Semeio o te fatata i te tupu
Semeio o te fatata i te tupu
A FERURI na e ua faanaho te hoê taote i te tâpû ia oe. Eaha to oe huru ia faaroo oe e aita o ˈna i rave aˈenei i teie huru tâpûraa fifi roa? Mea papu e e haapeapea oe. Eaha râ to oe huru ia faaroo oe e o ˈna te taote tâpû aravihi roa ˈˈe i roto i ta ˈna tuhaa e e hanere tâpûraa mai tera e ravehia i nia ia oe tei manuïa? Eita anei oe e tiaturi rahi aˈe e e nehenehe o ˈna e tauturu ia oe?
E titau-atoa-hia ia fanaˈo teie ao maˈimaˈi ta tatou e ora nei i te tahi “tâpûraa” rahi. Na roto i ta ˈna Parau, te Bibilia, ua fafau te Atua ra o Iehova e haamau faahou i te paradaiso i te fenua nei. (Petero 2, 3:13) Ia tupu râ te reira, e titauhia na mua ia faaore roa i te ino. (Salamo 37:9-11; Maseli 2:21, 22) E faaore-roa-hia te mau tupuraa peapea atoa e itehia nei hou a haamau-faahou-hia ˈi te paradaiso. I reira ïa e tupu ai te hoê semeio rahi mau!—Apokalupo 21:4, 5.
Te tiaturi nei te mau Ite no Iehova e fatata teie mau tauiraa rahi i te tupu. No te aha? Te haapapu ra hoi te mau semeio ta te Atua ra o Iehova i faatupu ê na e e mana to ˈna no te rave i ta ˈna i fafau. A faaau noa na e ono semeio Bibilia i te mau parau i fafauhia no a muri aˈe.
Ia tamau â oe i te haapii i ta te Bibilia e fafau ra no to tatou a muri aˈe. A rahi ai to faaroo, e papu roa ˈtu â to tiaturiraa—te tiaturiraa e ora i te hoê tau e fanaˈo roa ˈi oe i te mau semeio ta Iehova e faatupu.
[Tumu parau tarenihia i te api 7]
SEMEIO:
UA FAATAMAA IESU E TAUSANI TAATA E MAA PANE E E MAA IˈA.—MATAIO 14:13-21; MAREKO 8:1-9; IOANE 6:1-14.
PARAU FAFAU:
“Ei reira e hotu rahi mai ai te fenua, e na te Atua, na to tatou iho Atua, e haamaitai mai ia tatou nei.”—SALAMO 67:6.
TE AURAA NO TATOU:
EITA TE TAATA E POHE FAAHOU I TE POIA.
SEMEIO:
UA FAAARAARA IESU I TE MATA O TE FEIA MATAPO.—MATAIO 9:27-31; MAREKO 8:22-26.
PARAU FAFAU:
“Ei reira e faaaraarahia ˈi te mata o te matapo.”—ISAIA 35:5.
TE AURAA NO TATOU:
E ITE TE FEIA MATAPO ATOA.
SEMEIO:
UA FAAORA IESU I TE MAU HUMA MERO.—MATAIO 11:5, 6; IOANE 5:3-9.
PARAU FAFAU:
“Ei reira te pirioi e ouˈauˈa noa ˈi mai te aili.”—ISAIA 35:6.
TE AURAA NO TATOU:
E FAAORAHIA TE MAU PARUPARU ATOA I TE PAE TINO.
SEMEIO:
UA FAAORA IESU I TE MAˈI HURU RAU.—MAREKO 1:32-34; LUKA 4:40.
PARAU FAFAU:
“E ore hoi to reira e parau e, Ua paruparu vau i te maˈi.”—ISAIA 33:24.
TE AURAA NO TATOU:
E FAAOREHIA TE MAU MAˈI ATOA O TE HAAPARUPARU IA FANAˈO TATOU I TE EA MAITAI.
SEMEIO:
UA HAAVÎ IESU I TE MAU PUAI O TE NATURA.—MATAIO 8:23-27; LUKA 8:22-25.
PARAU FAFAU:
“E patu ratou i te fare, e na ratou iho e parahi; e na ratou e tanu i te ô vine, a amu ai i te maa i reira. E ore hoi ratou e ohipa faufaa ore noa.”—ISAIA 65:21, 23.
“E ore oe e mǎtaˈu i te reira; ei te atea ê hoi te mǎtaˈu; e ore ïa e faafatata mai ia oe ra.”—ISAIA 54:14.
TE AURAA NO TATOU:
AITA E ATI NATURA FAAHOU.
SEMEIO:
UA FAATIA FAAHOU MAI IESU I TEI POHE.—MATAIO 9:18-26; LUKA 7:11-17.
PARAU FAFAU:
‘E haere mai te feia atoa i roto i te apoo ra i rapae.’—IOANE 5:28, 29.
“Ua tuu maira te miti i te feia i pohe i roto ia ˈna ra, e ua tuu maira te apoo e hade i te feia i pohe i roto ia raua ra.”—APOKALUPO 20:13.
TE AURAA NO TATOU:
E FAATIA-FAAHOU-HIA MAI TE FEIA TA TATOU I HERE TEI POHE.
