O vai Tei faaroo i te pure?

MAI te peu e te vai ra hoê o te faaroo i te pure, mea papu e o te Atua Poiete. O vai atu â te nehenehe e ite i to oe mau manaˈo i Tei hamani i te roro taata? O vai atu â te nehenehe e pahono i te mau pure e e tauturu i te huitaata? E ui paha oe, ‘Mea tano anei ia tiaturi i te hoê Atua Poiete?’

Te manaˈo ra e rave rahi e no te tiaturi i te hoê Atua Poiete, e mea tia ia patoi i te mau itearaa apî o te ihi. Mea hape râ tera manaˈo. A hiˈo na i to muri nei mau parau.

◼ Ua ravehia te hoê maimiraa i nia i na 1 646 orometua haapii i te ihi o na 21 fare haapiiraa tuatoru tuiroo roa ˈˈe i te Hau Amui. E ua itehia e fatata e 550 noa orometua tei maiti i te parau “Aita vau e tiaturi ra i te Atua” no te faataa i to ratou manaˈo.

Mea rahi roa te aivanaa o te tiaturi ra e te vai mau ra te Atua.

Faaiteraa papu o te hoê Atua Poiete

E mea tia anei ia farii noa e te vai ra te hoê o te faaroo i te pure aore aˈe haapapuraa? Aita roa ˈtu! Mea hape te manaˈo e te faaroo, o te tiaturi-noa-raa ïa aore e haapapuraa. Te faataa ra te Bibilia i te faaroo mai “te ite i te mau mea aore e hiˈohia nei.” (Hebera 11:1) Te na ô nei te tahi atu huriraa e te faaroo, “o te faaiteraa papu o te mau mea aore e hiˈo hia nei.” (Te Bibilia Moˈa V.C.J.S., 1976) Ei hiˈoraa, aita oe e ite ra i te mau aru o te afata radio. Maoti râ te mau faaiteraa papu, oia hoi ia faaroo oe i te reo i roto, ua ite oe e te vai mau ra tera mau aru radio. Oia atoa, noa ˈtu e aita tatou e nehenehe e ite i Tei faaroo i te pure, e tia ia tatou ia hiˈopoa i te faaiteraa papu no te tiaturi e te vai mau ra o ˈna.

Ihea e itehia ˈi te mau haapapuraa e te vai  mau ra te Atua? E hiˈo anaˈe na e ati aˈe ia tatou. Te haaferuri maira te Bibilia: “E faatia hoi to te mau fare atoa nei, o te faatia râ i te mau mea atoa ra, o te Atua ïa.” (Hebera 3:4) Te farii ra anei oe i te tanoraa o teie mau parau? A hiˈopoa na i te nahonaho o te ao nui e i te tumu o te ora. Oia atoa i te faahiahiaraa o te mea fifi roa ˈˈe ia faataa i te fenua: te roro o te taata. Eita anei oe e manaˈo e te vai ra te tahi mea teitei aˈe ia tatou?

Eita râ te natura e nehenehe e haapii pauroa mai no nia i te Atua. E au te hiˈopoaraa i te mau haapapuraa i roto i te poieteraa e te vai mau ra te Atua i te faarooraa i te maniania avae i muri mai i te opani tei tapirihia. Ua ite tatou e e taata to muri mai i te opani, aita râ tatou i ite o vai ra. No te ite, e titauhia ïa ia iriti i te opani. E titauhia ia na reira atoa no te ite o vai tei poiete i te mau mea atoa.

E uputa te Bibilia e ite ai tatou o vai te Atua. Ia iriti oe i tera opani e ia hiˈopoa oe i te mau parau tohu faataa-maitai-hia e vai ra i roto e i to ratou mau tupuraa, e ite oe i te mau faaiteraa papu e te vai ra te Atua. a Hau atu â râ, te faaite ra te faatiaraa o ta te Atua mau haaraa e te taata i te huru mau o Tei faaroo i te pure.

Eaha te huru o Tei faaroo i te pure?

Te faaite ra te Bibilia e e nehenehe oe e matau i Tei faaroo i te pure. Oia mau, e nehenehe o ˈna e faaroo e e taa i ta oe e parau ra. Mea mahanahana ïa ia taio: “E tei  faaroo i te pure ra, e tae atoa mai te taata atoa ia oe ra.” (Salamo 65:2) Te faaroo ra oia i te feia e pure ra ia ˈna ma te aau faaroo. E e iˈoa to ˈna, te parau ra te Bibilia: “Tei te atea ê Iehova i te feia paieti ore; e faaroo mai râ oia i te pure a te feia parau-tia.”—Maseli 15:29.

E huru aau to Iehova. O ˈna “te Atua no ˈna te aroha” e ua piihia oia “te Atua no ˈna te ao,” aore ra oaoa. (Korinetia 2, 13:11; Timoteo 1, 1:11) No nia i to ˈna huru a rahi roa mai ai te ino, te na ô nei te Bibilia: “Ooo roa aˈera tana aau.” (Genese 6:5, 6) Mea hape te parau e te haamauiui ra te Atua i te taata no te tamata ia ratou. Te na ô nei te Bibilia: “Eiaha roa te parau ino ra e hurihia ˈtu i te Atua.” (Ioba 34:10) Teie râ, e ui paha oe, ‘Mai te peu e e Atua Poiete puai hope te Atua, no te aha oia e faatia noa ˈi i te mauiui?’

Ua ho mai Iehova i te taata te tiamâraa e maiti. Tapao ïa e te faatura ra te Atua i te taata. Aita anei tatou e poihere ra i to tatou tiamâraa e maiti i to tatou huru oraraa? Te mea peapea râ, mea rahi te taata te ore e faaohipa maitai ra i to ratou tiamâraa e te haamauiui ra ia ratou iho e ia vetahi atu. Teie atura ïa te uiraa mea faufaa ia feruri maite: E nafea te Atua e nehenehe ai e faaore i te mauiui ma te ore e faaere ia tatou i to tatou tiamâraa? E hiˈopoa mai tatou i teie uiraa i to muri nei tumu parau.

[Nota i raro i te api]

[Tumu parau tarenihia i te api 5]

No te haapaoraa anei oe e feaa ˈi?

Te mea peapea, o te haapaoraa te tumu e feaa ˈi te taata e rave rahi e te vai ra te hoê Atua aumauiui o te faaroo ra i te pure. Ua faaô te haapaoraa ia ˈna i roto i te tamaˈi e te ohipa totoaraa e ua farii atoa e ia rave-ino-hia te tamarii. No reira te feia paieti e parau ai, “Aita vau e tiaturi ra i te Atua.”

No te aha e pinepine e mea ino te hiˈoraa o te haapaoraa? Ua rave te taata ino i te ohipa ino i te iˈoa o te haapaoraa. Ua tohu te Bibilia e na te tahi atu mau puai e faatere i te Kerisetianoraa e e faaohipa i te reira no te mau opuaraa ino mau. Ua parau te aposetolo Paulo i te mau tiaau Kerisetiano: “E tia mai hoi te taata i roto ia outou iho, e parau mai i te parau piˈo, ia peehia ratou e te pǐpǐ.”—Ohipa 20:29, 30.

Mea faufau roa na te Atua te haapaoraa hape. Ia au i ta ˈna Parau, te Bibilia, tei nia ia ratou “te toto o . . . te feia atoa i taparahihia i teie nei ao.” (Apokalupo 18:24) I te mea e aita te haapaoraa hape i haapii i te taata no nia i te Atua mau, e Atua here hoi, e faautua Oia i tera mau haapaoraa.—Ioane 1, 4:8.

Te taa ra i Tei faaroo i te pure te mauiui o te feia tei haavîhia e te haapaoraa. No to ˈna here i te taata, ua fatata te Atua i te faaohipa ia Iesu no te haava i te mau taata faaroo haavarevare atoa. Ua parau Iesu: “E rave rahi te parau mai ia ˈu ia tae i taua mahana ra, E te Fatu, e te Fatu, e ere anei ua haapii matou ma to oe iˈoa? . . . O ta ˈu ïa e parau atu, Aita roâ vau i ite ia outou. E haere ê atu outou, e te feia rave parau ino.”—Mataio 7:22, 23.