O te taairaa piri roa ïa e vetahi ê. Ma ta ˈna mau parau e haaraa e faaite ai te taata i to ˈna here mau. Ia titauhia, e haapae o ˈna ia ˈna iho.

Ua here mau Mose i te Atua. Mea nafea oia i te faaiteraa? A haamanaˈo na i tei parauhia i roto i te Ioane 1, 5:3: “Teie hoi te hinaaro i te Atua, o te haapao i ta ˈna ra parau.” Ua ora noa Mose ia au i tera faaueraa. I te mau mea atoa ta te Atua i ani ia ˈna ia rave, mai te hopoia rahi e farerei i te arii puai ra o Aiphiti e tae roa ˈtu i te ohipa iti haihai e faatoro i to ˈna rima i nia i te miti Uteute, ua auraro Mose. Mea fifi aore ra mea ohie anei, “te mau mea atoa ta Iehova i parau mai ia ˈna ra, o ta [Mose] ïa i rave.”—Exodo 40:16.

Ua faaite atoa Mose i te here i nia i to ˈna mau hoa Iseraela. Ua ite iho â teie nunaa e te faaohipa ra Iehova ia ˈna no te aratai atu. No reira, ia fifi ratou, o ˈna te farereihia ˈtu. Te taiohia nei: “Ua tia noa ihora te mau taata i mua ia Mose mai te poipoi mai e ahiahi noa ˈtura.” (Exodo 18:13-16) A feruri na i to ˈna rohirohi i muri aˈe i to ˈna faarooraa i te mahana taatoa ia faaite mai to Iseraela i to ratou mau fifi! Noa ˈtu râ, ua oaoa noa Mose i te tauturu i te nunaa ta ˈna i here.

I pure atoa na oia no tei herehia e ana e no tei faaino ia ˈna. Ei hiˈoraa, a amuamu ai o ˈna ia Mose, ua faautua Iehova ia Miriama, te tuahine o Mose, leperahia ˈtura oia. Ua peapea Mose i tei tupu, na ô atura ia Iehova: “E faaora oe ia ˈna i teie nei, e te Atua e, o to ˈu ïa hinaaro ia oe.” (Numera 12:13) Eaha ˈtu â tei turai ia Mose ia pure ma te haavare ore maori râ te here?

Mai ia Mose, e faatupu anaˈe i te here mau no te Atua. Na te reira e turai ia tatou ia haapao i ta ˈna mau faaueraa “ma te aau atoa.” (Roma 6:17) E oaoa ïa to Iehova aau e e faufaa-atoa-hia tatou. (Maseli 27:11) Ia tavini tatou i te Atua ma te here mau, eita tatou e na reira noa no te mea e mea tia, no te mea râ ua oaoa tatou i te rave i te reira.—Salamo 100:2.

No te pee atoa i te hiˈoraa o Mose, e here anaˈe ia vetahi ê ma te haapae ia tatou iho. Ia faaite mai te mau hoa aore ra fetii i to ratou fifi, e turai mai te here (1) ia faaroo maitai atu, (2) ia tutava i te taa i to ratou mau manaˈo hohonu, e (3) ia faaite atu e te tâuˈahia ra ratou.

Mai ia Mose, e pure anaˈe no te feia herehia e tatou. I te tahi taime, e faaite mai ratou i to ratou fifi, e manaˈo paha tatou e aita ta tatou e ravea a na ô atu ai: “E pure vau no oe, ta ˈu noa ïa e nehenehe e rave.” A haamanaˈo râ: “E mana rahi to te pure a te taata parautiˈa.” (Iakobo 5:16, Te Faufaa Api) Maoti ta tatou mau pure e rave ai paha Iehova i te tahi mea no teie taata. Peneiaˈe tera te ravea ta ˈna i maiti no te tauturu atu. Eaha ˈtu â hoi ta tatou e nehenehe e rave no tei herehia e tatou maori ra o te pureraa no ratou? *

Mea rahi iho â ta Mose e haapii mai! E taata noa oia, e hiˈoraa faahiahia râ no te faaroo, haehaa e here. Rahi atu â tatou i te pee i to ˈna hiˈoraa, rahi atu â tatou e vetahi ê i te faufaahia.—Roma 15:4.