‘Ia mau maite outou i ta ˈu parau’

“I[a] mau maite outou i ta ˈu parau, e pǐpǐ mau ia outou na ˈu i reira. E ite ïa outou i te parau mau, e na te parau mau outou e faatiamâ.”—IOANE 8:31, 32.

Eaha te auraa? No ǒ roa mai te “parau” a Iesu, oia hoi ta ˈna mau haapiiraa, i te hoê tumu teitei aˈe. Ua na ô oia: “Na te Metua râ i tono mai ia ˈu nei ra i faaue mai ia ˈu i te parau ia parau vau e ia haapii au.” (Ioane 12:49) Ua parau Iesu i to ˈna Metua i te raˈi, te Atua ra o Iehova, i roto i te pure: “O to parau na te parau mau.” E pinepine oia i te faahiti i te Parau a te Atua no te haapapu i ta ˈna mau haapiiraa. (Ioane 17:17; Mataio 4:4, 7, 10) E mau maite ïa te Kerisetiano mau i ta ˈna parau ma te farii i te Parau a te Atua, te Bibilia, ei “parau mau” e ei niu mana roa ˈˈe o ta ratou mau tiaturiraa e haaraa.

Ua pee maite anei te mau Kerisetiano matamua i te reira? Ua papai te aposetolo Paulo e rave rahi buka Bibilia, e mai ia Iesu, ua faatura o ˈna i te Parau a te Atua. Ua na ô oia: “Te mau parau moˈa atoa i papaihia ra e mea faaurua mai ïa e te Atua, e e mea maitai.” (Timoteo 2, 3:16) E mea tia ia “tapea maite” te mau taeae faatoroahia no te haapii i to ratou mau hoa Kerisetiano i te parau mau o te Parau a te Atua. (Tito 1:7, 9) Ua faauehia i te mau Kerisetiano matamua ia patoi i “te parau paari e te haavare faufaa ore a te hoê taata ˈtu, i te parau tutuu a te taata nei, mai te â rii a teie nei ao ra, aore i au i ta te Mesia.”—Kolosa 2:8.

O vai te na reira atoa nei i teie mahana? Te parau ra te tahi papai a te Vaticana (Dogmatic Constitution on Divine Revelation), tei fariihia i 1965 e tei faahitihia i roto i te tahi papai Katolika (Catechism of the Catholic Church): “Eita te Ekalesia [Katolika] e niu noa i te papuraa o te mau mea i faaitehia mai i nia i te mau Papai Moˈa. E mea tia ïa ia fariihia e ia faaturahia te mau Papai Moˈa mai te mau tutuu atoa ma te paieti e te tura.” Ia au i te hoê vea (Maclean’s), ua ui te hoê faatere hau no Toronto i Kanada, ‘No te aha tatou e hinaaro ai i te hoê taata tei ora a piti tausani matahiti aˈenei no te aratai ia tatou? E manaˈo faahiahia to tatou tei tuu-noa-hia i te hiti no te mea e tia ia tatou ia niu i te reira i nia ia Iesu e i te mau Papai.’

No nia i te mau Ite no Iehova, te na ô ra te hoê buka ite rahi (New Catholic Encyclopedia): “Te faariro nei ratou i te Bibilia ei niu otahi roa o ta ratou tiaturiraa e haerea.” I Kanada, a faaite ai te hoê Ite no Iehova o vai o ˈna, ua tâpû te hoê taata i ta ˈna parau e ma te tohu i te Bibilia ua na ô atu: “Ua ite au o vai outou, teie hoi te tapao.”