Ta te Parau a te Atua e haapii maira

Eaha te tiai ra i te mau haapaoraa?

I roto i teie tumu parau, e ite oe i te mau uiraa ta oe paha i uiui na e ihea e taio ai i te pahonoraa i roto i ta oe Bibilia. E oaoa te mau Ite no Iehova i te aparau no nia i teie mau pahonoraa e oe.

1. Mea maitai anei te mau haapaoraa atoa?

E taata aau haavare ore iho â to roto i te mau haapaoraa atoa. Te ite ra e te haapao ra te Atua i tera mau taata. Te mea peapea râ, te rave nei vetahi i te mau ohipa ino i te iˈoa o te Atua. I na mua ˈˈe, i haamauiui na te mau aratai haapaoraa i te feia i patoi ia ratou. (Korinetia 2, 4:3, 4; 11:13-15) I teie mahana, ia au i te mau parau apî, ua faaitoito te tahi mau aratai haapaoraa i te ohipa totoaraa, ua turu i te tamaˈi aore ra ua rave ino i te mau tamarii.—A taio i te Mataio 24:3-5, 11, 12.

Te haapii ra te Bibilia e e piti huru haapaoraa: te haapaoraa mau e te haapaoraa hape. Aita te haapaoraa hape e haapii nei i te parau mau no nia i te Atua. Te hinaaro nei râ te Atua ra o Iehova ia ite te taata i te parau mau no nia ia ˈna.—A taio i te Timoteo 1, 2:3-5.

2. Eaha te tiai ra i te mau haapaoraa?

Aita te Atua e hinaaro ra e ia haavarehia te taata e te mau haapaoraa o te parau ra e here ia ˈna e o te ore râ e haapii atu i te parau mau no nia ia ˈna. Te au nei te feia e turu ra i tera mau haapaoraa i teie nei ao faaterehia e Satani te Diabolo. (Iakobo 4:4; Ioane 1, 5:19) Te faaau ra te Parau a te Atua i te mau haapaoraa e turu ra i te mau faatereraa taata, eiaha râ i te Atua, i te hoê vahine faaturi. Te pii nei te Bibilia i teie vahine faaturi, “Babulonia rahi,” no te oire tahito i reira te haamataraa te haapaoraa hape i muri aˈe i te diluvi i te tau o Noa. Fatata roa te Atua i te haamou taue i te mau haapaoraa o te haavare ra e o te haavî ra i te huitaata.—A taio i te Apokalupo 17:1, 2, 5, 17; 18:8, 23, 24.

  3. E nafea te Atua e hopoi mai ai i te oaoa i te mau fenua atoa?

Fatata roa te haapaoraa hape i te haamouhia. E parau apî maitai teie. E tiamâ mai hoi te huitaata i te haavîraa. Eita te mau haapaoraa hape e haavare e e faataa ê faahou i te taata. E tahoê te huitaata no te haamori i te Atua mau hoê roa.—A taio i te Isaia 11:9; Apokalupo 18:20, 21; 21:3, 4.

4. Ia aha te feia aau haavare ore?

Aita i moehia ia Iehova te feia aau haavare ore tei purara ê i roto i te mau haapaoraa hape na te ao. Te haaputuputu nei oia i tera mau taata ma te haapii ia ratou te parau mau.—A taio i te Mika 4:2, 5.

Te farii nei Iehova i roto i to ˈna utuafare te feia atoa e hinaaro ra e tavini ia ˈna. E patoi mai paha to tatou mau hoa e fetii ia haamata tatou i te tavini ia Iehova, e faufaa-rahi-hia râ tatou. E fanaˈo tatou i te auhoaraa e te Atua, i te hoê utuafare fetii apî e te î i te here e i te tiaturiraa o te ora mure ore.—A taio i te Mareko 10:29, 30; Korinetia 2, 6:17, 18.

No te faahohonu atu â, a hiˈo i te pene 15 e te 16 o teie buka, Eaha ta te Bibilia e haapii mau ra?, piahia e te mau Ite no Iehova.

[Faaiteraa i te fatu o te hohoˈa i te api 26]

The Complete Encyclopedia of Illustration/J. G. Heck