Mai te tahi atu buka noa anei te Bibilia?
Mai te tahi atu buka noa anei te Bibilia?
“Te mau parau moˈa atoa i papaihia ra e mea faaurua mai ïa e te Atua, e e mea maitai . . . ; ia au roa te taata no te Atua i te mau ohipa maitatai atoa ra.”—TIMOTEO 2, 3:16, 17.
E ERE pauroa te taata te farii i teie mau parau no nia i te Bibilia. Eaha te Bibilia no oe?
• E buka maitai?
• E buka moˈa faufaa mai te tahi atu?
• E buka aai e huti ai i te haapiiraa i te pae morare?
• O te Parau a te Atua?
Teie ïa te uiraa: Mea faufaa anei ta oe e tiaturi ra? A hiˈo na i ta te Bibilia e parau ra no ˈna iho: “Te mau parau atoa hoi i papaihia i mutaa ihora, i papaihia ïa ia ite tatou; ia noaa to tatou tiairaa, i te faaoromai e te mahanahana o te parau i papaihia ra.” (Roma 15:4) Te faataa maira te Bibilia e ta ˈna fa, o te haapiiraa e te tamahanahanaraa ïa ia tatou e ia noaa ia tatou te tiaturiraa.
A feruri na mai te peu e e buka maitai noa te Bibilia aore ra e buka moˈa mai te tahi atu. E tiaturi anei oe i tera buka no te haapii ia oe e no te aratai i to utuafare, ia ore iho â râ ta ˈna poroi e tuati i ta oe e manaˈo ra e mea tia? Mai te peu e e aai noa to roto i te Bibilia, e ite anei oe i te tamahanahanaraa e te tiaturiraa i roto i ta ˈna e fafau ra?
I te tahi aˈe pae, e mirioni taata tei haapii i te Bibilia tei papu e e buka otahi te Parau a te Atua. No te aha? Na te aha e faataa ê ra i te Bibilia i te tahi atu buka? E hiˈo anaˈe na i na tuhaa e pae i reira mea taa ê ai te Bibilia i to muri nei mau tumu parau.