te ite i te haamouraahia Pharao e ta ˈna mau nuu i roto i te miti Uteute. (Exo. 14:30, 31) Eaha râ to ratou faaroo i te puaihia i te ite i teie mau mea faahiahia!

⁹ Mea fifi ia tiaturi e i muri iti noa ˈˈe i to ratou faaora-semeio-raahia, ua haamata teie nunaa i te amuamu. I te aha? I te maa! Aita ratou i mauruuru i ta Iehova e horoa nei na ratou e ua amuamu: “Te manaˈo nei hoi tatou i te iˈa ta tatou i amu noa i Aiphiti ra; e te tutama, e te meleni, e te hezira, e te oniani, e te sumi; area i teie nei, ua pohe tatou: aita roa o mua i to tatou mata maori râ o teie nei mâna.” (Num. 11:5, 6) Ua hape roa to ratou huru feruriraa e ua hinaaro roa ˈtura ratou e hoˈi i te fenua tei faatîtî ia ratou! (Num. 14:2-4) Ua hiˈo te mau Iseraela i muri e ua ere i te farii maitai a Iehova.—Num. 11:10.

10. Eaha te haapiiraa e huti mai i te hiˈoraa o te mau Iseraela?

¹⁰ Eaha te haapiiraa e huti mai? I mua i te fifi, eiaha e manaˈo noa e mea au aˈe to tatou oraraa i na mua ˈˈe, hou paha a ite mai ai i te parau mau. E ere i te mea ino ia huti i te haapiiraa i ta tatou i rave i na mua ˈˈe aore ra ia manaˈonaˈo i te mau taime maitai ta tatou i ite. Mea faufaa râ ia tapea i te manaˈo aifaito e te tano. Aita anaˈe, e mauruuru ore roa ˈtu â tatou i to tatou oraraa nei a hinaaro atu ai e hoˈi i to tatou huru oraraa tahito.—A taio i te Petero 2, 2:20-22.

TE MAU HAAPAERAA I RAVEHIA NA

11. Eaha to vetahi huru i te mau haapaeraa ta ratou i rave i mutaa ihora?

¹¹ ‘Ahani e ahani,’ ta vetahi ïa e parau a manaˈonaˈo ai i te mau haapaeraa ta ratou i rave na, mai te haereraa i te haapiiraa teitei, te noaaraa i te tiaraa aore ra i te hoê oraraa fanaˈo. Mea rahi o to tatou mau taeae e tuahine tei vaiiho i ta ratou ohipa aufau-maitai-hia i roto i te tapihooraa, te faaanaanataeraa, te haapiiraa, aore ra te tuaro. Aitâ râ te hopea i tae mai atura. Te manaˈonaˈo noa ra anei oe i to oe oraraa ahani aita oe i rave i tera mau haapaeraa?

12. Eaha to Paulo manaˈo no nia i te mau mea ta ˈna i vaiiho i muri?

¹² Mea rahi ta te aposetolo Paulo i vaiiho no te pee i te Mesia. (Phil. 3:4-6) Eaha to ˈna manaˈo no nia i te reira? Te na ô ra o ˈna: “O taua mau mea taoˈa na ˈu ra, o ta ˈu ïa i faariro ei mea faufaa ore i te Mesia nei.” No te aha? Te parau nei â o ˈna: “Oia mau ïa e mea faufaa ore atoa te mau mea atoa nei ia ˈu, i te maitai rahi ra i te ite i te Mesia i tau Fatu ra ia Iesu: e faarue ai au i te mau mea atoa ra, e e aua ïa ia ˈu, ia noaa ia ˈu te Mesia.” a (Phil. 3:7, 8) Mai te hoê  taata te ore e tatarahapa ia faarue i te pehu, oia atoa aita Paulo i tatarahapa i to ˈna mau toroa i roto i teie nei ao ta ˈna i vaiiho i muri ia ˈna. E ere roa ˈtu te reira i te mea faufaa faahou no ˈna.

13, 14. E nafea ia pee i te hiˈoraa o Paulo?

¹³ Eaha te tauturu mai ia haamata tatou i te manaˈonaˈo i te mau mea ta tatou i nehenehe e rave? A pee i te hiˈoraa o Paulo. E nafea? A feruri i te faufaaraa o ta oe e fanaˈo nei. E taairaa maitai to oe e o Iehova e e taata taiva ore oe no ˈna. (Heb. 6:10) Aita aˈe mea ta teie nei ao e pûpû mai te nehenehe e faaauhia i ta Iehova e horoa nei no tatou e i ta ˈna e horoa mai i mua nei.—A taio i te Mareko 10:28-30.

¹⁴ Ua faahiti atoa Paulo i te tahi atu mea te tauturu ia tatou ia vai taiva ore noa, oia hoi ‘ua haamoe o ˈna i te mau mea i muri ra e ua titau atu i tei mua.’ (Phil. 3:13) Te faaite maira o Paulo e piti ohipa e titauhia ia rave. Mea faufaa na ohipa toopiti. A tahi, e haamoe anaˈe i te mau mea i vaiihohia i muri. Eiaha tatou e haamâuˈa i to tatou taime e itoito no te haapeapea roa ino i tera mau mea. Te piti, mai te hoê taata horo e ite ra i te reni tapaeraa, mea faufaa roa ia titau, aore ra ia hiˈo noa, i te mau mea i mua.

15. No te aha mea maitai ai ia feruri maite i te hiˈoraa o te mau tavini taiva ore a te Atua?

¹⁵ E itoitohia tatou i te haere noa i mua ma te ore e hiˈo i muri ia feruri maite tatou i te hiˈoraa o te mau tavini taiva ore a te Atua o te tau tahito e o teie mahana. A hiˈo na ia Aberahama raua Sara. Ahani raua i manaˈonaˈo noa ia Ura, ‘e tia noa ia raua ia hoˈi atu.’ Aita râ. (Heb. 11:13-15) Mea rahi aˈe ta Mose i vaiiho i muri ia ˈna i te tahi atu Iseraela i to ˈna faarue-matamua-raa ia Aiphiti. Aita te Bibilia e faaite maira e ua mihi o ˈna i tera mau mea, te parau maira râ: “E taoˈa rahi hoi ia ˈna te mau faainoraa, i te Mesia nei, i te mau taoˈa atoa o Aiphiti ra, te haapao maite ra hoi oia i te utua ra ei hoo.”—Heb. 11:26.

TE MAU TUPURAA FIFI TA TATOU I FAARURU NA

16. E nafea te mau tupuraa fifi tahito e ohipa ˈi i nia ia tatou?

¹⁶ Ua fifihia paha tatou i mutaa ihora. Peneiaˈe te haapeapea noa nei tatou i ta tatou mau hara aore ra hape tahito. (Sal. 51:3) Te inoino aore ra te mauiui noa ra paha tatou i te aˈoraahia mai tatou. (Heb. 12:11) E manaˈonaˈo noa paha tatou i te tahi mea tano ore ta tatou i faaruru aore ra i manaˈo i faaruru. (Sal. 55:2) Ia aha ïa ia ore e manaˈonaˈo noa i tera mau ohipa tahito? Teie e toru hiˈoraa.

17. (a) No te aha Paulo i faataa ˈi ia ˈna mai te hoê taata “tei iti roa ˈtu i tei iti roa i te feia moˈa atoa”? (b) Eaha tei tauturu ia Paulo ia ore ta ˈna mau hape tahito ia haaparuparu ia ˈna?

¹⁷ Te mau hape tahito. Ua faataa Paulo ia ˈna mai te hoê taata “tei iti roa ˈtu i tei iti roa i te feia moˈa atoa.” (Eph.  3:8) No te aha? “No te mea i hamani ino vau i te ekalesia [aore ra amuiraa] o te Atua,” ta ˈna ïa i parau. (Kor. 1, 15:9) Auê te aau o Paulo i te horuhoru a farerei ai i te tahi mau taeae e tuahine ta ˈna i hamani ino na! Aita râ o ˈna i vaiiho i tera mau manaˈo toaruaru ia haaparuparu ia ˈna. Ua haamanaˈo noa o ˈna i te hamani maitai rahi ta ˈna i fanaˈo. (Tim. 1, 1:12-16) Na to ˈna mauruuru i turai noa ia ˈna i roto i ta ˈna taviniraa. Ua haamoe Paulo i te mau mea ta ˈna i vaiiho, oia atoa ïa ta ˈna mau hape tahito. Eita e nehenehe e taui i ta tatou i rave na, e mâuˈa noa ïa to tatou puai ia haamanaˈo noa tatou i te reira. E haamanaˈo anaˈe râ i te aroha ta Iehova i faaite mai e e faaohipa anaˈe i to tatou puai no te tavini ia ˈna.

18. (a) Eaha te tupu ia manaˈonaˈo noa tatou i te tahi aˈoraa i horoahia mai? (b) E nafea ia pee i te mau parau a Solomona no nia i te fariiraa i te tahi aˈoraa?

¹⁸ Aˈoraa etaeta. Ia manaˈonaˈo noa tatou i te tahi aˈoraa i horoahia mai, e nehenehe tatou e mauiui aore ra e inoino a ‘pau atu ai te aho,’ aore ra a paruparu atu ai. (Heb. 12:5) Noa ˈtu e ua patoi tatou i te hoê aˈoraa aore ra ua farii e ua paruparu atura, hoê â huru: aita tatou i vaiiho i te aˈoraa ia tauturu ia tatou. Mea maitai aˈe ia pee i te mau parau a Solomona: “E tapea etaeta i te aˈo: eiaha roa e tuua; e vaiiho maite i te reira; o to oe ïa ora.” (Mas. 4:13) Mai te hoê taata faahoro e pee ra i te mau tapao i nia i te purumu, e farii anaˈe i te aˈoraa, e pee anaˈe i te reira e e haere anaˈe i mua.—Mas. 4:26, 27; a taio i te Hebera 12:12, 13.

19. E nafea ia pee i te faaroo o Habakuka e o Ieremia?

¹⁹ Ohipa tano ore aore ra e au ra e mea tano ore. I te tahi taime, e au paha tatou i te peropheta Habakuka tei tiaoro ia Iehova ia haava mai. Aita o ˈna i taa no te aha te Atua e vaiiho noa ˈi i te tahi mau ohipa tano ore ia tupu. (Hab. 1:2, 3) Mea faufaa mau ia pee i te faaroo o teie peropheta, tei parau: “E oaoa vau ia Iehova, e ouˈauˈa noa vau i te Atua i to ˈu nei ora.” (Hab. 3:18) Mai ia Ieremia, ia “tiaturi” tatou ia Iehova te Atua parau-tia ma te faaroo puai, e papu ia tatou e e faaafaro iho â o ˈna i te mau mea atoa i te taime tano.—Oto 3:19-24.

20. E nafea ia faaite e ‘te haamanaˈo ra tatou i te vahine a Lota’?

²⁰ E anotau oaoa mau teie! Te ite nei tatou i te mau tupuraa faahiahia mau e e fatata roa tatou i te ite e rave rahi atu â. Te haere ra te faanahonahoraa a Iehova i mua, ia na reira atoa tatou e tia ˈi. E pee anaˈe i te aˈoraa Bibilia e hiˈo i mua, eiaha i muri. Mea na reira tatou e faaite ai e ‘te haamanaˈo ra tatou i te vahine a Lota’!

[Nota i raro i te api]

[Uiraa haapiiraa]