A tavini i te Atua o te horoa i te tiamâraa

“Teie hoi te hinaaro i te Atua, o te haapao i ta ˈna ra parau: e ere hoi ta ˈna parau i te mea teimaha.”—IOA. 1, 5:3.

E NEHENEHE ANEI OUTOU E PAHONO?

Te aha ra Satani ia manaˈo tatou e mea teimaha ta te Atua mau ture?

No te aha ia haapao maitai ai i ta tatou mau amuimuiraa?

Eaha te tauturu ia tatou ia vai taiva ore i te Atua o te horoa i te tiamâraa?

1. E nafea Iehova e faaohipa ˈi i to ˈna tiamâraa? Mea nafea oia i te faaiteraa i te reira i nia ia Adamu raua Eva?

 TEI ia Iehova anaˈe te tiamâraa otia ore. Aita roa ˈtu râ oia e faaohipa ino ra i te reira aore ra e hiˈopoa ra i te mau mea rii atoa ta ta ˈna mau tavini e rave ra. Ua horoa ˈtu oia i te tiamâraa no te rave i te faaotiraa e no te haamâha i to ratou mau hinaaro tia. A hiˈo na, ua horoa te Atua i te hoê noa opaniraa etaeta ia Adamu raua Eva, eiaha e amu i “te raau e ite ai i te maitai e te ino.” (Gen. 2:17) Mea faahiahia mau â ïa to raua tiamâraa no te haapao i te hinaaro o to raua Atua Poiete!

2. No te aha to tatou na metua matamua i ere ai i te tiamâraa ta te Atua i horoa ˈtu?

² No te aha te Atua i horoa ˈi i to tatou na metua matamua tera huru faito tiamâraa? Ua hamani oia ia raua ma to ˈna huru e ua horoa i te hoê manaˈo haava. Ua hinaaro oia e ia rave raua i te mea maitai no to raua here i to raua Atua Poiete. (Gen. 1:27; Roma 2:15) Ma te peapea, aita Adamu raua Eva i haamauruuru i to raua Atua Poiete e i haafaufaa i te tiamâraa ta ˈna i horoa ˈtu. Ua hinaaro raua i te tiamâraa ta Satani i pûpû atu no te maiti i te mea maitai e te mea ino. Aita râ raua i fanaˈo hau atu â tiamâraa. Ua hoo to tatou na metua matamua ia raua e i to raua huaai ei tîtî no te hara ma te mau faahopearaa peapea mau.—Roma 5:12.

3, 4. Te aha ra Satani no te faahema ia tatou no nia i te mau ture aveia a Iehova?

³ Ua nehenehe Satani e turai e piti taata tia roa e e rave rahi melahi ia patoi i te mana arii o te Atua. Eita atoa anei ïa oia e nehenehe e faahema ia tatou? Aita ta ˈna mau ravea i taui. Te tamata noa nei oia i te  faahema ia tatou ia manaˈo e e mea teimaha ta Iehova mau ture aveia e e faaere te reira ia tatou i te mau mea navenave o te oraraa. (Ioa. 1, 5:3) E manaˈo iho â tatou mai tera ia faaroo pinepine tatou i te reira. “Ua ohipa puai te mau amuimuiraa ino i nia ia ˈu no to ˈu iho â râ riaria e ia taa ê to ˈu manaˈo i to to ˈu mau hoa,” ta te hoê ïa tuahine e 24 matahiti tei faaturi na i parau. Ua ite atoa paha oe i te hoê â faaheporaa no ǒ mai i te hoa.

⁴ Te mea peapea, e ite-atoa-hia tera mau amuimuiraa ino i roto i te amuiraa Kerisetiano. “Ua matau vau i te tahi feia apî tei haamatau na i te feia e ere i te Ite,” ta te hoê ïa taeae apî i parau. “I te pae hopea râ, ua ite au e hau atu â vau i te haere na muri ia ratou, hau atu â vau i te riro mai ia ratou. Ua haamata vau i te topatopa i te pae varua. Aita vau i anaanatae faahou i te mau putuputuraa e mea varavara roa vau i te haere i roto i te taviniraa. I reira vau i te taaraa e e mea tia ia faaea vau i te amuimui i tera mau hoa, e tera iho â ta ˈu i rave!” Te taa ra anei ia oe e e puai rahi to to oe mau hoa i nia ia oe? A hiˈo na i te hoê hiˈoraa Bibilia e tano no teie tau.—Roma 15:4.

UA EIÂ O ˈNA I TO RATOU AAU

5, 6. Mea nafea Abasaloma i te haavareraa ia vetahi atu? Ua manuïa anei ta ˈna i opua?

⁵ Mea rahi te hiˈoraa Bibilia o te feia tei haafifi ia vetahi atu. O Abasaloma te tahi, te tamaiti a te arii Davida. Mea haviti mau o Abasaloma. Tera râ, mai ia Satani, ua vaiiho oia i te nounou toroa ia rahi mai i roto i to ˈna aau e ua hinaaro aˈera i  te terono o to ˈna metua, tei ore hoi i tia ia ˈna. * No te haru i te terono, ua faahua tâuˈa Abasaloma i te mau Iseraela a haavarevare ai e aita te arii e haapao ra ia ratou. Oia mau, mai te Diabolo i roto i te ǒ i Edene, ua faaite Abasaloma ia ˈna mai te hoê taata o te hinaaro i to vetahi atu maitai e i te hoê â taime ua faaino mau i to ˈna metua tane.—Sam. 2, 15:1-5.

⁶ Ua manuïa anei ta Abasaloma i opua? Ua manuïa i nia i te tahi faito, te parau ra hoi te Bibilia: “Ua na reira hoi Abasaloma i te eiâ i te aau o te taata o Iseraela.” (Sam. 2, 15:6) I te pae hopea râ, ua aratai te teoteo o Abasaloma i to ˈna pau, i to ˈna pohe e i te pohe o e tausani taata tei vare ia ˈna.—Sam. 2, 18:7, 14-17.

7. Eaha te mau haapiiraa e huti mai i te aamu o Abasaloma? (A hiˈo i te hohoˈa i te api 18.)

⁷ No te aha tera mau Iseraela i vare ohie ai? Ua hinaaro paha ratou i ta Abasaloma i fafau atu aore ra ua hiˈo noa i to ˈna haviti. Atira noa ˈtu, ua papu tatou i teie: Aita ratou i vai taiva ore ia Iehova e i te arii ta ˈna i maiti. I teie mahana, te faaohipa noa nei Satani i te mau taata mai ia Abasaloma no te tamata i te eiâ i te aau o te mau tavini a Iehova. ‘Mea etaeta roa ta Iehova mau faaueraa,’ ta ratou paha e parau mai. ‘A hiˈo na i te feia atoa o te ore ra e tavini ia Iehova. Mea oaoa aˈe ratou!’ E taa anei ia oe e e haavare au ore mau tera mau parau a vai taiva ore noa ˈi i te Atua? E taa anei ia oe e o ta Iehova anaˈe “ture tia roa,” te ture a te Mesia, te aratai ia oe i te tiamâraa mau? (Iak. 1:25) Mai te peu e e, a poihere i tera ture e eiaha roa ˈtu e faaohipa i to oe tiamâraa Kerisetiano ma te tano ore.—A taio i te Petero 1, 2:16.

8. Eaha te tahi mau hiˈoraa e faaite ra e eita te taata e oaoa ia tâuˈa ore ratou i te mau ture aveia a Iehova?

⁸ O te feia apî iho â ta Satani e hinaaro ra e faahema. Teie ta te hoê taeae e 30 tiahapa matahiti i parau no nia i to ˈna taurearearaa: “No ˈu, e taotiaraa te mau ture aveia morare a Iehova, e ere i te parururaa.” Ua faaturi atura oia. Aita râ te reira i faaoaoa ia ˈna. Ua parau oia: “Ua vai noa te manaˈo faahapahapa e tatarahapa tau matahiti i te maoro.” No nia i to ˈna taurearearaa, ua papai te hoê tuahine: “Ua faaturi au, i muri iho râ, ua oto roa vau e ua manaˈo atura e mea faufaa ore au. Noa ˈtu e ua mairi 19 matahiti, e hoˈi faahou mai tera mau hape tahito i roto i te feruriraa.” Ua na ô te tahi atu tuahine: “Ua toaruaru roa vau i te pae feruriraa, i te pae varua e i te pae aau i te manaˈo e ua haamauiui to ˈu haerea i te feia ta ˈu e here mau ra. E ere roa ˈtu i te mea au ia ora aita anaˈe ta Iehova farii maitai.” Aita Satani e hinaaro ra ia manaˈo oe i teie mau faahopearaa o te hara.

9. (a) Eaha te mau uiraa o te tauturu ia tatou ia hiˈopoa i to tatou manaˈo no nia ia Iehova e ta ˈna mau ture e faaueraa tumu? (b) No te aha mea faufaa ˈi ia ite maitai o vai te Atua?

⁹ Mea peapea ia parau e mea rahi te feia apî i roto i te parau mau, oia atoa te mea paari aˈe, tei mauiui i te mau faahopearaa o to ratou faaroo ore i te Atua! (Gal. 6:7, 8) A uiui ïa: ‘E haavareraa ino iho â anei no ˈu te mau opuaraa a Satani? Te faariro ra anei au ia Iehova ei Hoa piri roa no ˈu, mai te hoê hoa o te faaite noa mai i te parau mau e o te hinaaro noa i te mea maitai aˈe no ˈu? Ua papu anei ia ˈu e eita roa ˈtu oia e faaere ia ˈu i te tahi mea maitai mau e oaoa ˈi au?’ (A taio i te Isaia 48:17, 18.) No te pahono i te hoê “E” haavare ore, eita e navai ia ite rii noa o vai ra o Iehova. E titauhia ia matau maitai tatou ia ˈna e ia  farii i te mau ture e faaueraa tumu Bibilia mai te hoê tapao o to ˈna here ia tatou, eiaha râ mai te hoê taotiaraa.—Sal. 25:14.

A PURE IA NOAA TE HOÊ AAU FAAROO E TE PAARI

10. No te aha ia tutava ˈi tatou i te pee i te hiˈoraa o te arii apî ra o Solomona?

¹⁰ A apî noa ˈi o Solomona, ua pure oia ma te haehaa: “E taata apî hoi au; aore au i ite maitai i ta ˈu nei haapaoraa.” Ua pure atura oia ia noaa ia ˈna te hoê aau faaroo e te paari. (Arii 1, 3:7-9, 12) Ua pahono Iehova i ta ˈna aniraa haavare ore e e na reira atoa oia no oe, mea apî anei oe aore ra aita. Parau mau, eita Iehova e horoa semeio atu i te ite e te paari. E noaa râ ia oe te paari ia tamau oe i te haapii i ta ˈna Parau, i te pure no te ani i te varua moˈa, e i te haafaufaa i te maa pae varua ta ˈna i faanaho na roto i te amuiraa Kerisetiano. (Iak. 1:5) Mea na reira Iehova e faariro ai i ta ˈna mau tavini apî ei mea paari aˈe i te feia atoa e tâuˈa ore ra i ta ˈna aˈoraa e i “te feia paari e te ite” o teie nei ao.—Luka 10:21; a taio i te Salamo 119:98-100.

11-13. (a) Eaha te haapiiraa faufaa e huti mai i te Salamo 26:4, i te Maseli 13:20 e i te Korinetia 1, 15:33? (b) E nafea oe e faaohipa ˈi i teie mau aratairaa Bibilia?

¹¹ E tauturu mai te hiˈopoaraa i te mau irava i muri nei ia taa i te faufaaraa o te haapiiraa i te Bibilia e o te feruriruriraa i ta tatou e taio ra no te ite maitai o vai ra o Iehova. E aratairaa faufaa roa to roto i te irava taitahi no nia i ta tatou mau amuimuiraa: “Aore au i parahi i roto i te mau taata haapao ore i te parau, aore hoi i amui i roto i te feia haavare.” (Sal. 26:4) “O tei amui atoa to ˈna haerea i to te feia paari ra, e paari atoa ïa; o tei amui râ i te feia maamaa ra, e pohe ïa.” (Mas. 13:20) “E ino te parau maitai i te amuiraa iino.”—Kor. 1, 15:33.

¹² Eaha te mau haapiiraa faufaa e huti mai i teie mau irava? (1) Te hinaaro ra Iehova e ia maiti maitai tatou i to tatou mau hoa. Te hinaaro ra oia e paruru ia tatou i te pae morare e i te pae varua. (2) E turai ta tatou mau amuimuiraa ia tatou ia rave i te mea maitai aore ra i te mea ino. Mai tera iho â te oraraa. Te faaite ra te huru papairaa o te mau irava i nia nei e te hinaaro ra Iehova e haaputapû i to tatou aau. A tapao na e aita e faatureraa i roto i teie mau irava mai teie, “eiaha roa ˈtu oe e . . .” E parau mau râ te reira. E au ra e te na ô mai nei Iehova: ‘Teie tei titauhia ia ite oe. Eaha ta oe e rave? Eaha to roto i to aau?’

¹³ I te mea e e parau mau tumu teie na irava e toru, e tano noâ tera mau parau i teie tau e i roto e rave rahi tupuraa. A uiui na: E nafea ia ore e faahoa ˈtu i “te feia haavare”? I roto i teihea mau tupuraa e nehenehe ai au e amui atu ia ratou? (Mas. 3:32; 6:12) O vai “te feia paari” ta Iehova e hinaaro ra e ia amui atu vau? O vai “te feia maamaa” ta ˈna e hinaaro ra e ia ape au? (Sal. 111:10; 112:1; Mas. 1:7) Eaha tera mau “parau maitai” ta ˈu e faaino ia maiti au i te mau amuimuiraa ino? To roto noa anei te mau amuimuiraa ino i teie nei ao? (Pet. 2, 2:1-3) Eaha ta oe e pahono?

14. E nafea ia haamaitai i ta outou arui haamoriraa utuafare?

¹⁴ I teie nei ua feruri oe i nia i teie mau irava, no te aha e ore ai e hiˈopoa i te tahi atu mau irava Bibilia o te faaite ra i to te Atua manaˈo no nia i te mau tumu parau faufaa no oe aore ra no to utuafare? * E te mau metua, a haamanaˈo e tauaparau i nia i te reira i ta outou arui haamoriraa utuafare. A na reira ˈi, eiaha e haamoe i ta  outou fa: e tauturu i te melo taitahi o te utuafare ia taa e ia haafaufaa roa ˈtu â i to te Atua here rahi ia tatou e itehia ra i roto i ta ˈna mau ture e faaueraa tumu. (Sal. 119:72) Ia na reira outou, e piri roa ˈtu â outou ia Iehova e i te tahi e te tahi.

15. E nafea oe e ite ai e te noaa ra ia oe te hoê aau faaroo e te paari?

¹⁵ E nafea oe e ite ai e te noaa ra ia oe te hoê aau faaroo e te paari? Te tahi ravea, o te faaauraa ïa i to huru feruriraa i to te mau tavini taiva ore i tahito ra, mai te arii Davida o tei papai hoi: “E mea au na ˈu te rave i to oe hinaaro, e tau Atua; te vai nei hoi ta oe ture tei roto i to ˈu nei aau.” (Sal. 40:8) Ua parau atoa te taata papai o te Salamo 119: “Te rahi roa nei to ˈu hinaaro i ta oe ra ture! o to ˈu ïa manaˈoraa i te mau mahana atoa nei.” (Sal. 119:97) Eita tera huru here e rahi mai aita anaˈe e navai te repo. E titauhia ïa te haapii-hohonu-raa i te Bibilia, te pure, te feruri-maite-raa e te iteraa e te haamaitai-rahi-hia ra oe no te mea te pee ra oe i te mau ture aveia a te Atua.—Sal. 34:8.

A ARO NO TO OE TIAMÂRAA KERISETIANO!

16. Eaha te haamanaˈo ia hinaaro tatou e upootia i to tatou aroraa no te tiamâraa mau?

¹⁶ I te roaraa o te tuatapaparaa, ua aro te mau nunaa i roto i te mau tamaˈi riaria mau no to ratou tiamâraa. Hau roa ˈtu â ïa oe, ia aro oe no to oe tiamâraa Kerisetiano e tia ˈi! A haamanaˈo e e ere noa o Satani, te ao e to ˈna huru feruriraa taero to oe mau enemi. O to oe atoa râ huru tia ore e to aau haavare. (Ier. 17:9; Eph. 2:3) E upootia râ oe maoti te tauturu a Iehova. Hau atu â, e piti aˈe faahopearaa maitai to te upootiaraa taitahi. A tahi, e faaoaoa oe i to Iehova aau. (Mas. 27:11) Te piti, a ite ai oe i te puai o ta te Atua “ture tia roa o te tiamâ ra,” e faaoti papu roa ˈtu â oe i te vai noa i nia i te ‘eˈa pirihao’ e aratai i te ora mure ore. I te tau au, e fanaˈo oe i te tiamâraa rahi aˈe e tiai ra i te mau tavini taiva ore a Iehova.—Iak. 1:25; Mat. 7:13, 14.

17. No te aha eiaha ˈi tatou e toaruaru no to tatou mau paruparu, e e nafea Iehova e tauturu mai ai?

¹⁷ E hape iho â tatou paatoa i te tahi taime. (Koh. 7:20) Ia tupu te reira, eiaha e haafaufaa ore ia tatou aore ra e toaruaru roa ino. Ia hiˈa oe, a tia e a haere i mua noa ˈtu e e titauhia ia ani i te tauturu a te mau matahiapo. Ua papai hoi Iakobo: “E ora taua maˈi ra i [ta ratou] pure faaroo, e na te Fatu [ra o Iehova] oia e faatia i nia; e i rave na oia i te hara ra, e faaorehia ta ˈna hara.” (Iak. 5:15) Oia mau, eiaha roa ˈtu e haamoe e e Atua aroha rahi mau o Iehova e ua faatae oia ia oe i roto i te amuiraa no te mea ua ite oia i te tahi mea maitai i roto ia oe. (A taio i te Salamo 103:8, 9.) Ia atuatu noa oe i te aau hoê no Iehova, eita roa ˈtu oia e faarue ia oe.—Par. 1, 28:9.

18. E nafea ia haa ia au i te pure a Iesu i papaihia i roto i te Ioane 17:15?

¹⁸ Eita e moehia teie mau parau ta Iesu i faahiti no ta ˈna na aposetolo 11, a pure ai oia e o ratou i te po hopea hou oia a pohe ai: “Ia tiai mai râ oe ia [r]atou eiaha ei ino.” (Ioa. 17:15) Te haapeapea nei Iesu no ta ˈna mau aposetolo, oia atoa râ no te taatoaraa o ta ˈna mau pǐpǐ. Ua papu ïa ia tatou e e pahono Iehova i ta Iesu pure ma te haapao ia tatou i teie anotau fifi. “O te paruru hoi [Iehova] no te feia haerea tia ra. . . . Te tiai ra hoi oia i te haerea o to ˈna ra feia moˈa,” aore ra taiva ore. (Mas. 2:7, 8) Oia mau, e ere noa i te mea ohie ia vai taiva ore, mea na reira noa râ e noaa ˈi ia tatou te ora mure ore e te tiamâraa mau. (Roma 8:21) Eiaha e vaiiho i te tahi noa ˈˈe taata ia faahema ia oe!

[Nota i raro i te api]

[Uiraa haapiiraa]

[Hohoˈa i te api 18]

E nafea ia ite o vai ma te mau Abasaloma o teie tau e ia paruru ia tatou?