TUMU PARAU MATAMUA: EAHA TE HAAPII MAI I TE HIˈORAA O MOSE?
O vai Mose?
Ia faaroo oe i te iˈoa Mose, eaha ta oe e manaˈo?
-
te aiû i tapunihia i roto i te hoê ete i te anavai i Aiphiti?
-
te tamaiti i paari i Aiphiti e i ravehia e te tamahine a Pharao—o tei ore râ i haamoe e e Iseraela oia?
-
te taata i ora na i Midiana e 40 matahiti ei tiai mamoe?
-
te taata i paraparau e Iehova * i te pu aihere ama ra?
-
te taata i farerei i te arii o Aiphiti e o tei ani atu ma te itoito ia vaiiho ia haere ê te mau Iseraela?
-
te taata arataihia e te Atua no te faaite i na ati ahuru i nia ia Aiphiti a aa ˈi te arii i te Atua mau?
-
te taata i aratai i te mau Iseraela i rapae ia Aiphiti?
-
te taata i faaohipahia no te vahi i te miti Uteute?
-
te taata i horoa i na Ture Ahuru a te Atua ia Iseraela?
TERA iho â te parauhia no Mose e te vai ra ˈtu â. Mea faatura-rahi-hia teie taata taiva ore e te mau Kerisetiano, ati Iuda e Mahometa!
Ei peropheta, i faaite na iho â Mose i te “mǎtaˈu rahi.” (Deuteronomi 34:10-12) I farii atoa na oia ia faaohipa te Atua ia ˈna ma te faahiahia. E taata noa râ Mose. Mai te peropheta Elia, tei itehia i pihai iho ia ˈna i roto i te orama a tavini ai Iesu i te fenua nei, e taata o Mose “mai ia tatou atoa te huru.” (Iakobo 5:17; Mataio 17:1-9) I fifi atoa na o ˈna mai ia tatou, ua faaruru râ oia i te reira.
E hinaaro anei oe e ite ua nafea oia? E hiˈopoa anaˈe e toru huru maitatai ta Mose i faaite e i ta tatou e haapii mai i to ˈna hiˈoraa.
^ I roto i te Bibilia, o Iehova te iˈoa o te Atua.
