Taata faaroo aau haavare ore e melo huiraatira haapao maitai—E nafea?

EAHA na tapao e piti o te taviniraa a Iesu? A tahi, ua hinaaro oia e taui i te aau o te taata, eiaha râ i te mau faanahoraa poritita. A hiˈo na i ta Iesu i faataa i roto i ta ˈna Aˈoraa i nia i te mouˈa. Hou a faahiti ai i te faufaaraa ia riro ei miti e ei maramarama, ua parau oia i te feia e faaroo ra ia ˈna e o te taata o te haapao i te parau a te Atua te ite i te oaoa mau. E ua na ô atoa oia: “E ao to tei mǎrû; . . . to tei mâ te aau; . . . to tei faatupu i te parau hau.” (Mataio 5:1-11) Ua tauturu Iesu i ta ˈna mau pǐpǐ ia ite i te faufaaraa ia faaau i to ratou huru feruriraa e huru aau i te mau ture aveia a te Atua no nia i te maitai e te ino. E ia tavini atoa i te Atua ma te aau hoê.

Te piti, no to Iesu aumihi a ite ai i te tupuraa peapea o te taata, ua tamǎrû oia i to ratou mauiui. E ere râ ta ˈna fa i te faaoreraa i te mau ati atoa. (Mataio 20:30-34) Ua faaora oia i te taata maˈi, te maˈi noa nei râ te huitaata. (Luka 6:17-19) Ua tamǎrû oia i tei haavîhia, te mauiui noa nei râ te taata i te ohipa tia ore. Ua faatamaa oia i te feia i poia, te pohe noa nei râ te taata no te oˈe.—Mareko 6:41-44.

E taui i te aau e e tamǎrû i te mauiui

No te aha Iesu i tutava noa ˈi i te taui i te aau e i te tamǎrû i te mauiui eiaha râ i te taui i te mau faanahoraa poritita aore ra i te faaore i te ahoaho? Ua ite Iesu e ua opua te Atua e faaohipa i to ˈNa Basileia no te haamou i te taatoaraa o te mau faatereraa taata e i te mau tumu atoa o te mauiui. (Luka 4:43; 8:1) I te tahi taime, ua hinaaro te mau pǐpǐ a Iesu e ia faaea noa o ˈna i te hoê oire no te faaora i tei maˈihia. Ua parau atura Iesu ia ratou: “Mai haere tatou i te mau oire fatata nei ia parau haere atoa vau i te basileia i reira; o to ˈu hoi ïa tere i haere mai ai.” (Mareko 1:32-38) Ua tamǎrû Iesu i te mauiui pae tino o te taata e rave rahi. Teie râ, o te pororaa e te haapiiraa ˈtu i te Parau a te Atua te mea faufaa aˈe no ˈna.

Te tutava nei te mau Ite no Iehova i te pee i te hiˈoraa o Iesu i roto i ta ratou ohipa pororaa. Te tamǎrû nei ratou i te mauiui ma te horoa i te tauturu e au i te feia e hinaaro ra. Aita râ ratou e tutava ra i te faaore i te mau ohipa tia ore o te ao. No ratou, na te Basileia o te Atua e faaore i te mau tumu atoa o te mauiui. (Mataio 6:10) Mai ia Iesu, te faaitoito nei ratou i te taui i te aau, eiaha râ i te mau faanahoraa poritita. Mea tano te reira, e ere hoi te mau fifi matamua o te taata i te mau fifi poritita, o te mau fifi morare râ.

E melo huiraatira haapao maitai

Te manaˈo atoa nei te mau Ite no Iehova e e hopoia Kerisetiano te riroraa ei melo huiraatira maitai. No reira ratou e faatura ˈi i te mana faatere. Na roto i ta ratou mau papai e ohipa pororaa, te faaitoito nei ratou i te taata ia auraro i te ture. Ia patoi tia ˈtu râ te hoê titauraa a te faatereraa i te ture a te Atua, “o te Atua ta [r]atou e faaroo e tia ˈi eiaha te taata.”—Ohipa 5:29; Roma 13:1-7.

E haere te mau Ite no Iehova e farerei i te feia atoa o to ratou vahi no te pûpû i te  haapiiraa Bibilia tamoni ore. E mirioni aau tei taui maoti teie haapiiraa. I te matahiti taitahi, e hanere tausani taata te tauturuhia ra ia haapae i te mau peu ino mai te puhipuhiraa i te avaava, te inu-hua-raa i te ava, te raveraa i te raau taero e te ohipa taiata. Ua riro mai ratou ei melo huiraatira haapao maitai i te pae morare i to ratou haapiiraa i te faaohipa i te mau faaueraa tumu Bibilia i roto i to ratou oraraa.

Hau atu â, te tauturu ra te haapiiraa Bibilia i te mau melo utuafare ia faatura ˈtu â i te tahi e te tahi e ia haamaitai i te aparauraa i rotopu i na hoa faaipoipo, i te metua e te tamarii, e i rotopu i te mau tamarii. E piri roa ˈtu â ïa te taairaa o te mau melo utuafare. E e maitai roa ˈtu â te totaiete i teie mau utuafare.

I muri aˈe i te hiˈopoaraa i te mau tuhaa o teie mau tumu parau, eaha to oe manaˈo? Te farii ra anei te Bibilia i te feia e anoi ra i te haapaoraa e te poritita? Mea papu te pahonoraa: aita. E titauhia anei ia riro te mau Kerisetiano mau ei melo huiraatira haapao maitai? E, e mea titauhia. E nafea ïa? Ma te pee i te faaueraa a Iesu ia riro mai te miti e te maramarama no te ao nei.

E maitaihia te feia e tutava ra i te faaohipa i teie mau aratairaa papu a te Mesia. E maitai-atoa-hia to ratou utuafare e to ratou feia tapiri. E oaoa te mau Ite no Iehova no to oe vahi i te faaite atu ia oe hau atu â haamaramaramaraa no nia i te haapiiraa Bibilia e ravehia ra i ǒ outou. a

[Nota i raro i te api]

[Parau iti faaôhia i te api 7]

Ua hinaaro Iesu e taui i te aau, eiaha râ i te mau faanahoraa poritita

[Parau iti faaôhia i te api 8]

Te manaˈo nei te mau Ite no Iehova e e hopoia Kerisetiano te riroraa ei melo huiraatira maitai