1, 2. Eaha te haamaitairaa ia haapao i to te Atua hinaaro? Eaha ta te hiˈoraa o Davida e haapii mai i roto i tera tuhaa?

 A FERURI na e tei te hoê fenua ê oe. Te tere noa ra oe a tapae ai i te hoê amaa purumu. Teihea purumu ta oe e rave? E ani paha ïa oe i te tauturu a te hoê taata o te matau maitai i tera fenua. Ia na reira atoa tatou a rave ai i te mau faaotiraa faufaa. E ani anaˈe i te aratairaa a Iehova o tei ite i te mau mea atoa. E na nia ïa tatou i te eˈa ta ˈna e farii ra.—Isa. 30:21.

² I te rahiraa o te taime, e hiˈoraa faahiahia roa Davida arii o Iseraela i tahito. Ua haapao noa oia i te hinaaro o te Atua. E hiˈopoa anaˈe i te tahi mau tupuraa o te oraraa o Davida o te haapii rahi mai no nia i te haerea o te hoê taata e aau hoê to ˈna no te Atua ra o Iehova.—Arii 1, 11:4.

3, 4. (a) Eaha tei turai ia Davida ia aro atu ia Golia? (b) Eaha to Davida manaˈo i te iˈoa o te Atua?

³ A hiˈo na i tei tupu a aro ai Davida i te aito rahi Philiseti ra ia Golia. Na te aha i turai ia Davida apî ia aro i te hoê faehau fatata e 2,90 metera i te roa? (Sam. 1, 17:4) Na to ˈna itoito e faaroo anei i te Atua? Ua tauturu mau na huru maitatai e piti ia ˈna ia haa ma te itoito. Teie râ, na te faatura ia Iehova e te haafaufaaraa i to ˈNa iˈoa rahi i turai ia ˈna ia aro atu i teie tiapai taata. Ma te riri, ua ui atu Davida: “O vai hoi teie nei Philiseti peritome-ore-hia ra i aa mai ai oia i te nuu a te Atua ora nei?”—Sam. 1, 17:26.

⁴ Ua parau Davida ia Golia: “Te haere maira oe ia ˈu nei, ma te ˈoˈe, e te mahae, e te paruru; te haere atu nei râ vau ia oe, ma te iˈoa o te Atua sabaota ra o Iehova,  te Atua no te nuu a Iseraela ra, tei vahavahahia e oe ra.” (Sam. 1, 17:45) Ma te turui i nia i te Atua mau, ua haapohe Davida i te aito Philiseti ma te taora i te hoê noa ofai. Ua tiaturi Davida ia Iehova e ua haafaufaa i te iˈoa o te Atua eiaha noa i tera taime, i to ˈna râ oraraa taatoa. Oia mau, ua faaitoito Davida i to ˈna mau hoa Iseraela ia oaoa i te iˈoa moˈa o Iehova.—A taio i te Paraleipomeno 1, 16:8-10.

5. Eaha te tupuraa ta oe e nehenehe e faaruru o tei au i ta Golia mau vahavaharaa?

⁵ Te oaoa ra anei oe i te haamori i te Atua ra o Iehova? (Ier. 9:24) Eaha to oe huru ia faaino te mau hoa ohipa, hoa haapiiraa, aore ra fetii ia Iehova e ia faaooo ratou i te mau Ite no Iehova? E turu anei oe i te iˈoa o Iehova ma te tiaturi e e tauturu mai oia? Parau mau, “e taime to te mamû noa.” Eiaha roa ˈtu râ tatou e haama ia riro ei Ite no Iehova e ei pǐpǐ a Iesu. (Koh. 3:1, 7; Mar. 8:38) E paraparau anaˈe ma te faatano i te parau e ma te peu maitai i te taata o te ore e farii i te parau mau. Eiaha tatou e riro mai te mau Iseraela ‘o tei taiâ e o tei mǎtaˈu rahi roa’ a faaroo ai i te mau vahavaharaa a Golia. (Sam. 1, 17:11) E haa anaˈe râ ma te faaoti papu e faaraa i to Iehova iˈoa. Te hinaaro nei tatou e tauturu i te taata ia ite o vai mau ra te Atua ra o Iehova. E faaohipa anaˈe ïa i te Bibilia no te tauturu ia vetahi atu ia ite i te faufaaraa ia haafatata ˈtu i te Atua.—Iak. 4:8.

6. Eaha ta Davida i hinaaro e rave ma te aro atu ia Golia, e eaha ta tatou tapitapiraa matamua?

⁶ Te vai ra te tahi atu haapiiraa faufaa roa e huti mai a aro ai Davida ia Golia. A horo ai i nia i te tahua aroraa, ua ui atu Davida: “Eahahia te taata e pohe ia ˈna teie nei Philiseti, ore aˈera te faaino ia Iseraela nei?” Ua parau faahou atura te nunaa: “E te taata e pohe ai [Golia], e taoˈa rahi ta ˈna i te arii nei, e horoa hoi oia i ta ˈna tamahine na ˈna.” (Sam. 1, 17:25-27) E ere râ te fanaˈoraa i te mau taoˈa materia te tapitapiraa matamua a Davida. E fa maitai aˈe ta ˈna. Ua hinaaro Davida e faahanahana i te Atua mau. (A taio i te Samuela 1, 17:46, 47.) E o tatou? Eaha ta tatou tapitapiraa matamua? O te riroraa ei taata moni aore ra ei taata mana anei i roto i teie nei ao? Te hinaaro mau nei tatou e riro mai ia Davida, o tei himene: “E haamaitai tatou ia Iehova; tatou atoa te faateitei i to ˈna iˈoa.” (Sal. 34:3) E tiaturi anaˈe ïa i te Atua ma te tuu i to ˈna iˈoa na mua ˈˈe i to tatou.—Mat. 6:9.

7. E nafea ia haapuai i to tatou faaroo a farerei ai i te taata o te ore e farii i te parau mau?

⁷ E titauhia te faaroo puai e te tiaturi papu ia Iehova ia tia ˈtu Davida i mua ia Golia ma te itoito. Ua haapuai atoa o ˈna i to ˈna faaroo ma te tiaturi i te Atua a ohipa ˈi oia ei tiai mamoe. (Sam. 1, 17:34-37) E mea tia ia puai atoa to tatou faaroo no te tamau â i roto i te taviniraa, ia farerei iho â râ tatou i te taata o te ore e farii mai. E nehenehe tatou e haapapu i tera faaroo ma te tiaturi i te Atua i roto i ta tatou mau ohipa o te mau mahana atoa. Ei hiˈoraa, ia na nia ˈtu tatou i te pereoo mataeinaa, e nehenehe tatou e paraparau no nia i te parau mau Bibilia i te taata o te parahi i pihaiiho ia tatou. E no te aha e ore ai e paraparau i te taata ta tatou e farerei i nia i te purumu a poro ai tatou na te mau fare?—Ohi. 20:20, 21.

8, 9. I to ˈna haaraa e o Saula, mea nafea Davida i te faaiteraa e ua manaˈo noa o ˈna i to Iehova hinaaro?

⁸ Teie te tahi atu hiˈoraa e ua tiaturi Davida ia Iehova: to ˈna haaraa e o Saula, te arii matamua o Iseraela. No to ˈna pohehae, e  toru taime to Saula tamataraa i te maoˈa i te ihe i nia ia Davida ia piri atu oia i nia i te pae fare. Ua ape râ Davida i te ihe i te taime taitahi e aita oia i hinaaro e tahoo atu. Horo ê atura oia ia Saula. (Sam. 1, 18:7-11; 19:10) Maiti aˈera Saula e 3 000 taata no roto ia Iseraela atoa e imi haere atura ratou ia Davida na te medebara. (Sam. 1, 24:2) I te hoê taime, aita Saula i ite e ua tomo oia i roto i te hoê ana to reira Davida e to ˈna mau taata. Ua nehenehe Davida e haapohe i te arii hou oia a na reira ˈi i nia ia ˈna. Te hinaaro ra hoi te Atua ia mono Davida ia Saula ei arii o Iseraela. (Sam. 1, 16:1, 13) Ahani ua faaroo Davida i te mau parau a to ˈna mau taata, e haapohehia te arii. Ua parau râ Davida: “A faaore mai hoi Iehova eiaha vau ia na reira i tau fatu, i ta Iehova ra taata i faatahinuhia ra; eiaha tau rima ia rave noa ˈtu ia ˈna, o tei faatahinuhia hoi oia e Iehova.” (A taio i te Samuela 1, 24:4-7.) O Saula noâ te arii ta te Atua i maiti. Aita Davida i hinaaro e haru i te tiaraa arii o Saula i te mea e aita Iehova i tatara ˈtura i to ˈna tiaraa. Ma te tâpû noa i te hiti ahu o Saula, ua faaite Davida e aita o ˈna e hinaaro ra e haamauiui ia Saula.—Sam. 1, 24:11.

⁹ Ua faaite faahou Davida i to ˈna faatura i te taata ta te Atua i maiti a ite ai oia i te arii no te taime hopea. I tera taime, ua tae Davida raua Abisai i te puhapa a Saula e ua ite atura ia ˈna te taoto noa ra. Noa ˈtu e ua faaoti Abisai e ua tuu te Atua i tera enemi i roto i te rima o Davida e ua hinaaro e patia ia Saula i te mahae, aita Davida i faatia. (Sam. 1, 26:8-11) No te mea ua imi noa Davida i te aratairaa a te Atua, ua tapea o ˈna i ta ˈna i faaoti ma te haa ia au i te hinaaro o Iehova noa ˈtu te mau onoonoraa a Abisai.

10. Eaha te tupuraa fifi ta tatou e nehenehe e faaruru, e eaha te tauturu mai ia mau papu?

¹⁰ E faaruru atoa paha tatou i te tahi tupuraa fifi i reira to tatou mau hoa e tamata ˈi i te faahepo ia tatou ia pee i te manaˈo taata eiaha râ i te faaitoito ia tatou ia rave i to Iehova hinaaro. Mai ia Abisai, e faaitoito mai paha vetahi ia rave i te tahi mea ma te ore e haapao i to te Atua manaˈo. No te mau papu, e titauhia ia haamanaˈo maitai tatou i te manaˈo o Iehova i nia i tera ohipa e ia faaoti papu e rave i to ˈna hinaaro.

11. Eaha ta oe i huti mai i te hiˈoraa o Davida no nia i te haamanaˈo-noa-raa i to te Atua hinaaro?

¹¹ Ua pure Davida i te Atua ra o Iehova: “E haapii mai oe ia ˈu ia rave au i to oe ra hinaaro.” (A taio i te Salamo 143:5, 8, 10.)  Aita Davida i tiaturi i to ˈna mau manaˈo aore ra i hema i te mau onoonoraa a te tahi atu taata. Ua hinaaro mau râ o ˈna ia haapii mai te Atua ia ˈna. I ‘imi na oia i te mau ravea hanahana a Iehova e i feruri noa na oia i te mau ohipa a to te Atua rima.’ E nehenehe tatou e haroaroa i te hinaaro o te Atua ma te hiˈopoa maite i te mau Papai a feruriruri atu ai i te faatiaraa Bibilia e rave rahi o te mau haaraa a Iehova e te taata.

12, 13. No te aha Davida i manii ai i te pape ta to ˈna na taata e toru i faahoˈi mai?

¹² Ua taa ia Davida te mau faaueraa tumu o te Ture e ua hinaaro mau oia e ora ia au i te reira. Mea maitai ia pee i to ˈna hiˈoraa. A hiˈo na i tei tupu i to Davida faaiteraa e te hiaai nei oia i te inu “maa pape i te apoo pape i Bete-lehema.” Na roto noa ˈtura na taata tootoru a Davida i te nuu Philiseti, tei taua oire ra hoi ratou, e faahoˈi mai nei i te pape. Aita “Davida i inu, ua rave aˈera râ, ua ninii ihora ei tusia niu na Iehova.” No te aha? Ua faataa Davida: “Eiaha roa vau, e tau Atua, ia na reira, e inu anei hoi au i te toto o teie nei mau taata, o tei faaû noa i to ratou pohe? Ua faaaau noa hoi ratou i to ratou pohe i te hopoiraa mai.”—Par. 1, 11:15-19.

¹³ Ua ite Davida i roto i te Ture e e mea tia ia ninii i te toto na Iehova e eiaha roa ˈtu ia amu i te reira. Ua taa atoa ia ˈna no te aha e na reira ˈi. Ua ite Davida e “tei te toto hoi te maa ora e ora ˈi te mau mea atoa.” Teie râ, e pape hoi te reira, e ere i te toto. No te aha Davida i ore ai i inu? Ua taa ia ˈna te faaueraa tumu o te ture no nia i te toto. No Davida, hoê â faufaaraa to teie pape e te toto o na taata e toru. No reira aita roa ˈtu o ˈna i inu i te pape. Ua faaoti râ o ˈna e faatahe i te reira i raro i te repo.—Lev. 17:11; Deut. 12:23, 24.

14. Na te aha i tauturu ia Davida ia manaˈo mai ia Iehova?

¹⁴ Mea faufaa roa te ture a te Atua no Davida. Ua himene oia: “Mea au na ˈu te rave i to oe hinaaro, e tau Atua; te vai nei hoi ta oe ture tei roto i to ˈu nei aau.” (Sal.  40:8) Ua haapii Davida i te ture a te Atua e ua feruriruri maite i te reira. Ua tiaturi oia i te paari o te mau faaueraa a Iehova. No reira Davida i hinaaro uˈana ˈi e pee eiaha noa i te mau faatureraa o te Ture a Mose, oia atoa râ i te mau parau mau faufaa roa e huti mai i teie mau ture. A haapii ai i te Bibilia, e haerea paari ia feruriruri i ta tatou e taio ra e ia tapea i te reira i roto i to tatou aau. E ite ïa tatou eaha ta Iehova e au i roto i te tahi tupuraa taa maitai.

15. Mea nafea Solomona i te ofatiraa i te Ture a te Atua?

¹⁵ Ua haamaitai rahi te Atua ra o Iehova ia Solomona, te tamaiti a Davida. I muri aˈe râ, ofati ihora Solomona i te Ture a te Atua. Aita o ˈna i pee i te faaueraa a Iehova i te arii Iseraela ‘eiaha e faarahi i te vahine na ˈna.’ (Deut. 17:17) Ua faaipoipo Solomona i te vahine ěê e rave rahi. I to ˈna paariraa, “faafariu-ê-hia ihora tana aau e te mau vahine na ˈna, a pee atu ai i te mau atua ěê.” Noa ˈtu eaha ta ˈna i manaˈo, “ua rave aˈera Solomona i te ino i te aro o Iehova, aore aˈera i pee hua ia Iehova, mai to ˈna metua mai ia Davida i pee ra.” (Arii 1, 11:1-6) Ia ora iho â tatou ia au i te mau ture e faaueraa tumu o te Parau a te Atua! Ei hiˈoraa, mea faufaa roa te reira ia hinaaro tatou e faaipoipo.

16. E nafea te iteraa i te tumu i faaue ai te Atua ia faaipoipo ‘ia au i te Fatu’ e tauturu ai i te feia e hinaaro ra e faaipoipo?

¹⁶ Eaha to tatou huru ia faahinaaro mai te hoê taata e ere i te Ite no Iehova? Mai to Davida anei to tatou huru feruriraa aore ra mai to Solomona? Ua parauhia i te feia e haamori mau ra i te Atua ia faaipoipo ‘ia au i te Fatu.’ (Kor. 1, 7:39) Ia maiti te hoê Kerisetiano i te faaipoipo, ia faaipoipo noa o ˈna i te hoê tavini pûpûhia e bapetizohia a Iehova e tia ˈi. E ia taa ia tatou te tumu o tera faaueraa Bibilia, eita tatou e faaipoipo i te hoê taata e ere i te Ite e eita atoa râ e farii e e atuatu i te mau faahinaaroraa o taua taata ra.

17. Eaha te tauturu ia tatou ia ore e hiˈo i te hohoˈa faufau?

¹⁷ E tauturu atoa mai te hiˈoraa o Davida no nia i te imi-maite-raa i te aratairaa a te Atua ia patoi i te faahemaraa e hiˈo i te hohoˈa faufau. A taio i te mau irava i muri nei, a feruri i te mau faaueraa tumu e vai ra i roto e a tutava i te ite i to Iehova manaˈo i nia i tera tuhaa. (A taio i te Salamo 119:37; Mataio 5:28, 29; Kolosa 3:5.) E tauturu mai te feruriruriraa i ta ˈna mau ture aveia teitei ia ore e hiˈo i te hohoˈa faufau.

18, 19. (a) Eaha tei tauturu ia Davida, noa ˈtu to ˈna huru tia ore, ia fanaˈo noa i te farii maitai a te Atua? (b) Ia aha tatou?

¹⁸ Noa ˈtu e e hiˈoraa maitai o Davida i roto i te tuhaa e rave rahi, ua hara ino mau o ˈna tau taime. (Sam. 2, 11:2-4, 14, 15, 22-27; Par. 1, 21:1, 7) I te roaraa râ o to ˈna oraraa, ua tatarahapa Davida a hara ˈi oia. I mua i te Atua, ua haere o ˈna “ma te haapao maitai o te aau.” (Arii 1, 9:4) No te aha tatou e parau ai i te reira? No te mea ua tutava Davida i te haa ia au i te hinaaro o Iehova.

¹⁹ Noa ˈtu to tatou huru tia ore, e nehenehe tatou e fanaˈo noa i te farii maitai a Iehova. Ma te haamanaˈo i te reira, e haapii maite anaˈe i te Parau a te Atua, e feruriruri maite anaˈe i ta te reira e haapii maira e e haa anaˈe ia au i ta tatou i tuu i roto i to tatou aau. E pure anaˈe ïa ia Iehova mai te fatu salamo o tei ani ma te haehaa: “E haapii mai oe ia ˈu ia rave au i to oe ra hinaaro.”