E hinaaro anei oe e ite i te parau mau no nia i te Atua? O vai o ˈna? Eaha ta ˈna e au? Eaha ta ˈna e riri? Eaha to ˈna hinaaro? I roto i ta ˈna Parau, te Bibilia, e faaite mai ai te Atua i te parau mau no nia ia ˈna. Eita hoê aˈe taata e nehenehe e taa maite i te Bibilia ma te taio noa i te reira. No te aha? No te mea e fanaˈoraa taa ê ia taa i taua parau mau pae varua ra; e ere pauroa te taata te fanaˈo i te reira. E hiˈopoa anaˈe ïa i ta Iesu i parau.—A taio i te Mataio 11:25.

Teie te omuaraa o te irava: “Ua na ô atura Iesu i reira ra.” No te ohipa paha i tupu aˈenei i parau ai Iesu mai tera. No aˈo noa ˈtura oia i na oire faaroo atâ e toru o Galilea, i reira hoi to ˈna faatupuraa i te mau semeio. (Mataio 11:20-24) E manaˈo paha oe, ‘No te aha teie feia tei ite i ta Iesu mau semeio i tâuˈa ore ai i te pue parau mau ta ˈna i haapii?’ No to ratou ïa aau etaeta.—Mataio 13:10-15.

Ua ite Iesu e no te taa i te parau mau o te Bibilia, e titauhia te tauturu a te Atua e te huru aau e tano. Ua faataa Iesu: “E haamaitai au ia oe, e tau Metua, e te Fatu o te raˈi e te fenua, i te mea, i huna ê noa oe i teie nei mau parau i te feia paari e te ite ra, e ua faaite mai i te tamarii nei.” Te ite ra anei oe e no te aha e fanaˈoraa taa ê roa ˈi ia taa i te parau mau Bibilia? E nehenehe Iehova e huna aore ra e faaite i te parau mau ia au i to ˈna hinaaro, o oia hoi te “Fatu o te raˈi e te fenua.” E ere oia i te mea paetahi no nia i teie tuhaa. No te aha oia e faaite ai i te parau mau Bibilia i te tahi, area i te tahi atu, eita ïa?

Tei te feia haehaa ta Iehova farii maitai eiaha râ i te teoteo. (Iakobo 4:6) Te huna nei oia i te parau mau i te feia tei paari e tei ite ia au i teie nei ao e i te mau aivanaa teoteo e tiaturi nei i to ratou iho puai eiaha râ i ta te Atua tauturu. (Korinetia 1, 1:19-21) Te faaite nei Oia i te parau mau i te “tamarii,” te feia aau haavare ore, haehaa mai te tamarii ra. (Mataio 18:1-4; Korinetia 1, 1:26-28) Ua taa maitai Iesu, te Tamaiti a te Atua, i teie mau huru o te taata. Aita e rave rahi faatere haapaoraa teoteo i taa i te auraa o ta Iesu poroi. Ua nehenehe râ te feia ravaai haehaa. (Mataio 4:18-22; 23:1-5; Ohipa 4:13) Ua faaite atoa vetahi feia ite e ona i te haehaa mau e ua riro maira ei pǐpǐ na Iesu.—Luka 19:1, 2, 8; Ohipa 22:1-3.

E hoˈi mai na tatou i te uiraa: E hinaaro anei oe e ite i te parau mau no nia i te Atua? Mai te peu e e, e tamahanahanahia paha oe i te iteraa e eita te Atua e farii i te feia tei paari ia au i teie nei ao. Te farii nei râ oia i tei faahaehaa ia ratou. Ia haapii oe i te Parau a te Atua ma te huru feruriraa e aau tano, e apiti atu paha ïa oe i te feia ta Iehova e haamaitai e ite i te parau mau no nia ia ˈna. A noaa ˈi taua ite ra, e oaoa oe e e aratai te reira ia oe i “te ora mure ore,” i roto i te ao apî parau-tia ta te Atua i fafau e fatata maira. *—Timoteo 1, 6:12, 19; Petero 2, 3:13.