A tapea i te aau hoê no Iehova
A tapea i te aau hoê no Iehova
“E tau tamaiti, . . . ia ite hua oe i te Atua o to metua nei, a haamori ai ia ˈna ma te aau mau.”—PAR. 1, 28:9.
A IMI I TE PAHONORAA I TEIE MAU UIRAA:
Eaha te aau?
Eaha te tahi ravea no te hiˈopoa i to tatou aau?
E nafea ia tavini ia Iehova ma te aau hoê?
1, 2. (a) Teihea tuhaa o te tino e faahiti-pinepine-aˈe-hia ei taipe i roto i te Bibilia? (b) No te aha mea faufaa ˈi ia taa eaha te aau?
E PINEPINE te Bibilia i te faahiti i te mau tuhaa o te tino ei taipe. A hiˈo na, ua parau Ioba: “E ere râ i to te rave ino o tau rima.” Ua na ô te arii Solomona: “E meˈihia te ivi i te roo maitai.” Ua haapapu Iehova ia Ezekiela: “Etaeta rahi [aˈe] i to te ofai, to oe ïa rae i te haapaariraahia e au ra.” Ua parau te pǐpǐ Iakobo: “E auahi atoa te arero nei.”—Ioba 16:17; Mas. 15:30; Ezk. 3:9; Iak. 3:6.
2 Teie râ, i roto i te mau reo tumu o te Bibilia, ua faahiti-pinepine-aˈe-hia te tahi tuhaa o te tino. Ta Hana taiva ore ïa i faaohipa i roto i ta ˈna pure: “Te oaoa nei tau aau [Hebera: mafatu] ia Iehova.” (Sam. 1, 2:1) Ua faahiti te feia papai Bibilia i te taˈo mafatu fatata e tausani taime, te rahiraa ei taipe (aau). Mea faufaa roa ia taa eaha mau na te aau, te na ô ra hoi te Parau a te Atua e e mea tia ia tiai, aore ra ia paruru, i te reira.—A taio i te Maseli 4:23.
EAHA TE AAU?
3. E nafea tatou e ite ai eaha te “aau” i roto i te Bibilia? A faataa.
3 Noa ˈtu e aita te Bibilia e tataratara ra eaha te aau, e nehenehe tatou e ite i te auraa o teie taˈo. E nafea? A feruri na e te hiˈo ra oe i te hohoˈa nehenehe mau i hamanihia e te mau ofai iti tei tapiripirihia. E ite oe i te hohoˈa taatoa ia otohe oe i muri. Oia atoa no te ite eaha mau na te “aau,” e titauhia ia rave oe i te taime no te hiˈopoa i te mau irava Bibilia atoa i reira teie taˈo i te faahitiraahia. Eaha ïa te aau?
4. (a) Eaha ta te “aau” e faahohoˈa ra? (b) Eaha te auraa o ta Iesu mau parau i roto i te Mataio 22:37?
4 Ua faaohipa te feia papai Bibilia i te “aau” no te faataa i te huru o roto o te hoê taata, mai to tatou mau hinaaro, manaˈo, huru, haerea, aravihi, manaˈo turai e ta tatou mau fa. (A taio i te Deuteronomi 15:7; Maseli 16:9; Ohipa 2:26.) E ere râ pauroa te taime. Ei hiˈoraa, ua parau Iesu: “Hinaaro oe i to Atua ia Iehova ma to aau atoa, e ma to varua [aore ra ora] atoa, e ma to manaˈo atoa.” (Mat. 22:37) I ǒ nei, te faahohoˈa ra te “aau” i te huru aau, te hinaaro e te manaˈo hohonu o te taata o roto. Ma te faahiti hoê hoê i te aau, te ora e te manaˈo, ua haapapu Iesu i te faufaaraa ia faaite i to tatou here i te Atua ma to tatou huru oraraa e huru feruriraa e ma to tatou atoa manaˈo hohonu. (Ioa. 17:3; Eph. 6:6) Ia faahiti-noa-hia râ te “aau,” o te huru taata taatoa ïa.
NO TE AHA IA PARURU AI I TO TATOU AAU?
5. No te aha e rave ai i tei nehenehe no te tavini ia Iehova ma te aau hoê?
5 Ua haamanaˈo te arii Davida ia Solomona no nia i te aau: “E tau tamaiti, . . . ia ite hua oe i te Atua o to metua nei, a haamori ai ia ˈna ma te aau mau, e ma te tia roa: e imi hoi Iehova i te mau aau atoa ra, e te ite ra oia i te mau manaˈo atoa.” (Par. 1, 28:9) E hiˈopoa Iehova i te mau aau atoa e i to tatou atoa. (Mas. 17:3; 21:2) E hoa tatou no Iehova e e oraraa oaoa to tatou no a muri aˈe mai te peu noa e au te Atua i ta ˈna e ite i roto i to tatou aau. E pee anaˈe ïa i te aˈoraa faaurua a Davida ma te rave i tei nehenehe no te tavini ia Iehova ma te aau mau, oia hoi ma te aau hoê.
6. Eaha te haamanaˈo no nia i ta tatou faaotiraa e tavini ia Iehova?
6 Te faaite ra iho â to tatou itoito rahi ei Ite no Iehova e te hinaaro mau ra tatou e tavini i te Atua ma te aau hoê. Te haamanaˈo atoa ra tatou e e nehenehe te ao ino a Satani e to tatou huru taata hara e haafifi mau i ta tatou faaotiraa e tavini i te Atua ma to tatou aau atoa. (Ier. 17:9; Eph. 2:2) Ia ore te reira ia tupu, mea faufaa roa ia hiˈopoa tamau i to tatou aau. E nafea?
7. Na te aha e faaite eaha te huru o to tatou aau?
7 Aita e nehenehe e ite eaha to roto roa i te hoê tumu raau. Oia atoa aita e taata e nehenehe e ite eaha to tatou huru o roto. Mai ta Iesu i faahiti i roto i ta ˈna Aˈoraa i nia i te mouˈa, e itehia te raau maitai i ta ˈna maa hotu, oia atoa e itehia e e aau maitai to tatou i ta tatou mau ohipa. (Mat. 7:17-20) E hiˈopoa anaˈe i te tahi.
TE HOÊ RAVEA NO TE HIˈOPOA I TO TATOU AAU
8. Ia au i ta Iesu mau parau i roto i te Mataio 6:33, e nafea ia faaite eaha to roto i to tatou aau?
8 I roto i ta ˈna Aˈoraa i nia i te mouˈa, ua parau atoa Iesu i te feia e faaroo ra ia ˈna eaha te titauhia ia rave no te faaite i to ratou hinaaro e tavini ia Iehova ma te aau atoa. Ua na ô oia: “E mata na râ outou i te imi i te basileia o te Atua, e te parau-tia na ˈna; e amui-atoa-hia mai taua mau mea ra ia outou.” (Mat. 6:33) E faaite te mau mea ta tatou e tuu na mua i roto i to tatou oraraa eaha to tatou mau hinaaro e manaˈo, e eaha to roto i to tatou aau. Te hoê ravea maitai no te ite e te tavini ra tatou i te Atua ma te aau hoê, o te hiˈopoaraa ïa eaha te mau mea faufaa aˈe no tatou i roto i te oraraa.
9. Eaha te titau-manihini-raa a Iesu i te tahi mau taata? Eaha ta to ratou huru i faaite ?
9 E hiˈopoa anaˈe i tei tupu i muri iti noa ˈˈe i to Iesu faaitoitoraa i ta ˈna mau pǐpǐ ia “mata na . . . i te imi i te basileia.” Te faaite ra teie tupuraa e e itehia eaha te huru o te aau o te hoê taata ia au i te mau mea ta ˈna e tuu na mua i roto i to ˈna oraraa. Te faahiti ra Luka e “ua opua maite [Iesu] e haere i Ierusalema” noa ˈtu e ua ite maitai o ˈna eaha te tiai ra ia ˈna. A haere noa ˈi oia e ta ˈna mau aposetolo na te eˈatia, titau manihini aˈera Iesu i te tahi mau taata: “A pee mai ia ˈu.” Ua ineine ratou i te farii i teie titau-manihini-raa, te hinaaro nei râ ratou e rave na mua i te tahi ohipa. Ua pahono atu hoê: “A tuu aˈe na ia ˈu e haere au e tanu i tau metua tane.” Area te tahi atu: “E te Fatu, e pee atu vau ia oe; e tuu na râ [oe] ia ˈu, e poroi na vau i to ˈu ra fetii.” (Luka 9:51, 57-61) Aita ratou i farii maite e pee ia ˈna. Auê hoi taa-ê-raa rahi e o Iesu, tei faaoti maite e rave i te hinaaro o te Atua! Ma te haapao na mua i to ratou iho mau hinaaro, ua faaite teie mau taata e aita ratou e tavini ra i te Atua ma te aau hoê.
10. (a) Eaha te huru o te taata e rave rahi i te titau-manihini-raa a Iesu? (b) Eaha te faahohoˈaraa ta Iesu i horoa?
10 Taa ê atu i tera mau taata, ua farii tatou i te titau-manihini-raa a Iesu e pee ia ˈna e te tavini nei tatou ia Iehova i te mau mahana atoa. Te faaite nei ïa tatou e mea faufaa roa Iehova no tatou. Noa ˈtu râ e mea itoito tatou i roto i te amuiraa, e nehenehe noâ to tatou aau e fifihia. I te aha? Ta Iesu ïa i faaite i te mau taata ta ˈna i titau manihini e pee ia ˈna: “O te taata e tuu i te rima i nia i te arote a hiˈo ai i muri, e ore ïa e au i te basileia o te Atua.” (Luka 9:62) Eaha ta teie faahohoˈaraa e haapii maira?
TE ATI RA ANEI TATOU I TE MAITAI?
11. I roto i te faahohoˈaraa a Iesu, eaha te huru o te ohipa a te taata e arote nei, e no te aha?
11 No te taa maitai i te haapiiraa o te faahohoˈaraa poto a Iesu, e feruri anaˈe eaha paha te huru o teie taata e arote nei. Mea rahi ta ˈna ohipa. E a arote noa ˈi, manaˈonaˈo noa ˈtura o ˈna i to ˈna fare, to reira hoi to ˈna utuafare e to ˈna mau hoa, oia atoa i te upaupa, te ataata e te marumaru. Auê oia i te hinaaro i tera mau mea! Arote noa ˈtura o ˈna maa taime e puai roa maira to ˈna hinaaro i te mau mea maitatai o te oraraa. Hiˈo aˈera oia i muri. Noa ˈtu e mea rahi â te ohipa hou a nehenehe ai e tanu, te nevaneva noa nei teie taata e aita oia i rave maitai faahou i ta ˈna ohipa. Mea papu e ua inoino te fatu o te faaapu no te mea aita te taata arote i faaoromai noa.
12. E nafea te taata arote o te faahohoˈaraa a Iesu e tuea ˈi e te tahi mau Kerisetiano i teie mahana?
12 E hiˈopoa anaˈe e nafea teie tupuraa e tuea ˈi i te nehenehe e itehia i teie mahana. Te taata faaapu, o te hoê ïa Kerisetiano e au ra e mea maitai o ˈna i te pae varua. Te fifi nei râ to ˈna aau. E feruri anaˈe i te hoê taeae o te apiti tamau ra i te taviniraa. Noa ˈtu e te haere nei oia i te mau putuputuraa e i roto i te pororaa, manaˈonaˈo noa aˈenei oia i te tahi mau mea o teie nei ao mea au roa na ˈna. I roto i to ˈna aau, te hinaaro mau nei oia i tera mau mea. Tau matahiti to teie taeae taviniraa ia Iehova e puai roa ˈtura to ˈna hinaaro i tera mau mea o teie nei ao. Hiˈo atura oia i muri. Noa ˈtu e mea rahi â te ohipa e rave i roto i te taviniraa, aita o ˈna i tamau i te ‘faaite atu i te parau ora’ e i te tavini i te Atua mai i na mua ˈˈe. (Phil. 2:16) E mauiui Iehova, “te Fatu o te ohipa,” ia faaea hoê o ta ˈna mau tavini i te faaoromai.—Luka 10:2.
13. Eaha te auraa e tavini ia Iehova ma te aau hoê?
13 Mea papu maitai te haapiiraa. E ere te taviniraa i te Atua ma te aau hoê i te haere-tamau-noa-raa i te mau putuputuraa e i roto i te pororaa. (Par. 2, 25:1, 2, 27) Mea atâta no te hoê Kerisetiano ia tamau noa i te hinaaro, i roto i to ˈna aau, i te tahi mau tuhaa o te huru oraraa o teie nei ao. E fifihia hoi to ˈna auhoaraa e o Iehova. (Luka 17:32) I te taime noa tatou e ‘riaria ai i te ino e e ati ai i te maitai’ ‘e au ai ia tatou te Basileia o te Atua.’ (Roma 12:9; Luka 9:62) Mea au paha te tahi mau mea o te ao a Satani aore ra e au ra e mea faufaa. Eiaha roa ˈtu râ tera mau mea ia tapea ia tatou ia tavini i te Atua ma to tatou aau atoa.—Kor. 2, 11:14; a taio i te Philipi 3:13, 14.
A VAI ARA NOA!
14, 15. (a) E nafea Satani e haaparuparu ai i to tatou itoito rahi no te taviniraa ia Iehova? (b) Te aha ra Satani no te faahema ia tatou? A faataa.
14 No to tatou here ia Iehova, ua pûpû tatou ia tatou no ˈna. Mai reira mai, mea rahi o tatou tei faaite i ta tatou faaotiraa e tapea i te aau hoê no Iehova. Aita râ Satani i tuu atura. O to tatou noâ aau ta ˈna fa. (Eph. 6:12) Ua taa paha ia ˈna e eita tatou e faarue taue noa ia Iehova. No reira o ˈna e faaohipa ˈi, ma te haavarevare, i “teie nei ao” no te haaparuparu mǎrû noa i to tatou itoito rahi haavare ore no te Atua. (A taio i te Mareko 4:18, 19.) No te aha teie raveraa a Satani e manuïa ˈi?
15 No te pahono, a feruri na e te taio nei oe i te hoê buka i roto i te hoê piha mea pura maitai te mori. Paapaa mai nei te mori, to roto atura oe i te poiri. Oioi oe i te haere e tii i te mea apî no te taui, e pura faahou mai nei. I te po i muri iho, aita oe i ite, ua tauihia ta oe mori e te hoê mea iti aˈe te puai. E ite anei oe i te taa-ê-raa? Aita paha. I te mahana i muri iho, e mori mea iti faahou aˈe te puai tei tuuhia. Eita paha oe e haapao. No te aha hoi mea fifi ai ia ite i te reira? Aita i taui-taue-hia te puai o te mori. Oia atoa e faaiti riirii mai teie ao a Satani i to tatou itoito rahi no te taviniraa ia Iehova. Ia ore te hoê Kerisetiano e vai ara, eita o ˈna e ite e ua iti mǎrû noa mai to ˈna itoito rahi, e ua manuïa ïa o Satani.—Mat. 24:42; Pet. 1, 5:8.
MEA FAUFAA ROA TE PURE
16. E nafea ia paruru ia tatou i te mau marei a Satani?
16 E nafea ia paruru ia tatou i te mau marei a Satani e ia tamau i te tavini ia Iehova ma te aau hoê? (Kor. 2, 2:11) Mea faufaa roa te pure. Ua faaitoito na mua Paulo i te mau Kerisetiano ia “patoi atu i te mau ravea paari a te diabolo.” E ua parau atura ia ratou ia pure ma te “tuutuu ore” ‘i te mau pure e aniraa atoa.’—Eph. 6:11, 18; Pet. 1, 4:7.
17. Eaha te haapiiraa e huti mai i te mau pure a Iesu?
17 No te mau papu noa i mua ia Satani, e pee anaˈe i te hiˈoraa o Iesu o tei faaite i to ˈna hinaaro e tavini noa ia Iehova ma te aau hoê. A hiˈo na i ta Luka i faaite no nia i te huru o Iesu a pure ai oia i te po hou to ˈna poheraa: “No te mea te rahi noa ra to ˈna mauiui oto, uˈana roa ˈtura ta ˈna pure.” (Luka 22:44) Ua pure uˈana noa iho â Iesu. I tera râ taime, i mua i te tamataraa ino roa ˈˈe o to ˈna oraraa, ua “uˈana roa ˈtura” ta ˈna pure, e ua pahonohia mai oia. Te faaite ra to ˈna hiˈoraa e mea puai aˈe iho â te pure i te tahi taime. No reira, ia pure uˈana roa ˈtu â tatou ia Iehova no te ani i ta ˈna parururaa i mua i te mau tamataraa ino roa ˈˈe e te mau marei haavarevare roa ˈˈe a Satani.
18. (a) Eaha te ui no nia i ta tatou mau pure, e no te aha? (b) Eaha te tahi mau ravea faufaa e rave ia maitai noa to tatou aau, e ia aha ïa? (A hiˈo i te tumu parau tarenihia i nia nei.)
18 Eaha te itehia ia pure uˈana tatou? Ua parau Paulo: “E faaite hua . . . i to outou hinaaro i te mau mea atoa nei i te Atua, i te pure, i te aniraa ˈtu ma te haamaitai. E na te hau a te Atua, o tei hau ê atu i te ite taata nei, e faaitoito mai i to outou aau.” (Phil. 4:6, 7) E mea tia ia pure uˈana tatou e ma te tamau no te tavini noa ia Iehova ma te aau atoa. (Luka 6:12) E ui anaˈe ïa: ‘Te pure uˈana ra anei au e ma te tamau?’ (Mat. 7:7; Roma 12:12) E faaite mai ta tatou pahonoraa i te puai o to tatou hinaaro e tavini i te Atua.
19. Ia aha tatou ia hoê noa to tatou aau no Iehova?
19 Mai tei hiˈopoahia mai, e ite-maitai-hia te huru o to tatou aau i te mau ohipa ta tatou e tuu na mua i roto i to tatou oraraa. Ia papu ia tatou e eita te mau mea ta tatou i vaiiho i muri aore ra te mau marei haavarevare a Satani e haafifi i ta tatou faaotiraa e tavini ia Iehova ma te aau atoa. (A taio i te Luka 21:19, 34-36.) Mai ia Davida, e taparuparu noa anaˈe ia Iehova: “Ia rotahi maite hoi tau aau.”—Sal. 86:11.
[Uiraa haapiiraa]
[Tumu parau tarenihia i te api 23]
E TORU RAVEA FAUFAA IA MAITAI TO TATOU AAU
Te vai ra te mau ravea faufaa ia pee ia maitai noa to tatou mafatu. Te vai atoa ra te ravea faufaa o te tauturu ia tatou ia maitai noa to tatou aau. E hiˈopoa anaˈe e toru:
1 Te maa: E titau to tatou mafatu i te tahi faito maa maitai no te ea. Oia atoa mea faufaa roa ia papu e te navai maitai ra ta tatou maa pae varua maoti ta tatou iho haapiiraa, te feruriruriraa e te haere-tamau-raa i te mau putuputuraa.—Sal. 1:1, 2; Mas. 15:28; Heb. 10:24, 25.
2 Te faaetaetaraa tino: I te tahi taime, no to ˈna maitai, e mea tia ia tupaipai vitiviti aˈe te mafatu. Oia atoa e maitai noa to tatou aau ia apiti tatou i te taviniraa ma te itoito rahi, peneiaˈe ma te faaitoito i te poro rahi atu â.—Luka 13:24; Phil. 3:12.
3 Te amuimuiraa: E nehenehe to tatou mafatu e maˈihia ia ohipa e ia ora tatou i rotopu i te mau taata aita e faatura ra i te Atua. Hoê â no to tatou aau. E nehenehe râ e faaiti mai i tera ahoaho ma te amuimui i to tatou mau hoa haamori mea hoê to ratou aau no te Atua e o te hinaaro ra i to tatou maitai.—Sal. 119:63; Mas. 13:20.
